جموں، جموں و کشمیر کے وزیر اعلیٰ عمر عبداللہ نے یہاں بکرم چوک کے قریب واقع نہرو مارکیٹ، جسے عام طور پر ویئر ہاؤس کے نام سے جانا جاتا ہے، میں زبردست آتشزدگی کے واقعے پر گہرے دکھ کا اظہار کیا ہے اور اس سے متاثرہ تمام لوگوں کے تئیں دلی ہمدردی ظاہر کی ہے۔

وزیر اعلیٰ نے ایک سرکاری بیان میں ضلعی انتظامیہ کو ہدایت دی ہے کہ وہ متاثرہ افراد کو فوری راحت فراہم کرے اور ہر ممکن مدد پہنچائے۔

انہوں نے انتظامیہ کو نقصان کا مکمل جائزہ لینے اور متاثرہ لوگوں کی ضروریات کو پورا کرنے کے لیے مناسب اقدامات کرنے کی بھی ہدایت دی۔

قابل ذکر ہے کہ گزشتہ شام بکرم چوک کے قریب واقع ویئر ہاؤس میں زبردست آگ لگ گئی تھی، جو آس پاس کی کئی عمارتوں اور تجارتی اداروں تک پھیل گئی تھی۔

یو این آئی۔ ایم جے

جموں، جموں پولیس نے شہر کے مضافاتی علاقے بشناہ میں ایک شخص کو پستول اور میگزین کے ساتھ گرفتار کیا ہے۔

پولیس نے بتایا کہ گرفتار شخص کی شناخت جموں کے میران صاحب علاقے کے لنگوٹیا کے رہنے والے آصف علی چودھری کے طور پر ہوئی ہے۔ اس کے قبضے سے ایک پستول، اس کی میگزین اور 2 زندہ کارتوس برآمد کیے گئے ہیں۔

پولیس نے معاملہ درج کرکے تحقیقات شروع کر دی ہیں، تاکہ اسلحے کے ذرائع، اسے رکھنے کے مقصد اور کسی ممکنہ مجرمانہ تعلق کا پتہ لگایا جا سکے۔

جموں پولیس نے امن و سلامتی برقرار رکھنے اور غیر قانونی طور پر اسلحہ اور گولہ بارود رکھنے والوں کے خلاف سخت کارروائی کرنے کے اپنے عزم کا اعادہ کیا ہے۔

یو این آئی۔ ایم جے

سرینگر، ماحولیاتی کارکن سونم وانگچک نے صدر جمہوریہ دروپدی مرمو سے مداخلت کی اپیل کرتے ہوئے لداخ انتظامیہ پر الزام عائد کیا ہے کہ لیفٹیننٹ گورنر وی کے سکسینہ کی قیادت میں ان کے خلاف منظم انداز میں منفی مہم چلائی جارہی ہے اور ان سے وابستہ اداروں کو بھی ہراساں کیا جارہا ہے۔

صدر جمہوریہ کے نام اپنے ویڈیو پیغام میں، جو انہوں نے سوشل میڈیا پلیٹ فارم ‘ایکس’ پر پوسٹ کیا، وانگچک نے دعویٰ کیا کہ ان کے وکلا کی جانب سے کیے گئے ایک اسٹنگ آپریشن میں ایل جی کے دفتر اور سوشل میڈیا کے دو ایسے صفحات کے درمیان مبینہ روابط کا انکشاف ہوا ہے، جنہیں ان کے خلاف مہم چلانے اور انتظامیہ کی تشہیر کے لیے بنایا گیا تھا۔

وانگچک کے مطابق، فیس بک اور انسٹاگرام پر یہ دونوں صفحات 14 اکتوبر کو سامنے آئے تھے، یعنی اس کے ایک دن بعد جب انہوں نے انتظامیہ کی بعض سرگرمیوں پر عوامی سطح پر تنقید کی تھی اور ماحولیاتی خدشات کا اظہار کیا تھا۔

انہوں نے بتایا کہ تحقیقات کے دوران معلوم ہوا کہ یہ دونوں صفحات ایک ہی تخلیقی ایجنسی نے تیار کیے تھے۔

اس کے بعد ان کے وکلا نے مبینہ اسٹنگ آپریشن کے ذریعے ایجنسی سے رابطہ کیا۔ وانگچک کے دعوے کے مطابق، ایجنسی کے مالک نے گفتگو کے دوران اعتراف کیا کہ دونوں صفحات اسی ایجنسی کے ہیں اور اس نے ایل جی ٹیم کے ساتھ اپنے روابط کا بھی ذکر کیا۔

وانگچک نے ریکارڈ شدہ گفتگو کے بعض منتخب حصے جاری کرتے ہوئے الزام لگایا کہ اس کارروائی سے ایل جی انتظامیہ سے وابستہ افراد کے ان کے خلاف رائے عامہ کو متاثر کرنے کی کوششوں میں ملوث ہونے کا انکشاف ہوا ہے۔

