سرینگر، پی ڈی پی صدر محبوبہ مفتی نے پیر کو نیشنل کانفرنس پر سخت تنقید کرتے ہوئے اس کے بانی شیخ محمد عبداللہ کو کشمیریوں اور ملک کے باقی حصوں کے درمیان بداعتمادی کے بیج بونے کا ذمہ دار ٹھہرایا۔

انہوں نے کہا کہ جب تک نیشنل کانفرنس اقتدار میں رہے گی، جموں و کشمیر میں امن کا قیام مشکل رہے گا۔

پی ڈی پی کے یومِ تاسیس کے موقع پر پارٹی کارکنوں سے خطاب کرتے ہوئے انہوں نے الزام لگایا کہ نیشنل کانفرنس نے اقتدار حاصل کرنے کی کوششوں کے مطابق کشمیر کے معاملے پر اپنا موقف تبدیل کیا ہے۔

انہوں نے کہاکہ ”نیشنل کانفرنس نے اپنی سیاست کے ذریعے اس بداعتمادی کی بنیاد رکھی۔”

محبوبہ مفتی نے سوال کیا کہ آخر ہندوستان کشمیریوں پر اعتماد کیوں نہیں کرتا اور کشمیری ہندوستان پر بھروسہ کیوں نہیں کرتے؟ اس ضمن میں انہوں نے خطے میں تقریباً 10 لاکھ سکیورٹی اہلکاروں کی تعیناتی کا حوالہ دیا۔

انہوں نے کہا کہ جموں و کشمیر نے 79 سال قبل ہندوستان کے ساتھ الحاق کیا تھا اور اس فیصلے کی حمایت شیخ عبداللہ نے بھی کی تھی، حالانکہ اس وقت ریاست میں مسلمانوں کی اکثریت تھی۔

انہوں نے سوال کیاکہ ”آپ نے مہاتما گاندھی اور جواہر لعل نہرو کو دیکھ کر اور ان کے نظریے پر یقین کرتے ہوئے یہ فیصلہ کیا تھا۔ لیکن محض دو سال کے اندر ایسا کیا ہوا کہ آپ نے رائے شماری کا مطالبہ شروع کردیا؟”

محبوبہ مفتی نے کہا کہ شیخ عبداللہ اس وقت جن سنگھ اور ہندو مہاسبھا کی مسلمانوں کے تئیں مخالفت سے واقف تھے، جب انہوں نے ہندوستان کے ساتھ الحاق کے فیصلے کی حمایت کی تھی۔

1975 کے اندرا۔شیخ معاہدے کا حوالہ دیتے ہوئے انہوں نے کہاکہ ”آپ نے 22 سال تک پاکستان میں رائے شماری کا مطالبہ کیا اور پھر اچانک ایک ہی رات میں دوبارہ اقتدار کی کرسی قبول کرلی۔”

محبوبہ مفتی کے مطابق، اس کے نتیجے میں پیدا ہونے والی غیر یقینی صورت حال نے نہ صرف نئی دہلی اور کشمیر کے تعلقات کو نقصان پہنچایا بلکہ عام کشمیریوں اور ملک کے باقی حصوں کے درمیان اعتماد کو بھی متاثر کیا۔

یواین آئی۔ ظ ا

سرینگر، سی پی آئی (ایم) کی مرکزی کمیٹی کے رکن اور کولگام کے رکن اسمبلی محمد یوسف تاریگامی نے جموں و کشمیر میں سی آئی ڈی کے تصدیقی عمل پر نظرثانی کا مطالبہ کرتے ہوئے کہا ہے کہ کسی بھی شخص کی جانچ اس کے اپنے کردار اور طرزِ عمل کی بنیاد پر ہونی چاہیے، نہ کہ انتہاپسندی سے متعلق سرگرمیوں میں اس کے رشتہ داروں کی مبینہ شمولیت کی بنیاد پر۔

