سرینگر، ماحولیاتی کارکن سونم وانگچک نے صدر جمہوریہ دروپدی مرمو سے مداخلت کی اپیل کرتے ہوئے لداخ انتظامیہ پر الزام عائد کیا ہے کہ لیفٹیننٹ گورنر وی کے سکسینہ کی قیادت میں ان کے خلاف منظم انداز میں منفی مہم چلائی جارہی ہے اور ان سے وابستہ اداروں کو بھی ہراساں کیا جارہا ہے۔

صدر جمہوریہ کے نام اپنے ویڈیو پیغام میں، جو انہوں نے سوشل میڈیا پلیٹ فارم ‘ایکس’ پر پوسٹ کیا، وانگچک نے دعویٰ کیا کہ ان کے وکلا کی جانب سے کیے گئے ایک اسٹنگ آپریشن میں ایل جی کے دفتر اور سوشل میڈیا کے دو ایسے صفحات کے درمیان مبینہ روابط کا انکشاف ہوا ہے، جنہیں ان کے خلاف مہم چلانے اور انتظامیہ کی تشہیر کے لیے بنایا گیا تھا۔

وانگچک کے مطابق، فیس بک اور انسٹاگرام پر یہ دونوں صفحات 14 اکتوبر کو سامنے آئے تھے، یعنی اس کے ایک دن بعد جب انہوں نے انتظامیہ کی بعض سرگرمیوں پر عوامی سطح پر تنقید کی تھی اور ماحولیاتی خدشات کا اظہار کیا تھا۔

انہوں نے بتایا کہ تحقیقات کے دوران معلوم ہوا کہ یہ دونوں صفحات ایک ہی تخلیقی ایجنسی نے تیار کیے تھے۔

اس کے بعد ان کے وکلا نے مبینہ اسٹنگ آپریشن کے ذریعے ایجنسی سے رابطہ کیا۔ وانگچک کے دعوے کے مطابق، ایجنسی کے مالک نے گفتگو کے دوران اعتراف کیا کہ دونوں صفحات اسی ایجنسی کے ہیں اور اس نے ایل جی ٹیم کے ساتھ اپنے روابط کا بھی ذکر کیا۔

وانگچک نے ریکارڈ شدہ گفتگو کے بعض منتخب حصے جاری کرتے ہوئے الزام لگایا کہ اس کارروائی سے ایل جی انتظامیہ سے وابستہ افراد کے ان کے خلاف رائے عامہ کو متاثر کرنے کی کوششوں میں ملوث ہونے کا انکشاف ہوا ہے۔

ماحولیاتی کارکن نے کہا کہ یہ مبینہ مہم لیفٹیننٹ گورنر سکسینہ کے 10 اکتوبر کو ایک تقریب میں دیے گئے بیان کے بعد شروع ہوئی، جس میں انہوں نے لداخ میں ماحولیاتی تحفظ اور تعلیم کے شعبوں میں وانگچک کی خدمات پر سوال اٹھائے تھے۔ وانگچک نے کہا کہ انہوں نے اس کے جواب میں بعض ترقیاتی سرگرمیوں کے ماحولیاتی اثرات کو اجاگر کیا تھا، جن میں مبینہ طور پر پتھر ڈال کر دریائے سندھ کے بہاؤ میں رکاوٹ پیدا کرنا بھی شامل تھا۔

انہوں نے دعویٰ کیا کہ ابتدا میں انہوں نے یہ مواد انٹلی جنس بیورو کے سربراہ کے ساتھ شیئر کیا تھا اور امید ظاہر کی تھی کہ اس معاملے میں مداخلت کی جائے گی، لیکن چند بار رابطے کے بعد انہیں کوئی مزید جواب نہیں ملا۔ وانگچک نے کہا کہ ملک کی شبیہ پر ممکنہ اثرات کے پیش نظر وہ ریکارڈ شدہ گفتگو کو عوامی سطح پر لانے سے گریز کررہے تھے، لیکن اب انہوں نے یہ معاملہ ملک کے سامنے رکھنے کا فیصلہ کیا ہے۔

صدر جمہوریہ سے اپیل کرتے ہوئے وانگچک نے الزام لگایا کہ گزشتہ چھ برسوں کے دوران لداخ میں جمہوری آزادیوں کا دائرہ محدود ہوا ہے اور سوشل میڈیا پر عام تبادلۂ خیال بھی پولیس کی نگرانی، ایف آئی آر درج ہونے اور گرفتاریوں کا سبب بن رہا ہے۔

