سری نگر، جموں و کشمیر کے وزیر اعلیٰ عمر عبداللہ نے مرکزی وزیر ریلوے اشونی ویشنو سے مطالبہ کیا ہے کہ اننت ناگ ریلوے اسٹیشن پر وندے بھارت ایکسپریس کے عارضی اسٹاپ کو مستقل اسٹاپ میں تبدیل کیا جائے۔

انہوں نے کہا کہ یہ اسٹیشن جنوبی کشمیر کے مسافروں کے لیے انتہائی اہمیت اختیار کرچکا ہے۔ وزیر اعلیٰ نے مسٹر ویشنو کو لکھے گئے ایک خط میں کہا کہ وندے بھارت ایکسپریس کے عارضی اسٹاپ کا جموں و کشمیر کے لوگوں نے دل سے خیرمقدم کیا ہے اور اس سے مسافروں کو کافی سہولت حاصل ہوئی ہے۔

عمر عبداللہ نے کہا کہ اننت ناگ جنوبی کشمیر کا ایک اہم تجارتی اور ٹرانسپورٹ مرکز ہے، جو آس پاس کے کئی اضلاع کی بڑی آبادی کی ضروریات پوری کرتا ہے۔

انہوں نے کہا کہ ریلوے اسٹیشن پر مستقل اسٹاپ کی سہولت فراہم کیے جانے سے بڑی تعداد میں مسافروں کو فائدہ پہنچے گا۔ اس سے ریل خدمات تک لوگوں کی رسائی بہتر ہوگی اور علاقے میں تجارت، سیاحت اور معاشی سرگرمیوں کو بھی فروغ ملے گا۔

وزیر اعلیٰ نے جموں اور سری نگر کے درمیان وندے بھارت ایکسپریس سروس کی اہمیت پر زور دیتے ہوئے کہا کہ اس سروس کا آغاز ریل رابطوں کو مضبوط بنانے اور جموں و کشمیر میں معاشی ترقی کے نئے امکانات پیدا کرنے کی سمت ایک بڑی کامیابی ہے۔

عمر عبداللہ نے اپنے خط میں لکھاکہ ”لہٰذا میں آپ سے ذاتی طور پر مداخلت کرنے کی درخواست کرتا ہوں تاکہ اننت ناگ ریلوے اسٹیشن پر وندے بھارت کے عارضی اسٹاپ کو مستقل اسٹاپ میں تبدیل کیا جاسکے۔ براہ کرم جنوبی کشمیر کے عوام کی حقیقی ضروریات اور ان کی توقعات کو مدنظر رکھیں۔”

انہوں نے اس درخواست پر مثبت غور کرنے کی اپیل کرتے ہوئے کہا کہ اس اسٹاپ کو مستقل طور پر جاری رکھنا عوامی مفاد کا ایک اہم معاملہ ہے۔

جموں و کشمیر میں ریل رابطوں کے فروغ کے حوالے سے وندے بھارت ایکسپریس سروس ایک اہم کامیابی ثابت ہوئی ہے۔ اپنی تیز رفتار کے باعث اس نے کشمیر وادی اور جموں خطے کے درمیان سفر کو کافی آسان اور سہل بنا دیا ہے۔

یواین آئی۔ ط ا

سرینگر، اپنی پارٹی کے صدر الطاف بخاری نے جمعرات کو مرکزی حکومت سے اپیل کی کہ وہ 1990 کی دہائی اور اس کے بعد ملک دشمن سرگرمیوں میں ملوث رہنے والے تمام افراد کے لیے عام معافی کا اعلان کرے۔

انہوں نے کہا کہ چونکہ جموں و کشمیر کے عوام اب امن اور معمول کے حالات کی راہ اختیار کرچکے ہیں، اس لیے ماضی میں گمراہ ہونے والے تمام افراد کو معاف کرکے معمول کی زندگی گزارنے کا ایک موقع دیا جانا چاہیے۔

مسٹر بخاری نے یہ اپیل سرینگر میں ایک پریس کانفرنس سے خطاب کرتے ہوئے کی۔ انہوں نے کہا کہ 1990 کی دہائی میں بعض نوجوانوں کو گمراہ کرکے ایسے بیانیے کی پیروی پر آمادہ کیا گیا تھا جو ملک کے امن اور استحکام کے خلاف تھا۔

