تہران، ایران کے پاسدارانِ انقلاب نے جمعرات کو سرکاری میڈیا پر نشر کیے گئے ایک بیان میں کہا کہ گزشتہ 24 گھنٹوں کے دوران آبنائے ہرمز کے جنوب میں ایک غیر مجاز بحری راستے سے گزرنے کی کوشش کرتے ہوئے تین تیل بردار جہاز سمندری بارودی سرنگوں سے ٹکرا گئے، جس کے بعد ان میں دھماکے ہوئے اور آگ لگ گئی۔

پاسدارانِ انقلاب کے مطابق، ان جہازوں نے اپنے ریڈار اور نیویگیشن نظام بند کر دیے تھے اور ایرانی بحریہ کی وارننگ کو نظر انداز کیا تھا۔ بیان میں کہا گیا کہ بعد ازاں جہازوں کو آبنائے ہرمز کے جنوبی ساحلوں کے قریب چھوڑ دیا گیا۔

اس سے قبل برطانیہ کی میری ٹائم ایجنسی یو کے ایم ٹی او (UKMTO) نے بتایا تھا کہ اسے ایک دوسرے جہاز کے کپتان سے آبنائے ہرمز میں ایک جہاز میں آگ لگنے کی اطلاع ملی ہے۔ ایجنسی نے آگ لگنے کی وجہ یا کسی جانی نقصان کے بارے میں تفصیلات نہیں دیں۔

یو کے ایم ٹی او کے مطابق، آگ کی لپیٹ میں آئے جہاز کو آبنائے ہرمز کے قریب عمان کے قصبے خصب سے تقریباً نو سمندری میل (17 کلومیٹر) شمال میں دیکھا گیا۔

آبنائے ہرمز عالمی سطح پر تیل اور قدرتی گیس کی ترسیل کے لیے ایک اہم بحری گزرگاہ ہے۔ فروری میں مشرق وسطیٰ کی جنگ شروع ہونے کے بعد سے ایران نے اس آبی راستے پر اپنا کنٹرول بڑھانے کی کوشش کی ہے اور ان جہازوں کو نشانہ بنایا ہے جن پر اس کا الزام ہے کہ وہ اجازت کے بغیر آبنائے سے گزر رہے تھے۔

یو این آئی۔ ع ا۔

یروشلم، اسرائیل کے وزیر اعظم بنیامن نیتن یاہو کے اتحاد کو 120 رکنی پارلیمنٹ (کنیسٹ) میں 53 نشستیں ملنے کا امکان ظاہر کیا گیا ہے، جبکہ یاشر پارٹی کے سربراہ گادی آئزن کوٹ کی قیادت والے اپوزیشن اتحاد کو 48 نشستیں ملنے کی توقع ہے۔ بدھ کو تقریباً 90 فیصد ووٹوں کی گنتی مکمل ہونے کے بعد بھی کسی اتحاد کو حکومت بنانے کے لیے درکار 61 نشستوں کی واضح اکثریت حاصل نہیں ہوئی۔

اس صورت حال میں اسرائیل کو حکومت سازی کے لیے مشکل مذاکرات کا سامنا کرنا پڑ سکتا ہے اور نئے انتخابات کا امکان بھی پیدا ہوگیا ہے۔

عرب قیادت والی دو اہم جماعتوں، جوائنٹ لسٹ اور رعام (Ra’am) کو مجموعی طور پر 19 نشستیں ملنے کا امکان ہے، جو ان کی موجودہ 10 نشستوں کے مقابلے میں تاریخی اضافہ ہوگا۔ اس سے انہیں حکومت سازی میں فیصلہ کن کردار ادا کرنے کا موقع مل سکتا ہے، تاہم اپوزیشن کی کئی جماعتیں ان کے ساتھ مل کر کام کرنے سے انکار کر چکی ہیں۔

یہ نتائج انتخاب سے قبل کے بیشتر رائے عامہ کے جائزوں اور منگل کی رات 10 بجے ووٹنگ ختم ہونے کے بعد جاری کیے گئے ایگزٹ پولز سے مختلف ہیں۔ ان جائزوں میں آئزن کوٹ کے اتحاد کو برتری حاصل دکھائی گئی تھی، جبکہ ایگزٹ پولز نے اپوزیشن کو دو سے تین نشستوں کی سبقت دی تھی۔تاہم، رات بھر اور بدھ کو ووٹوں کی گنتی جاری رہنے کے ساتھ ہی نیتن یاہو کی لیکوڈ پارٹی اور اس کے اتحادی آگے نکل گئے۔

مرکزی انتخابی کمیٹی نے بدھ کی رات 9 بجے کے کچھ دیر بعد جاری تازہ اطلاع میں بتایا کہ 89.8 فیصد ووٹوں کی گنتی مکمل ہوچکی ہے، جس میں تقریباً تمام معمول کے پولنگ مراکز کے ووٹ شامل ہیں۔ نتائج ابھی عارضی ہیں، لیکن حکام کو توقع نہیں ہے کہ اعداد و شمار میں کوئی بڑا فرق آئے گا۔

