نئی دہلی، کانگریس نے وزیر اعظم نریندر مودی پر راہل گاندھی کی جانب سے بحث کا چیلنج قبول نہ کرنے کا الزام لگاتے ہوئے کہا ہے کہ وہ ‘ووٹ اور حقوق کی چوری’ کا دفاع نہیں کر سکتے، اسی لیے اس چیلنج کو قبول نہیں کر رہے ہیں۔

کانگریس کے جنرل سکریٹری کے سی وینوگوپال نے جمعہ کو سوشل میڈیا پلیٹ فارم ایکس پر کہا کہ ”مسٹر مودی بحث کا چیلنج اس لیے قبول نہیں کر رہے ہیں، کیونکہ وہ اپنے ووٹ اور حقوق کی چوری کا دفاع نہیں کر سکتے۔ کیا مودی یا امت شاہ میں اس کا دفاع کرنے کی ہمت ہے؟”

انہوں نے الزام لگایا کہ خامیوں اور دھاندلی سے بھرپور ایس آئی آر کی آڑ میں 13 کروڑ لوگوں کو ہندوستان کے فلاحی نظام سے باہر کر دیا گیا ہے۔

مسٹر وینوگوپال نے کہا کہ یہ سب ایسے وقت میں ہو رہا ہے، جب اڈانی اور امبانی روزانہ اربوں ڈالر کما رہے ہیں۔

یواین آئی۔ این یو۔

دہرادون، مرکزی وزیر داخلہ و امدادِ باہمی امت شاہ نے جمعہ کو کہا کہ 2047 تک ترقی یافتہ ہندوستان کی تعمیر کے سفر میں اتراکھنڈ پہلا پڑاؤ ثابت ہوگا۔

امت شاہ نے آج اتراکھنڈ کے دارالحکومت دہرادون کے پریڈ گراؤنڈ میں منعقدہ ریاستی یومِ تاسیس کی تقریب میں مہمان خصوصی کی حیثیت سے شرکت کی۔ اس موقع پر انہوں نے ریاست کی ترقی سے متعلق 1475 کروڑ روپے کی لاگت والی 62 ترقیاتی اسکیموں کا افتتاح اور سنگ بنیاد رکھا۔

انہوں نے اتراکھنڈ فلم پالیسی کے تحت اعلان کردہ لائف ٹائم اچیومنٹ ایوارڈ کے علاوہ مختلف شخصیات کو ‘اتراکھنڈ گورو سمان’ اور ‘وزیراعلیٰ ریاستی بہادری ایوارڈ برائے اطفال’ بھی پیش کیے۔

امت شاہ نے کہا کہ اتراکھنڈ کا یومِ تاسیس فخر، کامیابی اور عزم کے طور پر منایا جارہا ہے۔ فخر اس بات کا ہے کہ سابق وزیراعظم اٹل بہاری واجپائی نے اتراکھنڈ ریاست کی تشکیل کی۔ کامیابی اس پیش رفت کا نام ہے جو وزیراعظم نریندر مودی اور ریاست کے وزیراعلیٰ پشکر سنگھ دھامی کی قیادت میں ترقی یافتہ اتراکھنڈ کی تعمیر کے لیے کی جارہی ہے، جبکہ عزم ریاست کے ثقافتی ورثے اور ماحولیات کے تحفظ کا ہے۔

مرکزی وزیر داخلہ نے کہا کہ بہادری اتراکھنڈ کے عوام کی پہچان رہی ہے۔ نئی نسل کو ویرانگنا تِیلو راوتیلی، ویر مادھو سنگھ بھنڈاری، وکٹوریہ کراس یافتہ دربان سنگھ نیگی اور گبر سنگھ نیگی، ویر چندر سنگھ گڑھوالی اور جنرل بپن راوت کے نقش قدم پر چلنے کا عزم کرنا چاہیے۔