انہوں نے انتظامیہ پر ایسی پالیسیاں اختیار کرنے کا بھی الزام لگایا جو ان کے بقول مقامی مفادات کو نقصان پہنچاتی ہیں اور کارپوریٹ اداروں کو فائدہ پہنچاتی ہیں۔ اس سلسلے میں انہوں نے اراضی، صنعت، بجلی اور سیاحت سے متعلق پالیسیوں کا حوالہ دیا۔

وانگچک نے تعلیمی اداروں کے تئیں انتظامیہ کے رویے پر بھی سوال اٹھائے، خصوصاً اپنے ادارے ‘ہمالین انسٹی ٹیوٹ آف آلٹرنیٹوز، لداخ’ (ایچ آئی اے ایل) کے حوالے سے۔ انہوں نے الزام لگایا کہ ایک طرف ادارے کے لیے پابندیاں سخت کی جارہی ہیں تو دوسری جانب دیہات میں شراب کی دکانوں کے لیے ضابطوں میں نرمی کی جارہی ہے۔

ان کی یہ اپیل ایسے وقت سامنے آئی ہے جب لداخ انتظامیہ نے حال ہی میں ایچ آئی اے ایل کو ہدایت دی تھی کہ لیہ میں واقع ‘ڈیزرٹ فلاور اسکول’ میں کلاسوں اور دیگر سرگرمیوں کا آغاز اس وقت تک معطل رکھا جائے، جب تک اراضی سے متعلق ہائی کورٹ میں زیر التوا تنازع کا فیصلہ نہیں ہوجاتا۔

اس سلسلے میں وانگچک کی اہلیہ اور ایچ آئی اے ایل کی بانی و چیف ایگزیکٹیو آفیسر گیتانجلی جے انگمو کو ایک نوٹس جاری کیا گیا تھا، جس میں خبردار کیا گیا تھا کہ مقدمہ زیر سماعت ہونے کے دوران اسکول کی سرگرمیاں شروع کرنے سے عدالتی کارروائی متاثر ہوسکتی ہے۔

وانگچک نے الزام لگایا کہ ان کے ادارے کو اراضی کی لیز کے معاملے میں بھی مشکلات کا سامنا کرنا پڑا ہے۔ ان کا دعویٰ تھا کہ لیز پالیسی کو حتمی شکل دینے میں تاخیر کے باعث انتظامیہ نے خود پہلے اس لیز کی مدت میں توسیع کی درخواست کی تھی۔ انہوں نے سوال اٹھایا کہ ایک کنڈرگارٹن اسکول سے ایسی منظوریوں اور این او سی کا مطالبہ کیوں کیا جارہا ہے، جن کی متعلقہ سرکاری ضابطوں کے تحت ضرورت نہیں ہے۔

لداخ اور دیگر سرحدی علاقوں کی تزویراتی اہمیت کو اجاگر کرتے ہوئے وانگچک نے صدر دروپدی مرمو سے مداخلت کی اپیل کی اور کہا کہ ان علاقوں کے باشندوں کو ان جمہوری حقوق اور آزادیوں سے محروم نہیں کیا جانا چاہیے جو ملک کے دیگر حصوں کے شہریوں کو حاصل ہیں۔

انہوں نے لداخ اور اروناچل پردیش سمیت سرحدی علاقوں میں رہنے والے لوگوں کے لیے مساوی حقوق، آزادی اور انصاف کو یقینی بنانے کا مطالبہ کیا۔

ان الزامات پر لداخ انتظامیہ کا ردعمل فوری طور پر دستیاب نہیں ہوسکا۔

یواین آئی۔ ط ا

سرینگر، جموں و کشمیر کے وزیر اعلیٰ عمر عبداللہ نے نیشنل کانفرنس کے ناراض ارکانِ اسمبلی کے ساتھ ایک میٹنگ کے دوران استعفیٰ دینے کی پیشکش کرتے ہوئے کہا کہ اگر انہیں لگتا ہے کہ وہ حکومت چلانے کے اہل نہیں ہیں تو ان میں سے کوئی ایک وزیر اعلیٰ کی ذمہ داری سنبھال سکتا ہے، جبکہ وہ پارٹی چلانے پر توجہ مرکوز کریں گے۔ میٹنگ میں شریک دو ناراض ارکانِ اسمبلی نے یہ بات بتائی۔

