سرینگر، حریت کانفرنس کے چیئرمین اور کشمیر کے ممتاز مذہبی رہنما میرواعظ عمر فاروق نے شہری آزادیوں کی بحالی پر زور دیتے ہوئے کہا ہے کہ کشمیر میں تشدد کے واقعات میں کمی خوش آئند ہے، لیکن پائیدار امن کے قیام کے لیے انصاف، مفاہمت اور عوام کا اعتماد بحال کرنا ضروری ہے۔

جمعہ کو سرینگر کی تاریخی جامع مسجد میں نماز جمعہ کے اجتماع سے خطاب کرتے ہوئے میرواعظ نے جموں و کشمیر سے متعلق انٹرنیشنل کرائسس گروپ کی حال ہی میں جاری کردہ رپورٹ کا حوالہ دیا اور کہا کہ اس کے نتائج پر سنجیدگی سے غور کیا جانا چاہیے۔ انہوں نے کہا کہ تشدد میں کمی کا مطلب یہ نہیں کہ بنیادی سیاسی شکایات دور ہوگئی ہیں یا عوام کا اعتماد بحال ہوگیا ہے۔

میرواعظ نے کہا کہ رپورٹ میں بتایا گیا ہے کہ گزشتہ چند برسوں کے دوران انتہاپسندی، سڑکوں پر احتجاج اور تشدد کے واقعات میں کمی آئی ہے، جو یقیناً قابل خیرمقدم ہے۔ انہوں نے کہا کہ کشمیر کے عوام سے زیادہ امن کی اہمیت کو کوئی نہیں سمجھ سکتا، کیونکہ وہ گزشتہ کئی دہائیوں سے بے پناہ مصائب برداشت کرتے آرہے ہیں۔

تاہم انہوں نے کہا کہ رپورٹ میں ایک اہم نکتے کی نشاندہی کی گئی ہے کہ تشدد میں کمی سے بنیادی سیاسی مسائل حل نہیں ہوجاتے اور نہ ہی اس سے عوام کا اعتماد خودبخود بحال ہوتا ہے۔ حکومت کی ذمہ داری ہے کہ وہ لوگوں کی جان و مال کا تحفظ کرے اور سلامتی کے انتظامات ضروری ہیں، لیکن صرف حفاظتی اقدامات ایسے مسئلے کا مستقل حل فراہم نہیں کرسکتے جس کے سیاسی اور انسانی پہلو بھی گہرے ہوں۔

میرواعظ نے کہا کہ کشمیر اب بھی دنیا کے سب سے زیادہ فوجی موجودگی والے علاقوں میں شامل ہے۔

انہوں نے رپورٹ کے انکشافات کا حوالہ دیتے ہوئے کہا کہ 2019 کے بعد گرفتاریوں اور حراست میں لیے جانے والے افراد کی تعداد تشویش ناک ہے۔ مرکزی وزارت داخلہ کے اعداد و شمار کے مطابق 2019 سے 2023 کے درمیان جموں و کشمیر میں غیر قانونی سرگرمیوں کی روک تھام کے قانون (یو اے پی اے) کے تحت 3,662 افراد کو گرفتار کیا گیا، جبکہ اس مدت میں صرف 23 افراد کو سزا سنائی گئی۔

انہوں نے کہا کہ یہ اعداد و شمار طویل مدت تک حراست میں رکھنے، قانونی کارروائی کے تقاضوں اور سخت قوانین کے وسیع پیمانے پر استعمال کے حوالے سے کئی سنجیدہ سوالات پیدا کرتے ہیں۔ ہزاروں خاندان اب بھی اپنے عزیزوں کے مستقبل کے بارے میں غیر یقینی صورت حال سے دوچار ہیں۔

میرواعظ نے کہا کہ کشمیری سیاسی قیدیوں کی مسلسل اسیری بھی تشویش کا باعث ہے۔ ان میں یاسین ملک، شبیر احمد شاہ، شاہد الاسلام، انجینئر رشید، آسیہ اندرابی، مسرت عالم اور دیگر کئی افراد شامل ہیں، جو برسوں سے جیلوں میں بند ہیں۔ ان میں سے کئی قیدیوں کو اپنے گھروں اور اہل خانہ سے دور جیلوں میں رکھا گیا ہے۔