کمیٹی کے مطابق باقی ماندہ معمول کے ووٹوں کی جانچ کے لیے اضافی نگرانی درکار ہے۔ اس کے علاوہ دو لفافوں میں ڈالے گئے تقریباً 4 لاکھ 30 ہزار سے 4 لاکھ 80 ہزار ووٹوں کی گنتی باقی ہے، جو جمعرات کی رات ایک بجے شروع ہونے اور شام تک مکمل ہونے کی توقع ہے۔

یہ ووٹ زیادہ تر فوجیوں، قیدیوں، بیرون ملک تعینات سفارت کاروں اور ایسے افراد کے ہوتے ہیں جو اپنے مقررہ پولنگ مراکز پر ووٹ نہیں ڈال سکتے۔ حکام کو تصدیق کرنا ہوتی ہے کہ ووٹر نے کسی دوسرے مقام پر پہلے ہی ووٹ نہ ڈالا ہو۔

کمیٹی نے واضح کیا کہ ووٹوں کی آمد اور ان کی جانچ جاری رہنے کے باعث موجودہ تخمینہ عارضی ہے۔ مکمل گنتی جمعرات کی دوپہر تک متوقع ہے، جبکہ حتمی سرکاری نتائج 4 نومبر کو جاری کیے جائیں گے۔

کنیسٹ کی ہر نشست کے لیے تقریباً 40 ہزار ووٹوں کا تخمینہ ہے۔ اس لیے باقی ووٹ نشستوں کی حتمی تقسیم پر اثر انداز ہوسکتے ہیں، تاہم مجموعی سیاسی توازن میں بڑی تبدیلی کا امکان نہیں ہے۔

بدھ کی دوپہر تک لیکوڈ 26 نشستوں کے ساتھ سب سے بڑی جماعت تھی، جبکہ یاشر کو 21 نشستیں ملنے کا امکان ظاہر کیا گیا۔ نفتالی بینیٹ کی جماعت بی یاخاد اور یوسف جبارین کی جوائنٹ لسٹ کو 12، 12 نشستیں ملنے کی توقع ہے، جبکہ بائیں بازو کی جماعت ڈیموکریٹس آٹھ نشستوں پر آگے تھی۔

اوتزما یہودیت، شاس، یونائیٹڈ توراتھ یہودیت، رام اور اویگدور لائبرمین کی اسرائیل بیتینو کو سات، سات نشستیں ملنے کا امکان ہے۔ وزیر خزانہ بیزلیل اسموترچ کی جماعت ریلیجس صہیونزم چھ نشستوں پر تھی۔

تین چھوٹی جماعتیں 3.25 فیصد کی انتخابی حد سے نیچے رہیں۔ یوعاز ہینڈل کی ریزروِسٹس اکنامک پارٹی کو 2.63 فیصد، اوفر ونٹر کی پیپل آف اسرائیل کو 1.61 فیصد اور حریدی پبلک کو 0.19 فیصد ووٹ ملے۔

ابتدائی اندازوں کے مطابق نیتن یاہو کے اتحاد میں شامل لیکوڈ، شاس، یونائیٹڈ توراتھ یہودیت، اوتزما یہودیت اور ریلیجس صہیونزم کو مجموعی طور پر 53 نشستیں ملنے کی توقع ہے، جو اکثریت سے آٹھ کم ہیں۔ موجودہ پارلیمنٹ میں اس اتحاد کے پاس 68 نشستیں ہیں، اس لیے اسے نمایاں نقصان ہوتا دکھائی دے رہا ہے۔

دوسری جانب آئزن کوٹ کے اتحاد، جس میں یاشر، بی یاخاد، ڈیموکریٹس اور اسرائیل بیتینو شامل ہیں، کو 48 نشستیں ملنے کا امکان ہے، جو اکثریت سے 13 کم ہیں۔

عرب قیادت والی جماعتوں کی مجموعی 19 نشستیں نیتن یاہو مخالف حکومت کو اکثریت کے ہندسے سے آگے پہنچانے کے لیے کافی ہوسکتی ہیں۔ تاہم، ڈیموکریٹس کے علاوہ آئزن کوٹ کے اتحاد کی بیشتر جماعتیں رام یا جوائنٹ لسٹ کے ساتھ تعاون سے انکار کر چکی ہیں، جس سے متبادل حکومت کی تشکیل مزید پیچیدہ ہوگئی ہے۔

یو این آئی ۔ ع ا۔

تل ابیب، اسرائیل کے طویل عرصے تک وزیر اعظم رہنے والے بنجامن نیتن یاہو کو ملک کے اہم ترین انتخابات میں سیاسی دھچکا لگا ہے۔ ان کے اتحاد کو پارلیمنٹ میں اکثریت حاصل ہوتی دکھائی نہیں دے رہی، جبکہ نتائج سے ظاہر ہوتا ہے کہ اکتوبر 2023 میں حماس کے حملے کے بعد رائے دہندگان نے تبدیلی کے حق میں ووٹ دیا ہے۔

