واشنگٹن، امریکی صدر ڈونالڈ ٹرمپ نے کہا ہے کہ واشنگٹن ایران کے ساتھ جنگ ختم کرنے کی کوئی جلدی میں نہیں ہے۔ انہوں نے اس تنازع کو ”روایتی جنگ نہیں” قرار دیتے ہوئے دعویٰ کیا کہ کئی ماہ سے جاری فوجی کارروائیوں اور پائیدار امن کے لیے مسلسل سفارتی کوششوں کے باوجود وقت امریکہ کے ساتھ ہے۔

ٹرمپ نے یہ بھی دعویٰ کیا کہ تہران مذاکرات میں اب بھی دلچسپی رکھتا ہے، لیکن اسے شدید مالی مشکلات کا سامنا ہے اور وہ فوجی اہلکاروں اور قانون نافذ کرنے والے اداروں کے ملازمین کو تنخواہیں ادا کرنے سے بھی قاصر ہے۔

اوول آفس میں صحافیوں سے گفتگو کرتے ہوئے ٹرمپ نے کہا، ”مذاکرات ہو رہے ہیں۔ وہ بات کرنا چاہتے ہیں۔ وہ مسلسل بات چیت کر رہے ہیں۔”

انہوں نے مزید کہا، ”لیکن دیکھیے، وہ اپنے فوجیوں اور پولیس اہلکاروں کو تنخواہیں نہیں دے رہے ہیں۔ وہ بڑی مشکل میں ہیں۔ اور سچ کہوں تو ہمارے پاس وقت ہے۔ یہ جنگ ہے، لیکن روایتی جنگ نہیں۔ اسے شروع ہوئے سات ماہ ہو چکے ہیں۔”

امریکی صدر نے فوجی مہم کے مالی اخراجات کی اہمیت بھی کم ظاہر کرنے کی کوشش کی اور دعویٰ کیا کہ اس تنازع پر واشنگٹن نسبتاً بہت کم رقم خرچ کر رہا ہے۔

ٹرمپ نے کہا، ”نسبتاً دیکھا جائے تو ہم بہت کم پیسہ خرچ کر رہے ہیں۔” انہوں نے مزید دعویٰ کیا کہ وینزویلا سے متعلق پیش رفت کے ذریعے امریکہ اپنے اخراجات سے کئی گنا زیادہ رقم حاصل کر چکا ہے۔

ٹرمپ کا یہ بیان ایسے وقت میں سامنے آیا ہے جب وہ متعدد بار ایران کے خلاف فوجی کارروائیاں دوبارہ شروع کرنے یا ان میں شدت لانے کی دھمکی دے چکے ہیں۔ انہوں نے اس سے قبل امریکی انتخابات کے بعد ایران کے خلاف ”ایک اور چھوٹی ایپک فیوری” کارروائی شروع کرنے کا امکان بھی ظاہر کیا تھا۔ ایپک فیوری سے مراد تہران کے خلاف امریکہ کی ابتدائی فوجی مہم ہے۔ تاہم، انہوں نے ایک ”بڑے اور اچھے” معاہدے کی امید بھی ظاہر کی ہے۔

حقیقت یہ ہے کہ واشنگٹن اور تہران کے درمیان کئی اہم معاملات پر اختلافات برقرار ہیں، جن میں ایران کا جوہری پروگرام، پابندیوں میں نرمی اور ایرانی بندرگاہوں کی امریکی ناکہ بندی شامل ہیں۔

دریں اثنا، جمعہ کو امریکہ میں جی 20 وزرائے خارجہ کے اجلاس کے موقع پر ترکی کے وزیر خارجہ حاقان فیدان اور امریکی وزیر خارجہ مارکو روبیو کی ملاقات کے بعد سفارتی سرگرمیوں میں تیزی دیکھی گئی۔ ملاقات میں واشنگٹن اور تہران کے درمیان مذاکرات، خطے کی مجموعی صورت حال اور دوطرفہ تعلقات پر تبادلہ خیال کیا گیا۔

یہ ملاقات رواں ہفتے کے اوائل میں ترک صدر رجب طیب اردوان اور ٹرمپ کے درمیان ٹیلی فون پر ہونے والی گفتگو کے بعد ہوئی۔ اس دوران انقرہ نے بحری سلامتی سے متعلق اپنے خدشات ظاہر کیے تھے اور علاقائی کشیدگی کم کرنے کے لیے سفارتی کوششوں کی حمایت کا اظہار کیا تھا۔