انہوں نے ایک مرتبہ پھر ان قیدیوں کی رہائی، ان کے مقدمات پر نظرثانی اور عمر رسیدہ و بیمار قیدیوں کے ساتھ انسانی بنیادوں پر ہمدردانہ رویہ اختیار کرنے کی اپیل کی۔ ان کا کہنا تھا کہ امن کی کوششوں میں انصاف اور ہمدردی کو الگ نہیں کیا جاسکتا۔

حریت چیئرمین نے سیاسی اور شہری سرگرمیوں پر پابندیوں، پُرامن اظہار رائے کے مواقع محدود ہونے، آزادانہ صحافت پر قدغنوں اور عوام میں بڑھتی ہوئی بیگانگی پر بھی تشویش ظاہر کی۔ انہوں نے کہا کہ ان مسائل کو نظرانداز نہیں کیا جانا چاہیے۔

میرواعظ نے سوال کیا کہ اگر صورت حال میں بہتری آئی ہے، جیسا کہ تسلیم کیا جارہا ہے، تو کیا یہ پابندیاں نرم کرنے، زیر حراست افراد کے معاملات پر نظرثانی، شہری آزادیوں کی بحالی اور ایسا ماحول پیدا کرنے کا مناسب موقع نہیں ہے جہاں لوگ اپنے خیالات اور شکایات کا پُرامن انداز میں اظہار کرسکیں؟

انہوں نے کہا کہ امن کا اندازہ صرف احتجاجی مظاہروں کی عدم موجودگی سے نہیں لگایا جاسکتا۔

رپورٹ کی سفارشات کا حوالہ دیتے ہوئے میرواعظ نے کہا کہ ریاستی درجہ کی بحالی، منتخب حکومت کو بامعنی اختیارات کی فراہمی، سخت انسداد دہشت گردی قوانین پر نظرثانی اور ہندوستان و پاکستان کے درمیان نئے سرے سے مذاکرات جیسے اقدامات پر سنجیدگی سے غور کیا جانا چاہیے۔

انہوں نے کہا کہ ان کا ہمیشہ سے یہ موقف رہا ہے کہ مسئلہ کشمیر کو صرف سلامتی کے نقطہ نظر سے حل نہیں کیا جاسکتا۔ سیاسی مسائل کے حل کے لیے سیاسی مذاکرات اور دیرینہ شکایات کے ازالے کے لیے مخلصانہ مفاہمتی کوششیں ضروری ہیں۔

میرواعظ نے کہا کہ حکومتوں کو اپنے سلامتی سے متعلق خدشات اور ذمہ داریوں کا حق حاصل ہے، لیکن عوام کے خدشات اور خواہشات بھی اتنی ہی اہمیت رکھتے ہیں اور انہیں امن کے کسی بھی بامعنی عمل میں جگہ ملنی چاہیے۔

گزشتہ سال کے واقعات اور ہندوستان و پاکستان کے درمیان کشیدگی کے خطرات کا ذکر کرتے ہوئے انہوں نے کہا کہ مذاکرات ہی آگے بڑھنے کا سب سے ذمہ دارانہ راستہ ہیں۔

انہوں نے کہا کہ وہ یہ مسائل کسی محاذ آرائی کے جذبے کے تحت نہیں بلکہ اپنے عوام کے مستقبل کے بارے میں حقیقی تشویش کے پیش نظر اٹھا رہے ہیں۔

میرواعظ نے کہا کہ سلامتی کی صورت حال میں بہتری کے بعد اگلا قدم مفاہمت، شہری آزادیوں کی بحالی، سیاسی قیدیوں کے مقدمات پر نظرثانی اور سنجیدہ سیاسی مذاکرات ہونا چاہیے۔

انہوں نے کہا کہ امن کا حقیقی پیمانہ صرف یہ نہیں کہ تشدد میں کتنی کمی آئی ہے، بلکہ یہ بھی ہے کہ عوام کا اعتماد کس حد تک بحال ہوا ہے۔

یواین آئی۔ ظ ا

سری نگر، جموں و کشمیر اور لداخ ہائی کورٹ نے پن بجلی منصوبوں پر عائد آبی استعمال کے محصولات کو کالعدم قرار دیتے ہوئے کہا ہے کہ سابق ریاستی اسمبلی کو بجلی کی پیداوار پر ٹیکس عائد کرنے کا اختیار حاصل نہیں تھا۔