90 فیصد ووٹوں کی گنتی مکمل ہونے کے بعد اندازہ ہے کہ نیتن یاہو کی لیکود پارٹی اور اس کے انتہائی دائیں بازو اور قدامت پسند مذہبی اتحادیوں کو 120 رکنی کنیسٹ میں 53 نشستیں ملیں گی۔ سابق فوجی سربراہ گادی آئزن کوٹ کی قیادت والے اپوزیشن اتحاد کو 48 نشستیں ملنے کا امکان ہے، جبکہ عرب جماعتوں کے حصے میں 19 نشستیں آسکتی ہیں۔ اس طرح حکومت سازی میں عرب جماعتوں کا کردار فیصلہ کن ہو سکتا ہے۔

حکومت بنانے اور اسے چلانے کے لیے درکار 61 نشستیں کسی بھی بڑے اتحاد کو حاصل ہوتی نظر نہیں آ رہیں۔

ووٹوں کی گنتی مکمل ہونے کے بعد حتمی نتائج متوقع ہیں۔ نیتن یاہو اور آئزن کوٹ دونوں نے نئی حکومت بنانے کی کوشش کرنے کا اعلان کیا ہے۔ صدر اسحاق ہرزوگ نے سیاسی جماعتوں سے ایک اور انتخاب سے بچنے کی اپیل کی ہے۔ توقع ہے کہ وہ حکومت سازی کے لیے موزوں امیدوار کا انتخاب کرنے سے پہلے جماعتوں سے مشاورت کریں گے۔ منتخب امیدوار کو حکومت بنانے کے لیے 28 دن ملیں گے۔

نیتن یاہو اپوزیشن کے ارکان کی حمایت حاصل کرنے کی کوشش کر سکتے ہیں، تاہم کئی جماعتوں نے ان کے ساتھ مخلوط حکومت میں شامل ہونے سے انکار کیا ہے۔ دوسری جانب آئزن کوٹ کو یہ فیصلہ کرنا ہوگا کہ آیا وہ عرب اسرائیلی جماعتوں کی حمایت حاصل کریں گے، جس سے حکومت سازی کی راہ ہموار ہو سکتی ہے، لیکن ان کے اپنے اتحاد کے بعض رہنما اس انتظام کے مخالف ہیں۔ اپوزیشن رہنما یائر گولان نے حریف جماعتوں پر زور دیا ہے کہ وہ نیتن یاہو کو اقتدار سے ہٹانے کے لیے عرب جماعتوں کے ساتھ تعاون کریں۔

عرب اسرائیلی جماعتوں کا کہنا ہے کہ ان کے ووٹروں نے نیتن یاہو کی اقتدار میں واپسی روکنے کے لیے بڑی تعداد میں ووٹ ڈالے۔ ان کے مطابق، انہیں حاصل ہونے والی حمایت اپوزیشن کو حکومت بنانے کا موقع فراہم کرتی ہے۔ مشترکہ عرب فہرست کے رہنما یوسف جبارین نے کہا کہ ان کا اتحاد حکومت کو ہٹانے میں مدد دینے کے لیے تیار ہے اور انہوں نے یہودیوں اور عربوں کے درمیان تعاون کو متبادل راستہ قرار دیا۔

جبارین نے سوشل میڈیا پلیٹ فارم ایکس پر لکھا، ”خونریزی کی حکومت اور بالادستی، نسل پرستی اور اخراج کی سیاست کے مقابلے میں ہم ایک بالکل مختلف متبادل پیش کرتے ہیں۔”

انہوں نے مزید کہا، ”تبدیلی یہودیوں اور عربوں کی شراکت داری سے آئے گی، جو حقیقی اور مساوی ہو۔ اس سے کم کچھ نہیں اور اس سے زیادہ کچھ نہیں۔”

نیتن یاہو نے عرب جماعتوں کی حمایت پر منحصر اپوزیشن حکومت کے امکان پر تنقید کرتے ہوئے کہا ہے کہ ان میں سے بعض جماعتیں اسرائیل کی یہودی اور صہیونی شناخت کو تسلیم نہیں کرتیں۔

انتخابی نتائج سے ظاہر ہوتا ہے کہ اسرائیلی ووٹر دو حصوں میں تقسیم ہیں۔ ایک طبقہ نیتن یاہو کے سخت گیر اور تقسیم پیدا کرنے والے سیاسی تصور سے تبدیلی چاہتا ہے، جبکہ دوسرا طبقہ اس بارے میں غیر یقینی کا
شکار ہے کہ ان کی جگہ کون سا سیاسی متبادل ہونا چاہیے۔

جاری۔ یو این آئی۔ ع ا۔