واشنگٹن، وسط مدتی انتخابات میں ریپبلکن پارٹی کی بھاری شکست کے بعد امریکی وزیر دفاع پیٹ ہیگسیتھ کو ٹرمپ انتظامیہ کے اندر بڑھتے دباؤ کا سامنا ہے۔ ایران جنگ، کانگریس کے ساتھ بگڑتے تعلقات اور مواخذے کے امکانات نے ان کے عہدے کو خطرے میں ڈال دیا ہے۔

امریکی ویب سائٹ ‘ایگزیوس’ کو ٹرمپ کے ایک مشیر نے بتایا کہ ہیگسیتھ کی پوزیشن ”یقینی طور پر کمزور ہوچکی ہے”، تاہم اس کا لازمی مطلب یہ نہیں کہ صدر انہیں عہدے سے ہٹانے کا فیصلہ کرچکے ہیں۔ مشیر نے مزید کہا کہ اس معاملے میں کئی پیچیدگیاں ہیں۔

ایوان نمائندگان آئندہ ہفتے ہی ہیگسیتھ کے خلاف مواخذے کی کارروائی شروع کرسکتا ہے۔ ان پر الزام ہے کہ انہوں نے کانگریس کی ہدایات کی خلاف ورزی کرتے ہوئے ایران کے خلاف امریکی فوجی مہم غیر قانونی طور پر جاری رکھی۔ اس سلسلے میں کینٹکی سے ریپبلکن رکن کانگریس تھامس میسی نے مواخذے کی تحریک پیش کی ہے، جو اسرائیل اور بیرون ملک امریکی فوجی مداخلتوں کے نمایاں ناقد ہیں۔

ایران جنگ مواخذے کی کوششوں اور ریپبلکن پارٹی کی انتخابی شکست دونوں کا مرکزی موضوع بن گئی ہے۔ جنگ کی مخالفت اور ایران کی جانب سے آبنائے ہرمز بند کیے جانے کے بعد پٹرول کی بڑھتی قیمتوں نے ووٹروں میں ناراضگی پیدا کی ہے۔

ذرائع کے مطابق 28 فروری کو ٹرمپ کی جانب سے ایران پر حملوں کا حکم دیے جانے سے قبل ہیگسیتھ فوجی کارروائی کے سب سے مضبوط حامیوں میں شامل تھے اور انہوں نے تنازع جلد ختم ہونے کے حوالے سے انتظامیہ کے اندر انتہائی پرامید اندازے پیش کیے تھے۔تاہم اطلاعات کے مطابق امریکی سینٹرل کمانڈ نے اگست تک تہران پر دباؤ بڑھانے کے متبادل طریقوں کی تلاش شروع کردی تھی، جس سے ظاہر ہوتا ہے کہ فوجی حکام انتظامیہ کے مقاصد کے حصول کی حکمت عملی پر نظرثانی کر رہے تھے۔

ذرائع کے مطابق فوج کے اندر اس بحث نے یہ سوال بھی اٹھایا کہ ہیگسیتھ کو کب احساس ہوا کہ ابتدائی حکمت عملی سے وہ نتائج حاصل ہونا مشکل ہیں جن کی انہوں نے توقع کی تھی۔

ٹرمپ نے بدھ کو عوامی طور پر اپنے وزیر دفاع کی حمایت کرتے ہوئے صحافیوں سے کہا کہ ہیگسیتھ ”بہت اچھا کام کر رہے ہیں”۔ تاہم صدر ماضی میں بھی کابینہ کے ان ارکان کی حمایت کرچکے ہیں جنہیں تنقید کا سامنا تھا، لیکن بعد میں انہیں عہدہ چھوڑنے کے لیے کہا گیا۔