یہ پیش رفت جمعہ کو منعقدہ ایک اہم میٹنگ کے دوران سامنے آئی، جس میں نیشنل کانفرنس کے صدر فاروق عبداللہ، وزیر اعلیٰ عمر عبداللہ اور ناراض ارکانِ اسمبلی کے ایک گروپ نے شرکت کی۔ اس میٹنگ کے ساتھ ہی حکمراں جماعت کے اندر تقریباً دس دن سے جاری سیاسی غیر یقینی صورتحال کا خاتمہ ہوگیا۔

پارٹی میں ناراضگی کی صورتحال 27 اکتوبر کو کابینہ میں ردوبدل کے بعد پیدا ہوئی تھی۔ کئی ارکانِ اسمبلی نے وزراء کونسل میں شامل نہ کیے جانے پر ناراضگی ظاہر کی تھی اور وزارتی قلمدانوں کی تقسیم میں جانبداری کا الزام لگایا تھا۔ انہوں نے حکومت کے کام کاج اور کابینہ میں مناسب نمائندگی نہ ملنے پر بھی تشویش ظاہر کی تھی۔

جمعہ کی میٹنگ میں شریک ایک رکنِ اسمبلی نے بتایا کہ عمر عبداللہ نے ان سے کہا کہ اگر انہیں محسوس ہوتا ہے کہ وہ حکومت چلانے میں ناکام ہیں تو وہ عہدہ چھوڑنے کے لیے تیار ہیں اور کوئی دوسرا شخص حکومت کی ذمہ داری سنبھال سکتا ہے۔

رکنِ اسمبلی نے کہاکہ ”انہوں نے کہا کہ اگر آپ کو لگتا ہے کہ میں کام کرنے سے قاصر ہوں تو میں استعفیٰ دے دوں گا۔ آپ میں سے کوئی ایک حکومت سنبھال سکتا ہے اور میں پارٹی چلاؤں گا۔” انہوں نے وضاحت کی کہ یہ بات ارکانِ اسمبلی کی شکایات دور کرنے کے تناظر میں کہی گئی تھی اور اس کا مطلب یہ نہیں تھا کہ وزیر اعلیٰ فوری طور پر استعفیٰ دینے والے ہیں۔

انہوں نے بتایا کہ بات چیت خوشگوار ماحول میں ہوئی اور ارکانِ اسمبلی نے پارٹی قیادت کے سامنے اپنے مسائل رکھے۔ عمر عبداللہ اور فاروق عبداللہ دونوں نے انہیں یقین دلایا کہ ان کے مسائل حل کیے جائیں گے اور وزراء و منتخب نمائندوں کے درمیان بہتر تال میل کو یقینی بنایا جائے گا۔

رکنِ اسمبلی کے مطابق، وزیر اعلیٰ نے ارکانِ اسمبلی سے کہا کہ وہ اپنے حلقوں سے متعلق مسائل کے لیے مشیروں یا دیگر درمیانی افراد کے بجائے براہِ راست ان سے رجوع کریں۔

میٹنگ میں شریک ایک اور رکنِ اسمبلی نے کہا کہ کسی بھی رکنِ اسمبلی کا نیشنل کانفرنس چھوڑنے کا کوئی ارادہ نہیں ہے۔ انہوں نے کہا کہ یہ شکایات پارٹی کے اندرونی معاملات سے متعلق تھیں اور پارٹی کو مزید مضبوط بنانے کے مقصد سے انہیں قیادت کے سامنے پیش کیا گیا تھا۔

میٹنگ میں نیشنل کانفرنس کے انتخابی منشور پر عمل درآمد، ریاستی درجے کی بحالی اور آرٹیکل 370 و 35A پر پارٹی کے موقف کے حوالے سے بھی تبادلہ خیال کیا گیا۔ ارکانِ اسمبلی نے ریاستی درجے کی بحالی کے لیے مہم تیز کرنے اور جموں و کشمیر کی خصوصی حیثیت کی بحالی کے مطالبے کو آگے بڑھانے کی ضرورت پر زور دیا۔ اس میں آرٹیکل 370 اور 35A کے حوالے سے پارٹی کا سابقہ موقف بھی شامل ہے۔
رکنِ اسمبلی نے مزید بتایا کہ فنڈس کی تقسیم پر نظر رکھنے اور تمام اسمبلی حلقوں کو منصفانہ طور پر فنڈس فراہم کرنے کے لیے تین سے چار ارکانِ اسمبلی پر مشتمل گروپوں کا ایک نظام قائم کرنے کا فیصلہ کیا گیا ہے۔ اس کے علاوہ پارٹی کے انتخابی منشور پر عمل درآمد کی نگرانی اور تنظیمی معاملات کو حل کرنے کے لیے الگ الگ ٹیمیں بھی تشکیل دی جائیں گی۔

