ماسکو، روس، امریکہ اور یوکرین کے درمیان سہ فریقی مذاکرات کا نیا دور منگل کو متحدہ عرب امارات کے دارالحکومت ابوظہبی میں شروع ہونے والا ہے۔

یہ مذاکرات 2 دن تک جاری رہنے کا امکان ہے۔ امریکی وفد میں خصوصی ایلچی اسٹیو وٹکوف اور جیرڈ کشنر شامل ہوں گے۔ روسی وفد کی قیادت صدر کے معاون ولادیمیر میڈنسکی کریں گے، جبکہ یوکرینی وفد کی سربراہی یوکرین کی غیر ملکی خفیہ ایجنسی کے سربراہ رستم عمروف کریں گے۔

تینوں فریقوں کے درمیان سلامتی کی ضمانتوں، کشیدگی میں کمی، انسانی ہمدردی سے متعلق امور اور یوکرین تنازع کے پرامن حل کی جانب مزید اقدامات پر بات چیت ہونے والی ہے۔

یورپی ممالک کے نمائندوں کے بھی ابوظہبی پہنچنے کی توقع ہے، تاہم یہ واضح نہیں ہے کہ وہ کن مذاکراتی اجلاسوں میں شرکت کریں گے۔

یو این آئی۔ ایم جے۔

بیروت، ایران میں یورینیم کی افزودگی کو 3.67 فیصد تک محدود کرنے کے لیے قطر اور پاکستان کی نئی پہل کے تحت امریکہ اور ایران تہران کے جوہری پروگرام پر جلد ہی ابتدائی معاہدے تک پہنچ سکتے ہیں۔ العربیہ نے ذرائع کے حوالے سے یہ اطلاع دی ہے۔

رپورٹ کے مطابق، پیر کو دونوں فریقوں کے درمیان ایران کے یورینیم کی افزودگی کی سطح کم کرنے کے لیے ابتدائی معاہدہ کرنے پر غور کیا گیا۔ خاص طور پر واشنگٹن یورینیم کی افزودگی کی اس سطح میں کمی کا مطالبہ کر رہا ہے، جسے بڑھا کر 60 فیصد تک پہنچا دیا گیا ہے۔

رپورٹ میں کہا گیا ہے کہ یورینیم کی افزودگی کی سطح کم کرنے میں مدد کے لیے کسی تیسرے ملک کو شامل کرنے کے امکان پر بھی بات چیت ہو رہی ہے۔ اس کے علاوہ ایران میں بین الاقوامی جوہری توانائی ایجنسی (آئی اے ای اے) کے معائنہ کاروں کی واپسی کی شرائط بھی طے کی جا رہی ہیں، حالانکہ ان کے اختیارات اور ذمہ داریوں کا دائرہ ابھی طے نہیں کیا گیا ہے۔

یو این آئی۔ ایم جے

واشنگٹن، امریکہ ایران کے ساتھ جاری تنازع کے خاتمے کی جانب مثبت پیش رفت دیکھ رہا ہے، تاہم وہ حملے کرنے کے لیے بھی تیار ہے۔ یہ بات امریکہ کے صدر ڈونالڈ ٹرمپ نے کہی۔

ٹرمپ نے قطر کے وزیر اعظم شیخ محمد بن عبدالرحمٰن بن جاسم الثانی کے ساتھ بات چیت کے بعد اپنے سوشل میڈیا پلیٹ فارم ‘ٹروتھ سوشل’ پر لکھا، ”سبھی اس بات پر متفق ہیں کہ ایران کے پاس جوہری ہتھیار نہیں ہونا چاہیے۔ اس معاملے میں کوئی سمجھوتہ نہیں ہوسکتا! اگر مشرق وسطیٰ کی صورت حال میں کوئی تبدیلی آتی ہے تو امریکہ پوری طرح تیار ہے اور کارروائی کے لیے فوری طور پر آگے بڑھ سکتا ہے۔ تاہم، فی الحال ایسا ہونے کا امکان کافی کم دکھائی دیتا ہے۔ اسرائیل اور پورا مشرق وسطیٰ ایران کے خطرات اور دھمکیوں سے محفوظ ہیں۔ ہم اس تنازع کے خاتمے کی جانب مثبت پیش رفت دیکھ رہے ہیں اور اس بات کو یقینی بنائیں گے کہ امریکہ کے مفادات ہر حال میں محفوظ رہیں۔”

اس سے پہلے دن میں ٹرمپ نے خبر رساں ادارے رائٹرز کو بتایا تھا کہ امریکہ ایران پر حملے کرنے کے لیے ”جب بھی چاہے، فوری طور پر تیار ہے۔”

امریکہ اور اسرائیل نے 28 فروری کوایران میں مختلف اہداف کو نشانہ بناتے ہوئے حملے شروع کیے تھے، جس کے جواب میں ایران نے بھی جوابی حملے کیے تھے۔ اگرچہ فی الحال اس تنازع میں جنگی کارروائیاں رکی ہوئی ہیں، لیکن معاملہ ابھی حل نہیں ہوا ہے اور دوبارہ لڑائی شروع ہونے کا خطرہ برقرار ہے۔

یو این آئی، ایم جے