ڈھاکہ، بنگلہ دیش کی سابق وزیر اعظم اور عوامی لیگ کی سربراہ شیخ حسینہ کی جانب سے دسمبر 2026 تک ہندوستان میں جلاوطنی ختم کرکے وطن واپسی کے عزم کا اعادہ کیے جانے کے درمیان، ملک کے وزیر داخلہ صلاح الدین احمد نے کہا ہے کہ عوام ممنوعہ عوامی لیگ کو دوبارہ سیاسی سرگرمیاں شروع کرنے کی اجازت نہیں دیں گے۔

احمد نے عوامی لیگ کو ”آمرانہ، فاشسٹ اور قاتل” جماعت قرار دیتے ہوئے کہا، ”جس جماعت نے لوگوں کو قتل کیا، نسل کشی کی، ظلم و ستم اور تشدد کا ارتکاب کیا اور اب تک نہ معافی مانگی ہے اور نہ ہی اپنے اعمال پر ندامت کا اظہار کیا ہے، اسے اس ملک میں سیاست کرنے کی اجازت نہیں دی جائے گی۔”

وہ چٹگاؤں کے فتح چھڑی میں واقع بابونگر مدرسے میں منعقدہ دو روزہ 104ویں سالانہ مذہبی اجتماع کی اختتامی تقریب سے خطاب کر رہے تھے۔

شیخ حسینہ نے خبر رساں ایجنسی ایسوسی ایٹڈ پریس (اے پی) کو دیے گئے ایک انٹرویو میں اعتراف کیا تھا کہ بنگلہ دیش واپسی پر انہیں گرفتاری، قید یا تشدد کا سامنا کرنا پڑ سکتا ہے۔ خاص طور پر اس لیے کہ بنگلہ دیش کے ایک خصوصی ٹریبونل نے انہیں غیر حاضری میں سزائے موت سنائی ہے۔

انہوں نے کہا، ”اگر میری قسمت میں موت لکھی ہے تو میں اپنے ہی ملک کی سرزمین پر، اپنے لوگوں کے درمیان مرنا پسند کروں گی۔ اس لیے میں بنگلہ دیش واپس آؤں گی۔ میرا فیصلہ نہیں بدلا ہے۔” انہوں نے مزید کہا کہ وہ اپنی باقی زندگی اپنے لوگوں کو دور سے مصائب میں مبتلا دیکھتے ہوئے نہیں گزار سکتیں۔

اس سوال پر کہ کیا انہیں توقع ہے کہ ہندوستان یا امریکہ ڈھاکہ پر ان کی سلامتی کی ضمانت دینے کے لیے دباؤ ڈالیں گے، حسینہ نے کسی بیرونی سفارتی مدد کی ضرورت سے انکار کیا۔ ان کا کہنا تھا، ”میں تمام ممالک کے ساتھ دوستی اور تعاون کو اہمیت دیتی ہوں، لیکن مجھے اپنے وطن واپس آنے کے لیے کسی غیر ملکی طاقت کی سرپرستی یا منظوری کی ضرورت نہیں ہے۔”

وزیر داخلہ احمد نے اس موقع پر حفاظتِ اسلام بنگلہ دیش کی بھی تعریف کی، جس نے ان کے بقول سابق عوامی لیگ حکومت کے فاشسٹ، اسلام مخالف اور غیر قانونی اقتدار کے خلاف احتجاج جاری رکھا، حالانکہ یہ تنظیم کوئی سیاسی جماعت نہیں ہے۔انہوں نے کہا کہ حفاظتِ اسلام کے امیر مولانا محب اللہ بابونگری نے فاشزم کے خاتمے کے بعد ہونے والے انتخابات سے قبل اور وسیع تر تحریک کے دوران مظاہروں کی قیادت کی تھی۔
وزیر داخلہ نے کہا، ”بنگلہ دیش کو آزادی حاصل کرنے میں 23 سال لگے، جبکہ ملک کو ایک فاشسٹ اور علما مخالف حکومت کے چنگل سے آزاد کرانے میں مزید 16 سے 17 سال صرف ہوئے۔”

انہوں نے مزید کہا کہ اس جدوجہد کے دوران علما اور طلبہ نے اپنی جانوں کی قربانیاں دیں، لیکن ہلاک ہونے والوں میں سے بہت سے افراد کی شناخت اب تک نہیں ہوسکی ہے یا ان کی تدفین کے مقامات کا پتہ نہیں ہے۔

احمد نے اقوام متحدہ کے اعداد و شمار کا حوالہ دیتے ہوئے کہا کہ جولائی اور اگست کی عوامی تحریک کے دوران تقریباً 1,400 افراد ہلاک ہوئے تھے۔ انہوں نے یہ الزام بھی لگایا کہ عوامی لیگ کے گزشتہ 16 سے 17 سالہ دور حکومت میں تقریباً 3,000 افراد کو جبری طور پر لاپتہ کیا گیا۔

