پلاؤ، امریکہ، نیوزی لینڈ اور کک آئی لینڈز نے شمالی کک آئی لینڈز میں تزویراتی لحاظ سے اہم پینرائن ایٹول میں واقع بندرگاہ کو اپ گریڈ کرنے کے لیے ایک اہم شراکت داری کا اعلان کیا ہے۔

توقع ہے کہ اس اقدام سے دور دراز ’’پا انوا‘‘ علاقوں میں نقل و حمل کے رابطوں، بحری سلامتی اور اقتصادی مواقع کو فروغ ملے گا۔ کک آئی لینڈز کے وزیر اعظم مارک براؤن، نیوزی لینڈ کے وزیر خارجہ ونسٹن پیٹرز اور امریکی نائب وزیر خارجہ کرسٹوفر لینڈاؤ نے بحرالکاہل جزائر فورم کے رہنماؤں کے اجلاس سے قبل پلاؤ میں اس منصوبے کا اعلان کیا۔

امریکہ اور نیوزی لینڈ اس اپ گریڈیشن منصوبے کی مشترکہ طور پر مالی معاونت کریں گے۔ امریکہ اس کے لیے 5 کروڑ ڈالر جبکہ نیوزی لینڈ تقریباً ایک کروڑ امریکی ڈالر فراہم کرے گا۔ منصوبے پر عمل درآمد نیوزی لینڈ، کک آئی لینڈز اور امریکہ کے درمیان باہمی تعاون اور رابطے کے ساتھ کیا جائے گا۔ اس اعلان سے کک آئی لینڈز کی انتہائی دور دراز کمیونٹیز میں سے ایک کے لیے اہم نئے بنیادی ڈھانچے کی بنیاد رکھی گئی ہے اور یہ تینوں ممالک کے درمیان بڑھتی ہوئی تزویراتی اور ترقیاتی شراکت داری کی عکاسی کرتا ہے۔

نیوزی لینڈ کے وزیر خارجہ ونسٹن پیٹرز نے کہا، ’’یہ ایک مثبت اور انتہائی اہم اقدام ہے جو کک آئی لینڈز اور امریکہ دونوں کے ساتھ نیوزی لینڈ کی شراکت داری کی مضبوطی کو ظاہر کرتا ہے۔‘‘ انہوں نے کہا کہ نیوزی لینڈ بحرالکاہل کے خطے میں بنیادی ڈھانچے کے منصوبے مکمل کرنے کے اپنے تجربے کو اس منصوبے میں استعمال کرے گا۔

امریکی نائب وزیر خارجہ کرسٹوفر لینڈاؤ نے کہا کہ یہ منصوبہ بحرالکاہل کے اپنے شراکت داروں کے لیے واشنگٹن کے عزم کی عکاسی کرتا ہے۔ انہوں نے کہا کہ 80 سے زائد برس قبل امریکی اہلکاروں نے پینرائن کی بندرگاہ اور ہوائی پٹی تعمیر کی تھی، جس کے باعث اس منصوبے کو تاریخی اہمیت بھی حاصل ہے۔

کک آئی لینڈز کے وزیر اعظم مارک براؤن نے کہا کہ یہ بندرگاہ ٹونگاریوا (پینرائن کا مقامی نام) کے باشندوں کے لیے ایک ’’زندہ رہنے کا سہارا‘‘ ہے۔ انہوں نے کہا کہ یہ بندرگاہ محفوظ انداز میں آمدورفت، خدمات تک بہتر رسائی اور بیرونی جزائر کو دنیا سے جوڑنے میں مدد دے گی۔ کک آئی لینڈز کے سب سے شمالی جزیرے پینرائن میں اوموکا گاؤں واقع ہے، جہاں یہ بندرگاہ موجود ہے۔ جغرافیائی طور پر اس دور دراز مقام کے باعث لوگوں، سامان اور ضروری خدمات کی آمدورفت کے لیے قابلِ اعتماد بحری بنیادی ڈھانچہ انتہائی اہم ہے۔

یو این آئی۔ ع ا۔

بشکیک (کرغزستان)، ایران کے صدر مسعود پزیشکیان نے منگل کو کہا کہ اگر امریکہ 14 نکاتی مفاہمتی یادداشت کے تحت اپنے وعدے پورے کرتا ہے تو ایران بھی ’’فوری جواب‘‘ دے گا۔ اس کے ساتھ ہی انہوں نے معاہدے پر دستخط ہونے کے دو ہفتے سے بھی کم عرصے میں واشنگٹن پر اپنی ذمہ داریوں سے پیچھے ہٹنے کا الزام عائد کیا۔

