تہران، ایران نے اقوام متحدہ کی جوہری نگران ایجنسی کو بتایا ہے کہ جب تک ملک کو مزید فوجی حملوں، بالخصوص جوہری تنصیبات پر حملوں کا خطرہ لاحق ہے، اس وقت تک جوہری معائنہ دوبارہ شروع کرنے پر کوئی بات چیت نہیں ہو سکتی۔

رکن ممالک کو جمعرات کو بھیجی گئی ایک خفیہ رپورٹ میں، بین الاقوامی جوہری توانائی ایجنسی نے کہا کہ تہران نے ایران کے خلاف مزید فوجی کارروائی شروع کرنے کے لیے امریکی صدر کی جانب سے مسلسل، واضح اور کھلی دھمکیوں کا حوالہ دیا۔ تہران نے کہا کہ اس صورتحال کا حل اس وقت تک نہیں نکل سکتا جب تک کہ موجودہ حالات کی بنیادی وجوہات کو ختم نہ کیا جائے اور معمول کے حفاظتی اقدامات کے نفاذ کے لیے ضروری شرائط بحال نہ کی جائیں۔ اس کے باوجود، ایران نے اس بات کا اعادہ کیا کہ جیسے ہی قانونی اور زمینی حقائق اجازت دیں گے، وہ اپنی حفاظتی ذمہ داریوں کو مکمل طور پر نافذ کرنے کا عمل دوبارہ شروع کرنے کے لیے پرعزم ہے۔

یہ تنازعہ ایک ایسے وقت میں سامنے آیا ہے جب آئی اے ای اے جون 2025 میں اسرائیلی اور امریکی حملوں میں تباہ ہونے والی ایرانی جوہری تنصیبات تک رسائی حاصل کرنے کی کوشش کر رہا ہے۔ ان حملوں کے بعد سے انسپکٹرز نہ تو متاثرہ مقامات پر واپس جا سکے ہیں اور نہ ہی ایران کے انتہائی افزودہ یورینیم کے ذخیرے کی صورتحال اور مقام کی تصدیق کر پائے ہیں۔ نگران ادارے نے ایران کی جوہری تنصیبات اور مواد کے بارے میں معلومات کی کمی کو “پھیلاؤ سے جڑی تشویش کا باعث” قرار دیا ہے، جسے “انتہائی فوری طور پر درست کرنے کی ضرورت” ہے۔ ایجنسی نے یہ بھی کہا کہ وہ بہت کم وقت کے نوٹس پر ایران میں اپنی حفاظتی نگرانی کی سرگرمیاں دوبارہ شروع کرنے کے لیے پوری طرح تیار ہے۔

ایران نے امریکی حکومت کی اس حالیہ پیشکش پر بھی اعتراض کیا ہے جس میں اس کے جوہری پروگرام کے بارے میں معلومات فراہم کرنے پر دو کروڑ ڈالر تک کے انعام کی پیشکش کی گئی ہے۔ امریکی محکمہ خارجہ کے ‘ریوارڈز فار جسٹس’ پروگرام کے تحت اعلان کردہ اس پیشکش میں، ایرانی جوہری تنصیبات، آلات اور سائنسدانوں سمیت وہاں کام کرنے والے لوگوں کے بارے میں معلومات طلب کی گئی ہیں۔ آئی اے ای اے کو لکھے گئے ایک خط میں، ایران نے ایجنسی کے کام کی رازداری اور آزادی کو برقرار رکھنے کی اہمیت پر زور دیا۔ اس کے ساتھ ہی متنبہ کیا کہ اس کے جوہری پروگرام سے متعلق معلومات کو افشا نہیں کیا جانا چاہیے اور نہ ہی اس کا غلط استعمال یا ناجائز فائدہ اٹھایا جانا چاہیے۔

ایران کے وزیر خارجہ عباس عراقچی نے اقوام متحدہ، سلامتی کونسل اور آئی اے ای اے کے سربراہ رافیل گروسی سے الگ الگ اپیل کی ہے کہ وہ امریکہ کے اس اقدام کی مذمت کریں۔ ان کا استدلال ہے کہ اس سے جاسوسی کو فروغ مل سکتا ہے اور جوہری تنصیبات اور سائنسی عملے کے تحفظ کو خطرہ لاحق ہو سکتا ہے۔

یو این آئی۔ م ع

لندن، عالمی منڈی میں خام تیل کی قیمتوں میں جمعہ کو معمولی کمی ریکارڈ کی گئی اور قیمتیں مسلسل دوسرے ہفتے بھی گراوٹ کی جانب گامزن رہیں۔ امریکہ کی جانب سے ایران کی بحری ناکہ بندی برقرار رکھنے کے باعث مشرق وسطیٰ میں بڑے پیمانے پر دوبارہ لڑائی چھڑنے کے خدشات کم ہوئے ہیں، تاہم تجارتی جہازوں پر حملوں سے تیل کی عالمی فراہمی کو خطرات لاحق ہیں۔