جسٹس سنجے دھر اور جسٹس راج نیش اوسوال پر مشتمل ڈویژن بنچ نے جمعرات کو بجلی پیدا کرنے والی کمپنیوں کو جاری کیے گئے مطالباتی نوٹس منسوخ کردیے اور حکومت کو ہدایت دی کہ وہ آبی استعمال کے محصولات یا کسی دوسرے ٹیکس کی آڑ میں بجلی کی پیداوار پر کوئی ٹیکس عائد نہ کرے۔

عدالت کا یہ فیصلہ تین عرضیوں پر آیا، جو آزادانہ طور پر پن بجلی منصوبے چلانے والی کمپنیوں نے دائر کی تھیں۔ ان عرضیوں میں جموں و کشمیر واٹر ریسورسز (ریگولیشن اینڈ مینجمنٹ) ایکٹ 2010 اور اس کے تحت وضع کردہ قواعد کے تحت عائد کیے گئے محصولات کو چیلنج کیا گیا تھا۔

عرضی گزاروں میں 11 کمپنیاں شامل تھیں، جنہیں جموں و کشمیر کے مختلف علاقوں میں چھوٹے پن بجلی منصوبے الاٹ کیے گئے تھے۔ ان کمپنیوں نے 2010 سے آبی استعمال کے نام پر محصولات کی وصولی کے مطالبات کو چیلنج کرتے ہوئے دلیل دی تھی کہ درحقیقت یہ بجلی کی پیداوار پر ٹیکس عائد کرنے کے مترادف ہے۔

ان کا کہنا تھا کہ پن بجلی پیدا کرنے کے لیے استعمال ہونے والا پانی قابل استعمال نہیں ہوتا، کیونکہ اسے ٹربائنوں سے گزارنے کے بعد دوبارہ نچلی جانب دریا میں چھوڑ دیا جاتا ہے۔ کمپنیوں نے محصولات کے تعین کے طریقہ کار پر بھی سوال اٹھاتے ہوئے کہا کہ واٹر ریسورسز ریگولیٹری اتھارٹی نے پانی کے استعمال کی مقدار کے بجائے پانی کے بہاؤ کی بلندی (ہیڈ ہائٹ) کی بنیاد پر محصولات مقرر کیے ہیں۔

حکومت ہند نے بھی عرضی گزاروں کے موقف کی حمایت کی۔ اس کا کہنا تھا کہ ریاستی فہرست کی دفعہ 53 کے تحت ریاستوں کو بجلی کے استعمال یا اس کی فروخت پر ٹیکس عائد کرنے کا اختیار حاصل تھا، لیکن بجلی کی پیداوار پر ٹیکس لگانے کا اختیار نہیں تھا۔

تاہم جموں و کشمیر حکومت نے متعلقہ قانون کا دفاع کرتے ہوئے دلیل دی کہ ریاستی فہرست کی دفعہ 17 کے تحت اسے آبی وسائل کو منظم کرنے اور ان کے استعمال پر محصولات عائد کرنے کا اختیار حاصل تھا، جس میں پن بجلی منصوبے بھی شامل ہیں۔

حکومت کے موقف کو مسترد کرتے ہوئے ڈویژن بنچ نے کہا کہ کسی محصول کی نوعیت کا تعین اس کے حقیقی مقصد اور اثرات کی بنیاد پر کیا جانا چاہیے، نہ کہ اس نام کی بنیاد پر جو اسے دیا گیا ہو۔

عدالت نے نشاندہی کی کہ 2 اپریل 2019 کے حکم کے ذریعے مقرر کردہ محصولات پانی کی مقدار کے بجائے اس کی بلندی سے منسلک تھے۔ پانی کی بلندی جتنی زیادہ ہوتی ہے، بجلی پیدا کرنے کی صلاحیت بھی اتنی ہی بڑھتی ہے اور اسی کے ساتھ محصولات میں بھی اضافہ ہوتا ہے۔ اس لیے یہ محصول درحقیقت بجلی کی پیداوار سے منسلک تھا۔

عدالت نے مزید کہا کہ ان محصولات کے عوض حکومت کو پن بجلی منصوبوں کے آپریشن، دیکھ بھال یا انتظام کی کوئی ذمہ داری ادا نہیں کرنی پڑتی تھی۔

