واشنگٹن، مصری نژاد امریکی ڈیموکریٹ اور صحتِ عامہ کے سابق عہدیدار عبدل السید نے بدھ کو مشی گن میں سینیٹ کا انتخاب جیت کر تاریخ رقم کردی۔ انہوں نے ریپبلکن امیدوار مائیک راجرز کو شکست دے کر امریکی سینیٹ کے لیے منتخب ہونے والے پہلے مسلم امریکی ہونے کا اعزاز حاصل کیا۔ وہ 1969 کے بعد سینیٹ میں خدمات انجام دینے والے پہلے ڈیموکریٹ ڈاکٹر بھی ہوں گے۔

ڈیٹرائٹ اور وین کاؤنٹی کے محکمہ صحت کی سربراہی کرچکے پیشے کے اعتبار سے ڈاکٹر عبدال السید نے اپنی تاریخی کامیابی پر خوشی کا اظہار کرتے ہوئے کہا، ”مشی گن، ہم نے یہ کر دکھایا! مجھے اس عظیم ریاست کے منتخب سینیٹر کی حیثیت سے یہاں کھڑے ہونے پر فخر اور اعزاز حاصل ہے۔”

مصری تارکین وطن کے گھرانے میں پیدا ہونے والے السید نے اس سے قبل کبھی کوئی انتخاب نہیں لڑا تھا۔

2018 میں مشی گن کے ڈیموکریٹک گورنر کے امیدواروں کے پرائمری انتخاب میں انہیں دوہرے ہندسے کے فرق سے شکست ہوئی تھی۔ ان کی موجودہ کامیابی امریکی کانگریس میں مسلم نمائندگی کے حوالے سے ایک اہم سنگ میل ہے۔ مشی گن میں ڈیموکریٹس کی یہ کامیابی اس لیے بھی اہم ہے کہ 2024 کے صدارتی انتخاب میں ڈونالڈ ٹرمپ نے اس ریاست میں معمولی فرق سے کامیابی حاصل کی تھی۔

السید کو انتخاب سے چند گھنٹے قبل ایک سیاسی دھچکا بھی لگا، جب ڈیموکریٹک پرائمری میں ان سے شکست کھانے والی کانگریس رکن ہیلی اسٹیونز نے ریپبلکن امیدوار مائیک راجرز کی حمایت کا اعلان کردیا۔ اس فیصلے پر ڈیموکریٹک پارٹی کے کئی رہنماؤں نے سخت تنقید کی، جس کے بعد اسٹیونز کے متعدد عملے نے استعفیٰ دے دیا۔

اسٹیونز نے اپنے فیصلے کا دفاع کرتے ہوئے السید پر نفرت انگیز سیاست اور بائیں بازو کے سیاسی اسٹریمر حسن پیکر سے قربت کا الزام لگایا۔ دلچسپ بات یہ ہے کہ اس سے قبل وہ خود راجرز کو ٹرمپ کے خطرناک ایجنڈے کی حمایت کرنے والا امیدوار قرار دے چکی تھیں۔

میڈیا رپورٹس کے مطابق السید نے اسٹیونز کی حمایت کو مسترد کردیا اور اس اعلان کے محض چار گھنٹوں کے اندر اپنی انتخابی مہم کے لیے 12 لاکھ ڈالر جمع کرلیے۔

ان کی انتخابی مہم میں صحت کی سہولیات اور روزمرہ زندگی کے بڑھتے اخراجات کو بنیادی موضوع بنایا گیا۔

اس دوران انہیں اپنے مسلم مذہبی تشخص اور غزہ میں اسرائیلی جنگ کے حوالے سے بھی سیاسی تنازعات کا سامنا کرنا پڑا۔

دوسری جانب ریپبلکن امیدوار راجرز نے انتخابی مہم کے دوران السید کو انتہا پسند ثابت کرنے کی کوشش کی۔ راجرز 2024 کے سینیٹ انتخاب میں بھی ڈیموکریٹ امیدوار ایلیسا سلاٹکن سے معمولی فرق سے ہار گئے تھے، حالانکہ اس صدارتی انتخاب میں مشی گن میں ٹرمپ کامیاب ہوئے تھے۔

السید کو اخوان المسلمون سے مبینہ تعلقات کے الزامات کا بھی سامنا کرنا پڑا، تاہم انہوں نے ان الزامات کی سختی سے تردید کی۔

انتخابی مہم کے آخری دنوں میں ٹرمپ اور نائب صدر جے ڈی وینس نے مشی گن کا دورہ کیا اور ریپبلکن امیدوار کی حمایت مضبوط بنانے کی کوشش کی۔

ٹرمپ نے انتخابی مہم کے دوران بارہا السید کے مسلم تشخص کو نشانہ بنایا اور انہیں ”تشدد پسند دہشت گرد” قرار دینے کے ساتھ ان کے درمیانی نام محمد سے مخاطب کیا۔ تاہم راجرز نے ٹرمپ کے اس بیان کی تائید کرنے سے گریز کیا۔

