جموں، جموں و کشمیر کے لیفٹیننٹ گورنر منوج سنہا نے جمعرات کو جموں و کشمیر بھر میں جیلوں کی سکیورٹی اور انتظامی طریقہ کار کو مزید مستحکم بنانے کے اقدامات پر تبادلہ خیال کیا۔

انہوں نے یہاں لوک بھون میں محکمہ جیل خانہ جات کے اعلیٰ سطحی جائزہ اجلاس کی صدارت کی۔ جیلوں کے مضبوط انتظامی نظام کی ضرورت پر زور دیتے ہوئے لیفٹیننٹ گورنر نے پولیس، محکمہ جیل خانہ جات اور خفیہ ایجنسیوں کے درمیان ایک متحدہ رابطہ نظام قائم کرنے کی ہدایت دی۔

انہوں نے دہشت گرد نیٹ ورکس، بنیاد پرستی اور امن و قانون کو لاحق خطرات سے نمٹنے کے لیے پولیس، محکمہ جیل خانہ جات اور خفیہ ایجنسیوں کے درمیان باقاعدہ جائزہ اجلاس منعقد کرنے اور خفیہ معلومات کے تبادلے پر زور دیا۔

لیفٹیننٹ گورنر نے جیلوں کے احاطوں اور ان کے اطراف اچانک معائنے کرنے کے ساتھ ساتھ ضبط کیے گئے الیکٹرانک آلات کا فرانزک تجزیہ کرنے کی بھی ہدایت دی۔

اجلاس میں جیلوں کے اندر خصوصی جیل انٹیلی جنس یونٹس کے قیام، تمام جیلوں میں بایومیٹرک نظام متعارف کرانے، قیدیوں کے لیے ٹیلی میڈیسن سہولتوں کو وسعت دینے اور محکمہ جیل خانہ جات میں افرادی قوت کو مضبوط بنانے کے امور پر بھی تبادلہ خیال کیا گیا۔

لیفٹیننٹ گورنر نے مہان پور میں زیر تعمیر ہائی سکیورٹی جیل کے کام کی پیش رفت کا بھی جائزہ لیا۔ انہوں نے افسران کو ہدایت دی کہ باقی ماندہ کام مقررہ مدت کے اندر مکمل کرنے کے لیے اس عمل میں تیزی لائی جائے۔

اجلاس میں پولیس کے ڈائریکٹر جنرل نلین پربھات، ڈائریکٹر جنرل جیل خانہ جات جموں و کشمیر دیپک کمار، محکمہ داخلہ کے ایڈیشنل چیف سکریٹری چندراکر بھارتی، اسپیشل ڈی جی کوآرڈینیشن پی ایچ کیو ایس جے ایم گیلانی، اے ڈی جی سی آئی ڈی ایم کے سنہا، لیفٹیننٹ گورنر کے پرنسپل سکریٹری گووند جیسوال، جموں و کشمیر اور لداخ کے ایڈیشنل ڈائریکٹر آئی بی پنکج کمار ٹھاکر اور دیگر سینئر افسران نے شرکت کی۔

یواین آئی۔ ط ا

سرینگر، شمالی کشمیر کے ضلع کپواڑہ کی کیرن وادی، جو کبھی لائن آف کنٹرول (ایل او سی) کے قریب واقع ایک حساس اور تنازعہ زدہ سرحدی علاقے کے طور پر جانی جاتی تھی، اب رفتہ رفتہ ایک منفرد سیاحتی مقام کے طور پر ابھر رہی ہے۔ اس علاقے کی قدرتی خوبصورتی، تاریخی ورثے اور ثقافتی شناخت کو اجاگر کرنے کے لیے مختلف اقدامات کیے جارہے ہیں۔

اسی سلسلے میں فارقیان میں قائم کیے گئے کیرن ہیریٹیج سینٹر کا افتتاح جلد عمل میں آنے والا ہے۔ اس مرکز کے قیام سے اس سرحدی خطے میں سیاحوں کے لیے ایک نئی کشش پیدا ہوگی۔ واضح رہے کہ کیرن وادی کو 2023 میں سیاحوں کے لیے کھولا گیا تھا۔

