سری نگر، مرکز کے زیر انتظام علاقے لداخ میں اس سال سیاحوں کی تعداد میں زبردست اضافہ ریکارڈ کیا گیا ہے۔ سال 2026 کے پہلے 8 ماہ (جنوری سے اگست) میں ہی 4.05 لاکھ سے زیادہ سیاح لداخ پہنچ چکے ہیں۔ ان 8 ماہ کے اعداد و شمار نے سال 2025 کے پورے سال کے مجموعی سیاحتی اعداد و شمار کو پیچھے چھوڑ دیا ہے۔

لداخ کے لیفٹیننٹ گورنر ونے کمار سکسینہ کے ذریعے شیئر کیے گئے اعداد و شمار کے مطابق، جنوری اور اگست 2026 کے درمیان 4.05 لاکھ سیاح پہنچے، جبکہ گزشتہ سال اسی مدت کے دوران یہ تعداد 2.69 لاکھ تھی۔ یہ سالانہ بنیاد پر 50.37 فیصد کا اضافہ ہے۔ سال 2025 میں مجموعی سیاحوں کی آمد صرف 3.35 لاکھ تھی۔

علاقے میں غیر ملکی سیاحوں کی آمد و رفت میں بھی نمایاں اضافہ دیکھا گیا ہے۔ اس سال جنوری سے اگست کے درمیان لداخ میں 33,346 غیر ملکی سیاح آئے، جبکہ 2025 کی اسی مدت میں یہ تعداد 25,082 تھی۔

صرف اگست کے مہینے میں 2026 میں 74,753 سیاحوں نے لداخ کا دورہ کیا، جو گزشتہ سال اگست کے مہینے میں آنے والے 45,201 سیاحوں کے مقابلے میں 65.38 فیصد زیادہ ہے۔

لیفٹیننٹ گورنر سکسینہ نے اس اضافے کا سہرا وزیر اعظم نریندر مودی کے ملکی سیاحت کو فروغ دینے کے نظریے، بنیادی ڈھانچے کی ترقی پر مرکزی حکومت کی مسلسل توجہ اور لداخ کی سیاحت دوست پالیسی کے خاکے کو دیا۔ انہوں نے کہا کہ انتظامیہ اس علاقے میں پائیدار، ذمہ دار اور پورے سال جاری رہنے والی سیاحتی معیشت قائم کرنے کے لیے پرعزم ہے۔

انہوں نے بتایا کہ سیاحتی موسم سے باہر ہونے والی تقریبات اور پروگراموں کو فروغ دے کر مقامی نوجوانوں، کاریگروں اور ہوم اسٹے چلانے والوں کے لیے روزگار کے پائیدار مواقع پیدا کیے جا رہے ہیں، تاکہ سیاحوں کو پرسکون اور سستا تجربہ حاصل ہو سکے۔

یو این آئی۔ ایم جے

سری نگر، جسٹس پشپیندر سنگھ بھاٹی نے بدھ کو یہاں منعقدہ ایک تقریب میں جموں و کشمیر اور لداخ ہائی کورٹ کے چیف جسٹس کی حیثیت سے حلف لیا۔

لداخ کے لیفٹیننٹ گورنر ونے کمار سکسینہ نے جسٹس بھاٹی کو عہدے کا حلف دلایا۔ مسٹر سکسینہ اس وقت جموں و کشمیر کے لیفٹیننٹ گورنر کا اضافی چارج بھی سنبھال رہے ہیں۔

عہدیداروں نے بتایا کہ حلف برداری کی تقریب شیرِ کشمیر یونیورسٹی آف ایگریکلچرل سائنسز اینڈ ٹیکنالوجی کے شالیمار آڈیٹوریم میں منعقد ہوئی۔ تقریب میں وزیر اعلیٰ عمر عبداللہ، اسمبلی کے اسپیکر عبدالرحیم راتھر، کئی کابینی وزرا، ہائی کورٹ کے جج اور سینئر سول و پولیس افسران شریک ہوئے۔

مرکزی حکومت نے 05 ستمبر کو جموں و کشمیر اور لداخ ہائی کورٹ کے چیف جسٹس کے طور پر جسٹس بھاٹی کی تقرری کا باضابطہ اعلان کیا تھا۔

یو این آئی۔ ایم جے

سری نگر، جموں و کشمیر میں وندے ماترم کے مکمل ورژن پر کانگریس اور اس کی اتحادی جماعت نیشنل کانفرنس (این سی) کے درمیان اختلافات سامنے آ گئے ہیں۔ سری نگر میں بین الاقوامی فلم فیسٹیول کی افتتاحی تقریب میں وندے ماترم کا مکمل ورژن گائے جانے پر کانگریس نے اعتراض کیا تھا۔ تقریب میں وزیرِ اعلیٰ عمر عبداللہ اور نیشنل کانفرنس کے صدر فاروق عبداللہ بھی موجود تھے۔