ٹرمپ کے تبصروں پر ردعمل ظاہر کرتے ہوئے السید نے کہا، ”مجھے اس بات کی پروا نہیں کہ وہ میرا نام کیسے لیتے ہیں، یہاں تک کہ انہیں میرا پورا نام یاد ہے یا نہیں، اس سے بھی مجھے کوئی فرق نہیں پڑتا۔ نومبر کے بعد وہ مجھے صرف سینیٹر کہہ کر مخاطب کرسکتے ہیں۔ آپ کے لیے میں سینیٹر محمد ہوں گا، دوست۔”

حسن پیکر سے تعلقات پر ہونے والی تنقید کے بعد السید نے اپنی انتخابی مہم کو ان سے الگ رکھنے کی بھی کوشش کی۔

دریں اثنا، سابق امریکی صدر بارک اوباما، سابق نائب صدر کملا ہیرس اور ڈیموکریٹک پارٹی کے کئی دیگر اہم رہنماؤں نے السید کی انتخابی مہم کی حمایت کی تھی۔

یو این آئی۔ ع ا۔

تل ابیب، اسرائیلی اپوزیشن کے سیاست دانوں نے امریکی وسط مدتی انتخابات کے بعد، جن کے غیر حتمی نتائج کے مطابق ڈیموکریٹس نے کامیابی حاصل کی، اس بات پر زور دیا ہے کہ اسرائیلی وزیرِاعظم نیتن یاہو مزید اپنے عہدے پر برقرار نہیں رہ سکتے۔

امریکی وسط مدتی انتخابات کے نتائج کو نیتن یاہو اور اسرائیل کی حمایت کے تناظر میں دیکھتے ہوئے، اسرائیلی اپوزیشن رہنماؤں نے نشاندہی کی کہ امریکہ میں اسرائیل کی حمایت انتخابی شکست کی ایک وجہ بن گئی ہے۔

اپوزیشن جماعت ”یَش عتید” کے رہنما اور سابق اسرائیلی وزیرِاعظم یائیر لاپید نے سوشل میڈیا پلیٹ فارم ایکس پر اپنے بیان میں امریکی انتخابی نتائج کے بعد کہا:”نیتن یاہو کے ساتھ قومی اتحاد کی حکومت بنانے کا امکان مکمل طور پر ختم ہو چکا ہے۔'”

لاپید نے مزید کہا:”اسرائیل انہیں وزیرِاعظم کے عہدے پر برقرار رہنے کی اجازت نہیں دے سکتا۔ یہ ہماری سلامتی، جمہوریت کو خطرے میں ڈالے گا اور بین الاقوامی سطح پر ہمیں تباہ کر دے گا۔”

دوسری جانب ڈیموکریٹس پارٹی کے رہنما یائیر گولان نے بھی اپنے ایکس اکاؤنٹ پر لکھا:”امریکہ میں سامنے آنے والے وسط مدتی انتخابات کے نتائج ظاہر کرتے ہیں کہ نیتن یاہو ڈیموکریٹس اور ریپبلکنز، دونوں کی نظر میں کس قدر نقصان دہ شخصیت بن چکے ہیں۔”

گولان نے کہا کہ ان کے پاس وقت ضائع کرنے کی گنجائش نہیں ہے اور انہیں ایک متبادل حکومت تشکیل دینی چاہیے۔

امریکی وسط مدتی انتخابات کے غیر حتمی نتائج کے مطابق ڈیموکریٹس نے سینیٹ اور ایوانِ نمائندگان، دونوں میں صدر ڈونلڈ ٹرمپ کی قیادت میں ریپبلکنز کو پیچھے چھوڑ دیا۔

یو این آئی۔ ع ا۔

تہران، ایران کے سپریم لیڈر مجتبیٰ خامنہ ای نے بدھ کو خبردار کیا کہ امریکہ نے ایران پر دوبارہ فوجی حملہ کیا تو اس کا ردعمل پورے خطے میں کہیں زیادہ وسیع ہوگا۔ انہوں نے کہا کہ امریکہ میں سیاسی تبدیلیوں کے بعد واشنگٹن کی پالیسی بدلنے کی امید رکھنے والے سخت غلط فہمی میں ہیں۔

ایران کے قومی دن ‘عالمی استکبار کے خلاف جدوجہد’ کے موقع پر جاری تحریری پیغام میں خامنہ ای نے کہا کہ نہ تو امریکی قیادت میں تبدیلی اور نہ ہی ایران کی جانب سے کسی قسم کی رعایت واشنگٹن کو ایران کے خلاف دشمنانہ رویہ ترک کرنے پر آمادہ کر سکتی ہے۔ یہ دن 4 نومبر کو 1979 میں تہران میں امریکی سفارت خانے پر قبضے کی یاد میں منایا جاتا ہے۔

ان کا یہ بیان ایسے وقت میں سامنے آیا ہے جب امریکی وسط مدتی انتخابات میں صدر ڈونالڈ ٹرمپ کی ریپبلکن پارٹی کو نقصان اٹھانا پڑا اور ڈیموکریٹس نے کانگریس میں اکثریت حاصل کرلی۔