شنگھائی تعاون تنظیم (ایس سی او) کے 26ویں سربراہی اجلاس سے بشکیک میں خطاب کرتے ہوئے پزیشکیان نے کہا کہ ایران کا اپنے بین الاقوامی وعدوں اور معاہدوں کی پاسداری کا ’’شاندار ریکارڈ‘‘ رہا ہے۔ انہوں نے خبردار کیا کہ یک طرفہ اقدامات، فوجی طاقت کا استعمال، غیر قانونی پابندیاں اور جغرافیائی سیاسی مسابقت علاقائی اور عالمی استحکام کو نقصان پہنچا رہی ہیں۔

پزیشکیان نے ایران پر حالیہ امریکی اور اسرائیلی حملوں کو اقوام متحدہ کے منشور اور بین الاقوامی قانون کی کھلی خلاف ورزی قرار دیا۔ انہوں نے کہا، ’’13 جون 2025 اور 28 فروری 2026 کو ایران کے خلاف امریکہ اور اسرائیل کے حملے اقوام متحدہ کے منشور کے بنیادی اصولوں، بین الاقوامی قانون، طاقت کے استعمال کی ممانعت کے اصول اور زندگی کے حق کی واضح خلاف ورزی تھے۔‘‘

انہوں نے کہا کہ ایران، لبنان، غزہ اور مغربی کنارے سمیت پورے مغربی ایشیا میں ہونے والے واقعات نے طاقت اور دباؤ پر مبنی طرزِ عمل کے خطرات کو نمایاں کر دیا ہے۔

پزیشکیان کے مطابق ایران پر ہونے والے حملوں میں مینا ب کے ایک اسکول اور فارس صوبے کے لامِرد میں ایک اسٹیڈیم پر حملے بھی شامل تھے، جن میں بڑے پیمانے پر شہری ہلاکتیں ہوئیں۔ انہوں نے کہا، ’’یہ 40 روزہ جنگ کے پہلے دن کے بڑے جرائم کی صرف تین مثالیں تھیں۔ اس بربریت کے باوجود، اسلامی جمہوریہ ایران نے اپنی مسلح افواج کی طاقت اور عوام کی حمایت کے بل پر امریکہ اور قابض حکومت کو بھاری اسٹریٹجک شکست دی۔‘‘

یزیشکیان نے کہا کہ یہ حملے ایس سی او کے ایک رکن ملک اور ایک قدیم تہذیب پر حملہ تھے۔ انہوں نے ان رکن ممالک کا شکریہ ادا کیا جنہوں نے اس جارحیت کی مذمت کی اور تہران کے ساتھ اظہارِ یکجہتی کیا۔ انہوں نے بتایا کہ ایران کی 40 روزہ مزاحمت کے بعد بالآخر جنگ بندی عمل میں آئی اور امریکہ اپنے پہلے سے طے شدہ اہداف حاصل کرنے میں ناکام رہا۔ ایرانی صدر کے مطابق اس کے بعد پاکستان اور قطر کی ثالثی میں تین ماہ تک جاری رہنے والے مذاکرات کے نتیجے میں 14 نکاتی مفاہمتی یادداشت تیار ہوئی۔

انہوں نے کہا، ’’تاہم، صدر کی جانب سے دستخط کیے گئے اس دستاویز کے حوالے سے امریکی عزم دو ہفتے سے بھی کم عرصے تک قائم رہا اور امریکہ نے اپنے وعدوں سے انحراف شروع کر دیا، جو اب بھی جاری ہے۔‘‘ انہوں نے کہا، ’’یہ واضح ہے کہ امریکی وعدوں کی خلاف ورزی کا ایران نے بھی اسی انداز میں جواب دیا ہے۔ لیکن میں واضح طور پر کہہ رہا ہوں کہ اگر امریکہ مفاہمتی یادداشت میں اپنی ذمہ داریوں کی پاسداری کی طرف واپس آتا ہے تو ایران بھی فوری طور پر اسی طرح جواب دے گا۔ امریکہ کے برعکس، بین الاقوامی ذمہ داریاں پوری کرنے کے حوالے سے ہمارا ریکارڈ شاندار رہا ہے۔‘‘

یزیشکیان نے سلامتی اور اقتصادی معاملات میں ایس سی او کے رکن ممالک کے درمیان مزید تعاون پر زور دیتے ہوئے کہا کہ سلامتی اور ترقی ایک دوسرے سے جڑے ہوئے ہیں۔ انہوں نے دہشت گردی، پرتشدد انتہا پسندی، منشیات کی اسمگلنگ، سائبر جرائم اور ابھرتے ہوئے سلامتی کے چیلنجز کو خطے کے اہم خطرات قرار دیا۔ ایرانی صدر نے ایس سی او کے اندر متعدد اقتصادی اقدامات کی تجویز بھی پیش کی، جن میں مالیاتی اور بینکاری تعاون کو مزید گہرا کرنا، ’’ایس سی او بینک‘‘ کا قیام، برآمدات اور سرمایہ کاری کے لیے انشورنس یونین اور ’’ایس سی او انرجی کنسورشیم‘‘ کا قیام شامل ہے۔

