تہران، ایران کی پارلیمنٹ کے اسپیکر محمد باقر قالیباف نے جمعرات کو امریکی صدر ڈونالڈ ٹرمپ پر الزام عائد کیا کہ وہ ایران کے خلاف جنگ کے اگلے مرحلے کی تیاری کر رہے ہیں، جبکہ امریکی نائب صدر جے ڈی وینس نے وسط مدتی انتخابات میں ریپبلکن پارٹی کی شکست کے بعد تنازع ختم کرنے کی اپیل کی ہے۔

قالیباف نے سوشل میڈیا پلیٹ فارم ‘ایکس’ پر ایک سخت بیان میں وینس کے اس اعتراف کو نشانہ بنایا، جس میں انہوں نے کہا تھا کہ ایران کے ساتھ جنگ نے ریپبلکن پارٹی کی انتخابی شکست میں اہم کردار ادا کیا ہے۔

قالیباف نے سوال اٹھایا کہ نائب صدر اپنی اس رائے سے براہ راست ٹرمپ کو آگاہ کیوں نہیں کرتے۔

قالیباف نے لکھا، ”ہارنے والے جواری کی کیفیت ہے، جو میز سے اٹھنے کو تیار نہیں۔ ادھر امریکہ اسرائیل کو اولین ترجیح دینے کے راستے پر تباہی کے دہانے پر کھڑا ہے اور ان کا سربراہ جنگ کے اگلے مرحلے کی تیاری کر رہا ہے۔ طویل تقریر کی ضرورت نہیں، یہ بات اپنے سربراہ سے کیوں نہیں کہتے؟”

ان کا یہ بیان وینس کے اس اعتراف کے بعد سامنے آیا ہے کہ ایران کے خلاف جنگ اور اسرائیل کے ساتھ واشنگٹن کے تعلقات نے ان بعض ووٹروں کو ناراض کیا ہے، جنہوں نے 2024 کے صدارتی انتخابات میں ٹرمپ کی حمایت کی تھی۔

ریپبلکن پارٹی کی انتخابی شکست کا تفصیلی جائزہ لیتے ہوئے وینس نے ووٹروں کی جانب سے ڈیموکریٹس کی حمایت کی چار بڑی وجوہات بیان کیں۔ ان میں ایران کے ساتھ جنگ ختم کرنا، مہنگائی اور روزمرہ اخراجات کے بحران پر قابو پانا، ‘امریکہ فرسٹ’ پالیسی کی بحالی اور اسرائیل کے ساتھ امریکی تعلقات پر نظرثانی شامل ہیں۔

وینس نے لکھا، ”ہمارے ووٹر ووٹ ڈالنے کے لیے باہر آئے۔ مذکورہ چار وجوہات ہی ہیں جن کی بنا پر ان میں سے بہت سے لوگوں نے ڈیموکریٹس کو ووٹ دیا۔”

انہوں نے جنگ کے سیاسی اثرات کا ذکر کرتے ہوئے واضح طور پر کہا، ”ہماری شکست کی وجہ جنگ ہے۔ صدر نے خود گزشتہ رات یہ بات کہی تھی۔”

وینس کے اس تجزیے کے بارے میں پوچھے جانے پر ٹرمپ نے اعتراف کیا کہ تنازع نے ایندھن کی قیمتوں کو متاثر کیا ہے، تاہم انہوں نے فوجی کارروائی شروع کرنے کے فیصلے پر کسی پشیمانی کا اظہار نہیں کیا۔

ٹرمپ نے کہا، ”یہ بات بڑی حد تک درست ہے، کیونکہ ایران کے ساتھ جنگ کی وجہ سے پٹرول کی قیمتوں میں کچھ اضافہ ہوا ہے۔ تاہم اگر مجھے دوبارہ یہ فیصلہ کرنا پڑے تو میں پھر بھی یہی کروں گا۔”

