جموں، جموں کرائم برانچ کی اقتصادی جرائم شاخ (ای او ڈبلیو) نے ملازمت کے نام پر دھوکہ دہی کرنے والے گروہ میں مبینہ طور پر ملوث 2 افراد کے خلاف جموں کی سب جج عدالت میں چارج شیٹ داخل کی ہے۔

سرکاری بیان کے مطابق، اننت ناگ، کشمیر کے پیرزادہ عبدل اور مینڈھر، پونچھ، جموں کے منیر حسین کے خلاف جموں کرائم برانچ پولیس اسٹیشن میں متعلقہ دفعات کے تحت درج ایک معاملے میں چارج شیٹ داخل کی گئی ہے۔

یہ معاملہ عدالت کی ہدایت پر منیر حسین کی جانب سے پیرزادہ عبد الحمید کے خلاف ملازمت کے نام پر دھوکہ دہی کی شکایت کے بعد درج کیا گیا تھا۔

انسپکٹر مینو شرما کی قیادت میں کی گئی تحقیقات سے انکشاف ہوا کہ شکایت کنندہ کے طور پر سامنے آئے منیر حسین نے مبینہ طور پر پیرزادہ عبد الحمید کے ساتھ مل کر متاثرین کو جھانسہ دینے، ان سے رقم وصول کرنے اور بعد میں ذمہ داری سے بچنے کے لیے جھوٹی شکایت درج کرانے کا کام کیا۔ بیان کے مطابق، دونوں ملزمان نے سرکاری ملازمتیں دلانے کا وعدہ کرکے بے روزگار نوجوانوں سے تقریباً 25 لاکھ روپے کی دھوکہ دہی کی سازش کی۔

بیان میں مزید کہا گیا کہ گواہوں کے بیانات اور دستاویزی شواہد سے ان کی مبینہ شمولیت ثابت ہوئی، جس کے بعد پیرزادہ عبد الحمید اور منیر حسین کے خلاف عدالتی کارروائی کے لیے جموں کی سب جج عدالت میں چارج شیٹ پیش کی گئی۔

جموں کرائم برانچ کی اقتصادی جرائم شاخ کے سینئر سپرنٹنڈنٹ آف پولیس نے عام لوگوں کو اقتصادی دھوکہ دہی سے ہوشیار رہنے اور اس طرح کے کسی بھی واقعے کی اطلاع جموں و کشمیر کرائم برانچ کی اقتصادی جرائم شاخ کو دینے کا مشورہ دیا ہے۔

اقتصادی دھوکہ دہی کے متاثرین اپنی شکایات آن لائن بھی درج کرا سکتے ہیں۔

یو این آئی۔ این یو۔

جموں، جموں و کشمیر بی جے پی کے صدر اور راجیہ سبھا کے رکن ست شرما نے جمعرات کو کانگریس پارٹی کے سیاسی طریقہ کار پر تنقید کرتے ہوئے کہا کہ اپوزیشن جماعت ملک کو درپیش مسائل کا تعمیری حل پیش کرنے کے بجائے عوام کو گمراہ کرنے کی کوشش میں بار بار نئے نعرے اور مہمات شروع کرتی ہے۔

بی جے پی کے جموں بارڈر ضلع کی جانب سے منعقدہ ”جمہوریت بچاؤ، انتشار ختم کرو” کے عنوان سے ایک سیمینار سے خطاب کرتے ہوئے مسٹر شرما نے کہا کہ جمہوری اداروں کی حفاظت اور انتخابی عمل کے تقدس کو برقرار رکھنا تمام شہریوں کی مشترکہ ذمہ داری ہے۔

اس سیمینار میں دانشوروں، ممتاز شہریوں، معاشرے کے مختلف طبقات کے نمائندوں اور پارٹی کارکنوں نے شرکت کی۔ اس دوران جمہوری اداروں کے تحفظ اور عوامی فیصلے کا احترام کرنے کی اہمیت پر تبادلہ خیال کیا گیا۔

اس موقع پر ان کے ساتھ ایم ایل اے راجیو بھگت ، سابق ایم ایل اے اشونی شرما اور جموں بارڈر ضلع کے صدر رنکو چودھری نے اجتماع سے خطاب کیا ۔

