واشنگٹن، امریکی صدر ڈونالڈ ٹرمپ نے کہا ہے کہ گزشتہ ہفتے وسط مدتی انتخابات میں ریپبلکن پارٹی کی بھاری شکست کی ایک وجہ امریکہ میں اسرائیل کی حمایت میں کمی بھی تھی۔ انہوں نے اعتراف کیا کہ اسرائیل کے ساتھ واشنگٹن کے قریبی تعلقات کی مخالفت بڑھ رہی ہے۔

اتوار کو ایک انٹرویو میں انتخابی نتائج کا جائزہ لیتے ہوئے ٹرمپ نے کانگریس کے دونوں ایوانوں پر ڈیموکریٹس کے قبضے کی کئی وجوہات بتائیں۔ ان میں ان کا خود انتخابی میدان میں نہ ہونا، ریپبلکن امیدواروں سے ووٹروں کی ناراضگی اور ایران کے خلاف جنگ کی مخالفت شامل تھی۔

ٹرمپ نے کہا، ”سب سے پہلی بات یہ ہے کہ میں انتخابی میدان میں نہیں تھا۔” انہوں نے کہا کہ ووٹر ریپبلکن پارٹی کے بعض امیدواروں سے بھی ناخوش تھے، جن میں ان کے حمایت یافتہ امیدوار بھی شامل تھے۔

انہوں نے مزید کہا، ”لیکن اس کے علاوہ بھی کچھ باتیں تھیں۔ لوگوں کو ایران کے ساتھ جنگ پسند نہیں آئی۔

انہیں پٹرول کی قیمتوں میں اضافہ بھی پسند نہیں آیا۔” اس کے بعد ٹرمپ نے کہا، ”اور حیرت انگیز طور پر اسرائیل کے خلاف بھی شدید ناراضگی ہے۔”

2023 میں غزہ جنگ شروع ہونے کے بعد سے امریکہ میں اسرائیل کی حمایت میں کمی آئی ہے۔ یہ جنگ 7 اکتوبر کو حماس کی قیادت میں اسرائیل پر حملے کے بعد شروع ہوئی تھی۔ اسرائیل کی حمایت میں یہ کمی خاص طور پر ڈیموکریٹک ووٹروں میں نمایاں رہی ہے۔

نائب صدر جے ڈی وینس نے بھی گزشتہ ہفتے اشارہ دیا تھا کہ اگر ریپبلکن پارٹی اپنے انتخابی امکانات بہتر بنانا چاہتی ہے تو اسے اسرائیل کے ساتھ اپنے تعلقات پر نظرثانی کرنا ہوگی۔

انتخابات کے دن ٹرمپ نے یہ اعلان بھی کیا تھا کہ امریکہ 2026 کے اختتام تک اسرائیل کو سالانہ تقریباً 4 ارب ڈالر کی فوجی امداد بند کر دے گا۔ اس اعلان سے اسرائیلی سلامتی اور مالیاتی حکام مبینہ طور پر حیران رہ گئے تھے، کیونکہ موجودہ مفاہمت کی یادداشت کے تحت اسرائیل کو سالانہ 3.8 ارب ڈالر کی فوجی امداد ملتی ہے اور یہ معاہدہ ستمبر 2028 تک برقرار ہے۔

بعد ازاں ٹرمپ نے اپنے اعلان کی وضاحت کرتے ہوئے کہا کہ اسرائیل ایک اچھا اتحادی رہا ہے اور اس نے اس پالیسی کی حمایت کی ہے۔ تاہم، ان کے بیان کے وقت نے واضح کیا کہ امریکہ کی دونوں بڑی سیاسی جماعتوں میں اسرائیل کو فوجی امداد دینے کا معاملہ کس قدر سیاسی طور پر حساس ہوتا جا رہا ہے۔

اطلاعات کے مطابق، ٹرمپ نے گزشتہ سال ایک یہودی عطیہ دہندہ کو خبردار کیا تھا کہ ان کے اپنے حامیوں میں بھی اسرائیل کی حمایت کم ہو رہی ہے۔

دریں اثنا، اتوار کو ٹرمپ سے اسرائیلی صدر اسحاق ہرزوگ کی جانب سے یاشار پارٹی کے سربراہ گادی آئزن کوٹ کو موجودہ وزیر اعظم بنجامن نیتن یاہو سے پہلے حکومت بنانے کی کوشش کا موقع دیے جانے کے بارے میں بھی سوال کیا گیا۔

ٹرمپ نے کہا، ”ان کی پالیسیاں کافی حد تک ایک جیسی ہیں۔” انہوں نے مزید کہا کہ آئزن کوٹ نے ان کے بارے میں ”بہت اچھی باتیں کہی ہیں” اور وہ کہتے ہیں کہ ”انہیں ٹرمپ سے محبت ہے۔”

ٹرمپ نے صحافیوں سے کہا، ”میں نے ابھی تک یہ نہیں دیکھا کہ وہاں کیا ہو رہا ہے۔ یقیناً یہ ان کے اور بی بی نیتن یاہو کے درمیان مقابلہ ہے۔ دیکھتے ہیں آگے کیا ہوتا ہے۔”

