سری نگر، جموں و کشمیر کے دارالحکومت سری نگر میں انفورسمنٹ ڈائریکٹوریٹ (ای ڈی) نے منگل کو دہشت گردوں کو مالی مدد فراہم کرنے اور غیر قانونی طریقے سے رقم کی منتقلی کے معاملے میں 4 الگ الگ مقامات پر تلاشی مہم چلائی۔

یہ جانچ ان الزامات سے متعلق ہے کہ عمر عادل ڈار اور اس کے ساتھی ممنوعہ تنظیم لشکر طیبہ (ایل ای ٹی) کے خفیہ مددگاروں کے طور پر کام کر رہے تھے اور اس دہشت گرد تنظیم سے وابستہ سرگرمیوں میں سرگرمی سے شامل تھے۔ ڈار کو فروری 2023 میں سری نگر کے نوگام علاقے سے اس کے 2 ساتھیوں کے ساتھ گرفتار کیا گیا تھا۔ پولیس نے ان تینوں کے قبضے سے بڑی مقدار میں نقد رقم بھی برآمد کی تھی۔ اس کے بعد جموں و کشمیر پولیس نے نوگام پولیس تھانے میں مقدمہ درج کیا تھا۔

ڈار 2023 میں گرفتاری کے بعد سے ہی جیل میں بند ہے۔ یہ خبر لکھے جانے تک ای ڈی نے ان تلاشی مہموں کے بارے میں کوئی سرکاری بیان جاری نہیں کیا تھا۔

یو این آئی۔ ایم جے

سری نگر، جموں و کشمیر اور لداخ ہائی کورٹ نے سری نگر کی ڈل جھیل میں پٹرول اور ڈیزل سے چلنے والی کشتیوں، موٹر والے شکاروں اور جیٹ اسکی کے استعمال پر پابندی برقرار رکھنے کی ہدایت دی ہے۔

عدالت نے واضح کیا ہے کہ اس پابندی کی خلاف ورزی کرنے والوں کے خلاف سخت کارروائی کی جائے گی۔

اس سے پہلے 14 اکتوبر کو ہائی کورٹ نے ڈل جھیل میں آلودگی کو مزید بڑھنے سے روکنے کے لیے ایندھن سے چلنے والی تمام کشتیوں، بشمول موٹر والے شکاروں اور جیٹ اسکی کے استعمال پر پابندی عائد کرنے کا حکم دیا تھا۔ تاہم انتظامی اور ضروری خدمات، جیسے ہنگامی خدمات، امن و قانون، آفات سے نمٹنے اور سلامتی سے متعلق امور کو ان پابندیوں سے مستثنیٰ رکھا گیا تھا۔

چیف جسٹس ڈاکٹر پشپیندر سنگھ بھاٹی اور جسٹس یشپال بورنی پر مشتمل ڈویژن بنچ نے 31 اکتوبر کو ایک نیا حکم جاری کیا۔ اس میں حکومت سے کہا گیا ہے کہ وہ اگلی سماعت تک عدالت کے سامنے ایک عارضی لیکن جامع پالیسی پیش کرے۔ اس پالیسی کی تیاری کے دوران ماحولیات کے تحفظ، آلودگی اور سیاحت جیسے پہلوؤں کو مدنظر رکھا جائے۔

اس سے پہلے سینئر ایڈیشنل ایڈووکیٹ جنرل محسن قادری نے عدالت کو بتایا تھا کہ حکومت جھیل میں کشتیوں کے استعمال کو منظم کرنے کے لیے ایک عارضی لیکن جامع پالیسی تیار کرے گی۔ انہوں نے کہا کہ مجوزہ پالیسی میں کشتیوں، شکاروں اور جیٹ اسکی چلانے کے لیے شمسی توانائی اور برقی توانائی کے استعمال پر بھی غور کیا جائے گا۔ ہائی کورٹ نے کہا کہ مجوزہ پالیسی کے ساتھ ایک لائحہ عمل بھی ہونا چاہیے۔ اس میں جھیل میں چلنے والی موٹر کشتیوں، جیٹ اسکی اور شکاروں کی موجودہ تعداد کی مکمل تفصیلات ہونی چاہئیں، جن میں موٹر والی اور بغیر موٹر والی کشتیوں کی تعداد اور ان کے انجن کی خصوصیات کی تفصیل بھی شامل ہو۔

عدالت نے حکومت سے یہ بھی کہا کہ وہ ماہرین کی ان سفارشات پر غور کرے جن میں بتایا گیا ہے کہ جھیل کا کتنا حصہ ہاتھ سے چلائے جانے والے شکاروں کے لیے مخصوص کیا جانا چاہیے۔ اس کے ساتھ ہی یہ بھی دیکھا جائے کہ موٹر کشتیوں اور جیٹ اسکی چلانے والوں جیسے دیگر متعلقہ فریقوں کے مفادات کا تحفظ کیسے کیا جا سکتا ہے۔

