واشنگٹن، امریکہ کی جانب سے ایران کی اسلامی انقلابی گارڈ کور (آئی آر جی سی) سے منسلک ٹھکانوں پر حملوں کے بعد ایران نے بدھ کو مغربی ایشیا میں امریکہ کے اتحادی ممالک کو میزائلوں اور ڈرونز سے نشانہ بنایا۔

اس کے نتیجے میں دونوں ممالک کے درمیان سات ماہ سے جاری تنازع مزید شدت اختیار کر گیا ہے۔ اردن کی فوج نے کہا ہے کہ اس نے 10 بیلسٹک میزائلوں کو روک دیا، جبکہ بحرین نے بھی ایرانی ڈرونز کو روکنے کی اطلاع دی ہے۔ یہ حملے اس وقت ہوئے جب امریکی فوج نے جوابی کارروائی کرتے ہوئے ایران کو نشانہ بنایا۔ امریکہ کا الزام تھا کہ ایران آبنائے ہرمز میں بارودی سرنگیں بچھانے کی کوشش کر رہا تھا اور اس نے اردن میں امریکی اڈے پر میزائل حملہ کیا تھا۔ امریکی سینٹرل کمانڈ نے کہا کہ حالیہ حملوں میں ایرانی انقلابی گارڈ سے منسلک مقامات کو نشانہ بنایا گیا۔

امریکی صدر ڈونالڈ ٹرمپ نے خبردار کیا ہے کہ اگر ایران نے جوابی کارروائی جاری رکھی تو اس پر ’’بہت زوردار حملہ‘‘ کیا جائے گا۔ کشیدگی میں اضافے کے ساتھ یہ تنازع امریکہ اور ایران کے براہ راست تصادم سے آگے بڑھ گیا ہے اور پورے خطے میں امریکی فوجی اڈوں اور اتحادی ممالک پر حملوں میں اضافہ ہو رہا ہے۔

ایران کی آئی آر جی سی نے کہا کہ اس کی افواج نے کویت، اردن، بحرین اور اربیل میں امریکی اڈوں پر بھی میزائل اور ڈرون حملے کیے۔ اس نے دعویٰ کیا کہ کویت کے علی السالم ایئر بیس پر امریکی کمانڈر کے کمانڈ کمپلیکس اور رہائشی مقامات کو نشانہ بنایا گیا، جس کے نتیجے میں ڈرون ہینگرز اور تعیناتی کے ریمپ میں آگ لگ گئی اور کئی ڈرون تباہ ہو گئے۔ ان دعوؤں کی آزادانہ طور پر تصدیق نہیں ہو سکی۔

آئی آر جی سی نے کہا کہ یہ حملے جنوبی ایران پر امریکی حملوں کے جواب میں کیے گئے، جن میں ہرمزگان صوبے کے سیریک میں ایک رہائشی مکان پر فضائی حملہ بھی شامل تھا، جہاں ایک شادی کی تقریب جاری تھی۔

ایرانی وزارت خارجہ کے ترجمان اسماعیل بقائی نے امریکہ پر حملے میں 50 سے زائد افراد کو ہلاک یا زخمی کرنے کا الزام عائد کیا۔

مسٹر بقائی نے سوشل میڈیا پلیٹ فارم ایکس پر ایک پوسٹ میں کہا، ’’آج رات ایک گھر پر اس وقت بے رحمی سے حملہ کیا گیا جب ایک خاندان شادی کی خوشیاں منا رہا تھا۔‘‘ انہوں نے کہا کہ 50 سے زیادہ مرد، خواتین اور بچے ہلاک یا زخمی ہوئے ہیں۔ بعد میں ایرانی حکام نے بتایا کہ تقریباً 70 عام شہری متاثر ہوئے اور ایک بچے سمیت پانچ افراد ہلاک ہوئے۔ اس الزام پر امریکی حکام کی جانب سے فوری طور پر کوئی تبصرہ نہیں کیا گیا۔

مسٹر بقائی نے اس واقعے کو مبینہ مظالم کے ایک سلسلے کا حصہ قرار دیتے ہوئے کہا کہ ایران اس کا جواب دے گا۔ انہوں نے کہا، ’’اس سے بھی زیادہ خطرناک بمباری کی جائے گی۔‘‘

