واشنگٹن، امریکی ایوانِ نمائندگان نے وزیر جنگ پیٹ ہیگسیتھ کے خلاف مواخذے کی کارروائی شروع کرنے کی کوشش ناکام بنا دی ہے۔

ووٹنگ کے دوران 211 ارکان نے مواخذے کی قرارداد کو ایوان کی عدالتی کمیٹی کے حوالے کرنے کی حمایت کی، جس کے نتیجے میں اس قرارداد پر غور کرنے کا عمل مؤثر طور پر رک گیا۔

دوسری جانب ایوان کے 204 ارکان نے اس طریقہ کار کی مخالفت کی اور براہ راست مواخذے کی قرارداد پر ووٹنگ کرانے کی حمایت کی۔

یو این آئی۔ ایم۔ جے

واشنگٹن، امریکی صدر ڈونالڈ ٹرمپ نے ایران کے ساتھ جنگ کو ‘عملی طور پر ختم’ قرار دیتے ہوئے کہا ہے کہ امریکہ فی الحال فوجی حملے کی دھمکی پر عمل نہیں کرے گا۔ وسط مدتی انتخابات میں ریپبلکن پارٹی کی کراری شکست کے بعد انہوں نے یہ اعلان کیا۔

مسٹر ٹرمپ نے پینٹاگون کی جانب سے فوجی کارروائی تیز کیے جانے کے خدشات کو کم کرتے ہوئے کہا کہ امریکی فوج ‘اب تک کے بہترین ہتھیاروں اور سازوسامان کے ساتھ پوری طرح تیار ہے’، لیکن انہیں نہیں لگتا کہ ان کے استعمال کی کوئی ضرورت پیش آئے گی۔

‘انڈیپنڈنٹ’ کی ایک رپورٹ کے مطابق، وائٹ ہاؤس میں صحافیوں سے بات چیت کے دوران مسٹر ٹرمپ نے کہا کہ وہ ان ممالک کی درخواست پر فوجی کارروائی روک رہے ہیں جو ایران کے پڑوسی ہیں۔ انہوں نے بتایا کہ قطر، سعودی عرب، متحدہ عرب امارات، بحرین، کویت اور دیگر ممالک نے امریکہ سے مزید حملے نہ کرنے کی اپیل کی ہے۔

مسٹر ٹرمپ نے ایران پر اقتصادی دباؤ برقرار رکھنے کے لیے آبنائے ہرمز میں بحری ناکہ بندی جاری رکھنے کی بات کہی ہے۔

مسٹر ٹرمپ کا یہ بیان قطر کے وزیر اعظم شیخ محمد بن عبدالرحمٰن آل ثانی سے ملاقات کے بعد سامنے آیا ہے۔ 28 فروری کو امریکہ اور اسرائیل کی جانب سے ایران کے خلاف جنگ شروع کیے جانے کے بعد سے آل ثانی نے واشنگٹن اور تہران کے درمیان ایک اہم ثالث کا کردار ادا کیا ہے۔

دونوں فریقوں کے درمیان حملے جاری ہیں، حالانکہ ان کی شدت پہلے جیسی نہیں رہی ہے۔ ایران کے سرکاری ذرائع ابلاغ نے دعویٰ کیا ہے کہ امریکہ نے رات کے وقت ایک بار پھر ایران کے جزیرہ قشم پر حملہ کیا۔

دوسری جانب ایران نے اس ماہ کے آغاز میں خلیجی خطے اور آبنائے ہرمز میں تیل کے ٹینکروں کو نشانہ بنایا تھا۔

یمن میں ایران کے اتحادی حوثی باغیوں نے بھی حالیہ مہینوں میں سعودی عرب پر اپنے حملے تیز کر دیے ہیں۔ مسٹر ٹرمپ ایران کی جانب سے پہلے ہی پیش کی گئی جنگ بندی کی تجویز قبول کرنے کے لیے تیار نہیں ہوئے ہیں۔ اس تجویز میں امریکہ سے اپنی بندرگاہوں کی بحری ناکہ بندی ختم کرنے، کچھ پابندیاں ہٹانے اور بمباری روکنے کا مطالبہ کیا گیا ہے۔ اس کے بدلے تہران آبنائے ہرمز کو فوجی سرگرمیوں سے پاک کرنے پر رضامندی ظاہر کر رہا ہے۔ اس کے بعد ایران کے جوہری پروگرام اور دیگر پابندیوں کے معاملے پر بات چیت کی تجویز ہے۔

