نئی دہلی، وزیر اعظم نریندر مودی نے ہفتہ کے روز ہندوستانی خلائی تحقیقی ادارے (اسرو) کے سائنس دانوں اور انجینئروں کو اگلی نسل کے نیویگیشن سیٹلائٹ این وی ایس-03 کو لے جانے والے جی ایس ایل وی-ایف18 راکٹ کی کامیاب لانچنگ پر مبارک باد دی۔ انہوں نے اس مشن کو ہندوستان کے مقامی سیٹلائٹ نیویگیشن نظام ‘ناوِک’ کو مضبوط بنانے اور اہم ٹیکنالوجی کے شعبوں میں خود انحصاری حاصل کرنے کی سمت ایک اہم قدم قرار دیا۔

سوشل میڈیا پلیٹ فارم ایکس پر جاری اپنے پیغام میں مسٹر مودی نے کہا کہ اس مشن کی کامیابی ہندوستان کے خلائی سائنس دانوں کی لگن اور تکنیکی صلاحیتوں کا مظہر ہے۔ انہوں نے کہا، ”این وی ایس-03 کو لے جانے والے جی ایس ایل وی-ایف18 کی کامیاب لانچنگ پر اسرو کے ہمارے سائنس دانوں اور انجینئروں کو مبارک باد۔”

وزیر اعظم نے کہا، ”یہ مشن ہمارے مقامی سیٹلائٹ نیویگیشن نظام ناوِک کو مضبوط بنانے کی سمت ایک اہم قدم ہے۔ جدید صلاحیتوں سے لیس این وی ایس-03 اہم ٹیکنالوجی کے شعبوں میں خود انحصاری کی ہماری کوششوں کو آگے بڑھائے گا اور ایسی نیویگیشن خدمات کی فراہمی میں مدد کرے گا جن سے ہمارے عوام کو فائدہ پہنچے گا۔” انہوں نے مزید کہا کہ ہندوستان کے خلائی سائنس دانوں کی لگن اور جدت طرازی مسلسل ملک کا سر فخر سے بلند کر رہی ہے۔

یہ لانچنگ جمعہ کی رات 11 بج کر 51 منٹ پر آندھرا پردیش کے سری ہری کوٹہ میں واقع ستیش دھون خلائی مرکز کے دوسرے لانچ پیڈ سے کی گئی۔ جیو سنکرونس سیٹلائٹ لانچ وہیکل (جی ایس ایل وی-ایف18) نے 2,232 کلوگرام وزنی سیٹلائٹ این وی ایس-03 کو کامیابی کے ساتھ اس کے مقررہ جیو سنکرونس ٹرانسفر آربٹ (جی ٹی او) میں پہنچا دیا۔ اس کے ساتھ ہی ہندوستان کے خلائی پروگرام نے ایک اور اہم کامیابی حاصل کی۔

یہ مشن جی ایس ایل وی کی 20ویں پرواز اور 2026 میں اسرو کی تیسری خلائی لانچنگ تھی۔ تقریباً 50 میٹر بلند تین مرحلوں والے اس لانچ وہیکل نے تقریباً 18 منٹ میں اپنا مشن مکمل کرتے ہوئے نیویگیشن سیٹلائٹ کو مقررہ مدار میں پہنچا دیا۔

این وی ایس-03 اسرو کے اگلی نسل کے نیویگیشن سیٹلائٹ سلسلے کا تیسرا سیٹلائٹ ہے۔ اسے ہندوستانی علاقائی سیٹلائٹ نیویگیشن نظام (آئی آر این ایس ایس) کی خدمات کو جاری رکھنے، ان کی درستگی بڑھانے اور اعتبار کو بہتر بنانے کے مقصد سے تیار کیا گیا ہے۔ یہ نظام عام طور پر ناوِک یعنی نیویگیشن ود انڈین کانسٹیلیشن کے نام سے مشہور ہے۔

یو این آئی۔ایم جے

نئی دہلی، صدر جمہوریہ ہند دروپدی مرمو، نائب صدر سی پی رادھا کرشنن، وزیر داخلہ امت شاہ اور دہلی کے لیفٹیننٹ گورنر ترنجیت سنگھ سندھو نے ملک کے پہلے وزیر داخلہ سردار ولبھ بھائی پٹیل کی یوم پیدائش کے موقع پر ان کے مجسمے پر پھول چڑھا کر انہیں خراج عقیدت پیش کیا۔

محترمہ مرمو اور مسٹر رادھا کرشنن سمیت تمام معزز شخصیات نے ہفتہ کی صبح سویرے پٹیل چوک پر واقع مرد آہن سردار پٹیل کے مجسمے پر پھول چڑھائے۔ نئی دہلی سے بھارتیہ جنتا پارٹی کی رکن پارلیمنٹ بانسری سوراج نے بھی سردار پٹیل کو خراج عقیدت پیش کیا۔

