سری نگر، جموں و کشمیر اسکول ایجوکیشن بورڈ (جے کے بی اوایس ای) نے دسویں، گیارہویں اور بارہویں جماعت کے امتحانی نتائج 10 جنوری تک جاری کرنے کا ہدف مقرر کیا ہے۔

جے کے بی او ایس ای کے چیئرمین غلام حسن شیخ نے کہا کہ بورڈ فی الحال جاری امتحانات کی تکمیل کے بعد مقررہ مدت کے اندر نتائج کا اعلان کرنے کی کوشش کر رہا ہے۔ پیر کے روز ایک تقریب کے دوران صحافیوں سے گفتگو کرتے ہوئے انہوں نے کہا، “آخری پرچے کے بعد پریکٹیکل امتحانات اور ووکیشنل مضامین کے انعقاد میں تقریباً آٹھ سے دس دن کا وقت لگتا ہے۔ ہم 10 جنوری تک تمام کلاسوں کے نتائج کا اعلان کرنے کی پوری کوشش کریں گے۔”

تاہم انہوں نے آگاہ کیا کہ کچھ عوامل اس وقت کی حد کو متاثر کر سکتے ہیں، جس کی وجہ سے نتائج کے اعلان کی تاریخ کے بارے میں سو فیصد یقین کے ساتھ کچھ کہنا مشکل ہو جاتا ہے۔ فی الحال جاری امتحانات کے بارے میں مسٹر شیخ نے بتایا کہ دسویں جماعت کے بنیادی مضامین کے امتحانات مکمل ہو چکے ہیں اور اب صرف کچھ اضافی اور پیشہ ورانہ مضامین کے امتحانات باقی ہیں۔ بارہویں جماعت کے بھی بیشتر بنیادی امتحانات ہو چکے ہیں جبکہ گیارہویں جماعت کے امتحانات جاری ہیں، جن میں ہر شعبے کے تین تین پرچے مکمل ہو چکے ہیں۔ انہوں نے کہا کہ امتحانات خوش اسلوبی سے جاری ہیں۔

مسٹر شیخ نے یہ بھی بتایا کہ سرکاری اسکولوں میں پہلی سے آٹھویں جماعت تک کے طلباء میں مفت نصابی کتب کی تقسیم تعلیمی سیشن کے آغاز کے ساتھ ہی شروع ہو چکی ہے۔ انہوں نے کہا کہ کئی برسوں میں یہ پہلا موقع ہے کہ اس طرح کا عمل بروقت شروع ہوا ہے۔

انہوں نے مزید کہا کہ پورے کشمیر میں کتابوں کی تقسیم کا کام آٹھ سے دس دنوں کے اندر مکمل کر لیا جائے گا، جس کے تحت زونل ایجوکیشن افسران کو کتابیں فراہم کی جائیں گی تاکہ وہ انہیں آگے اسکولوں میں تقسیم کر سکیں۔ چیئرمین کے مطابق، جموں و کشمیر کے سرکاری اسکولوں میں تقریباً 8.2 لاکھ طلباء مفت نصابی کتب اسکیم کے دائرے میں آتے ہیں، جن میں کشمیر ڈویژن کے تقریباً 3.31 لاکھ طلباء شامل ہیں۔

یواین آئی۔الف الف

سرینگر، انفورسمنٹ ڈائریکٹوریٹ (ای ڈی) نے جموں و کشمیر میں پی ایم امپلائی جنریشن پروگرام (پی ایم ای جی پی) اسکیم کے مبینہ غلط استعمال کے معاملے میں سرینگر اور باندی پورہ اضلاع میں 10.63 کروڑ روپے کی 11 غیر منقولہ جائیدادوں کو عارضی طور پر ضبط کرلیا ہے۔

حکام نے پیر کو یہ اطلاع دی۔ ای ڈی کے سرینگر علاقائی دفتر نے انسداد منی لانڈرنگ ایکٹ (پی ایم ایل اے)، 2002 کے تحت ضبطی کا یہ عارضی حکم جاری کیا ہے۔ اس کے تحت ان زمینوں اور عمارتوں کو ضبط کیا گیا ہے، جن کی ملکیت مبینہ طور پر اسکیم کے غلط استعمال میں ملوث سپلائروں اور درمیانی افراد کے علاوہ جموں و کشمیر بینک کے ایک افسر کے نام بتائی گئی ہے۔

ای ڈی نے بتایا کہ انسداد بدعنوانی بیورو اور مرکزی تفتیشی بیورو (سی بی آئی)، سرینگر کی دو ایف آئی آر کی بنیاد پر تحقیقات شروع کی گئی تھیں۔ ان ایف آئی آر میں الزام لگایا گیا ہے کہ پی ایم ای جی پی اسکیم کے تحت دیے گئے قرض کی رقم کا غلط استعمال کیا گیا۔

الزام ہے کہ اس مجرمانہ سازش میں پی ایم ای جی پی کے تحت قرض لینے والے مستفیدین، جموں و کشمیر بینک کی سمبل اور گاموڑ گڈکھوڑ شاخوں کے افسران اور دیگر نامعلوم افراد نے ملی بھگت کرکے بینک کو دھوکہ دیا۔ اس کے نتیجے میں بینک کی رقم کا غبن ہوا اور بینک کو مالی نقصان پہنچا کر ملزمان نے خود ناجائز فائدہ حاصل کیا۔