ہیگسیتھ کی پوزیشن کو کمزور کرنے والے چار اہم عوامل ہیں۔

ڈیموکریٹس اس سے قبل بھی ہیگسیتھ کے مواخذے کی کوشش کرچکے ہیں اور جنوری میں ایوان نمائندگان میں اپنی نئی اکثریت کے بعد وہ ان کوششوں کو مزید تیز کرسکتے ہیں۔ مواخذے کی طویل کارروائی سے ان کی وزارت کے دوران کارکردگی اور ایران کے خلاف فوجی کارروائی شروع کرنے کے انتظامیہ کے فیصلے پر بھی نئے سرے سے سوالات اٹھ سکتے ہیں۔

انتظامیہ کے ایک عہدیدار نے ‘ایگزیوس’ کو بتایا کہ اگر ایران جنگ نہ ہوتی تو ریپبلکن پارٹی کی انتخابی کارکردگی کہیں بہتر ہوتی۔

جاری ۔ یو این آئی۔ ع ا۔

تہران، ایران کی پارلیمنٹ کے اسپیکر محمد باقر قالیباف نے جمعرات کو امریکی صدر ڈونالڈ ٹرمپ پر الزام عائد کیا کہ وہ ایران کے خلاف جنگ کے اگلے مرحلے کی تیاری کر رہے ہیں، جبکہ امریکی نائب صدر جے ڈی وینس نے وسط مدتی انتخابات میں ریپبلکن پارٹی کی شکست کے بعد تنازع ختم کرنے کی اپیل کی ہے۔

قالیباف نے سوشل میڈیا پلیٹ فارم ‘ایکس’ پر ایک سخت بیان میں وینس کے اس اعتراف کو نشانہ بنایا، جس میں انہوں نے کہا تھا کہ ایران کے ساتھ جنگ نے ریپبلکن پارٹی کی انتخابی شکست میں اہم کردار ادا کیا ہے۔

قالیباف نے سوال اٹھایا کہ نائب صدر اپنی اس رائے سے براہ راست ٹرمپ کو آگاہ کیوں نہیں کرتے۔

قالیباف نے لکھا، ”ہارنے والے جواری کی کیفیت ہے، جو میز سے اٹھنے کو تیار نہیں۔ ادھر امریکہ اسرائیل کو اولین ترجیح دینے کے راستے پر تباہی کے دہانے پر کھڑا ہے اور ان کا سربراہ جنگ کے اگلے مرحلے کی تیاری کر رہا ہے۔ طویل تقریر کی ضرورت نہیں، یہ بات اپنے سربراہ سے کیوں نہیں کہتے؟”

ان کا یہ بیان وینس کے اس اعتراف کے بعد سامنے آیا ہے کہ ایران کے خلاف جنگ اور اسرائیل کے ساتھ واشنگٹن کے تعلقات نے ان بعض ووٹروں کو ناراض کیا ہے، جنہوں نے 2024 کے صدارتی انتخابات میں ٹرمپ کی حمایت کی تھی۔

ریپبلکن پارٹی کی انتخابی شکست کا تفصیلی جائزہ لیتے ہوئے وینس نے ووٹروں کی جانب سے ڈیموکریٹس کی حمایت کی چار بڑی وجوہات بیان کیں۔ ان میں ایران کے ساتھ جنگ ختم کرنا، مہنگائی اور روزمرہ اخراجات کے بحران پر قابو پانا، ‘امریکہ فرسٹ’ پالیسی کی بحالی اور اسرائیل کے ساتھ امریکی تعلقات پر نظرثانی شامل ہیں۔

وینس نے لکھا، ”ہمارے ووٹر ووٹ ڈالنے کے لیے باہر آئے۔ مذکورہ چار وجوہات ہی ہیں جن کی بنا پر ان میں سے بہت سے لوگوں نے ڈیموکریٹس کو ووٹ دیا۔”

انہوں نے جنگ کے سیاسی اثرات کا ذکر کرتے ہوئے واضح طور پر کہا، ”ہماری شکست کی وجہ جنگ ہے۔ صدر نے خود گزشتہ رات یہ بات کہی تھی۔”