وینس کے بیان سے ایران کے خلاف انتظامیہ کی فوجی کارروائی اور اسرائیل کے ساتھ اس کی قریبی وابستگی کے اندرون ملک سیاسی اثرات کا اعتراف ظاہر ہوتا ہے۔

منگل کو ہونے والے وسط مدتی انتخابات میں ڈیموکریٹک پارٹی نے امریکی ایوان نمائندگان اور سینیٹ دونوں میں اکثریت حاصل کرلی، جس کے نتیجے میں ٹرمپ کی صدارت کے باقی دو برسوں کے لیے کانگریس پر ریپبلکن پارٹی کا کنٹرول ختم ہوگیا۔

یو این آئی ۔ ع ا۔

ریاض، شام کے صدر احمد الشرع اور سعودی عرب کے ولی عہد شہزادہ محمد بن سلمان نے دفاعی تعاون کے معاہدے سمیت متعدد سمجھوتوں پر دستخط کی نگرانی کی ہے۔ اس کے علاوہ سعودی عرب نے شام کے توانائی، رہائش، صحت اور بنیادی ڈھانچے کے شعبوں کے لیے 40 کروڑ 30 لاکھ ڈالر سے زائد کے قرضے فراہم کرنے پر بھی اتفاق کیا ہے۔

یہ معاہدے بدھ کو صدر احمد الشرع کے ایک ماہ سے بھی کم عرصے میں ریاض کے دوسرے دورے کے موقع پر طے پائے۔

شام کی وزارت خارجہ نے دونوں ملکوں کی وزارت دفاع کے درمیان ہونے والے تعاون کے معاہدے کو ان سمجھوتوں میں ”سب سے اہم” قرار دیا، تاہم اس کی تفصیلات ظاہر نہیں کیں۔

یہ دفاعی معاہدہ ایسے وقت میں ہوا ہے جب چند روز قبل شام کے وزیر خارجہ اسعد الشیبانی نے کہا تھا کہ ان کی حکومت سعودی عرب، ترکیہ اور پاکستان کے درمیان مجوزہ مشترکہ دفاعی معاہدے میں شامل ہونے کے امکان کا جائزہ لے رہی ہے۔،۔۔۔۔

الشیبانی نے ہفتے کو بحرین میں سلامتی سے متعلق کانفرنس ‘منامہ ڈائیلاگ’ سے خطاب کرتے ہوئے کہا تھا، ”مکہ اتحاد میں شام کی شمولیت کے امکانات کا جائزہ لینے کے لیے فی الحال بات چیت جاری ہے۔”

سعودی عرب نے یمن میں حوثیوں کے خلاف ایک بار پھر شروع ہونے والی جنگ کے تناظر میں دفاعی اور جارحانہ دونوں طرح کی مدد کے لیے امریکہ، یورپی اور مشرق وسطیٰ کے ممالک سے تعاون طلب کیا ہے۔

حوثی گروپ نے یمن کی بین الاقوامی طور پر تسلیم شدہ حکومت کے حامی فورسز کے ساتھ ملک پر کنٹرول کی لڑائی کے دوران سعودی عرب کے ہوائی اڈوں اور تیل کی تنصیبات کو نشانہ بنایا ہے۔

شام کی وزارت خارجہ نے سوشل میڈیا پلیٹ فارم ایکس پر جاری بیان میں کہا کہ ریاض میں ہونے والی ملاقات کے دوران صدر احمد الشرع اور شہزادہ محمد بن سلمان نے موجودہ علاقائی اور بین الاقوامی صورت حال پر تبادلہ خیال کیا۔

بیان کے مطابق بات چیت میں فوجی کشیدگی کے علاقائی سلامتی پر اثرات، بین الاقوامی بحری جہاز رانی کا تحفظ، توانائی کی قابل اعتماد فراہمی اور عالمی معیشت کے استحکام جیسے امور شامل تھے۔

دونوں رہنماؤں نے کشیدگی میں کمی اور تنازعات کے پرامن حل کی ضرورت پر زور دیا۔ انہوں نے بحیرہ احمر، آبنائے باب المندب اور آبنائے ہرمز میں بحری جہاز رانی کی سلامتی کو خطرے میں ڈالنے والی تمام سرگرمیاں فوری طور پر بند کرنے کی اپیل بھی کی۔

