سری نگر، نیشنل کانفرنس کے چھ بار رکن اسمبلی منتخب ہونے والے مبارک گل نے بدھ کے روز اپنی پریس کانفرنس ملتوی کردی، جس میں ان سے مستقبل کے لائحہ عمل کا اعلان متوقع تھا۔ انہوں نے کہا کہ فی الحال وہ اس معاملے پر کوئی بیان نہیں دیں گے۔

سری نگر کے عیدگاہ اسمبلی حلقے کی نمائندگی کرنے والے مبارک گل نے حالیہ کابینہ میں توسیع کے دوران انہیں وزیر نہ بنائے جانے پر پارٹی کے اندر بڑھتی ہوئی ناراضگی کے درمیان میڈیا سے خطاب کرنے کا پروگرام بنایا تھا۔

اپنا فیصلہ واضح کرتے ہوئے مبارک گل نے کہا کہ انہوں نے جموں و کشمیر کی موجودہ صورت حال، اپنے ساتھیوں سے مشاورت اور حامیوں کے جذبات کو پیش نظر رکھتے ہوئے پریس کانفرنس ملتوی کرنے کا فیصلہ کیا ہے۔

انہوں نے کہا کہ ان کے بعض کارکن گزشتہ تقریباً ایک دہائی سے ان کے ساتھ وابستہ ہیں، جبکہ کچھ کارکن 1975 سے گزشتہ 51 برسوں سے ان کا ساتھ دے رہے ہیں۔

انہوں نے کہاکہ”میں اعلان کرتا ہوں کہ آج کی پریس کانفرنس ملتوی کررہا ہوں۔ اس معاملے پر آج کچھ نہیں کہوں گا۔” انہوں نے مزید کہا کہ وہ اپنے ساتھیوں اور دوستوں کے جذبات کا احترام کرنا چاہتے ہیں اور ان کی احساسات کی ترجمانی کرنا چاہتے ہیں۔

مبارک گل نے کہاکہ ”میں نہ کچھ کہوں گا اور نہ ہی کوئی اعلان کروں گا۔ ان شاء اللہ، مناسب وقت آنے پر چیزیں خود آگے بڑھیں گی۔” انہوں نے واضح کیا کہ ان کا یہ بیان ہی وہ واحد پیغام ہے جو وہ فی الحال دینا چاہتے ہیں۔ انہوں نے سب کا شکریہ ادا کرتے ہوئے کہا کہ انہیں نہ کوئی وضاحت پیش کرنی ہے اور نہ ہی مزید کچھ کہنا ہے۔

انہوں نے بتایا کہ بعض ساتھیوں نے فون پر انہیں مشورے دیے ہیں اور وہ ان کے مشوروں پر عمل کرتے ہوئے اسی کے مطابق اپنی جدوجہد جاری رکھیں گے۔ اپنی بات ختم کرتے ہوئے انہوں نے کہاکہ ”میں ایک لڑاکا ہوں اور اپنی جدوجہد جاری رکھوں گا۔”

یواین آئی۔ ط ا

سرینگر، نیشنل کانفرنس کے سینئر رہنما اور سابق رکن قانون ساز کونسل (ایم ایل سی) غلام قادر پردیسی منگل کی دیر رات انتقال کرگئے۔ ان کے انتقال کی خبر سے سیاسی حلقوں میں غم کی لہر دوڑ گئی۔ پارٹی کے رہنماؤں اور کارکنوں نے ان کی وفات پر گہرے رنج و غم کا اظہار کرتے ہوئے سوگوار خاندان سے تعزیت کی ہے۔

ان کے فرزند اور لال چوک کے رکن اسمبلی احسن پردیسی نے سوشل میڈیا پلیٹ فارم ایکس پر ایک پیغام کے ذریعے اپنے والد کے انتقال کی اطلاع دی۔

احسن پردیسی نے اپنے پیغام میں لکھا کہ انتہائی دکھ اور بوجھل دل کے ساتھ اپنے عزیز والد شیخ غلام قادر پردیسی، سابق ایم ایل سی اور ریٹائرڈ جوائنٹ فنانشل کمشنر کے انتقال کی اطلاع دے رہا ہوں۔ وہ اس دار فانی سے کوچ کرکے اپنے خالق حقیقی سے جاملے ہیں۔