انہوں نے کہا کہ ان کا تعلق گجرات سے ہے، جہاں یہ عقیدہ پایا جاتا ہے کہ چار دھام کی یاترا کے بغیر انسان کو نجات حاصل نہیں ہوتی۔ آج انہیں بھگوان بدری وشال، بابا کیدارناتھ، گنگوتری، یمونوتری، سکھوں کے مقدس تیرتھ استھل ہیم کنڈ صاحب اور کمبھ نگری ہریدوار کی مقدس سرزمین، دیو بھومی آنے کا موقع ملا ہے۔

سابق وزیراعظم بھارت رتن آنجہانی اٹل بہاری واجپائی کو خراج عقیدت پیش کرتے ہوئے انہوں نے کہا کہ اٹل جی نے اتراکھنڈ ریاست کی تشکیل کرکے ریاستی تحریک کے کارکنوں کے خوابوں کو شرمندہ تعبیر کیا، جبکہ آج وزیراعظم نریندر مودی اتراکھنڈ کو ترقی کی نئی بلندیوں تک پہنچانے کا کام کررہے ہیں۔

مرکزی وزیر نے کہا کہ گزشتہ دس برسوں کے دوران اتراکھنڈ کی ترقی کی رفتار میں تیزی آئی ہے۔ انہوں نے کہا کہ اس تقریب میں مختلف شعبوں کی ممتاز شخصیات کو اعزازات سے نوازا جارہا ہے، جو اس بات کا ثبوت ہے کہ ریاستی حکومت ترقی کے سفر میں تعاون کرنے والے ہر فرد کی خدمات کا اعتراف کرتی ہے۔

یواین آئی۔ ظا

نئی دہلی، وزیر اعظم نریندر مودی نے جمعہ کو ملک کے عوام کو دھن تیرس کی دلی مبارک باد دی۔ انہوں نے بھگوان دھنونتری کا آشیرواد لیتے ہوئے ہر گھر میں خوشی، امن، خوشحالی اور اچھی صحت کی پرارتھنا کی۔

وزیر اعظم مسٹر مودی نے سوشل میڈیا پلیٹ فارم ایکس پر جاری اپنے پیغام میں امید ظاہر کی کہ بھگوان دھنونتری کی کرپا سے سب کی زندگی میں خوشی، امن اور اچھی صحت برقرار رہے۔ انہوں نے یہ بھی پراتھنا کی کہ ہر خاندان میں جوش و خروش اور خوشی کا چراغ ہمیشہ روشن رہے۔

مسٹر مودی نے کہاکہ ”میرے تمام ہم وطنوں کو دھن تیرس کی دلی مبارک باد۔ بھگوان دھنونتری کی کرپا سے سب کی زندگی میں خوشی، امن اور بہترین صحت کی روشنی ہمیشہ قائم رہے۔ ہر خاندان میں جوش و خروش اور خوشی کا چراغ ہمیشہ روشن رہے۔”

انہوں نے تہوار کی مبارک باد کے ساتھ بھگوان دھنونتری سے منسوب ایک سنسکرت پراتھنا بھی شیئر کی۔ ہندو روایت میں بھگوان دھنونتری کو دیویا ویدیا اور آیوروید اور طب کا دیوتا مانا جاتا ہے۔ ‘نمامی دھنونتریم آدی دیوم’ سے شروع ہونے والی اس پراتھنا میں بھگوان دھنونتری کو دیوتاؤں اور اسوروں کے ذریعے پوجے جانے والے اولین دیوتا کے طور پر بیان کیا گیا ہے۔ اس میں انہیں بیماری، بڑھاپے اور موت کے خوف سے نجات دلانے والے علاج کا الوہی سرچشمہ بتایا گیا ہے۔

واضح رہے کہ دھن تیرس، جسے دھن تریودشی کے نام سے بھی جانا جاتا ہے، 5 روزہ دیوالی کے تہوار کے آغاز کی علامت ہے۔ یہ تہوار ہندو کیلنڈر کے کارتک مہینے کے کرشن پکش کی تریودشی تِتھی کو منایا جاتا ہے۔ یہ تہوار روایتی طور پر دولت، خوشحالی اور خوش بختی سے وابستہ ہے۔

یو این آئی۔ این یو۔