ست شرما نے کہاکہ ”کانگریس پارٹی اب بھی اپنے ایک ہی خاندان کے گرد گھوم رہی ہے اور ایک کے بعد ایک سیاسی مہم کے ذریعے سب سے زیادہ مراعات یافتہ شخص کو دوبارہ پیش کرنے کی بار بار کوشش کر رہی ہے۔ کبھی وہ یاترا نکالتی ہے، کبھی کوئی نیا نعرہ دیتی ہے، لیکن عوام میں حقیقی مقبولیت حاصل کرنے سے پہلے ہی اس کی مہمات دم توڑ دیتی ہیں۔”

انہوں نے دانشوروں، پیشہ ور افراد، سماجی نمائندوں اور سیاسی کارکنوں سے اپیل کی کہ وہ غلط معلومات کا مقابلہ کریں اور ہندوستان کے آئینی نظام پر عوام کے اعتماد کو مضبوط بنائیں۔

راجیو بھگت نے کہا کہ جمہوریت میں ووٹر سب سے بالاتر ہوتا ہے اور قابل اعتماد ثبوت کے بغیر انتخابی عمل پر الزامات لگانے سے ووٹروں کی دانش مندی مجروح ہوتی ہے۔

انہوں نے شہریوں سے اپیل کی کہ وہ بیدار رہیں اور نچلی سطح پر جمہوری شعور کو مضبوط بنانے میں سرگرمی سے حصہ لیں۔

یو این آئی۔ این یو۔

سری نگر، حکام نے بتایا کہ 48 سالہ اشفاق محمد بیگ کو انچارج چیف انجینئر، آر اینڈ بی وسطی کشمیر مقرر کیا گیا ہے۔ اس کے ساتھ ہی وہ مرکز کے زیر انتظام علاقے کے سب سے کم عمر چیف انجینئر بن گئے ہیں۔

بدھ کو جاری کیے گئے سرکاری حکم کے مطابق، حکومت نے اعجاز احمد شاہ کو بھی انچارج چیف انجینئر، آر اینڈ بی جنوبی کشمیر مقرر کیا ہے۔ حکم میں کہا گیا ہے کہ دونوں تقرریاں فوری طور پر نافذ العمل ہوں گی۔

حکام نے بتایا کہ شمالی کشمیر کے ضلع بارہمولہ کے سوپور کے رہنے والے مسٹر بیگ ترقی سے قبل آر اینڈ بی سرکل بارہمولہ میں سپرنٹنڈنگ انجینئر کے طور پر خدمات انجام دے رہے تھے۔

اپنے شعبے کے ماہر سول انجینئر بیگ نے نیشنل انسٹی ٹیوٹ آف ٹیکنالوجی (این آئی ٹی) سری نگر سے گولڈ میڈل کے ساتھ گریجویشن کی ہے۔ انہوں نے گریجویٹ اپٹیٹیوڈ ٹیسٹ اِن انجینئرنگ (گیٹ) میں آل انڈیا رینک 16 حاصل کی اور انڈین انسٹی ٹیوٹ آف ٹیکنالوجی (آئی آئی ٹی) روڑکی میں ماسٹرز پروگرام کے دوران بھی گولڈ میڈل حاصل کیا۔ ان کے سروس ریکارڈ سے واقف حکام نے یہ معلومات فراہم کیں۔

ایک افسر نے بتایا کہ جموں و کشمیر پبلک سروس کمیشن کا امتحان کامیاب کرنے کے بعد انہوں نے دسمبر 2007 میں محکمہ آر اینڈ بی میں اسسٹنٹ انجینئر کی حیثیت سے ملازمت شروع کی۔

افسر نے بتایا کہ گزشتہ برسوں کے دوران انہوں نے مختلف عہدوں پر خدمات انجام دیں اور سڑکوں، پلوں اور عمارتوں کے بنیادی ڈھانچے سے متعلق پروجیکٹوں کی منصوبہ بندی، ڈیزائن اور تکمیل کا تجربہ حاصل کیا۔

انہوں نے مزید کہا کہ ان کی ترقی سے وہ محکمہ آر اینڈ بی کے وسطی کشمیر زون کی سربراہی کریں گے، جہاں بنیادی ڈھانچے کی منصوبہ بندی، پروجیکٹوں کی تکمیل اور معیار کو برقرار رکھنے کے لیے ان کا تکنیکی تجربہ انتہائی اہم ثابت ہوگا۔

یو این آئی۔ این یو۔