ایران کے ساتھ جنگ کا آغاز 28 فروری کو ایران کے فوجی ٹھکانوں، میزائل مراکز اور جوہری تنصیبات پر امریکہ اور اسرائیل کے مشترکہ حملوں کے بعد ہوا تھا۔ ابتدائی بمباری میں ایران کے اس وقت کے سپریم لیڈر آیت اللہ علی خامنہ ای ہلاک ہو گئے تھے، جس کے بعد ایران نے اسرائیل اور خطے میں امریکی تنصیبات پر جوابی میزائل حملے کیے۔

بعد ازاں ایران نے آبنائے ہرمز سے بحری آمد و رفت محدود کر دی، جس سے عالمی سطح پر تیل کی فراہمی اور توانائی کے تحفظ کے حوالے سے تشویش پیدا ہو گئی۔

یو این آئی۔ ع ا۔

بیروت، اسرائیلی فورسز نے جمعہ کو ہیام اور کنتارا میں مشین گن سے وسیع پیمانے پر فائرنگ کی جس سے آبادی میں خوف وہراس پھیل گیا اور کنتارا میں کچھ مکانات کو آگ لگ گئی۔ایجنسی نے یہ اطلاع دی ہے۔

ایجنسی نے یہ بھی اطلاع دی کہ اسرائیلی فوج نے بنت جبیل کے علاقے میں طیری قصبے میں ایک دھماکہ کیا اور طولن قصبے کے قریب وادی الحجیر کو 155 ایم ایم توپ خانے کے گولوں سے نشانہ بنایا گیا۔

آرکب کے علاقے میں کفر شوبہ کے ارد گرد کے علاقے، بنت جبیل میں حداسہ کے مضافات اور صور کے علاقے میں وادی زیبکن کو بھی توپ خانے سے نشانہ بنایا گیا۔

میفدون اور ظوطار الشرقیہ کے قصبوں کے درمیان کے علاقے کو بھی وقفے وقفے سے توپ خانے کی گولیوں کا نشانہ بنایا گیا۔

ایجنسی کے مطابق، اسرائیلی فوجیوں نے کفر شوبہ کے رہائشی حسن نبا کے مکان کو اس میں موجود سامان سمیت کفر شوبا-سیدانہ ہل شیبہ روڈ پر اڑا دیا۔

ایجنسی کے مطابق، اسرائیلی فوجیوں نے کفر شوبہ کے رہائشی حسن نبا کے مکان کو اس میں موجود سامان سمیت کفر شوبا-سیدانہ ہل شیبہ روڈ پر اڑا دیا۔ ایجنسی نے یہ بھی اطلاع دی کہ ایک انٹرسیپٹر میزائل طیبہ کے قصبے پر پھٹا، لیکن اس نے مزید تفصیلات فراہم نہیں کیں۔

یہ حملے 20-21 اکتوبر کو ٹمپا، فلوریڈا میں واشنگٹن کی سرپرستی میں بیروت اور تل ابیب کے درمیان تکنیکی سطح کے فوجی مذاکرات کے بعد ہوئے۔

جبکہ مذاکرات سے کسی ٹھوس پیش رفت کا اعلان نہیں کیا گیا اور نہ ہی کوئی مشترکہ بیان جاری کیا گیا۔ تاہم، یہ اطلاع دی گئی ہے کہ فریقین نے لبنان سے اسرائیل کے انخلاء اور حزب اللہ کو غیر مسلح کرنے پر اختلافات کے باوجود مذاکرات جاری رکھنے پر اتفاق کیا۔

بیروت اور تل ابیب نے 26 جون کو ایک فریم ورک معاہدہ کیا تھا، جس میں لبنانی فوج کی خطے میں تعیناتی اور اسرائیل کے مقبوضہ لبنانی علاقوں سے بتدریج انخلاء کے بدلے مسلح گروہوں کو غیر مسلح کرنے کا تصور کیا گیا تھا۔

معاہدہ، جس میں عمل درآمد کے لیے پائلٹ زونز کا تعین بھی شامل ہے، اب تک صرف تین قصبوں میں نافذ کیا گیا ہے۔ 50 سے زائد قصبوں پر اسرائیل کا قبضہ جاری ہے۔ معاہدے کے باوجود اسرائیل نے لبنان پر اپنے حملے جاری رکھے ہوئے ہیں۔ 2 مارچ سے اب تک ان حملوں میں کم از کم 4,386 افراد ہلاک اور 12,407 زخمی ہوچکے ہیں۔ دس لاکھ سے زائد لوگ بے گھر ہو چکے ہیں۔