تحقیقات میں مبینہ طور پر سامنے آیا کہ فرضی مستفیدین کے نام پر ان کی شناخت اور پتے سے متعلق دستاویزات (کے وائی سی) کا استعمال کرکے دھوکہ دہی سے قرض حاصل کیے گئے۔ اس کے لیے ایسی کمپنیوں کے فرضی بل استعمال کیے گئے، جن کا حقیقت میں کوئی وجود نہیں تھا۔ الزام ہے کہ بینک افسران اور نجی سپلائروں اور درمیانی افراد کی ملی بھگت سے ان قرضوں کی منظوری دلائی گئی تھی۔

ای ڈی نے انسداد منی لانڈرنگ ایکٹ (پی ایم ایل اے) کی دفعہ 16 کے تحت جموں و کشمیر بینک کی دونوں شاخوں میں تلاشی اور سروے کے دوران پایا کہ پی ایم ای جی پی اسکیم سے منسلک 270 مدتی قرض کے کھاتے اور اتنی ہی تعداد میں ورکنگ کیپیٹل قرض کے کھاتے غیر فعال اثاثوں (این پی اے) میں تبدیل ہوگئے ہیں۔ ان کھاتوں میں تقریباً 32 کروڑ روپے کی بقایا رقم شامل ہے۔

ای ڈی نے بتایا کہ تحقیقات میں ہلال احمد وانی اور دیگر افراد کا مبینہ طور پر اس دھوکہ دہی میں اہم رول سامنے آیا ہے۔ الزام ہے کہ قرض لینے والوں کو ان کی دستاویزات کا استعمال کرکے پی ایم ای جی پی کے تحت قرض لینے کے لیے تیار کیا گیا۔ وہیں، قرض کی رقم جاری کرانے کے لیے ایسی فرضی کمپنیوں کے بل استعمال کیے گئے، جو سپلائروں، درمیانی افراد یا ان کے اہل خانہ کے نام پر رجسٹرڈ تھیں، لیکن حقیقت میں ان کا کوئی وجود نہیں تھا۔

تحقیقاتی ایجنسی نے اب تک 11.37 کروڑ روپے کی مجرمانہ آمدنی کا پتہ لگایا ہے۔ الزام ہے کہ اس رقم کو کئی بینک کھاتوں کے ذریعے ایک جگہ سے دوسری جگہ منتقل کیا گیا اور اس کا ایک حصہ ملزمان کے اہل خانہ کے نام پر درج جائیدادوں کی تعمیر اور مرمت پر خرچ کیا گیا۔

یو این آئی۔ الف الف

سرینگر، جموں و کشمیر میں کئی ہفتوں سے جاری خشک موسم کے بعد 12 نومبر سے بارش اور برف باری کا ایک نیا سلسلہ شروع ہونے کا امکان ہے۔ محکمہ موسمیات نے پیر کو مرکز کے زیر انتظام علاقے میں بڑے پیمانے پر بارش، اونچے علاقوں میں برف باری اور اس کے بعد درجہ حرارت میں کافی کمی کی پیش گوئی کی ہے۔

موسم سے متعلق پیش گوئی کے مطابق آج اس علاقے میں ایک کمزور مغربی ہواؤں کا نظام داخل ہورہا ہے، جس کے باعث کچھ اونچے علاقوں، خاص طور پر شمالی اور وسطی کشمیر کے پہاڑی علاقوں میں ہلکی برف باری ہوسکتی ہے۔ اس کے علاوہ دوپہر کے بعد اور شام کے وقت موسم جزوی طور پر ابر آلود رہنے کا بھی امکان ہے۔ 12 نومبر کے آس پاس جموں و کشمیر میں کمزور سے درمیانی شدت کا ایک مغربی ہواؤں کا نظام اثر انداز ہوسکتا ہے، جس کے باعث بڑے پیمانے پر بارش اور کچھ مقامات پر درمیانی بارش ہونے کا امکان ہے۔

جنوبی، شمالی اور وسطی کشمیر کے اونچے علاقوں کے ساتھ ساتھ جموں کے پیر پنجال اور چناب وادی کے علاقوں میں برف باری ہونے کی پیش گوئی کی گئی ہے۔ کچھ زیادہ بلندی والے علاقوں میں درمیانی درجے کی برف باری بھی ہوسکتی ہے۔

اس موسمی نظام کے باعث کچھ مقامات پر آندھی، طوفان اور تیز ہوائیں چل سکتی ہیں۔ 14 نومبر سے موسم میں بہتری آنے کی امید ہے، تاہم 14 اور 15 نومبر کو وقفے وقفے سے تھوڑی دیر کے لیے بادل چھائے رہ سکتے ہیں۔ اس دوران موسم میں کسی خاص تبدیلی کا امکان نہیں ہے۔

محکمہ موسمیات نے 16 نومبر سے 18 نومبر تک موسم خشک رہنے کی پیش گوئی کی ہے۔ اس دوران بارش کے بعد درجہ حرارت میں کافی کمی آنے کا امکان ہے اور دن کا درجہ حرارت معمول سے تقریباً 5 سے 8 ڈگری سیلسیس کم رہنے کی توقع ہے۔

محکمہ موسمیات نے درجہ حرارت سے متعلق اپنی تازہ ترین اطلاع میں بتایا کہ کشمیر اور جموں دونوں ڈویژنوں میں کئی مقامات پر رات کا کم از کم درجہ حرارت معمول سے 1 سے 2 ڈگری سیلسیس زیادہ رہا۔

کشمیر ڈویژن میں سیاحتی مقام پہلگام میں سب سے کم درجہ حرارت 0.8 ڈگری سیلسیس ریکارڈ کیا گیا، جبکہ جموں ڈویژن میں بانہال میں سب سے کم درجہ حرارت 4.5 ڈگری سیلسیس درج کیا گیا۔

یو این آئی۔ الف الف۔