ایکٹ کی دفعہ 185-A کا حوالہ دیتے ہوئے بنچ نے کہا کہ جمع کی گئی رقم پن بجلی منصوبے قائم کرنے، موجودہ بجلی منصوبوں کو حاصل کرنے، بجلی کی ترسیل اور تقسیم کے نیٹ ورک میں سرمایہ کاری کرنے اور بجلی خریدنے کے لیے مختص کی گئی تھی۔ اس رقم کو بجلی پیدا کرنے والی کمپنیوں کو کوئی خدمات فراہم کرنے کے لیے استعمال نہیں کیا جارہا تھا۔

اس بنیاد پر عدالت نے قرار دیا کہ اس محصول کو نہ تو ریگولیٹری فیس تصور کیا جاسکتا ہے اور نہ ہی پانی کے استعمال کے عوض وصول کیا جانے والا معاوضہ۔

قانون سازی کے اختیار کے معاملے پر بنچ نے فیصلہ سنایا کہ اس وقت نافذ آئینی نظام کے تحت سابق ریاست جموں و کشمیر کی اسمبلی کو بجلی کی پیداوار پر ٹیکس عائد کرنے کا اختیار حاصل نہیں تھا۔

عدالت نے اپنے فیصلے میں کہاکہ ”ایسا کوئی قانون جو اپنی منظوری کے وقت آئین سے متصادم ہو، بعد میں پارلیمنٹ کی جانب سے اسے اختیار کیے جانے سے آئینی جواز حاصل نہیں کرسکتا۔”

عدالت نے حکومت کی اس دلیل کو بھی مسترد کردیا کہ جموں و کشمیر تنظیم نو ایکٹ 2019 کے تحت 2010 کے قانون کو اختیار کیے جانے سے اس کی آئینی خامی دور ہوگئی تھی۔ عدالت نے واضح کیا کہ کسی موجودہ ریاستی قانون کو اختیار کرنے سے وہ پارلیمنٹ کا قانون نہیں بن جاتا۔

عرضیوں کو منظور کرتے ہوئے ڈویژن بنچ نے 2010 کے ایکٹ کو اس حد تک آئین کے منافی قرار دیا، جہاں تک اس کے تحت عرضی گزاروں کے پن بجلی منصوبوں پر آبی استعمال کے محصولات عائد کیے گئے تھے۔

عدالت نے وصولی کے مطالباتی نوٹس منسوخ کردیے اور حکومت کو پابند کیا کہ وہ آبی استعمال کے محصولات یا کسی دوسرے ٹیکس کی آڑ میں بجلی کی پیداوار پر کوئی ٹیکس عائد نہ کرے۔

یواین آئی۔ ط ا

سری نگر، لیفٹیننٹ گورنر منوج سنہا نے جمعرات کو کہا کہ جموں و کشمیر کی کہانی اب ماضی کے چیلنجوں تک محدود نہیں ہے، بلکہ اس میں موجودہ کوششوں اور مستقبل کے امکانات کی بھی عکاسی ہوتی ہے۔ یہاں کے نوجوان کھیل، تعلیم، اختراع اور کاروبار کے شعبوں میں نمایاں کارکردگی کا مظاہرہ کر رہے ہیں۔

”پیڈل تھرو پیراڈائز” سائیکلنگ مقابلے کے فاتحین کو مبارک باد دیتے ہوئے مسٹر سنہا نے شرکاء کے جوش و جذبے اور عزم کی تعریف کی۔ انہوں نے کہا کہ یہ مقابلہ جموں و کشمیر کے نوجوانوں کی امید اور ان کے متحرک جذبے کی عکاسی کرتا ہے۔

حاضرین سے خطاب کرتے ہوئے لیفٹیننٹ گورنر نے جموں و کشمیر پولیس کی تعریف کی کہ اس نے سلامتی اور قانون نافذ کرنے کی ذمہ داریوں سے آگے بڑھ کر عوامی رابطے کے بامعنی اقدامات کے ذریعے اپنا رول ادا کیا ہے۔

انہوں نے کہا کہ ”پیڈل تھرو پیراڈائز” جیسے پروگرام نظم و ضبط کو ترغیب اور فرض کو سماجی ذمہ داری کے ساتھ جوڑ کر شہریوں کے ساتھ اعتماد کے رشتے مضبوط کرنے کے عزم کا اظہار کرتے ہیں۔

