جموں، جموں و کشمیر پولیس نے ضلع کشتواڑ میں دو اسپیشل پولیس آفیسرز (ایس پی اوز) کے قتل کے معاملے میں مطلوب تین دہشت گردوں کے پوسٹر جاری کیے ہیں۔ پولیس نے ان کی گرفتاری کے لیے قابل اعتماد اطلاع فراہم کرنے والے شخص کو مجموعی طور پر 30 لاکھ روپے نقد انعام دینے کا اعلان بھی کیا ہے۔

پولیس کے بیان کے مطابق، مطلوب دہشت گردوں کی شناخت محمد امین عرف جہانگیر، ریاض احمد عرف حضری اور مدثر حسین کے طور پر کی گئی ہے۔

یہ اعلان جمعرات کی صبح دور افتادہ علاقہ دچھن میں لاپتہ ایس پی اوز ببّی چند اور رشپال کمار کی گولیوں سے چھلنی لاشیں برآمد ہونے کے بعد کیا گیا ہے۔

پولیس نے عام لوگوں سے اپیل کی ہے کہ اگر کسی کے پاس مطلوب دہشت گردوں کی موجودہ جگہ یا ان کے ٹھکانے سے متعلق کوئی اطلاع ہو تو وہ ان فون نمبروں 9797900958 یا 1995357494 پر رابطہ کرکے پولیس کو مطلع کرے۔

پولیس نے یقین دہانی کرائی ہے کہ اطلاع فراہم کرنے والے شخص کی شناخت مکمل طور پر خفیہ رکھی جائے گی۔

یواین آئی۔ ط ا

سری نگر، مرکز کے زیر انتظام علاقے لداخ میں 2026 کے پہلے دس مہینوں کے دوران سیاحوں کی آمد میں نمایاں اضافہ دیکھنے میں آیا ہے۔ پچھلے سال کی اسی مدت کے مقابلے اس سال سیاحوں کی تعداد میں 65.90 فی صد اضافہ ہوا ہے۔ لداخ کے لیفٹیننٹ گورنر ونے سکسینہ نے ان اعداد و شمار کو سوشل میڈیا پر شیئر کیا۔

انہوں نے کہا کہ جنوری اور اکتوبر 2026 کے درمیان تقریباً 4.91 لاکھ سیاحوں نے مرکز کے زیر انتظام علاقے کا دورہ کیا، جبکہ پچھلے سال کی اسی مدت کے دوران یہ تعداد 2.96 لاکھ تھی۔ سیاحوں کی آمد میں یہ مثبت رجحان اکتوبر کے مہینے میں بھی جاری رہا۔ اکتوبر 2026 میں سیاحوں کی تعداد 30,623 تک پہنچ گئی جو اکتوبر 2025 میں 17,537 سیاحوں کے مقابلے میں 74.62 فیصد زیادہ ہے۔ اعداد و شمار کے مطابق گزشتہ پانچ ماہ کے دوران سیاحوں کی آمد میں مسلسل اضافہ دیکھا گیا ہے۔ پچھلے سال انہی مہینوں کے مقابلے مئی میں 121 فی صد، جون میں 43 فی صد، جولائی میں 56 فی صد، اگست میں 65 فی صد اور ستمبر میں 61 فی صد اضافہ ریکارڈ کیا گیا۔ لیفٹیننٹ گورنر نے اس کامیابی کو وزیر اعظم نریندر مودی کے گھریلو سیاحت کو فروغ دینے کی کال اور مرکز کے زیر انتظام انتظامیہ کے ہدف بنائے گئے پالیسی اقدامات کو قرار دیا۔ انہوں نے کہا کہ انتظامیہ کی کوششوں کا مقصد سیاحت کے شعبے کے لیے سازگار ماحول پیدا کرنا، مقامی باشندوں کے لیے روزگار کے مواقع پیدا کرنا اور پائیدار معاش کو فروغ دینا ہے۔ ذمہ دارانہ سیاحت کی اہمیت پر زور دیتے ہوئے لیفٹیننٹ گورنر نے مسافروں کو لداخ کا دورہ کرنے اور اس کی قدرتی خوبصورتی اور ثقافتی ورثے کا تجربہ کرنے کی دعوت بھی دی۔

یو این آئی۔ الف الف۔م الف

جموں، جموں و کشمیر کے لیفٹیننٹ گورنر منوج سنہا نے کشتواڑ میں دورانِ ڈیوٹی اپنی جان قربان کرنے والے جموں و کشمیر پولیس کے خصوصی پولیس افسران (ایس پی اوز) کو خراجِ عقیدت پیش کیا ہے۔

لیفٹیننٹ گورنر نے سوشل میڈیا پلیٹ فارم ایکس پر ایک پوسٹ میں کہاکہ ”جموں و کشمیر پولیس کے بہادر اہلکاروں بابی چند اور رشپال کمار کی کشتواڑ میں دورانِ ڈیوٹی المناک ہلاکت پر مجھے گہرا دکھ پہنچا ہے۔ میں اس بزدلانہ حملے کی سخت مذمت کرتا ہوں۔”

انہوں نے مزید کہا کہ ان اہلکاروں کی بہادری، غیر متزلزل لگن اور ملک کے لیے بے لوث خدمات کو ہمیشہ یاد رکھا جائے گا۔ منوج سنہا نے سوگوار خاندانوں سے دلی تعزیت کا اظہار کرتے ہوئے کہا کہ غم کی اس گھڑی میں ہم ان کے ساتھ پوری یکجہتی کے ساتھ کھڑے ہیں۔

یواین آئی۔ ط ا