گزشتہ ماہ کنیسٹ انتخابات سے قبل ٹرمپ نے دو مرتبہ عوامی طور پر نیتن یاہو کی حمایت کی تھی، اس کے باوجود آئزن کوٹ نے امریکی صدر پر براہ راست تنقید سے گریز کیا۔ اطلاعات کے مطابق، نیتن یاہو نے ٹرمپ کی حمایت حاصل کرنے کی کوشش کی تھی، کیونکہ رائے عامہ کے جائزوں میں مسلسل اشارہ مل رہا تھا کہ ان کا حکمران اتحاد پارلیمنٹ میں اکثریت حاصل نہیں کر سکے گا۔

آئزن کوٹ کو ارکان پارلیمنٹ کی جانب سے نیتن یاہو کے مقابلے میں زیادہ حمایت حاصل ہوئی اور انہیں نئی حکومت تشکیل دینے کی کوشش کی ذمہ داری سونپی گئی ہے۔ انہوں نے زیادہ معتدل طرز حکمرانی اختیار کرنے کا وعدہ کرکے خود کو سبکدوش ہونے والے وزیر اعظم سے الگ دکھانے کی کوشش کی ہے، تاہم پالیسیوں کے حوالے سے دونوں کے درمیان نمایاں اختلافات کی تفصیلات ابھی سامنے نہیں آئی ہیں۔

آئزن کوٹ کی مجوزہ حکومت نیتن یاہو کے سبکدوش ہونے والے اتحاد سے مختلف ہوگی، جس میں انتہائی دائیں بازو اور الٹرا آرتھوڈوکس جماعتیں شامل تھیں۔

ٹرمپ اس سے قبل بھی نیتن یاہو کی فوجی اور علاقائی پالیسیوں پر ناراضگی ظاہر کر چکے ہیں، حالانکہ دونوں رہنما اپنے تعلقات کو مثبت قرار دیتے رہے ہیں۔

جون میں لبنان پر اسرائیلی حملوں کے بعد ٹرمپ کی تنقید میں شدت آ گئی تھی، جس سے ایران کے معاملے پر سفارتی کوششیں بھی پیچیدہ ہو گئی تھیں۔ اطلاعات کے مطابق، حملوں کی شدت پر انہوں نے نیتن یاہو کو ”انتہائی پاگل” قرار دیا تھا۔

اس سے قبل رواں سال ٹرمپ نے بعض پالیسی معاملات پر اختلافات کے درمیان مبینہ طور پر اسرائیلی وزیر اعظم کو ”اپنا سب سے بڑا دشمن” بھی قرار دیا تھا۔

یو این آئی۔ ع ا۔

تپران، ایران کے ایک صوبائی عہدیدار احمد نفیسی نے پیر کے روز جاری کردہ بیان میں کہا ہے کہ ایران کے جزیرے قشم پر رات گئے کئے گئے امریکی حملوں میں رہائشی مکانات، تجارتی علاقوں یا اہم بنیادی ڈھانچے کو کوئی نقصان نہیں پہنچا۔

نیم سرکاری خبر رساں ایجنسی فارس کے مطابق جنوبی صوبے ہرمزگان کے سیاسی، سکیورٹی اور سماجی امور کے نائب گورنر احمد نفیسی نے کہا ہے کہ جن مقامات کو نشانہ بنایا گیا وہ رہائشی علاقوں، کاروباری مراکز اور عوامی خدمات کی تنصیبات سے دُور تھےلہٰذا جزیرے کے اہم بنیادی ڈھانچے یا بنیادی خدمات کو کسی قسم کا نقصان نہیں پہنچا۔’

نفیسی نے کہا ہے کہ جزیرہ قشم کی صورتِ حال قابو میں ہے اور ہنگامی امدادی ٹیمیں، عوامی خدمات کے ادارے اور انتظامی محکمے انتہائی چوکس حالت میں ہیں۔

یہ بیان اتوار کی شام جنوبی ساحلی شہر بندر عباس اور اس کے قریب واقع جزیرہ قشم میں ہونے والے دھماکوں کی اطلاعات کے بعد سامنے آیا ہے۔

خبر رساں ایجنسی ‘فارس’ نے ابتدائی طور پر مقامی ذرائع کے حوالے سے جاری کردہ خبر میں دعویٰ کیا تھا کہ یہ دھماکے آبنائے ہرمز میں بحری آمدورفت کے قواعد کی خلاف ورزی کے شبہے میں بعض جہازوں پر کی گئی تنبیہی فائرنگ کا نتیجہ ہو سکتے ہیں۔ تاہم ایرانی حکام نے تاحال اس واقعے کی وجہ سے متعلق کوئی وضاحت جاری نہیں کی۔

واضح رہے کہ جزیرہ قشم، بندر عباس کے قریب آبنائے ہرمز کے داخلی راستے پر واقع ہے۔ یہ ایک اہم بحری گزرگاہ ہے جہاں سے عالمی سطح پر برآمد کیے جانے والے تیل کا ایک بڑا حصہ گزرتا ہے۔