شام کے سیاسی امور کے محقق احمد قاسم نے الجزیرہ سے گفتگو کرتے ہوئے کہا کہ مختصر عرصے میں احمد الشرع کا دوسری بار سعودی عرب کا دورہ خطے اور شام کو درپیش سکیورٹی چیلنجوں کی سنگینی کو ظاہر کرتا ہے۔انہوں نے کہا کہ شام کو مکہ دفاعی اتحاد میں شامل ہونا چاہیے، کیونکہ ملک کو اپنی خودمختاری کے تحفظ اور اس کی سرزمین میں اسرائیل کی بڑھتی ہوئی دراندازی روکنے کے لیے ایک مضبوط ”بازدار قوت” کی ضرورت ہے۔

صدر احمد الشرع کے دورے کے دوران سعودی فنڈ برائے ترقی نے بھی شام کی وزارت خزانہ کے ساتھ چھ معاہدوں کے تحت 40 کروڑ 30 لاکھ ڈالر کے قرضے رعایتی شرائط پر فراہم کرنے پر اتفاق کیا۔

سعودی سرکاری خبر رساں ایجنسی کے مطابق ان قرضوں میں تباہ شدہ طبی مراکز کی تعمیر نو اور انہیں جدید سہولتوں سے آراستہ کرنے کے لیے 10 کروڑ ڈالر، متاثرہ رہائشی عمارتوں کی مرمت کے لیے 6 کروڑ ڈالر، شہری دفاع کو مضبوط بنانے کے لیے 10 کروڑ 50 لاکھ ڈالر، حلب کے تھرمل پاور پلانٹ کی بحالی کے لیے 9 کروڑ ڈالر اور دمشق و ادلب میں پینے کے پانی کے نظام کی ترقی کے لیے 3 کروڑ ڈالر شامل ہیں۔

کروڑ ڈالر اور دمشق و ادلب میں پینے کے پانی کے نظام کی ترقی کے لیے 3 کروڑ ڈالر شامل ہیں۔
دونوں حکومتوں نے صنعتی تعاون سے متعلق ایک مفاہمت کی یادداشت پر بھی دستخط کیے، جبکہ زراعت اور ماحولیاتی تحفظ کے شعبوں میں مزید دو مفاہمتی یادداشتوں پر اتفاق کیا۔

دسمبر 2024 میں بشار الاسد کی حکومت کے خاتمے اور احمد الشرع کے اقتدار میں آنے کے بعد سے سعودی عرب شام کی نئی حکومت کا اہم حامی رہا ہے۔

دونوں رہنماؤں کی اس سے قبل 6 اکتوبر کو ریاض میں ملاقات ہوئی تھی۔ شامی ایوان صدر کے مطابق اس ملاقات میں شام کی تعمیر نو کے منصوبوں، تباہ شدہ بنیادی ڈھانچے اور ضروری سہولتوں کی بحالی پر تبادلہ خیال کیا گیا تھا۔

یو این آئی۔ع ا۔

واشنگٹن، امریکہ کے نائب صدر جے ڈی وینس نے وسط مدتی انتخابات میں ریپبلکن پارٹی کی شکست کا ذمہ دار ایران جنگ کو قرار دیتے ہوئے کہا ہے کہ یہی تنازع ”ہماری شکست کی وجہ بنا”۔ ڈیموکریٹک پارٹی نے ایوان نمائندگان اور سینیٹ دونوں میں اکثریت حاصل کرلی ہے۔ وینس کے اس بیان سے ٹرمپ انتظامیہ کی خارجہ پالیسی اور ایران جنگ کے حوالے سے ریپبلکن پارٹی کے اندر بڑھتے اختلافات نمایاں ہوگئے ہیں۔