سلامتی کے شعبے میں انہوں نے تنظیم کے اندر ایک ’’اسٹریٹجک سکیورٹی اسٹڈیز سینٹر‘‘ قائم کرنے کی تجویز پیش کی، جو ابھرتے ہوئے خطرات کی نشاندہی کرنے اور علاقائی استحکام کو مضبوط بنانے کے لیے سفارشات پیش کر سکے۔

یو این آئی۔ ع ا۔

تہران، ایران نے یورپی یونین پر الزام لگایا ہے کہ وہ تہران کے خلاف پابندیوں کے معاملے میں واشنگٹن کا ساتھ دے کر اپنی قانونی اور سیاسی آزادی سے دستبردار ہو رہی ہے۔

وزارتِ خارجہ کے ترجمان اسماعیل بقائی نے کہا کہ ایسا لگتا ہے جیسے یہ بلاک اپنی خودمختاری، قوانین و ضوابط، اقدار اور اخلاقی اصولوں کو امریکی دباؤ کے سامنے سرنگوں کر رہا ہے۔

ایکس (ایکس) پر ایک پوسٹ شیئر کرتے ہوئے ترجمان نے یورپی یونین کے اپنے “بلاگنگ اسٹیٹیوٹ” کی طرف توجہ دلائی، جس کا مقصد یورپی کاروباری اداروں کو بیرونی پابندیوں کے ماورائے سرحد اثرات سے بچانا ہے۔

بروسلز اس قسم کی ماورائے سرحد پابندیوں کو مسترد کرنے والے اپنے قانون کو برقرار رکھتے ہوئے ایران کے خلاف ریاستہائے متحدہ امریکہ کے یکطرفہ اقدامات کی کیسے حمایت کر سکتا ہے، اس پر سوال اٹھاتے ہوئے بقائی نے کہا کہ یورپی یونین نے 1996 میں امریکی پابندیوں کے جواب میں جب بلاکنگ اسٹیٹیوٹ کو قبول کیا تھا تو اس وقت اس کا مؤقف بالکل مختلف تھا، جبکہ آج وہ واشنگٹن کے غیر قانونی اقدامات میں شراکت دار بن چکی ہے۔

بقائی نے اس بات کی طرف اشارہ کیا کہ واشنگٹن کی دباؤ کی مہم کی حمایت کرنا اور ساتھ ہی ساتھ کشیدگی کو کم کرنے اور علاقائی استحکام کی اپیل کرنا آپس میں متضاد رویے ہیں، اور انہوں نے خبردار کیا کہ یورپی یونین کے رکن ممالک کو ایران کے خلاف امریکی اقتصادی اقدامات کی حمایت کے نتائج کا ذمہ دار ٹھہرایا جا سکتا ہے۔

یہ بیانات ایک ایسے وقت میں سامنے آئے ہیں جب اتوار کے روز آبنائے ہرمز کے قریب ایران کے جزیرہ لارک پر امریکہ کی جانب سے کیے جانے والے حملوں کے بعد علاقائی کشیدگی دوبارہ بڑھ گئی ہے، جن کے بارے میں ایرانی میڈیا نے رپورٹ کیا ہے کہ ان حملوں میں دو افراد ہلاک اور دو زخمی ہوئے ہیں۔

ایران نے بعد میں اعلان کیا تھا کہ وہ اردن اور متحدہ عرب امارات میں امریکی افواج کے زیرِ استعمال تنصیبات پر جوابی حملے کرے گا۔

امریکی صدر ڈونلڈ ٹرمپ نے گزشتہ ماہ ایک ایسے اقدام کا اعلان کیا تھا جسے انہوں نے کسی بھی ملک کے خلاف اب تک کا سب سے سخت اقتصادی آپریشن قرار دیا تھا۔

ٹرمپ نے اس بات پر زور دیا تھا کہ اس کوشش کا مقصد تہران کے مالیاتی ذرائع کو بند کرنا ہے اور انہوں نے مالیاتی اداروں، کاروباری اداروں یا سرکاری ایجنسیوں کے ذریعے ایران کو معاشی مدد فراہم کرنے والے ممالک کو ان سنگین معاشی نتائج کے بارے میں انتباہ دیا تھا جن کا انہیں سامنا کرنا پڑ سکتا ہے۔

یو این آئی۔ ع ا۔