انہوں نے کہا، ”میں بھی ان میں سے ایک تھا۔ اللہ تعالیٰ نے میری بقا کا فیصلہ کیا تھا۔ میں آج آپ لوگوں کی دعاؤں اور اللہ کے فضل و کرم سے زندہ ہوں۔” انہوں نے مزید کہا کہ تقریباً 7,000 افراد کو مختلف طریقوں سے قتل اور تشدد کا نشانہ بنایا گیا۔

وزیر داخلہ نے یہ دعویٰ بھی کیا کہ لاکھوں افراد حملوں اور سیاسی محرکات پر مبنی مقدمات کے ذریعے ظلم و ستم کا شکار ہوئے۔ انہوں نے سوال اٹھایا کہ کیا ملک ایک بار پھر ان قوتوں کی واپسی چاہتا ہے جو ان مظالم کی ذمہ دار تھیں؟

احمد نے یہ الزام بھی لگایا کہ گارمنٹ سیکٹر میں حالیہ بدامنی پیدا کرنے کی کوششوں میں ملوث بعض گروہوں کے روابط سابق عوامی لیگ حکومت سے تھے۔

انہوں نے بعض سیاسی جماعتوں پر انتخابی مقاصد کے لیے اسلام کے استعمال کا الزام لگاتے ہوئے کہا کہ ان کے انتخابی منشور میں اسلامی اصولوں سے متعلق کوئی بامعنی عہد شامل نہیں ہے۔

انہوں نے کہا، ”کچھ جماعتیں خود کو اسلامی جماعتیں قرار دیتی ہیں، لیکن ان کے انتخابی منشور سے ‘اقیموا الدین’ کی اصطلاح حذف کردی گئی ہے۔ وہ عوامی سطح پر کچھ اور کہتی ہیں، لیکن ان کی دستاویزات میں اس کا کوئی ثبوت نہیں ملتا۔”

یو این آئی۔ ع ا۔

تہران، ایران کے ایک سینئر عہدیدار نے کہا ہے کہ جوہری معاملے سے متعلق تجاویز قطر کے ذریعے امریکہ کو بھیج دی گئی ہیں اور واشنگٹن کے ساتھ مذاکرات ایران کی جانب سے پیش کردہ ساتوں شرائط پوری ہونے کے بعد ہی ہوں گے۔

خبر رساں ایجنسی رائٹرز کے مطابق شناخت ظاہر نہ کرنے کی شرط پر ایرانی عہدیدار نے بتایا کہ امریکہ ان تجاویز کا جائزہ لے رہا ہے، تاہم انہوں نے اس بارے میں مزید تفصیلات فراہم نہیں کیں۔

رپورٹ کے مطابق ایران اور امریکہ کے درمیان جنگ ختم کرانے کے لیے ثالثوں نے سفارتی کوششیں تیز کردی ہیں۔ اس دوران خدشہ ظاہر کیا جا رہا ہے کہ امریکی وسط مدتی انتخابات کے بعد جنگ دوبارہ شروع ہوسکتی ہے۔ امریکی صدر ڈونلڈ ٹرمپ نے منگل کو انتخابات کے بعد فوجی کارروائیاں دوبارہ شروع کرنے کے امکان کو مسترد نہیں کیا، جبکہ ایران نے بھی نئی جنگ کی صورت میں وسیع پیمانے پر جوابی کارروائی کی تیاری کا عندیہ دیا ہے۔

ایران کی قومی سلامتی کونسل کے سیکریٹری محسن رضائی نے اس سے قبل کہا تھا کہ تہران نے امریکہ کے سامنے سات شرائط رکھی ہیں اور ان پر عمل درآمد تک نہ آبنائے ہرمز کھولی جائے گی اور نہ ہی مذاکرات ہوں گے۔

ایران کے مطالبات میں امریکی پابندیوں کا خاتمہ اور منجمد ایرانی اثاثوں کی بحالی سمیت دیگر امور شامل ہیں، جبکہ امریکہ کا مؤقف ہے کہ مذاکرات میں جوہری ہتھیاروں کا معاملہ بھی زیر بحث آنا چاہیے۔

واضح رہے کہ امریکہ اور اسرائیل نے 28 فروری 2026 کو ایران پر حملہ کیا تھا، جس کے جواب میں ایران نے مشرق وسطیٰ میں امریکی تنصیبات کو نشانہ بنایا تھا۔ اس دوران متحدہ عرب امارات، قطر، سعودی عرب، کویت، بحرین اور عراق سمیت خطے کے دیگر ممالک بھی متاثر ہوئے تھے۔