سوشل میڈیا پلیٹ فارم ایکس پر ایک پوسٹ میں تاریگامی نے کہا کہ ہائی کورٹ کے متعدد فیصلوں میں یہ واضح کیا جا چکا ہے کہ محض رشتہ داروں کی انتہاپسندی سے متعلق سرگرمیوں میں مبینہ شمولیت کی بنیاد پر کسی شخص کو سیکورٹی کلیئرنس سے محروم نہیں کیا جا سکتا، اس کے باوجود بہت سے لوگوں کو سی آئی ڈی کلیئرنس حاصل کرنے میں مشکلات کا سامنا کرنا پڑ رہا ہے۔

انہوں نے کہا کہ بعض معاملات میں دور کے رشتہ داروں کی مبینہ سرگرمیاں بھی متعلقہ افراد کے مستقبل اور ملازمت کے امکانات کو متاثر کر رہی ہیں۔ یہاں تک کہ ایسے واقعات بھی سامنے آئے ہیں جن میں ملزم رشتہ داروں کی موت کئی برس قبل ہو چکی ہے، لیکن اس کے باوجود ان کے ماضی کے معاملات کا اثر نئی نسل پر پڑ رہا ہے۔

تاریگامی نے کہا کہ رشتہ داروں کے ماضی کے اعمال کی سزا نوجوان نسل کو نہیں ملنی چاہیے اور نہ ہی انہیں کسی قصور کے بغیر مواقع سے محروم کیا جانا چاہیے۔

انہوں نے کہا کہ ”تصدیقی عمل پر نظرثانی کی ضرورت ہے تاکہ اس بات کو یقینی بنایا جا سکے کہ افراد کی جانچ ان کے اپنے کردار اور طرزِ عمل کی بنیاد پر ہو، نہ کہ ان کے رشتہ داروں کی مبینہ سرگرمیوں کی بنیاد پر۔”

انہوں نے مزید کہا کہ ”سیکورٹی سے متعلق خدشات اہم ہیں، لیکن ان کی آڑ میں بے قصور افراد کے حقوق اور مستقبل کو داؤ پر نہیں لگایا جانا چاہیے۔”

واضح رہے کہ ماضی میں بھی جموں و کشمیر کے کئی مین اسٹریم سیاسی رہنما پولیس تصدیق کے موجودہ طریقہ کار پر سوال اٹھاتے ہوئے اس میں تبدیلی اور نظرثانی کا مطالبہ کر چکے ہیں۔

یواین آئی۔ ط ا

سرینگر، جموں و کشمیر کے ضلع اننت ناگ میں نماز کے دوران سنگ باری کے واقعے کے بعد پولیس نے چار افراد کو پوچھ تاچھ کے لیے حراست میں لے لیا ہے۔

پولیس نے پیر کے روز بتایا کہ اننت ناگ کے پیہرو شیر باغ علاقے میں ایک مکان کو عبادت گاہ میں تبدیل کرکے وہاں نماز ادا کرنے کے معاملے پر تنازعہ پیدا ہوگیا۔ اس دوران بعض شرپسند عناصر نے عشاء کی نماز کے وقت سنگ باری کی، جس کے نتیجے میں معمولی نقصان پہنچا۔

پولیس کے مطابق، واقعے کی اطلاع ملتے ہی پولیس کی ٹیمیں فوری طور پر موقع پر پہنچ گئیں اور حالات کو قابو میں کر لیا۔

پولیس نے بتایا کہ اس سلسلے میں ایف آئی آر درج کر لی گئی ہے، جبکہ چار افراد کو پوچھ تاچھ کے لیے حراست میں لیا گیا ہے۔ معاملے کی مزید تحقیقات جاری ہیں۔

پولیس نے شہریوں سے اپیل کی ہے کہ وہ اس واقعے کو فرقہ وارانہ رنگ دینے سے گریز کریں اور غیر مصدقہ اطلاعات کو پھیلانے سے باز رہیں۔ پولیس نے مزید کہا کہ علاقے میں امن و قانون کی صورت حال معمول کے مطابق ہے اور مکمل طور پر قابو میں ہے۔

یواین آئی۔ ط ا