یہ ہدایات اس وقت جاری کی گئیں جب قانونی لائسنس کے ساتھ جیٹ اسکی اور موٹر کشتیاں چلانے والے متعلقہ فریقوں نے اس قانونی کارروائی میں شامل ہونے کی درخواست کی۔ انہوں نے مطالبہ کیا کہ ایسی پالیسی بنائی جائے جس سے کشتیوں کی صنعت سے حاصل ہونے والے فوائد کی منصفانہ تقسیم یقینی بنائی جا سکے۔ عدالت نے ان کی درخواست منظور کر لی۔ عدالت نے واضح کر دیا ہے کہ موجودہ پابندیاں برقرار رہیں گی۔ عدالت کے حکم میں کہا گیا ہے، ”اس دوران انجن سے چلنے والی کسی بھی قسم کی کشتی، خواہ وہ جیٹ اسکی ہو، موٹر کشتی ہو یا شکارا، اس کے استعمال پر عائد پابندی برقرار رہے گی۔ ان ہدایات کی خلاف ورزی کو عدالت انتہائی سنجیدگی سے لے گی۔” اس معاملے کی اگلی سماعت 16 نومبر کو ہوگی۔

یو این آئی۔ ایم جے

جموں، مرکزی وزیر ڈاکٹر جتیندر سنگھ نے پیر کو کہا کہ 2014 کے بعد سے ضلع کشتواڑ میں رابطہ سڑکوں اور بنیادی ڈھانچے کے شعبوں میں نمایاں تبدیلی آئی ہے۔

وزیر نے کشتواڑ میں منعقدہ عوامی دربار سے خطاب کرتے ہوئے یہ بات کہی۔ اس موقع پر انہوں نے مقامی باشندوں اور عوامی نمائندوں سے براہِ راست ملاقات کی اور ان کی شکایات، ترقیاتی ضروریات اور عوامی خدمات کی فراہمی سے متعلق مسائل کا جائزہ لیا۔

ڈاکٹر سنگھ نے یاد دلایا کہ مئی 2014 میں عہدہ سنبھالنے کے بعد وزیر اعظم نریندر مودی نے اسی سال دسمبر میں کشتواڑ کے چوگن میدان کا دورہ کیا تھا اور عوام کو یقین دلایا تھا کہ اب تک نظرانداز رہنے والے علاقوں کی ترقی کو ترجیح دی جائے گی اور ان پر خصوصی توجہ مرکوز کی جائے گی۔

2014 سے پہلے کی صورت حال کا ذکر کرتے ہوئے انہوں نے کشتواڑ میں بنیادی سہولتوں کی شدید کمی کو اجاگر کیا۔ ان کا کہنا تھا کہ سڑکوں کی حالت اتنی خراب تھی کہ ضلع تک بحفاظت پہنچ جانا بھی ایک بڑی کامیابی سمجھا جاتا تھا۔ کئی علاقوں میں موبائل رابطے کی سہولت تقریباً موجود نہیں تھی، جس کے باعث متعدد آبادیاں بیرونی دنیا سے کٹی ہوئی تھیں۔

انہوں نے کہا کہ مچیل یاترا کے راستے پر بھی بنیادی ڈھانچے کی شدید کمی تھی۔ یاتریوں کو بیت الخلا، بہتر سڑکوں اور قابل اعتماد مواصلاتی سہولتوں سمیت بنیادی ضروریات کی عدم دستیابی کا سامنا کرنا پڑتا تھا۔

عوامی دربار کے دوران وزیر نے لوگوں کی باتیں توجہ سے سنیں اور سڑکوں کے رابطے، عوامی بنیادی ڈھانچے، ضروری خدمات، دیہی ترقی اور مختلف سرکاری محکموں کی کارکردگی سے متعلق ان کے مسائل اور خدشات کا نوٹس لیا۔ ضلع کے مختلف علاقوں سے آئے لوگوں نے اپنی شکایات اور مطالبات پیش کیے اور ان مسائل کی نشاندہی کی جن پر عوامی خدمات کو بہتر بنانے اور خطے میں ترقیاتی سرگرمیوں کو تیز کرنے کے لیے توجہ دینے کی ضرورت ہے۔

کئی شکایات کا موقع پر ہی ازالہ کیا گیا، جبکہ وزیر نے متعلقہ افسران کو باقی مسائل کا جائزہ لینے اور مقررہ مدت کے اندر مناسب کارروائی کرنے کی ہدایت دی۔

یواین آئی۔ ظ ا