یہ واقعات ایسے وقت میں پیش آئے ہیں جب تنازعے میں کمی لانے کے لیے سفارتی کوششیں جاری ہیں۔ تاہم آبنائے ہرمز میں سلامتی اور محفوظ سیر و سفر کے معاملات پر واشنگٹن اور تہران کے درمیان کشیدگی بدستور برقرار ہے۔

یو این آئی۔ ع ا۔

تہران، ایران کا داخلی سلامتی کا نظام ہائی الرٹ پر ہے اور حکام ان سرگرمیوں سے نمٹنے کے لیے اپنا رویہ مزید سخت کر رہے ہیں جنہیں وہ امریکہ کے ساتھ جاری جنگ کے دوران ملک پر اپنی گرفت کے لیے خطرہ سمجھتے ہیں۔

ایرانی حکام نے عوام کو حکومت مخالف مظاہروں میں شرکت پر سخت سزاؤں کی وارننگ دی ہے اور عوامی مقامات پر کنٹرول بھی سخت کیا جا رہا ہے۔ یہ اقدام ایسے وقت میں کیا جا رہا ہے جب گزشتہ کئی ماہ سے لوگوں کے لباس سے متعلق پابندیوں کے نفاذ میں نسبتاً نرمی دیکھی جا رہی تھی۔

مختصراً، ایرانی حکام یہ تاثر دینے کی کوشش کرتے دکھائی دے رہے ہیں کہ آٹھ ماہ کی جنگ اور امریکہ کی جانب سے نئے، وسیع تر اور زیادہ شدید حملوں کے خطرے کے باوجود وہ اسلامی جمہوریہ کے اصولوں پر کوئی سمجھوتہ نہیں کریں گے۔

قطر یونیورسٹی کے گلف اسٹڈیز سینٹر کے ڈائریکٹر محجوب زویری نے کہا کہ ان کشیدگیوں کے درمیان حکام تہران میں حکومت کے تسلسل کے حامیوں کو عوامی سطح پر متحرک کرنے میں بھی کامیاب رہے ہیں۔

انہوں نے الجزیرہ کو بتایا، ”ان میں صرف اسلامی انقلابی گارڈز کور (آئی آر جی سی) کے ارکان ہی نہیں بلکہ بعض عام شہری بھی شامل ہیں اور امکان ہے کہ جنگ ختم ہونے تک یہ سلسلہ جاری رہے گا۔” آئی آر جی سی ایک فوجی ادارہ ہے جسے 1979 کے اسلامی انقلاب کے اصولوں کے تحفظ کے لیے قائم کیا گیا تھا۔
ایرانی حکام اختلافِ رائے کی کسی بھی شکل کی حوصلہ شکنی کے لیے معمول کے مطابق سخت سزائیں دیتے ہیں۔ 28 اکتوبر کو ایرانی رہنماؤں کے خلاف امریکہ اور اسرائیل کے حملوں سے شروع ہونے والی جنگ نے اس عمل کو مزید تیز کر دیا ہے۔

عدلیہ نے اتوار کو بتایا کہ جنوری میں ملک گیر احتجاج کے دوران گرفتار کیے گئے تین نوجوانوں کو پھانسی دے دی گئی ہے۔ ان پر الزام تھا کہ انہوں نے امریکہ اور اسرائیل کو فائدہ پہنچانے کے لیے تہران کے قریب سرکاری دفاتر پر حملے کیے اور عوامی املاک کو نقصان پہنچایا تھا۔

ایرانی حکام حکومت مخالف احتجاج کو امریکہ اور اسرائیل سے وابستہ ”دہشت گردوں” کی جانب سے ”تختہ پلٹنے” کی کوشش قرار دیتے ہیں۔ تاہم اقوام متحدہ کے ایک آزاد تحقیقاتی مشن نے پایا کہ مظاہرین کے خلاف پرتشدد کریک ڈاؤن کے دوران حکام نے انسانیت کے خلاف جرائم کا ارتکاب کیا۔ انسانی حقوق کی تنظیموں کے مطابق اس کارروائی میں ہزاروں افراد ہلاک ہوئے، جن میں زیادہ تر اموات 8 اور 9 جنوری کی راتوں میں ہوئیں۔

بیرون ملک قائم انسانی حقوق کی تنظیموں کا کہنا ہے کہ سزائے موت کے نتیجے میں ختم ہونے والے متعدد سیاسی مقدمات میں تشدد، جبری اعترافات اور قانونی کارروائی کے منصفانہ تقاضوں کی خلاف ورزی کے الزامات سامنے آئے ہیں۔

ناروے میں قائم انسانی حقوق کی تنظیم ہینگاؤ کے مطابق ایران میں رواں سال کم از کم 79 سیاسی یا مذہبی قیدیوں کو پھانسی دی گئی ہے، جن میں جنوری کے احتجاج کے دوران گرفتار کیے گئے 40 افراد بھی شامل ہیں۔ ان میں سے بعض کو جاسوسی کے الزامات میں سزا سنائے جانے کے بعد پھانسی دی گئی۔

جاری ۔ یو این آئی۔ ع ا۔