خامنہ ای نے کہا کہ واشنگٹن کا اصل مقصد ایرانی عوام کو غیر مشروط طور پر ہتھیار ڈالنے پر مجبور کرنا ہے۔ ان کے مطابق امریکہ کے سامنے معمولی جھکاؤ یا رعایت بھی اسے مزید مطالبات اور فوجی جارحیت کی حوصلہ افزائی کرے گی۔

آبنائے ہرمز پر ایران کے کنٹرول اور خطے میں امریکی فوجی اڈوں کی تباہی کا حوالہ دیتے ہوئے انہوں نے ان اقدامات کو امریکی جارحیت کا جواب اور خطے میں امریکی اثرورسوخ کے خلاف وسیع تر مزاحمت کا حصہ قرار دیا۔ انہوں نے خبردار کیا کہ اگر ایسی جارحیت دوبارہ ہوئی تو اس کا دائرہ پہلے سے کہیں زیادہ وسیع ہوگا۔

ایرانی سپریم لیڈر نے دعویٰ کیا کہ خلیج فارس کی صورت حال نے امریکہ کی ناقابلِ تسخیر ہونے کے تصور کو غلط ثابت کردیا ہے اور بیرونی طاقتوں پر اپنی سلامتی کے لیے انحصار کرنے والی حکومتوں کی کمزوری عیاں کردی ہے۔ انہوں نے امریکی فوجی اور عالمی اثرورسوخ کو ناقابلِ تلافی زوال سے دوچار قرار دیتے ہوئے کہا کہ مغربی ایشیا کی تبدیلیاں اور علاقائی مزاحمتی تحریکوں کی سرگرمیاں ایک نئے عالمی نظام کے ظہور کا اشارہ ہیں۔

خامنہ ای نے کہا کہ مکمل دفاعی صلاحیت اور دشمن کو حملے سے باز رکھنے کے لیے ‘ایران، پہلے سے زیادہ مضبوط’ کی حکمت عملی پر عمل جاری رکھنا ہوگا۔ قومی اتحاد، یکجہتی اور سماجی ہم آہنگی کو ملک کی مضبوطی کے لیے ناگزیر قرار دیتے ہوئے انہوں نے حکام سے عوامی فلاح، روزگار اور اقتصادی ترقی کو ترجیح دینے کی اپیل کی۔ انہوں نے نوجوانوں، طلبہ اور اسکول کے بچوں پر بھی زور دیا کہ وہ علم، مہارت اور عزم کے ذریعے ملک کے مستقبل کی تعمیر میں حصہ لیں۔

انہوں نے امریکہ پر ایران کو تقسیم کرنے، اس کے سیاسی نظام کو ختم کرنے اور ایرانی تہذیب کو تباہ کرنے کی کوششوں کا الزام لگایا۔ امریکہ اور ایران کے درمیان کشیدگی کی تاریخ کا ذکر کرتے ہوئے انہوں نے 1953 میں وزیر اعظم محمد مصدق کی حکومت کا تختہ الٹنے کو ایران میں امریکی مداخلت کا نقطۂ آغاز قرار دیا۔ ان کے مطابق امریکہ نے بعد ازاں 1980 سے 1988 کی ایران۔عراق جنگ میں صدام حسین کی حمایت کی، ایران پر اقتصادی پابندیاں عائد کیں اور اسلامی جمہوریہ کو غیر مستحکم کرنے کی کوششوں کی پشت پناہی کی۔

انہوں نے جنوری 2020 میں بغداد میں امریکی ڈرون حملے کے ذریعے پاسدارانِ انقلاب کے کمانڈر قاسم سلیمانی کے قتل اور بعد کے تصادم میں ایرانی فوجی کمانڈروں اور سائنس دانوں کی ہلاکتوں کا بھی حوالہ دیا۔

دریں اثنا، ایران کی پاسدارانِ انقلاب کے سربراہ کے مشیر محمد مقدم فر نے خبردار کیا کہ اگر ایرانی قیادت کو نشانہ بنایا گیا تو تہران اعلیٰ امریکی فوجی اور سیاسی شخصیات کو نشانہ بنائے گا۔ انہوں نے کہا کہ ایران کا جواب اب نہ تو محض جوابی کارروائی تک محدود ہوگا اور نہ ہی حملے کے تناسب سے ہوگا، بلکہ امریکی اثاثوں کو کسی بھی وقت اور کسی بھی مقام پر نشانہ بنایا جائے گا۔

بندر عباس میں خطاب کرتے ہوئے انہوں نے متحدہ عرب امارات اور بحرین سمیت خلیجی ممالک کو بھی خبردار کیا کہ اگر انہوں نے اپنی سرزمین ایران پر حملوں کے لیے استعمال کرنے کی اجازت دی تو انہیں ایران کے وسیع تر ردعمل کا سامنا کرنا پڑ سکتا ہے۔

یو این آئی۔ ع ا۔