انہوں نے کہا کہ ”پیڈل تھرو پیراڈائز جیسے اقدامات اس بات کا ثبوت ہیں کہ جموں و کشمیر پولیس نے سلامتی کو ہمدردی، نظم و ضبط کو ترغیب اور فرض کو سماجی وابستگی کے ساتھ جوڑا ہے، تاکہ جموں و کشمیر کے مرکز کے زیر انتظام علاقے کے لوگوں کے ساتھ دلوں کے رشتے قائم کیے جا سکیں۔”

لیفٹیننٹ گورنر نے کہا کہ فاتحین کی کامیابیاں جموں و کشمیر کی بدلتی ہوئی تصویر کی علامت ہیں اور انہوں نے جامع ترقی اور قومی پیش رفت میں حصہ لینے کے لیے نوجوانوں کی صلاحیت کو اجاگر کیا۔ انہوں نے کہا کہ جموں و کشمیر پولیس کے شہری کارروائی پروگراموں نے نوجوانوں کی شمولیت، ہنر مندی کے فروغ اور کھیلوں میں نمایاں کارکردگی کے نئے مواقع پیدا کیے ہیں، جس سے معاشرے میں اعتماد اور تعمیری شرکت کو فروغ ملا ہے۔

انہوں نے کہاکہ ”جموں و کشمیر کی کہانی اب ماضی کے چیلنجوں تک محدود نہیں رہی ہے، بلکہ یہ حال کی کوششوں اور مستقبل کے امکانات کی کہانی بھی ہے۔”

لیفٹیننٹ گورنر نے کہا کہ جموں و کشمیر امکانات کی سرزمین کے طور پر ابھر رہا ہے، جہاں نوجوان کھیل، تعلیم، اختراع اور کاروبار کے شعبوں میں نمایاں کارکردگی کا مظاہرہ کر رہے ہیں۔ انہوں نے اس بات پر زور دیا کہ کسی بھی خطے کی حقیقی ترقی اسی وقت یقینی ہوتی ہے، جب وہاں کے نوجوانوں کو مواقع میسر ہوں، انہیں اپنی صلاحیتوں پر اعتماد ہو اور ان کے دلوں میں اتحاد کا مضبوط جذبہ موجود ہو۔

انہوں نے کہا کہ ”میں ہمیشہ اس بات پر زور دیتا رہا ہوں کہ کسی بھی خطے کی حقیقی ترقی اس وقت ہوتی ہے، جب اس کے نوجوانوں کی آنکھوں میں یقین، ہاتھوں میں مواقع اور دلوں میں اتحاد کا جذبہ ہو۔ مجھے یقین ہے کہ پیڈل تھرو پیراڈائز جیسے مقابلے جموں و کشمیر کے نوجوانوں کو اپنے ہنر، محنت اور عزم کے ذریعے ملک کی ترقی میں نمایاں رول ادا کرنے کی ترغیب دیں گے۔”

لیفٹیننٹ گورنر نے کہا کہ ”پیڈل تھرو پیراڈائز” اور ”جشنِ ڈل” جیسے اقدامات محض کھیلوں کے مقابلے نہیں ہیں، بلکہ یہ شرکاء میں نظم و ضبط، ثابت قدمی اور مشکلات کا مقابلہ کرنے کی صلاحیت پیدا کرتے ہیں۔ انہوں نے شہریوں سے اپیل کی کہ وہ اجتماعی ترقی کے لیے مثبت خیالات، علم اور اختراع کو اپنائیں۔

انہوں نے کہا کہ نوجوانوں کی طاقت ملک کا سب سے بڑا سرمایہ ہے اور نوجوان نسل کو کھیلوں اور سماجی پروگراموں میں سرگرمی سے حصہ لینے کی ترغیب دی۔ انہوں نے منشیات سے پاک جموں و کشمیر کی تعمیر کی اہمیت پر بھی زور دیتے ہوئے کہا کہ معاشرے کو نشے کی لت سے متاثرہ افراد کی ہمدردی اور توجہ کے ساتھ مدد کرنی چاہیے اور ان کی بحالی کے لیے اقدامات کرنے چاہئیں۔

لیفٹیننٹ گورنر نے تمام متعلقہ فریقوں سے امن، ترقی اور صحت مند، خوش حال اور محفوظ جموں و کشمیر کے لیے مل کر کام کرنے کی اپیل کی۔ انہوں نے کھیلوں کے ذریعے مثبت تبدیلی کے جذبے کو آگے بڑھانے پر تمام شرکاء کو مبارک باد بھی دی۔

یو این آئی۔ این یو۔