وینس کے اس تجزیے کے بارے میں پوچھے جانے پر ٹرمپ نے اعتراف کیا کہ تنازع نے ایندھن کی قیمتوں کو متاثر کیا ہے، تاہم انہوں نے فوجی کارروائی شروع کرنے کے فیصلے پر کسی پشیمانی کا اظہار نہیں کیا۔

ٹرمپ نے کہا، ”یہ بات بڑی حد تک درست ہے، کیونکہ ایران کے ساتھ جنگ کی وجہ سے پٹرول کی قیمتوں میں کچھ اضافہ ہوا ہے۔ تاہم اگر مجھے دوبارہ یہ فیصلہ کرنا پڑے تو میں پھر بھی یہی کروں گا۔”

وینس کے بیان سے ایران کے خلاف انتظامیہ کی فوجی کارروائی اور اسرائیل کے ساتھ اس کی قریبی وابستگی کے اندرون ملک سیاسی اثرات کا اعتراف ظاہر ہوتا ہے۔

منگل کو ہونے والے وسط مدتی انتخابات میں ڈیموکریٹک پارٹی نے امریکی ایوان نمائندگان اور سینیٹ دونوں میں اکثریت حاصل کرلی، جس کے نتیجے میں ٹرمپ کی صدارت کے باقی دو برسوں کے لیے کانگریس پر ریپبلکن پارٹی کا کنٹرول ختم ہوگیا۔

یو این آئی ۔ ع ا۔

ریاض، شام کے صدر احمد الشرع اور سعودی عرب کے ولی عہد شہزادہ محمد بن سلمان نے دفاعی تعاون کے معاہدے سمیت متعدد سمجھوتوں پر دستخط کی نگرانی کی ہے۔ اس کے علاوہ سعودی عرب نے شام کے توانائی، رہائش، صحت اور بنیادی ڈھانچے کے شعبوں کے لیے 40 کروڑ 30 لاکھ ڈالر سے زائد کے قرضے فراہم کرنے پر بھی اتفاق کیا ہے۔

یہ معاہدے بدھ کو صدر احمد الشرع کے ایک ماہ سے بھی کم عرصے میں ریاض کے دوسرے دورے کے موقع پر طے پائے۔

شام کی وزارت خارجہ نے دونوں ملکوں کی وزارت دفاع کے درمیان ہونے والے تعاون کے معاہدے کو ان سمجھوتوں میں ”سب سے اہم” قرار دیا، تاہم اس کی تفصیلات ظاہر نہیں کیں۔

یہ دفاعی معاہدہ ایسے وقت میں ہوا ہے جب چند روز قبل شام کے وزیر خارجہ اسعد الشیبانی نے کہا تھا کہ ان کی حکومت سعودی عرب، ترکیہ اور پاکستان کے درمیان مجوزہ مشترکہ دفاعی معاہدے میں شامل ہونے کے امکان کا جائزہ لے رہی ہے۔،۔۔۔۔

الشیبانی نے ہفتے کو بحرین میں سلامتی سے متعلق کانفرنس ‘منامہ ڈائیلاگ’ سے خطاب کرتے ہوئے کہا تھا، ”مکہ اتحاد میں شام کی شمولیت کے امکانات کا جائزہ لینے کے لیے فی الحال بات چیت جاری ہے۔”

سعودی عرب نے یمن میں حوثیوں کے خلاف ایک بار پھر شروع ہونے والی جنگ کے تناظر میں دفاعی اور جارحانہ دونوں طرح کی مدد کے لیے امریکہ، یورپی اور مشرق وسطیٰ کے ممالک سے تعاون طلب کیا ہے۔

حوثی گروپ نے یمن کی بین الاقوامی طور پر تسلیم شدہ حکومت کے حامی فورسز کے ساتھ ملک پر کنٹرول کی لڑائی کے دوران سعودی عرب کے ہوائی اڈوں اور تیل کی تنصیبات کو نشانہ بنایا ہے۔