یو این آئی۔ ع ا۔

دوحہ، واشنگٹن اور تہران کے درمیان بالواسطہ مذاکرات میں مبینہ پیش رفت کے بعد امریکی وفد کی قطر کے دارالحکومت دوحہ آمد متوقع ہے، جہاں اس کی ایرانی حکام کے ساتھ براہِ راست بات چیت ہوسکتی ہے۔

قطری اخبار ‘العربی الجدید’ نے قطر اور پاکستان کی ثالثی کی کوششوں سے واقف ذرائع کے حوالے سے بتایا ہے کہ دونوں فریقوں کے درمیان ایران کے جوہری پروگرام، آبنائے ہرمز سے جہازوں کی آمدورفت اور تہران کو ممکنہ اقتصادی مراعات دینے کے معاملے پر ابتدائی مفاہمت ہوگئی ہے۔ رپورٹ کے مطابق، چین اور روس کسی حتمی معاہدے پر عمل درآمد کے ضامن بن سکتے ہیں۔

یہ پیش رفت جمعہ کو تہران میں قطری ثالثوں اور ایرانی حکام کے درمیان 12 گھنٹے سے زیادہ جاری رہنے والی بات چیت کے بعد سامنے آئی ہے۔ امریکی ویب سائٹ ‘ایکسِیوس’ کے مطابق، ان مذاکرات کا مقصد واشنگٹن اور تہران کے درمیان براہِ راست بات چیت کی بحالی کی راہ ہموار کرنا تھا۔

بعد ازاں ایرانی وزیر خارجہ عباس عراقچی کے ایک نائب سمیت ایرانی وفد مزید بات چیت کے لیے دوحہ پہنچا۔ ایرانی ذرائع کے مطابق، واشنگٹن کے ساتھ مذاکرات اب بھی قطر کے توسط سے بالواسطہ طور پر جاری ہیں اور دونوں ملکوں کے درمیان براہِ راست رابطہ نہیں ہوا ہے۔ ثالثی کی کوششوں سے وابستہ ذرائع کا کہنا ہے کہ امریکی وفد بھی دوحہ پہنچنے والا ہے، جہاں ایرانی مذاکرات کاروں سے براہِ راست گفتگو ہوسکتی ہے۔

میڈیا رپورٹس کے مطابق، قطری ثالث اس سفارتی عمل کے دوران وائٹ ہاؤس سے مسلسل رابطے میں ہیں۔ ایک سفارتی ذریعے نے مذاکرات میں مثبت پیش رفت کا دعویٰ کیا ہے۔

یہ کوششیں ایسے وقت میں جاری ہیں جب 3 نومبر کو امریکی وسط مدتی انتخابات کے بعد واشنگٹن کی جانب سے ایران کے خلاف دوبارہ فوجی کارروائی شروع کیے جانے کا خدشہ ظاہر کیا جارہا ہے۔ ‘ایکسِیوس’ کے مطابق، قطر دونوں فریقوں سے کئی روز تک ایک دوسرے کے لیے رعایتی اقدامات حاصل کرنے کی کوشش کررہا ہے، تاکہ ایران کے جوہری پروگرام اور دیگر زیرِ التوا معاملات پر وسیع تر مذاکرات کی بحالی کی راہ ہموار ہوسکے۔

تاہم مذاکرات دوبارہ شروع کرنے کی شرائط پر دونوں ملکوں کے درمیان اہم اختلافات برقرار ہیں۔ ٹرمپ انتظامیہ چاہتی ہے کہ ایران بات چیت شروع ہونے سے پہلے اپنے جوہری پروگرام کے حوالے سے رعایتیں دے، جبکہ تہران نے امریکی بحری ناکہ بندی ختم کرنے، منجمد ایرانی اثاثے جاری کرنے اور تیل کی برآمدات کی اجازت دینے کا مطالبہ کیا ہے۔

قطری ثالث ایران کو اس بات پر آمادہ کرنے کی کوشش بھی کررہے ہیں کہ وہ گزشتہ حملوں میں تباہ ہونے والی جوہری تنصیبات کے معائنے کے لیے اقوام متحدہ کے معائنہ کاروں کو رسائی دے۔ اس کے بدلے واشنگٹن کی جانب سے پابندیوں میں نرمی کی پیشکش کی جاسکتی ہے۔

جاری۔ یو این آئی۔ ع ا۔