خبر رساں ادارے رائٹرز کے مطابق جمعہ کو عالمی معیار برینٹ خام تیل کے مستقبل کے سودوں کی قیمت 28 سینٹ، یعنی 0.29 فیصد کم ہوکر 95.54 ڈالر فی بیرل ہوگئی۔

امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت میں بھی 56 سینٹ، یعنی 0.63 فیصد کی کمی ریکارڈ کی گئی، جس کے بعد یہ 88.18 ڈالر فی بیرل پر آگیا۔

رپورٹ کے مطابق جمعہ کی کمی سے گزشتہ دو کاروباری سیشنز کے دوران تیل کی قیمتوں میں ہونے والا اضافہ ختم ہوگیا۔ پورے ہفتے عالمی منڈی میں قیمتوں میں اتار چڑھاؤ دیکھا گیا۔

اس سے قبل امریکہ اور اسرائیل کی ایران کے خلاف جاری جنگ میں مفاہمت اور کشیدگی کم ہونے کی امیدوں نے تیل کی قیمتوں کو سہارا دیا تھا، تاہم سعودی عرب کے بنیادی ڈھانچے پر یمن کے حوثیوں کے حملوں اور خلیجی خطے سے خام تیل لے جانے والے ٹینکروں پر حملوں نے عالمی سپلائی سے متعلق خدشات بڑھا دیے۔

امریکی ناکہ بندی کے باعث خطے میں فوری طور پر بڑے پیمانے پر فوجی تصادم کے خدشات کم ہوئے ہیں، لیکن خلیج میں تجارتی جہازوں اور تیل بردار ٹینکروں کو لاحق خطرات برقرار ہیں۔

ماہرین کے مطابق مشرق وسطیٰ میں کشیدگی اور اہم بحری راستوں پر حملوں کی صورت میں تیل کی ترسیل متاثر ہوسکتی ہے، جس سے عالمی منڈی میں قیمتوں میں دوبارہ اضافہ بھی ممکن ہے۔

یو این آئی۔ م ع

واشنگٹن، امریکہ کے نائب صدر جے ڈی وینس ایران کے ساتھ جنگ ختم کرنے کی کوششوں میں اہم کردار ادا کرتے ہوئے ایرانی سلامتی عہدیدار محسن رضائی کے ساتھ بالمشافہ بات چیت پر غور کر رہے ہیں۔ وال اسٹریٹ جرنل نے بدھ کو امریکی اور مشرق وسطیٰ کے عہدیداروں اور مذاکرات سے واقف افراد کے حوالے سے یہ اطلاع دی۔

رپورٹ کے مطابق، صدر ڈونالڈ ٹرمپ نے اپنے سینئر معاونین اور غیر ملکی ہم منصبوں کو بتایا ہے کہ وہ وینس کے ذریعے تہران کے ساتھ مذاکرات دوبارہ شروع کرنے کے لیے تیار ہیں اور انہیں بات چیت کا اختیار بھی دے دیا ہے۔

وینس نے اکتوبر میں ایران کی سپریم نیشنل سکیورٹی کونسل کے سکریٹری محسن رضائی کو خط بھیج کر ملاقات کی درخواست کی تھی، تاہم ابھی تک اس کے لیے کوئی تاریخ طے نہیں ہوئی ہے۔

سفارتی کوششوں کو کئی بڑی رکاوٹوں کا سامنا ہے۔ ایرانی عہدیداروں کا مطالبہ ہے کہ مذاکرات دوبارہ شروع کرنے سے پہلے واشنگٹن اپنی بحری ناکہ بندی ختم کرے، منجمد اثاثے جاری کرے اور تیل پر عائد پابندیوں میں نرمی کرے۔

ثالثوں نے تجویز پیش کی ہے کہ بڑے فوجی حملوں کے خطرے کو کم کرنے کے لیے امریکی طیارہ بردار بحری جہازوں کو مزید دور منتقل کیا جائے اور ایرانی بندرگاہوں کی ناکہ بندی میں بھی نرمی کی جائے۔

وال اسٹریٹ جرنل کے حوالے سے مشرق وسطیٰ کے عہدیداروں کے مطابق، اس کے بدلے ایران آبنائے ہرمز سے 25 تیل بردار جہازوں کو گزرنے کی اجازت دے گا۔

یو این آئی۔ م ع