یو این آئی۔ م س

ریاض، سعودی عرب نے امریکی اخبار ‘دی وال اسٹریٹ جرنل’ (ڈبلیو ایس جے) کی اس رپورٹ کو مسترد کردیا ہے، جس میں دعویٰ کیا گیا تھا کہ یمن کی حوثی تحریک نے جنگ بندی کے لیے 51 ارب ڈالر معاوضے اور ملک کی حکمراں اتھارٹی کے طور پر باضابطہ تسلیم کیے جانے کا مطالبہ کیا ہے۔

اخبار نے جمعرات کو بات چیت سے واقف نامعلوم ذرائع کے حوالے سے بتایا تھا کہ ریاض نے تنازع کے خاتمے کی شرائط پر غور کرنے کے لیے ایران کی حمایت یافتہ حوثی تحریک سے رابطہ کیا تھا۔ ان مذاکرات میں سرحدی جھڑپوں، بحیرہ احمر میں بحری جہازوں پر حملوں اور میزائل حملوں کے خطرات جیسے معاملات شامل تھے۔

لیک ہونے والی تفصیلات کے مطابق حوثیوں نے مبینہ طور پر سخت شرائط پیش کرتے ہوئے 51 ارب ڈالر معاوضے کے ساتھ یمن کی حکمراں اتھارٹی کے طور پر باضابطہ تسلیم کیے جانے کا مطالبہ کیا تھا۔تاہم، سعودی عرب کے نائب وزیر برائے عوامی سفارت کاری اور سفیر رائد کریملی نے اس رپورٹ کو دوٹوک انداز میں مسترد کرتے ہوئے ان دعوؤں کو من گھڑت قرار دیا ہے۔

انہوں نے سوشل میڈیا پلیٹ فارم ایکس پر اپنی پوسٹ میں کہا، ”میں دی وال اسٹریٹ جرنل میں اس ملیشیا کے مطالبات کے حوالے سے شائع ہونے والے دعوؤں کی واضح طور پر تردید کرتا ہوں۔ یہ سب کچھ مصنفین یا ان کے مبینہ ذرائع کی گھڑی ہوئی باتیں ہیں۔”

کریملی نے حوثیوں پر الزام عائد کیا کہ انہوں نے یمن کی بین الاقوامی سطح پر تسلیم شدہ حکومت کے خلاف بغاوت کی، ملک میں قحط کی صورت حال پیدا کرنے میں کردار ادا کیا اور یمن کو ایسے تنازعات میں دھکیل دیا جو اس کے مفادات کے خلاف تھے۔

انہوں نے حوثی گروپ پر بحیرہ احمر میں تجارتی جہازوں کو نشانہ بنانے، شہری اور اقتصادی بنیادی ڈھانچے پر حملے کرنے اور امن کی کوششوں کو مسترد کرنے کا الزام بھی لگایا۔ انہوں نے مزید کہا، ”ہم اخبار کے مصنفین کو یہ بھی یاد دلانا چاہتے ہیں کہ یمن کی ایک تسلیم شدہ حکومت موجود ہے۔”

ڈبلیو ایس جے کی رپورٹ اور سعودی عرب کی تردید ایسے وقت سامنے آئی ہے جب مغربی ایشیا میں جاری وسیع تر تنازع کے درمیان سعودی عرب اور حوثی جنگجوؤں کے درمیان کشیدگی ایک بار پھر بڑھ گئی ہے۔

علاقائی جنگ کا آغاز 28 فروری کو اس وقت ہوا تھا جب امریکہ اور اسرائیل نے ایران پر حملے کیے تھے، جس کے جواب میں تہران نے خطے کے مختلف مقامات پر حملے کیے۔

یمن میں بھی جولائی میں اس وقت کشیدگی میں اضافہ ہوا تھا جب حوثیوں نے سعودی عرب کے یمنی فضائی حدود پر کنٹرول کی خلاف ورزی کرتے ہوئے ایک ایرانی طیارے کو ملک میں اترنے کی اجازت دی تھی۔

اس کے جواب میں سعودی قیادت والے اتحاد کی حمایت یافتہ بین الاقوامی سطح پر تسلیم شدہ یمنی حکومت نے صنعا ہوائی اڈے پر حملہ کیا، جو حوثیوں کے کنٹرول میں ہے۔ اس کے نتیجے میں حملوں اور جوابی حملوں کا سلسلہ شروع ہوگیا، جس سے یمن کی طویل خانہ جنگی میں 2022 میں ہونے والی جنگ بندی بھی متاثر ہوئی۔

اس کے بعد سے حوثیوں نے سعودی عرب کو نشانہ بناتے ہوئے بحری ناکہ بندی کا اعلان کیا ہے اور اس کی سرزمین کے علاوہ بحیرہ احمر میں تیل بردار جہازوں پر بھی حملے کیے ہیں۔

یو این آئی۔ ع ا۔