ماحولیاتی کارکن نے کہا کہ یہ مبینہ مہم لیفٹیننٹ گورنر سکسینہ کے 10 اکتوبر کو ایک تقریب میں دیے گئے بیان کے بعد شروع ہوئی، جس میں انہوں نے لداخ میں ماحولیاتی تحفظ اور تعلیم کے شعبوں میں وانگچک کی خدمات پر سوال اٹھائے تھے۔ وانگچک نے کہا کہ انہوں نے اس کے جواب میں بعض ترقیاتی سرگرمیوں کے ماحولیاتی اثرات کو اجاگر کیا تھا، جن میں مبینہ طور پر پتھر ڈال کر دریائے سندھ کے بہاؤ میں رکاوٹ پیدا کرنا بھی شامل تھا۔

انہوں نے دعویٰ کیا کہ ابتدا میں انہوں نے یہ مواد انٹلی جنس بیورو کے سربراہ کے ساتھ شیئر کیا تھا اور امید ظاہر کی تھی کہ اس معاملے میں مداخلت کی جائے گی، لیکن چند بار رابطے کے بعد انہیں کوئی مزید جواب نہیں ملا۔ وانگچک نے کہا کہ ملک کی شبیہ پر ممکنہ اثرات کے پیش نظر وہ ریکارڈ شدہ گفتگو کو عوامی سطح پر لانے سے گریز کررہے تھے، لیکن اب انہوں نے یہ معاملہ ملک کے سامنے رکھنے کا فیصلہ کیا ہے۔

صدر جمہوریہ سے اپیل کرتے ہوئے وانگچک نے الزام لگایا کہ گزشتہ چھ برسوں کے دوران لداخ میں جمہوری آزادیوں کا دائرہ محدود ہوا ہے اور سوشل میڈیا پر عام تبادلۂ خیال بھی پولیس کی نگرانی، ایف آئی آر درج ہونے اور گرفتاریوں کا سبب بن رہا ہے۔

انہوں نے انتظامیہ پر ایسی پالیسیاں اختیار کرنے کا بھی الزام لگایا جو ان کے بقول مقامی مفادات کو نقصان پہنچاتی ہیں اور کارپوریٹ اداروں کو فائدہ پہنچاتی ہیں۔ اس سلسلے میں انہوں نے اراضی، صنعت، بجلی اور سیاحت سے متعلق پالیسیوں کا حوالہ دیا۔

وانگچک نے تعلیمی اداروں کے تئیں انتظامیہ کے رویے پر بھی سوال اٹھائے، خصوصاً اپنے ادارے ‘ہمالین انسٹی ٹیوٹ آف آلٹرنیٹوز، لداخ’ (ایچ آئی اے ایل) کے حوالے سے۔ انہوں نے الزام لگایا کہ ایک طرف ادارے کے لیے پابندیاں سخت کی جارہی ہیں تو دوسری جانب دیہات میں شراب کی دکانوں کے لیے ضابطوں میں نرمی کی جارہی ہے۔

ان کی یہ اپیل ایسے وقت سامنے آئی ہے جب لداخ انتظامیہ نے حال ہی میں ایچ آئی اے ایل کو ہدایت دی تھی کہ لیہ میں واقع ‘ڈیزرٹ فلاور اسکول’ میں کلاسوں اور دیگر سرگرمیوں کا آغاز اس وقت تک معطل رکھا جائے، جب تک اراضی سے متعلق ہائی کورٹ میں زیر التوا تنازع کا فیصلہ نہیں ہوجاتا۔

اس سلسلے میں وانگچک کی اہلیہ اور ایچ آئی اے ایل کی بانی و چیف ایگزیکٹیو آفیسر گیتانجلی جے انگمو کو ایک نوٹس جاری کیا گیا تھا، جس میں خبردار کیا گیا تھا کہ مقدمہ زیر سماعت ہونے کے دوران اسکول کی سرگرمیاں شروع کرنے سے عدالتی کارروائی متاثر ہوسکتی ہے۔

وانگچک نے الزام لگایا کہ ان کے ادارے کو اراضی کی لیز کے معاملے میں بھی مشکلات کا سامنا کرنا پڑا ہے۔ ان کا دعویٰ تھا کہ لیز پالیسی کو حتمی شکل دینے میں تاخیر کے باعث انتظامیہ نے خود پہلے اس لیز کی مدت میں توسیع کی درخواست کی تھی۔ انہوں نے سوال اٹھایا کہ ایک کنڈرگارٹن اسکول سے ایسی منظوریوں اور این او سی کا مطالبہ کیوں کیا جارہا ہے، جن کی متعلقہ سرکاری ضابطوں کے تحت ضرورت نہیں ہے۔

لداخ اور دیگر سرحدی علاقوں کی تزویراتی اہمیت کو اجاگر کرتے ہوئے وانگچک نے صدر دروپدی مرمو سے مداخلت کی اپیل کی اور کہا کہ ان علاقوں کے باشندوں کو ان جمہوری حقوق اور آزادیوں سے محروم نہیں کیا جانا چاہیے جو ملک کے دیگر حصوں کے شہریوں کو حاصل ہیں۔

انہوں نے لداخ اور اروناچل پردیش سمیت سرحدی علاقوں میں رہنے والے لوگوں کے لیے مساوی حقوق، آزادی اور انصاف کو یقینی بنانے کا مطالبہ کیا۔

ان الزامات پر لداخ انتظامیہ کا ردعمل فوری طور پر دستیاب نہیں ہوسکا۔

یواین آئی۔ ط ا