غلام قادر پردیسی کا نیشنل کانفرنس کے ساتھ طویل سیاسی وابستگی کا رشتہ رہا اور وہ پارٹی کی سیاسی سرگرمیوں میں سرگرم حصہ لیتے رہے۔ سیاسی زندگی کے علاوہ انہوں نے جموں و کشمیر انتظامیہ میں بھی اہم خدمات انجام دیں۔ وہ جوائنٹ فنانشل کمشنر کے عہدے پر فائز رہے اور سرکاری ملازمت سے سبکدوش ہوئے تھے۔

نیشنل کانفرنس کے صدر ڈاکٹر فاروق عبداللہ، نائب صدر اور وزیراعلی عمر عبداللہ کے علاوہ پارٹی کے دیگر رہنماؤں اور کارکنوں نے غلام قادر پردیسی کے انتقال پر گہرے دکھ اور افسوس کا اظہار کیا ہے۔

پارٹی کی جانب سے جاری تعزیتی پیغام میں احسن پردیسی اور دیگر اہل خانہ سے دلی ہمدردی اور تعزیت کا اظہار کیا گیا۔ پارٹی نے مرحوم کی مغفرت، بلندیٔ درجات اور انہیں جنت الفردوس میں اعلیٰ مقام عطا کیے جانے کی دعا کرتے ہوئے کہا کہ اللہ تعالیٰ سوگوار خاندان کو اس ناقابل تلافی نقصان کو برداشت کرنے کے لیے صبر و حوصلہ عطا فرمائے۔

دریں اثنا، اپنی پارٹی کے صدر الطاف بخاری نے بھی نیشنل کانفرنس کے سینئر رہنما غلام قادر پردیسی کے انتقال پر گہرے رنج و غم کا اظہار کیا۔

انہوں نے کہا کہ غلام قادر پردیسی ایک غیر معمولی شائستگی اور وقار کے حامل انسان تھے۔ اپنی اعلیٰ اخلاقی خوبیوں اور غیر متزلزل دیانت داری کے باعث انہیں وسیع پیمانے پر عزت و احترام کی نگاہ سے دیکھا جاتا تھا۔ الطاف بخاری نے کہا کہ وہ نہ صرف عوامی زندگی میں ان کی گراں قدر خدمات اور سیاسی شخصیت کے معترف رہے ہیں بلکہ ان کے مرحوم والد کے ساتھ غلام قادر پردیسی کی قریبی وابستگی کی وجہ سے بھی وہ ہمیشہ ان کا بے حد احترام کرتے تھے۔

یواین آئی۔ ظ ا

سرینگر، جرائم شاخ جموں و کشمیر کے معاشی جرائم ونگ کشمیر نے کاروباری لین دین کی 35 لاکھ روپے کی واجب الادا رقم ادا کرنے کے لیے مبینہ طور پر جعلی دستخط والا چیک جاری کرنے کے معاملے میں پلوامہ کے ایک شخص کے خلاف فردِ جرم داخل کی ہے۔

سال 2026 میں درج ایف آئی آر کے سلسلے میں بھارتیہ نیائے سنہتا (بی این ایس) کی دفعات 318(2)، 336(3) اور 340 کے تحت یہ فردِ جرم چیف جوڈیشل مجسٹریٹ (سی جے ایم) پلوامہ کی عدالت میں مشتاق احمد یتو، ساکن چن پورہ، راج پورہ، پلوامہ کے خلاف داخل کی گئی ہے۔

معاشی جرائم ونگ کے مطابق یہ معاملہ ایک کاروباری شخص کی شکایت سے شروع ہوا تھا۔ شکایت کنندہ نے الزام لگایا تھا کہ وہ ملزم کے ساتھ کاروباری شراکت داری میں تھا اور کاروباری حسابات کے تصفیے کے دوران ملزم کے ذمے 35 لاکھ روپے کی رقم واجب الادا پائی گئی تھی۔

الزام ہے کہ ملزم نے اس رقم کی ادائیگی کے لیے ایک چیک جاری کیا، لیکن بینک نے اسے مسترد کردیا، کیونکہ یہ چیک اس کے والد کے بینک کھاتے سے جاری کیا گیا تھا، جن کا 2 سال قبل انتقال ہوچکا تھا۔ ملزم نے مبینہ طور پر اس چیک پر خود دستخط کیے تھے۔

معاشی جرائم ونگ نے بتایا کہ تفتیش کے دوران الزامات کی تصدیق ہوگئی، جس کے بعد عدالتی فیصلے کے لیے مجاز عدالت میں فردِ جرم داخل کردی گئی۔

یو این آئی، ایم جے آر۔