انہوں نے کہاکہ ”تاہم اب حالات بدل چکے ہیں۔ ان میں سے بہت سے لوگ قومی دھارے میں واپس آچکے ہیں اور اس وقت سرگرم رہنے والے رہنماؤں کے بچے اور پوتے نواسے بھی اب قومی دھارے میں شامل ہورہے ہیں۔”

اپنی پارٹی کے صدر نے کہاکہ ”حالات میں اس تبدیلی کے پیش نظر میں وزیر اعظم اور وزیر داخلہ سے اپیل کرتا ہوں کہ ایسے تمام افراد کے لیے عام معافی دینے پر غور کیا جائے اور انہیں معاشرے کے قومی دھارے میں مکمل طور پر دوبارہ شامل ہونے کا موقع فراہم کیا جائے۔”

مسٹر بخاری نے کہا کہ ان افراد کے خلاف ایف آئی آر درج ہونے کی وجہ سے انہیں مسلسل مشکلات کا سامنا کرنا پڑ رہا ہے۔ انہوں نے کہا کہ ان مقدمات کے باعث بہت سے افراد نہ تو سرکاری اور نجی شعبوں میں ملازمت حاصل کرپارہے ہیں اور نہ ہی پاسپورٹ بنوا سکتے ہیں، جس سے ان کی معمول کی زندگی متاثر ہورہی ہے۔

انہوں نے متعدد نوجوانوں کو پولیس ویریفکیشن سرٹیفکیٹ جاری نہ کیے جانے پر بھی تشویش ظاہر کی۔ ان کا کہنا تھا کہ ملازمت حاصل کرنے اور پاسپورٹ بنوانے کے لیے یہ سرٹیفکیٹ ضروری ہے، لیکن اس کی عدم دستیابی نوجوانوں کے لیے غیر ضروری رکاوٹیں پیدا کررہی ہے۔

انہوں نے مزید کہاکہ”بہت سے نوجوانوں کو اس وجہ سے پولیس ویریفکیشن سرٹیفکیٹ نہیں دیا جارہا ہے کہ ان کے خاندان کے بعض افراد 1990 کی دہائی کے ہنگامہ خیز حالات میں ملوث رہے تھے۔ اس طریقہ کار پر نظرثانی کی ضرورت ہے۔ نوجوانوں کو ان کے خاندان کے افراد کے اقدامات کی وجہ سے مشکلات کا سامنا کرنے یا مواقع سے محروم نہیں کیا جانا چاہیے۔”

اپنی پارٹی کے صدر نے موجودہ ریزرویشن پالیسی پر بھی تشویش کا اظہار کرتے ہوئے اسے غیر منصفانہ اور میرٹ کے لیے نقصان دہ قرار دیا۔ انہوں نے خبردار کیا کہ اگر یہ پالیسی موجودہ شکل میں جاری رہی تو جموں و کشمیر میں کشمیری نوجوان ملازمتوں کے مواقع سے بتدریج محروم ہوسکتے ہیں۔ ان کا کہنا تھا کہ تقریباً 70 فیصد ملازمتیں مختلف زمروں کے لیے محفوظ ہیں۔

انہوں نے کہا کہ موجودہ ریزرویشن پالیسی خاص طور پر وادی کشمیر کے لوگوں کے لیے ناانصافی پر مبنی ہے، جو گزشتہ کئی دہائیوں سے پہلے ہی بے پناہ مشکلات برداشت کرتے آئے ہیں۔

مسٹر بخاری نے کہاکہ ”دو لاکھ کشمیری قبرستانوں میں دفن ہیں، ہزاروں افراد جیلوں میں قید ہیں اور اب لوگوں کو روزگار کے مواقع سے بھی محروم کیا جارہا ہے۔ غیر منصفانہ ریزرویشن پالیسی انسانی حقوق کی خلاف ورزی کے مترادف ہے۔”

یواین آئی۔ظ ا

سرینگر، جنوبی کشمیر کے ضلع کولگام میں سینٹرل ریزرو پولیس فورس (سی آر پی ایف) کی چوکی پر حملے میں ملوث دہشت گردوں کی تلاش کے لیے جمعرات کو مسلسل دوسرے دن بڑے پیمانے پر تلاشی مہم جاری رہی۔ اس حملے میں سی آر پی ایف کے تین اہلکار زخمی ہوگئے تھے، جن میں سے ایک کی حالت تشویشناک بتائی گئی ہے۔