کانگریس کے جنرل سکریٹری اور تنظیمی امور کے انچارج کے سی وینوگوپال نے سوشل میڈیا پلیٹ فارم ’ایکس‘ پر تقریب کی ویڈیو شیئر کرتے ہوئے نیشنل کانفرنس سے اپیل کی کہ وہ کانگریس کے اس موقف کی حمایت کرے جس میں وندے ماترم کے صرف پہلے دو بند گانے پر زور دیا گیا ہے۔ انہوں نے کہا، ’’وندے ماترم کا مکمل ورژن اس ہم آہنگی اور کثرت پسندی کی روح کے مطابق نہیں ہے، جس کا تصور آزادی کے مجاہدین نے ہندستان کے لیے کیا تھا اور اسے فروغ دیا تھا۔‘‘

مسٹر وینوگوپال نے مہاتما گاندھی، جواہر لال نہرو، سردار ولبھ بھائی پٹیل، سبھاش چندر بوس، راجندر پرساد، آچاریہ نریندر دیو، مولانا ابوالکلام آزاد، سروجنی نائیڈو اور جے بی کرپلانی کا ذکر کرتے ہوئے کہا کہ اس گیت کے حوالے سے آزادی کے مجاہدین کا اجتماعی فیصلہ اہمیت رکھتا ہے۔ انہوں نے کہا کہ رابندر ناتھ ٹیگور کے مشورے نے بھی گیت کی موجودہ شکل طے کرنے میں اہم کردار ادا کیا تھا۔

انہوں نے کہا کہ کانگریس اپنی اتحادی جماعتوں سے اپیل کرتی ہے کہ وہ آزادی کے مجاہدین کے فیصلے کا احترام کریں اور اسی ورژن کو گائیں جسے انہوں نے اختیار کیا تھا۔ ان کے مطابق اس ورژن کا انتخاب سوچ سمجھ کر کیا گیا تھا تاکہ گیت کو فرقہ وارانہ رنگ نہ دیا جائے اور جمہوریہ کے سیکولر اور جامع کردار کو برقرار رکھا جا سکے۔ جموں و کشمیر کانگریس کے صدر طارق قرہ نے بھی وندے ماترم کا مکمل ورژن گائے جانے پر تشویش ظاہر کی۔ انہوں نے کہا کہ قومی علامات، قومی گیت اور روایات ہر ہندستان کے لیے خاص اہمیت رکھتی ہیں اور ان کی اصل طاقت ملک کے تنوع کو متحد کرنے میں ہے۔ انہوں نے کہا کہ اتحادی جماعتوں کی جانب سے وندے ماترم کا مکمل ورژن گانا تشویش کا باعث ہے، کیونکہ یہ آزادی کی تحریک سے لے کر جمہوریہ کے آئینی سفر تک اس گیت کے کردار میں آنے والی بتدریج تبدیلی کو نظرانداز کرتا ہے۔

مسٹر وینوگوپال کے بیان پر بی جے پی کی جانب سے سخت ردِعمل سامنے آیا۔ بی جے پی کی جموں و کشمیر یونٹ نے اسے کانگریس کے لیے ایک نئی نچلی سطح قرار دیا۔ بی جے پی کی جموں و کشمیر یونٹ نے ’ایکس‘ پر کہا، ’’…ان کی اپنی اتحادی جماعتوں کے مسلم رہنما فخر اور پورے اعتماد کے ساتھ وندے ماترم گا رہے ہیں اور کانگریس، جو خود کو مسلمانوں کی خود ساختہ ٹھیکیدار سمجھتی ہے، انہی رہنماؤں کو برا بھلا کہہ رہی ہے اور وندے ماترم کو مسلم مخالف قرار دے رہی ہے۔ آپ ہوتے کون ہیں؟ چاول کے بدلے مذہب تبدیل کرنے والے لوگ اب حقیقی مسلمانوں کو اسلام اور مسلم مخالف ہونے کا سبق دیں گے؟ آپ دو تین انتہا پسند ملاؤں کے تلوے چاٹنے کے لیے پوری برادری اور پورے ملک کو بیچ دیں گے؟ کانگریس سے زیادہ مسلم مخالف اور ملک دشمن کوئی پارٹی نہیں ہے۔ آپ کے لیے شرم کی بات ہے۔‘‘ قابلِ ذکر ہے کہ کانگریس ورکنگ کمیٹی نے گزشتہ ماہ وندے ماترم کے حوالے سے 1937 کی پارٹی قرارداد پر عمل کرنے کا فیصلہ کیا تھا۔ اس کے تحت مستقبل میں کانگریس کے پروگراموں میں گیت کے صرف پہلے دو بند گائے جائیں گے۔

یواین آئی ایم جے