وینس نے انتظامیہ کی خارجہ پالیسی کے سیاسی اثرات کا اعتراف کرتے ہوئے کہا کہ ایران جنگ ہی وہ وجہ ہے جس کے باعث ان کی پارٹی کو شکست کا سامنا کرنا پڑا۔

دوسری جانب ڈیموکریٹک رہنماؤں نے کانگریس میں اکثریت حاصل کرنے کے بعد ٹرمپ انتظامیہ اور اس کی پالیسیوں کے خلاف جارحانہ حکمت عملی اختیار کرنے کا عندیہ دیا ہے۔ سینیٹ میں ڈیموکریٹک لیڈر چک شومر نے کہا کہ ان کی پارٹی صدر ڈونالڈ ٹرمپ کو ”قانون سازی کی خاردار باڑ میں الجھا دے گی”، جس سے ان کے ایجنڈے کو کانگریس میں سخت مزاحمت کا سامنا کرنے کا اشارہ ملتا ہے۔

ایوان نمائندگان کی نگرانی سے متعلق کمیٹی کے آئندہ چیئرمین رابرٹ گارسیا نے تحقیقات کے لیے کئی معاملات کی نشاندہی کی ہے۔ ان میں ٹرمپ خاندان سے وابستہ کاروبار، امیگریشن قوانین کا نفاذ، وائٹ ہاؤس میں مجوزہ بال روم کی تعمیر کے لیے کارپوریٹ عطیات اور جیفری ایپسٹین سے متعلق دستاویزات کو سنبھالنے کا معاملہ شامل ہے۔

سی بی ایس نیوز کے تخمینوں کے مطابق 435 رکنی ایوان نمائندگان میں ڈیموکریٹس کو 251 سے 268 نشستیں ملنے کا امکان ہے، جبکہ سینیٹ میں وہ کم از کم 54 نشستیں حاصل کرچکے ہیں۔ اس طرح آئندہ سال نئی کانگریس کے اجلاس کے آغاز پر پارٹی کو دونوں ایوانوں کا کنٹرول حاصل ہوجائے گا۔

ڈیموکریٹس نے ملک بھر میں نمایاں کامیابیاں حاصل کرتے ہوئے ٹیکساس، کنساس، جنوبی کیرولینا، اوہائیو، آئیووا، شمالی کیرولینا اور مین میں ریپبلکن پارٹی کی سینیٹ نشستیں چھین لی ہیں۔ ٹیکساس، کنساس اور جنوبی کیرولینا میں کئی دہائیوں بعد پہلی مرتبہ ڈیموکریٹک سینیٹر منتخب ہوئے ہیں۔

یہ نتائج صدر ٹرمپ کے لیے ایک بڑا سیاسی دھچکا ہیں۔ ان کی گرتی ہوئی مقبولیت کو ڈیموکریٹس کی کامیابیوں کی ایک اہم وجہ قرار دیا جارہا ہے، جبکہ 2028 کے صدارتی انتخابات سے قبل ریپبلکن پارٹی کی سیاسی سمت کے حوالے سے بھی سوالات اٹھنے لگے ہیں۔

انتخابی نتائج کے اثرات پارٹی کی قیادت پر بھی ظاہر ہونے لگے ہیں۔ ایوان نمائندگان کے اسپیکر مائیک جانسن نے عملے کو بتایا ہے کہ وہ ریپبلکن پارٹی کے پارلیمانی رہنما کی حیثیت سے مزید مدت کے لیے انتخاب نہیں لڑیں گے۔ اس فیصلے سے ایوان میں پارٹی کی قیادت کے لیے مقابلے کی راہ ہموار ہوگئی ہے۔

سی بی ایس نیوز کے مطابق ٹرمپ نے اپنے مشیروں کے ساتھ وزیر دفاع پیٹ ہیگسیتھ کے مستقبل پر بھی تبادلہ خیال کیا ہے، تاہم بعد میں صدر نے کہا کہ وہ انہیں عہدے سے ہٹانے پر غور نہیں کررہے۔

جاری ْ یو این آئی۔ ع ا۔