محترمہ مرمو نے اپنے پیغام میں کہا، ”مرد آہن سردار ولبھ بھائی پٹیل کی 151ویں یوم پیدائش پر میں انہیں عاجزانہ خراج عقیدت پیش کرتی ہوں۔ تحریک آزادی کے صف اول کے رہنما اور جدید ہندوستان کے اہم معمار کی حیثیت سے ان کا تعاون ناقابل فراموش ہے۔ انہوں نے ملک کے اتحاد اور ایک مضبوط انتظامی نظام کی تشکیل میں تاریخی کردار ادا کیا۔ ملک کے اتحاد اور سالمیت کے لیے ان کی بے مثال خدمات کے احترام میں ہم ان کی یوم پیدائش کو قومی یومِ اتحاد کے طور پر مناتے ہیں۔ میری خواہش ہے کہ ان کی زندگی اور اصولوں سے ترغیب حاصل کرکے تمام ہم وطن ترقی یافتہ ہندوستان کی تعمیر کے لیے عزم کے ساتھ کام کریں۔”

اس کے بعد مسٹر شاہ نے میجر دھیان چند اسٹیڈیم سے یونٹی رن کو ہری جھنڈی دکھا کر روانہ کیا۔

آج پورے ملک میں سردار پٹیل کی 151ویں یوم پیدائش منائی جا رہی ہے۔ اس دن کو قومی یومِ اتحاد کے طور پر منایا جاتا ہے۔

وزیر اعظم نریندر مودی قومی یومِ اتحاد کے موقع پر آج شام گجرات کے ایکتا نگر میں واقع اسٹیچو آف یونٹی پر منعقد ہونے والے شاندار پروگرام میں شرکت کریں گے۔

یو این آئی۔ ایم جے

نئی دہلی، انڈیا اتحاد کی یکم نومبر کو یہاں ہونے والی عظیم الشان ریلی سے قبل اتحاد کے رہنماؤں نے جمعہ کو کہا کہ وہ جمہوریت اور آئین کے تحفظ کے لیے متحد ہیں اور عوام کے حق رائے دہی کے تحفظ کی لڑائی مل کر لڑیں گے۔

لوک سبھا میں قائد حزب اختلاف راہل گاندھی نے چیف الیکشن کمشنر گیانیش کمار کے خلاف مبینہ عوامی مواخذے کی مہم شروع ہونے سے پہلے آج یہاں انڈیا اتحاد کے رہنماؤں کے ساتھ میڈیا سے خطاب کرتے ہوئے کہا کہ رام لیلا میدان میں ہونے والی ریلی میں لوگوں کی شرکت اور انہیں دہلی آنے سے روکنے کی کوششوں سے ملک کی صورت حال کا اندازہ ہوگا۔ انہوں نے الزام لگایا کہ لاکھوں لوگوں کو حق رائے دہی سے محروم کیا جا رہا ہے اور ان کے ووٹ چھینے جا رہے ہیں۔

مسٹر گاندھی نے الزام لگایا کہ یہ سب صنعت کار گوتم اڈانی، مکیش امبانی، وزیر اعظم نریندر مودی، وزیر داخلہ امت شاہ اور آر ایس ایس کے سربراہ موہن بھاگوت کو فائدہ پہنچانے کے لیے کیا جا رہا ہے۔ انہوں نے کہا کہ یہ الگ الگ احتجاجی مظاہرے نہیں ہیں، بلکہ ایک مشترکہ تحریک ہے، جس میں پوری اپوزیشن متحد ہو کر کھڑی ہے۔ انہوں نے کہا کہ آئین، ہندوستان کے تصور اور ہر ہندوستانی کے حق رائے دہی کے تحفظ کے لیے سبھی کو متحد ہونا چاہیے۔

مسٹر گاندھی نے الزام لگایا کہ مرکزی حکومت اتر پردیش، بہار، مدھیہ پردیش، راجستھان، ہریانہ، تلنگانہ اور پنجاب سے ریلی میں شرکت کے لیے دہلی آنے والے پارٹی کارکنوں اور عام لوگوں کو روکنے کی کوشش کر رہی ہے۔

ترنمول کانگریس کے رکن پارلیمنٹ ڈیرک اوبرائن نے کہا کہ اس لڑائی میں سبھی ایک ساتھ ہیں اور وہ مل کر کامیابی حاصل کریں گے۔

سماجوادی پارٹی کے رکن پارلیمنٹ دھرمیندر یادو نے کہا کہ یہ ایک اہم لڑائی ہے اور اس میں سماجوادی پارٹی کے سربراہ اکھلیش یادو سمیت پارٹی کے تمام اہم رہنما حصہ لیں گے۔

یواین آئی۔ ایف اے