حملہ آوروں کا سراغ لگانے کے لیے ضلع کے مختلف علاقوں میں سکیورٹی فورسز نے متعدد محاصرے اور تلاشی کی کارروائیاں شروع کی ہیں۔ بدھ کے روز دہشت گردوں نے میر بازار میں اکھران پل کے قریب سی آر پی ایف کی ناکہ پارٹی پر فائرنگ کی تھی اور اس کے بعد موقع سے فرار ہوگئے تھے۔

سرکاری ذرائع نے بتایا کہ حملے میں ملوث افراد کی شناخت اور ان کا سراغ لگانے کی کوششوں کے تحت سکیورٹی ایجنسیاں سرگرم ہوگئی ہیں اور کئی مشتبہ افراد سے پوچھ گچھ کی گئی ہے۔ سکیورٹی حکام کا خیال ہے کہ بدھ کے حملے میں لشکر طیبہ کا دہشت گرد محمد لطیف بھٹ بھی ملوث تھا، جس کے ساتھ ایک یا دو غیر ملکی دہشت گرد بھی شامل تھے۔

محمد لطیف بھٹ کو کشمیر میں سرگرم واحد زندہ بچ جانے والا مقامی ملی ٹینٹ بتایا جاتا ہے۔ اس پر جنوبی کشمیر میں ماضی کے کئی حملوں، جن میں رواں سال جولائی میں مہاجر مزدوروں کو نشانہ بنانے کے واقعات بھی شامل ہیں، میں ملوث ہونے کا الزام ہے۔ کولگام کے خریوان چادر گاؤں کا رہنے والا بھٹ گزشتہ سال ہی مبینہ طور پر دہشت گرد تنظیم میں شامل ہوا تھا۔

قومی تحقیقاتی ایجنسی (این آئی اے) کی ایک ٹیم نے جمعرات کو جائے واردات کا دورہ کیا اور وہاں سے فارنسک شواہد جمع کیے۔ ادھر فوج کی سرینگر میں قائم چنار کور کے کمانڈر نے بھی علاقے کا دورہ کرکے سکیورٹی صورت حال کا جائزہ لیا اور جاری کارروائیوں کا معائنہ کیا۔

حملے میں زخمی ہونے والے اہلکاروں کی شناخت ہیڈ کانسٹیبل سونبیر سنگھ، کانسٹیبل راکیش داس اور کانسٹیبل سنتانو چندرا کے طور پر کی گئی ہے۔ سونبیر سنگھ کے پیٹ اور ریڑھ کی ہڈی میں گولی لگی ہے۔ ان کی حالت بدستور تشویشناک ہے اور وہ سرینگر کے فوجی 92 بیس اسپتال میں زیر علاج ہیں۔

بدھ کے حملے کے فوراً بعد وادی کے دیگر علاقوں میں بھی سکیورٹی انتظامات سخت کردیے گئے ہیں۔
لیفٹیننٹ گورنر منوج سنہا نے بدھ کی شام سرینگر میں اعلیٰ حکام کے ساتھ سکیورٹی صورت حال کا جائزہ لیا۔ انہوں نے کہا کہ سکیورٹی فورسز کو دہشت گردوں کے خلاف کارروائی کرنے کے لیے ”کھلی چھوٹ” دے دی گئی ہے۔

بدھ کا یہ حملہ کشمیر میں سکیورٹی فورسز پر بڑے حملوں کے ایک طویل وقفے کے بعد پیش آیا ہے۔ اس سے قبل 24 اکتوبر 2024 کو بارہمولہ کے بٹہ پتری علاقے میں، جو گلمرگ کے قریب واقع ہے، ایک دہشت گردانہ حملے میں دو فوجی اہلکار اور دو شہری پورٹر ہلاک ہوگئے تھے، جبکہ تین دیگر افراد زخمی ہوئے تھے۔

دریں اثنا، سی آر پی ایف کے جموں و کشمیر زون کے اسپیشل ڈائریکٹر جنرل سندیپ کھروار نے جمعرات کو لیفٹیننٹ گورنر منوج سنہا سے ملاقات کی اور مرکز کے زیر انتظام علاقے میں موجودہ سکیورٹی صورت حال پر تبادلہ خیال کیا۔

یواین آئی۔ ظ ا