جمعہ کی یہ میٹنگ ناراض ارکانِ اسمبلی کی ایک الگ میٹنگ کے بعد منعقد ہوئی تھی۔ ان ارکان نے نیشنل کانفرنس کی قیادت کو ایک یادداشت پیش کرکے اپنے مطالبات پر مشترکہ موقف اختیار کرنے کی کوشش کی تھی۔
دو گھنٹے سے زائد جاری رہنے والی میٹنگ کے بعد فاروق عبداللہ اور عمر عبداللہ ناراض ارکانِ اسمبلی کے ساتھ باہر آئے۔

صحافیوں سے بات کرتے ہوئے نیشنل کانفرنس کے صدر فاروق عبداللہ نے ارکانِ اسمبلی کے خدشات کو جائز قرار دیا اور یقین دلایا کہ بعض مسائل فوری طور پر حل کیے جائیں گے، جبکہ دیگر معاملات کو مرحلہ وار نمٹایا جائے گا۔

انہوں نے پارٹی میں پھوٹ پڑنے سے متعلق قیاس آرائیوں کو بھی مسترد کرتے ہوئے کہا کہ نیشنل کانفرنس متحد ہے اور جموں و کشمیر کی خصوصی حیثیت اور ریاستی درجے کی بحالی کے لیے اپنی جدوجہد جاری رکھے گی۔

یواین آئی ظا

سرینگر، ہندوستانی فضائیہ (آئی اے ایف) نے ایک اہم فضائی سنگ میل حاصل کرتے ہوئے اپنے اسٹریٹجک ٹرانسپورٹ طیارے IL-76MD کو مشرقی لداخ کے نیوما ایئر فیلڈ پر کامیابی کے ساتھ اتارا ہے۔ روسی ساختہ اس طیارے کی دنیا میں اب تک کی سب سے زیادہ بلندی پر لینڈنگ کا یہ عالمی ریکارڈ ہے۔

ہندوستانی فضائیہ نے ہفتہ کو بتایا کہ IL-76MD طیارے نے نیوما میں کامیاب لینڈنگ کرکے تاریخ رقم کی ہے۔ یہ طیارے کی دنیا میں اب تک کی سب سے زیادہ بلندی پر کی گئی لینڈنگ ہے۔

اس کامیابی سے خاص طور پر لداخ کے بلند پہاڑی علاقے میں ہندوستان کی اسٹریٹجک فضائی نقل و حمل کی صلاحیت کو مزید تقویت ملی ہے۔ لداخ کی سرحد چین کے ساتھ ملتی ہے اور یہ ایک حساس سرحدی خطہ ہے۔

فضائیہ نے سوشل میڈیا پلیٹ فارم ایکس پر اپنی پوسٹ میں کہاکہ ”یہ طیارے کی دیرپا صلاحیت کا ایک شاندار مظاہرہ ہے، جسے اس کے عملے کی غیر معمولی مہارت، درستگی اور پیشہ ورانہ صلاحیت نے ممکن بنایا۔ یہ سنگ میل ہندوستان کی اسٹریٹجک فضائی نقل و حمل کی صلاحیت کو مزید مستحکم کرتا ہے۔ حدود کو آگے بڑھاتے ہوئے، نئی بلندیوں کا تعین کرتے ہوئے تاریخ رقم کی گئی ہے۔”

جنوبی لداخ میں واقع نیوما ایئر فیلڈ لائن آف ایکچوئل کنٹرول (ایل اے سی) سے تقریباً 35 کلومیٹر کے فاصلے پر ہے۔ اس نئے ایئر فیلڈ کی تعمیر گزشتہ سال مکمل ہوئی تھی اور اب یہ ہندوستانی فوج کے لیے ایک اہم اسٹریٹجک اثاثہ بن چکا ہے۔

IL-76 طیاروں کو 1980 کی دہائی کے وسط میں ہندوستانی فضائیہ میں شامل کیا گیا تھا۔ اس کے بعد سے یہ طیارے فضائیہ کی بھاری سامان کی نقل و حمل کی صلاحیت کا ایک اہم حصہ رہے ہیں۔ ماضی میں ان طیاروں کے ذریعے لداخ کے اگلے مورچوں تک ٹینک، بکتر بند گاڑیاں اور دیگر بھاری فوجی سازوسامان پہنچایا جاتا رہا ہے۔

یواین آئی۔ظ ا