آئی آر جی سی نے الگ سے بتایا کہ آبنائے ہرمز میں دو تیل بردار ٹینکر بارودی سرنگوں کی زد میں آ گئے۔

آئی آر جی سی کے مطابق یہ ٹینکر ایک غیر مجاز راستہ استعمال کررہے تھے۔ اس نے بتایا کہ جہازوں میں دھماکے ہوئے اور ان میں آگ بھڑک اٹھی، تاہم عملے کو بحفاظت نکال لیا گیا۔ آئی آر جی سی نے جہازوں کی شناخت، ان کی ملکیت رکھنے والے گروپوں یا ممکنہ جانی نقصان سے متعلق کوئی معلومات فراہم نہیں کیں۔

آئی آر جی سی نے کہا کہ ایرانی فورسز نے پہلے ہی جہازوں کو بارودی سرنگوں والے علاقے سے گزرنے کے خطرات سے آگاہ کر دیا تھا اور ان شپنگ کمپنیوں کے خلاف مزید تعزیری کارروائی کی دھمکی دی تھی جو ایران کی جانب سے منظور شدہ راستوں کے بجائے غیر مجاز راستے استعمال کرتی ہیں۔

قابل ذکر ہے کہ آبنائے ہرمز عالمی سطح پر تیل کی ترسیل کا ایک اہم راستہ ہے اور یہ تنازع کے اہم مراکز میں شامل ہو چکا ہے۔

دریں اثنا، مسٹر ٹرمپ نے ایرانی عوام سے اپنی حکومت کو چیلنج کرنے کی اپیل دہراتے ہوئے ایک بار پھر لوگوں کو حکومت کے خلاف اٹھ کھڑے ہونے پر اکسایا۔ انہوں نے سوشل میڈیا پر ایک پوسٹ میں کہا، ’’ایران کے عوام کب اٹھ کھڑے ہوں گے اور لڑیں گے؟‘‘ انہوں نے کہا کہ ایران کا نظامِ حکومت ناگزیر انجام کی جانب بڑھ رہا ہے اور اس کی معیشت مکمل طور پر تباہ ہو رہی ہے۔

مسٹر ٹرمپ نے جنگ شروع ہونے کے بعد ایرانی عوام سے اپنی حکومت کا تختہ الٹنے کو کہا تھا، تاہم بعد میں کہا تھا کہ امریکہ اقتدار کی تبدیلی نہیں چاہتا۔ انہوں نے کہا کہ انہیں کبھی بھی حکومت کی تبدیلی کی کوئی پروا نہیں رہی۔ حملوں کا یہ تازہ سلسلہ امریکی فوج کی جانب سے چند روز قبل آبنائے ہرمز میں ایران کے لارک جزیرے پر حملہ کیے جانے کے بعد شروع ہوا ہے۔

امریکہ نے کہا تھا کہ اس حملے کا مقصد ایران کو آبنائے ہرمز میں بارودی سرنگیں بچھانے سے روکنا تھا۔ اس کے بعد ایران نے اردن اور متحدہ عرب امارات میں امریکی فوجی اہلکاروں پر میزائل اور ڈرون حملے کیے۔

اس کے بعد سے ایرانی رہنماؤں نے امریکہ اور ان ممالک کے خلاف مزید جوابی کارروائی کی دھمکیاں دی ہیں جو امریکہ کو اپنی سرزمین یا فوجی تنصیبات استعمال کرنے کی اجازت دیتے ہیں۔

پارلیمنٹ کے نائب اسپیکر علی نیک زاد نے کہا کہ امریکی حملوں کی حمایت کرنے والے ممالک کو ان کی شمولیت کے تناسب سے سزا دی جائے گی۔ مسٹر نیک زاد نے کہا، ’’جس کسی نے بھی امریکہ کے جرائم میں تعاون اور حصہ لیا ہے اور اسے اپنی سرزمین، علاقے یا تنصیبات استعمال کرنے کی اجازت دی ہے، اسے اس کی شمولیت کی سطح کے مطابق سزا دی جائے گی۔‘‘

یو این آئی۔ ع ا۔