شام کی وزارت خارجہ نے سوشل میڈیا پلیٹ فارم ایکس پر جاری بیان میں کہا کہ ریاض میں ہونے والی ملاقات کے دوران صدر احمد الشرع اور شہزادہ محمد بن سلمان نے موجودہ علاقائی اور بین الاقوامی صورت حال پر تبادلہ خیال کیا۔

بیان کے مطابق بات چیت میں فوجی کشیدگی کے علاقائی سلامتی پر اثرات، بین الاقوامی بحری جہاز رانی کا تحفظ، توانائی کی قابل اعتماد فراہمی اور عالمی معیشت کے استحکام جیسے امور شامل تھے۔

دونوں رہنماؤں نے کشیدگی میں کمی اور تنازعات کے پرامن حل کی ضرورت پر زور دیا۔ انہوں نے بحیرہ احمر، آبنائے باب المندب اور آبنائے ہرمز میں بحری جہاز رانی کی سلامتی کو خطرے میں ڈالنے والی تمام سرگرمیاں فوری طور پر بند کرنے کی اپیل بھی کی۔

شام کے سیاسی امور کے محقق احمد قاسم نے الجزیرہ سے گفتگو کرتے ہوئے کہا کہ مختصر عرصے میں احمد الشرع کا دوسری بار سعودی عرب کا دورہ خطے اور شام کو درپیش سکیورٹی چیلنجوں کی سنگینی کو ظاہر کرتا ہے۔انہوں نے کہا کہ شام کو مکہ دفاعی اتحاد میں شامل ہونا چاہیے، کیونکہ ملک کو اپنی خودمختاری کے تحفظ اور اس کی سرزمین میں اسرائیل کی بڑھتی ہوئی دراندازی روکنے کے لیے ایک مضبوط ”بازدار قوت” کی ضرورت ہے۔

صدر احمد الشرع کے دورے کے دوران سعودی فنڈ برائے ترقی نے بھی شام کی وزارت خزانہ کے ساتھ چھ معاہدوں کے تحت 40 کروڑ 30 لاکھ ڈالر کے قرضے رعایتی شرائط پر فراہم کرنے پر اتفاق کیا۔

سعودی سرکاری خبر رساں ایجنسی کے مطابق ان قرضوں میں تباہ شدہ طبی مراکز کی تعمیر نو اور انہیں جدید سہولتوں سے آراستہ کرنے کے لیے 10 کروڑ ڈالر، متاثرہ رہائشی عمارتوں کی مرمت کے لیے 6 کروڑ ڈالر، شہری دفاع کو مضبوط بنانے کے لیے 10 کروڑ 50 لاکھ ڈالر، حلب کے تھرمل پاور پلانٹ کی بحالی کے لیے 9 کروڑ ڈالر اور دمشق و ادلب میں پینے کے پانی کے نظام کی ترقی کے لیے 3 کروڑ ڈالر شامل ہیں۔

کروڑ ڈالر اور دمشق و ادلب میں پینے کے پانی کے نظام کی ترقی کے لیے 3 کروڑ ڈالر شامل ہیں۔
دونوں حکومتوں نے صنعتی تعاون سے متعلق ایک مفاہمت کی یادداشت پر بھی دستخط کیے، جبکہ زراعت اور ماحولیاتی تحفظ کے شعبوں میں مزید دو مفاہمتی یادداشتوں پر اتفاق کیا۔

دسمبر 2024 میں بشار الاسد کی حکومت کے خاتمے اور احمد الشرع کے اقتدار میں آنے کے بعد سے سعودی عرب شام کی نئی حکومت کا اہم حامی رہا ہے۔

دونوں رہنماؤں کی اس سے قبل 6 اکتوبر کو ریاض میں ملاقات ہوئی تھی۔ شامی ایوان صدر کے مطابق اس ملاقات میں شام کی تعمیر نو کے منصوبوں، تباہ شدہ بنیادی ڈھانچے اور ضروری سہولتوں کی بحالی پر تبادلہ خیال کیا گیا تھا۔

یو این آئی۔ع ا۔