ایران جنگ کی غیر مقبولیت اور پٹرول کی قیمتوں سمیت معیشت پر اس کے اثرات نے ڈیموکریٹک پارٹی کی انتخابی کامیابی میں اہم کردار ادا کیا۔ امریکہ کے نائب صدر جے ڈی وینس نے ریپبلکن پارٹی کی تاریخی شکست کے لیے براہ راست جنگ کو ذمہ دار ٹھہرایا۔ انہوں نے اعتراف کیا کہ اس تنازع کے باعث امریکی شہریوں کے لیے اخراجاتِ زندگی بڑھ گئے ہیں۔

اگرچہ آل ثانی نے مسٹر ٹرمپ اور نائب صدر جے ڈی وینس کے ساتھ ہونے والی بات چیت کو ‘مثبت’ قرار دیا، لیکن امریکہ اور خلیجی ممالک کے سینئر حکام نے جلد کسی معاہدے کے امکان پر شبہ ظاہر کیا ہے۔

یہ ملاقات ایران کی قومی سلامتی کونسل کے سربراہ محسن رضائی کے اس بیان کے بعد ہوئی، جس میں انہوں نے سوشل میڈیا پلیٹ فارم ایکس پر امریکہ سے ‘فرضی مذاکرات کے بارے میں جھوٹی خبریں پھیلانا بند کرنے’ کو کہا تھا۔ انہوں نے کہا کہ اب وقت آگیا ہے کہ امریکہ ایران کی جانب سے بار بار پیش کی گئی 7 شرائط قبول کرتے ہوئے ہتھیار ڈال دے۔

امریکہ نے ایران کی اس تجویز کو بار بار مسترد کیا ہے۔ امریکی وزیر خارجہ مارکو روبیو نے اسے ‘توہین آمیز، مضحکہ خیز اور حقیقت سے دور’ قرار دیا تھا۔ دوسری جانب ایران کی وزارت خارجہ کے ترجمان اسماعیل بقائی نے پیر کے روز اس تجویز کا دفاع کرتے ہوئے اسے مذاکرات کی میز پر دستیاب سب سے مناسب تجویز قرار دیا۔

یو این آئی۔ الف الف۔ م الف

واشنگٹن، امریکہ کے ریپبلکن رکن پارلیمنٹ تھامس میسی نے وزیر دفاع پیٹ ہیگسیتھ کے خلاف مواخذہ چلانے کی تحریک پیش کی ہے۔

انہوں نے ایران کے خلاف فوجی مہم، منشیات کی اسمگلنگ کے شبے میں جہازوں پر حملے اور امریکی قوانین اور آئین کی مبینہ خلاف ورزی کو لے کر ہیگسیتھ پر سنگین الزامات عائد کیے ہیں۔’پیٹر برائن ہیگسیتھ، وزیر دفاع کو سنگین جرائم اور بدعنوانی کے الزام میں عہدے سے ہٹانے’ کے عنوان سے اس تجویز میں مواخذے کی آٹھ وجوہات بتائی گئی ہیں۔ ان میں عہدے کا غلط استعمال، آئینی التزامات کی خلاف ورزی، غیر قانونی فوجی کارروائیوں کا حکم دینا اور قانون کی حکمرانی کو کمزور کرنا شامل ہے۔

ایوان نمائندگان میں تجویز پیش کرتے ہوئے مسٹر میسی نے وزیر دفاع کو آئین کے لیے خطرہ قرار دیا۔ انہوں نے الزام لگایا کہ مسٹر ہیگسیتھ نے غیر قانونی فوجی احکامات جاری کیے اور ایسا رویہ اختیار کیا جو ان کے عہدے کی ذمہ داریوں کے بالکل خلاف ہے۔ تجویز میں مسٹر ہیگسیتھ کے خلاف مواخذہ چلانے، ان پر مقدمہ چلانے، انہیں عہدے سے ہٹانے اور امریکہ میں کسی بھی باعزت، معتبر یا منافع بخش سرکاری عہدے پر مستقبل میں تقرری کے لیے نااہل قرار دینے کا مطالبہ کیا گیا ہے۔ اس میں الزام لگایا گیا ہے کہ انہوں نے 1973 کی جنگی طاقتوں سے متعلق تجویز کی دفعہ 2(سی) کی خلاف ورزی کرتے ہوئے غیر قانونی فوجی احکامات کو نافذ کیا۔

تجویز میں لگائے گئے اہم الزامات میں سے ایک ایران کے خلاف امریکی فوجی مہم سے متعلق ہے۔ میسی کا الزام ہے کہ یہ مہم کانگریس کی منظوری کے بغیر شروع کی گئی تھی۔ تجویز میں کہا گیا ہے کہ امریکی کانگریس نے نہ تو اسلامی جمہوریہ ایران کے خلاف جنگ کا اعلان کیا تھا اور نہ ہی وہاں امریکی مسلح افواج کو فوجی تصادم میں جھونکنے کے لیے کوئی خاص قانونی منظوری دی تھی۔