وزارت دفاع کے ترجمان لیفٹیننٹ کرنل سنیل برتوال نے بتایا کہ کیرن ہیریٹیج سینٹر، وادی کشن گنگا کے خوبصورت پس منظر میں قائم کیا گیا ہے، جس کے اطراف میں گھنے چیڑ کے جنگلات پھیلے ہوئے ہیں۔ یہ مرکز تاریخی ورثے، مہمان نوازی اور قومی اہمیت کے مختلف پہلوؤں کو یکجا کرتے ہوئے کیرن کو ایک نئے سیاحتی مقام کے طور پر متعارف کرانے کی کوشش ہے۔

انہوں نے کہا کہ کئی دہائیوں تک کیرن ہندوستان کے سرحدی علاقوں میں آباد لوگوں کی ثابت قدمی، بہادری اور ناقابل تسخیر حوصلے کی علامت رہی ہے۔ نئے ہیریٹیج سینٹر کا مقصد اس تاریخی ورثے کو زندہ کرنا اور سیاحوں کو وادی کے دلکش قدرتی مناظر کے علاوہ یہاں کی قربانیوں، خدمات اور قومی وابستگی کی داستانوں سے بھی روشناس کرانا ہے۔

اس مرکز میں قومی پرچم کی تنصیب کو خصوصی اہمیت دی گئی ہے۔ لیفٹیننٹ کرنل برتوال کے مطابق، ایک بلند و بالا قلعہ نما داخلی دروازے کے اوپر شان سے لہراتا ترنگا اس مرکز کا نمایاں حصہ ہے۔ اس داخلی دروازے کے دونوں جانب گنبد نما مینار بھی تعمیر کیے گئے ہیں، جو اس مقام کی خوبصورتی میں اضافہ کرتے ہیں۔

یادگاری دیواروں پر ”قربانی، خدمت اور اتحاد” اور ”بلند مقامات، مضبوط رشتے، عظیم تر ہندوستان” کے کلمات درج کیے گئے ہیں۔ ان تحریروں کے ذریعے حب الوطنی، قومی یکجہتی اور ملک کے سرحدی علاقوں میں آباد لوگوں کے ساتھ قومی وابستگی کے جذبے کو اجاگر کیا گیا ہے۔

اس کے علاوہ مرکز میں توپ بھی نصب کی گئی ہے، جبکہ خوبصورت انداز میں تیار کردہ راستے اور اطراف کی تزئین و آرائش اس مقام کو مزید پرکشش بناتے ہیں۔ یہ جگہ سیاحوں کو غور و فکر اور قومی فخر کے احساس سے ہمکنار کرنے کے لیے تیار کی گئی ہے۔

ترجمان نے بتایا کہ ہیریٹیج سینٹر میں ایک خصوصی ورثہ گیلری بھی قائم کی گئی ہے، جہاں سیاحوں کو کیرن وادی کی تاریخ، قدرتی مناظر اور ثقافتی شناخت کے بارے میں معلومات فراہم کی جائیں گی۔ اس گیلری میں تصاویر اور دیگر بصری مواد کے ذریعے علاقے کی تاریخی داستانوں کو محفوظ رکھنے اور اس سرحدی خطے کے بارے میں بہتر تفہیم پیدا کرنے کی کوشش کی گئی ہے۔

کمپلیکس کے اندر ”کیرن کیفے۔ فارقیان” کے نام سے ایک کیفے بھی قائم کیا گیا ہے۔ یہاں سیاحوں کو کشمیری قہوہ، گرم مشروبات اور دیگر ہلکی پھلکی اشیائے خوردونوش فراہم کی جائیں گی۔ کیفے سے آس پاس کے پہاڑوں اور چیڑ کے گھنے جنگلات کے دلکش مناظر بھی دیکھے جاسکیں گے۔

