نئی دہلی، کانگریس نے وزیر اعظم نریندر مودی پر راہل گاندھی کی جانب سے بحث کا چیلنج قبول نہ کرنے کا الزام لگاتے ہوئے کہا ہے کہ وہ ‘ووٹ اور حقوق کی چوری’ کا دفاع نہیں کر سکتے، اسی لیے اس چیلنج کو قبول نہیں کر رہے ہیں۔

کانگریس کے جنرل سکریٹری کے سی وینوگوپال نے جمعہ کو سوشل میڈیا پلیٹ فارم ایکس پر کہا کہ ”مسٹر مودی بحث کا چیلنج اس لیے قبول نہیں کر رہے ہیں، کیونکہ وہ اپنے ووٹ اور حقوق کی چوری کا دفاع نہیں کر سکتے۔ کیا مودی یا امت شاہ میں اس کا دفاع کرنے کی ہمت ہے؟”

انہوں نے الزام لگایا کہ خامیوں اور دھاندلی سے بھرپور ایس آئی آر کی آڑ میں 13 کروڑ لوگوں کو ہندوستان کے فلاحی نظام سے باہر کر دیا گیا ہے۔

مسٹر وینوگوپال نے کہا کہ یہ سب ایسے وقت میں ہو رہا ہے، جب اڈانی اور امبانی روزانہ اربوں ڈالر کما رہے ہیں۔

یواین آئی۔ این یو۔

نئی دہلی، وزیر اعظم نریندر مودی نے جمعہ کو ملک کے عوام کو دھن تیرس کی دلی مبارک باد دی۔ انہوں نے بھگوان دھنونتری کا آشیرواد لیتے ہوئے ہر گھر میں خوشی، امن، خوشحالی اور اچھی صحت کی پرارتھنا کی۔

وزیر اعظم مسٹر مودی نے سوشل میڈیا پلیٹ فارم ایکس پر جاری اپنے پیغام میں امید ظاہر کی کہ بھگوان دھنونتری کی کرپا سے سب کی زندگی میں خوشی، امن اور اچھی صحت برقرار رہے۔ انہوں نے یہ بھی پراتھنا کی کہ ہر خاندان میں جوش و خروش اور خوشی کا چراغ ہمیشہ روشن رہے۔

مسٹر مودی نے کہاکہ ”میرے تمام ہم وطنوں کو دھن تیرس کی دلی مبارک باد۔ بھگوان دھنونتری کی کرپا سے سب کی زندگی میں خوشی، امن اور بہترین صحت کی روشنی ہمیشہ قائم رہے۔ ہر خاندان میں جوش و خروش اور خوشی کا چراغ ہمیشہ روشن رہے۔”

انہوں نے تہوار کی مبارک باد کے ساتھ بھگوان دھنونتری سے منسوب ایک سنسکرت پراتھنا بھی شیئر کی۔ ہندو روایت میں بھگوان دھنونتری کو دیویا ویدیا اور آیوروید اور طب کا دیوتا مانا جاتا ہے۔ ‘نمامی دھنونتریم آدی دیوم’ سے شروع ہونے والی اس پراتھنا میں بھگوان دھنونتری کو دیوتاؤں اور اسوروں کے ذریعے پوجے جانے والے اولین دیوتا کے طور پر بیان کیا گیا ہے۔ اس میں انہیں بیماری، بڑھاپے اور موت کے خوف سے نجات دلانے والے علاج کا الوہی سرچشمہ بتایا گیا ہے۔

واضح رہے کہ دھن تیرس، جسے دھن تریودشی کے نام سے بھی جانا جاتا ہے، 5 روزہ دیوالی کے تہوار کے آغاز کی علامت ہے۔ یہ تہوار ہندو کیلنڈر کے کارتک مہینے کے کرشن پکش کی تریودشی تِتھی کو منایا جاتا ہے۔ یہ تہوار روایتی طور پر دولت، خوشحالی اور خوش بختی سے وابستہ ہے۔

یو این آئی۔ این یو۔

نئی دہلی، لوک سبھا میں اپوزیشن کے رہنما راہل گاندھی نے مرکزی حکومت کی جانب سے سرکاری اسکیموں کے فوائد کو آدھار کارڈ کے بجائے ووٹر شناختی کارڈ سے جوڑنے کی تیاری پر سنگین سوالات اٹھائے ہیں۔

انہوں نے مرکزی وزیر للن سنگھ کی ایک ویڈیو شیئر کرتے ہوئے الزام لگایا کہ مودی حکومت ووٹر لسٹ کے ذریعے غریبوں کے حقوق کو کنٹرول کرنے اور جمہوری نظام کو کمزور کرنے کی سازش کر رہی ہے۔

مسٹر گاندھی نے کہا کہ ووٹر لسٹ سے خصوصی جامع نظرثانی (ایس آئی آر) کے نام پر کروڑوں لوگوں کے نام کاٹے جا رہے ہیں اور اگر اسے نہیں روکا گیا تو مستقبل میں مزید لوگوں کے نام ہٹا دیے جائیں گے۔ انہوں نے الزام لگایا کہ بنیادی طور پر ان لوگوں کو نشانہ بنایا جا رہا ہے، جن میں بھارتیہ جنتا پارٹی (بی جے پی) حکومت کے خلاف ناراضگی ہے۔

مسٹر گاندھی نے الیکشن کمیشن کی غیر جانب داری پر سوال اٹھاتے ہوئے چیف الیکشن کمشنر گیانیش کمار پر بی جے پی کے ساتھ ملی بھگت اور ووٹ چوری میں ملوث ہونے کا الزام لگایا۔ انہوں نے کہا کہ ایسی ووٹر لسٹ تیار کرنے کی کوشش کی جا رہی ہے، جس میں بی جے پی کی اکثریت یقینی ہو اور مستقبل میں اسی فہرست کی بنیاد پر سرکاری اسکیموں کے فوائد بھی طے کیے جائیں۔ انہوں نے خدشہ ظاہر کیا کہ آج پنچایتی راج کی اسکیموں کے فوائد کو ووٹر شناختی کارڈ سے جوڑنے کی بات ہو رہی ہے، کل راشن، پنشن، منریگا، رہائش، وظائف اور ریزرویشن جیسی سہولتوں پر بھی اس کا اثر پڑ سکتا ہے۔

کانگریس رہنما نے کہا کہ ووٹ دینا شہریوں کا آئینی حق ہے، کوئی شرط نہیں۔ کسی غریب کی پنشن اس کے ووٹر کارڈ کی محتاج نہیں ہو سکتی۔ انہوں نے الزام لگایا کہ یہ صرف ووٹ چوری نہیں، بلکہ لوگوں کے حقوق کی چوری ہے۔

انہوں نے خبردار کرتے ہوئے کہا کہ یہ انتخابات جیتنے کی سیاست نہیں، بلکہ انتخابات میں دھاندلی کرکے اقتدار میں برقرار رہنے کا مستقل انتظام ہے۔ کانگریس اس طرح کی کوششوں کو کامیاب نہیں ہونے دے گی۔

یو این آئی۔ این یو۔