اپنے مؤقف کی حمایت میں تجویز میں قومی انسداد دہشت گردی مرکز کے سابق ڈائریکٹر جو کینٹ کا حوالہ دیا گیا ہے۔ مسٹر کینٹ نے مارچ میں اپنے عہدے سے استعفیٰ دیتے ہوئے کہا تھا کہ ایران کی طرف سے امریکہ کو کوئی فوری خطرہ نہیں تھا۔ مسٹر میسی نے ہیگسیتھ پر کانگریس کی طرف سے امریکی فوجیوں کو ایران سے واپس بلانے کی کوششوں کے باوجود فوجی مہم جاری رکھنے کا بھی الزام لگایا ہے۔ایک اور سنگین الزام ایران کے شہر میناب واقع شجرہ طیبہ پرائمری اسکول پر امریکی فوجی حملے سے جڑا ہے۔ اس حملے میں مبینہ طور پر 150 سے زائد بچے ہلاک ہو گئے تھے۔ تجویز میں ہیگسیتھ کے متنازع بیانات کا بھی ذکر کیا گیا ہے، جن میں ‘قانونی رسومات کے بجائے زیادہ سے زیادہ مہلک کارروائی’ اور ‘ہم احمقانہ جنگی اصولوں کے ساتھ نہیں لڑتے’ جیسے بیانات شامل ہیں۔ مسٹر میسی نے انہیں فوجی کارروائیوں پر لاگو قانونی پابندیوں کو نظر انداز کرنے کا ثبوت قرار دیا۔

مواخذے کی تجویز میں کیریبین بحیرہ اور مشرقی بحر الکاہل میں منشیات کی اسمگلنگ کے شبہے والے جہازوں پر امریکی فوجی حملوں کو بھی ہدف بنایا گیا ہے۔ اس میں الزام لگایا گیا ہے کہ ان کارروائیوں میں کم از کم 221 افراد لقمہ اجل بنے۔ مسٹر میسی نے وینزویلا کے صدر نکولس مادورو اور ان کی اہلیہ سیلیا فلورس کو حراست میں لینے کے لیے چلائی گئی فوجی مہم پر بھی سوال اٹھائے ہیں۔ تجویز میں الزام لگایا گیا ہے کہ مسٹر ہیگسیتھ نے ‘آپریشن ایبسلوٹ ریزالو’ کی ہدایت دی تھی، جسے وینزویلا کے تیل کے وسائل پر کنٹرول حاصل کرنے کے مقصد سے کی گئی غیر قانونی فوجی کارروائی قرار دیا گیا۔

یمن میں ‘آپریشن رف رائڈر’ کے تحت چلائی جانے والی فوجی مہم بھی مواخذے کی تجویز کی ایک اہم بنیاد ہے۔ اس میں الزام لگایا گیا ہے کہ اس مہم کے دوران 1,100 سے زائد فضائی حملے کیے گئے، جن میں تقریباً 224 شہری اور 500 سے 600 حوثی جنگجو ہلاک ہوئے۔ لیک ہوئی سگنل کی بات چیت کا حوالہ دیتے ہوئے تجویز میں مسٹر ہیگسیتھ کے اس بیان کا ذکر کیا گیا ہے کہ ‘ہم آسانی سے روک سکتے ہیں۔’مسٹر میسی نے مسٹر ہیگسیتھ سے جنوری میں ڈیموکریٹس کے کانگریس کا کنٹرول سنبھالنے سے پہلے استعفیٰ دینے کا مطالبہ کیا ہے۔ انہوں نے تمام جماعتوں کے اراکین پارلیمنٹ سے مواخذے کی تجویز کی حمایت کرنے کی اپیل کی اور کہا کہ تجویز پڑھی ہے یا نہیں، اس سے کوئی فرق نہیں پڑتا، وہ کانگریس کے تمام ارکان کی حمایت قبول کریں گے۔

مسٹر ہیگسیتھ نے تنقید کو مسترد کر دیا ہے اور انتظامیہ کی فوجی کارروائیوں کا دفاع کرنے کی بات کہی ہے۔

انہوں نے کہا کہ اگر ٹرمپ انتظامیہ کی فوجی کارروائیوں پر قانونی بحث کرنی ہے تو وہ اس کے لیے پورا دن تیار ہیں۔

یواین آئی۔الف الف