اس منصوبے کا بنیادی مقصد نسبتاً کم دریافت کیے گئے اس سرحدی علاقے کی جانب سیاحوں کو راغب کرنا، سیاحتی بنیادی ڈھانچے کو مستحکم بنانا اور مقامی لوگوں کے لیے روزگار اور معاشی سرگرمیوں کے نئے مواقع پیدا کرنا ہے۔

بیان کے مطابق، کیرن ہیریٹیج سینٹر کا قیام سرحدی علاقوں کو سیاحت، ثقافتی تبادلے اور معاشی ترقی کے مراکز میں تبدیل کرنے کے وسیع تر منصوبے کا حصہ ہے۔ اس اقدام سے نہ صرف کیرن وادی کو سیاحتی نقشے پر نمایاں شناخت ملنے کی توقع ہے بلکہ مقامی آبادی کی معاشی ترقی میں بھی مدد مل سکتی ہے۔

یواین آئی۔ ط ا

سری نگر، نیشنل کانفرنس کے چھ بار رکن اسمبلی منتخب ہونے والے مبارک گل نے بدھ کے روز اپنی پریس کانفرنس ملتوی کردی، جس میں ان سے مستقبل کے لائحہ عمل کا اعلان متوقع تھا۔ انہوں نے کہا کہ فی الحال وہ اس معاملے پر کوئی بیان نہیں دیں گے۔

سری نگر کے عیدگاہ اسمبلی حلقے کی نمائندگی کرنے والے مبارک گل نے حالیہ کابینہ میں توسیع کے دوران انہیں وزیر نہ بنائے جانے پر پارٹی کے اندر بڑھتی ہوئی ناراضگی کے درمیان میڈیا سے خطاب کرنے کا پروگرام بنایا تھا۔

اپنا فیصلہ واضح کرتے ہوئے مبارک گل نے کہا کہ انہوں نے جموں و کشمیر کی موجودہ صورت حال، اپنے ساتھیوں سے مشاورت اور حامیوں کے جذبات کو پیش نظر رکھتے ہوئے پریس کانفرنس ملتوی کرنے کا فیصلہ کیا ہے۔

انہوں نے کہا کہ ان کے بعض کارکن گزشتہ تقریباً ایک دہائی سے ان کے ساتھ وابستہ ہیں، جبکہ کچھ کارکن 1975 سے گزشتہ 51 برسوں سے ان کا ساتھ دے رہے ہیں۔

انہوں نے کہاکہ”میں اعلان کرتا ہوں کہ آج کی پریس کانفرنس ملتوی کررہا ہوں۔ اس معاملے پر آج کچھ نہیں کہوں گا۔” انہوں نے مزید کہا کہ وہ اپنے ساتھیوں اور دوستوں کے جذبات کا احترام کرنا چاہتے ہیں اور ان کی احساسات کی ترجمانی کرنا چاہتے ہیں۔

مبارک گل نے کہاکہ ”میں نہ کچھ کہوں گا اور نہ ہی کوئی اعلان کروں گا۔ ان شاء اللہ، مناسب وقت آنے پر چیزیں خود آگے بڑھیں گی۔” انہوں نے واضح کیا کہ ان کا یہ بیان ہی وہ واحد پیغام ہے جو وہ فی الحال دینا چاہتے ہیں۔ انہوں نے سب کا شکریہ ادا کرتے ہوئے کہا کہ انہیں نہ کوئی وضاحت پیش کرنی ہے اور نہ ہی مزید کچھ کہنا ہے۔

انہوں نے بتایا کہ بعض ساتھیوں نے فون پر انہیں مشورے دیے ہیں اور وہ ان کے مشوروں پر عمل کرتے ہوئے اسی کے مطابق اپنی جدوجہد جاری رکھیں گے۔ اپنی بات ختم کرتے ہوئے انہوں نے کہاکہ ”میں ایک لڑاکا ہوں اور اپنی جدوجہد جاری رکھوں گا۔”

یواین آئی۔ ط ا