جموں، جموں و کشمیر پولیس نے ضلع کشتواڑ میں دو اسپیشل پولیس آفیسرز (ایس پی اوز) کے قتل کے معاملے میں مطلوب تین دہشت گردوں کے پوسٹر جاری کیے ہیں۔ پولیس نے ان کی گرفتاری کے لیے قابل اعتماد اطلاع فراہم کرنے والے شخص کو مجموعی طور پر 30 لاکھ روپے نقد انعام دینے کا اعلان بھی کیا ہے۔

پولیس کے بیان کے مطابق، مطلوب دہشت گردوں کی شناخت محمد امین عرف جہانگیر، ریاض احمد عرف حضری اور مدثر حسین کے طور پر کی گئی ہے۔

یہ اعلان جمعرات کی صبح دور افتادہ علاقہ دچھن میں لاپتہ ایس پی اوز ببّی چند اور رشپال کمار کی گولیوں سے چھلنی لاشیں برآمد ہونے کے بعد کیا گیا ہے۔

پولیس نے عام لوگوں سے اپیل کی ہے کہ اگر کسی کے پاس مطلوب دہشت گردوں کی موجودہ جگہ یا ان کے ٹھکانے سے متعلق کوئی اطلاع ہو تو وہ ان فون نمبروں 9797900958 یا 1995357494 پر رابطہ کرکے پولیس کو مطلع کرے۔

پولیس نے یقین دہانی کرائی ہے کہ اطلاع فراہم کرنے والے شخص کی شناخت مکمل طور پر خفیہ رکھی جائے گی۔

یواین آئی۔ ط ا

جموں، جموں و کشمیر کے لیفٹیننٹ گورنر منوج سنہا نے کشتواڑ میں دورانِ ڈیوٹی اپنی جان قربان کرنے والے جموں و کشمیر پولیس کے خصوصی پولیس افسران (ایس پی اوز) کو خراجِ عقیدت پیش کیا ہے۔

لیفٹیننٹ گورنر نے سوشل میڈیا پلیٹ فارم ایکس پر ایک پوسٹ میں کہاکہ ”جموں و کشمیر پولیس کے بہادر اہلکاروں بابی چند اور رشپال کمار کی کشتواڑ میں دورانِ ڈیوٹی المناک ہلاکت پر مجھے گہرا دکھ پہنچا ہے۔ میں اس بزدلانہ حملے کی سخت مذمت کرتا ہوں۔”

انہوں نے مزید کہا کہ ان اہلکاروں کی بہادری، غیر متزلزل لگن اور ملک کے لیے بے لوث خدمات کو ہمیشہ یاد رکھا جائے گا۔ منوج سنہا نے سوگوار خاندانوں سے دلی تعزیت کا اظہار کرتے ہوئے کہا کہ غم کی اس گھڑی میں ہم ان کے ساتھ پوری یکجہتی کے ساتھ کھڑے ہیں۔

یواین آئی۔ ط ا

سری نگر، تقریباً دو ہفتوں تک گھر میں نظربندی میں رہنے کے بعد کشمیر کے میرواعظ مولوی عمر فاروق جمعہ کے روز تاریخی جامع مسجد سری نگر واپس پہنچے اور نمازِ جمعہ کے اجتماع سے خطاب کیا۔

نمازیوں سے خطاب کرتے ہوئے میرواعظ نے اپنی مذہبی اور عوامی سرگرمیوں پر بار بار عائد کی جانے والی پابندیوں پر تشویش کا اظہار کیا۔ انہوں نے کہا کہ اس طرح کے من مانے اقدامات سے لوگوں کو پریشانی ہوتی ہے اور یہ ان کی مذہبی ذمہ داریوں کی ادائیگی میں بلاجواز مداخلت کے مترادف ہیں۔

میرواعظ نے کہا کہ جامع مسجد کا منبر ہمیشہ دین و ایمان کے تحفظ اور حق بات کہنے کی علامت رہا ہے۔

اس منبر سے عوام کے مسائل اور ان کے حقوق کی ترجمانی کی جاتی رہی ہے اور وہ اس ذمہ داری سے دستبردار نہیں ہوسکتے۔

انہوں نے افسوس ظاہر کیا کہ پابندیوں کے باعث متحدہ مجلس علما (ایم ایم یو) کو اپنا پہلا ضلعی سطح کا اجلاس ملتوی کرنا پڑا، جو 4 نومبر کو بانڈی پورہ میں منعقد ہونا طے تھا۔ اس اجلاس میں علما کو ستمبر میں شروع کیے گئے اقدام کو آگے بڑھانے کے طریقوں پر غور کرنا تھا۔ اس اقدام کا مقصد منشیات کے استعمال، سماجی برائیوں، نوجوانوں میں خودکشی کے بڑھتے رجحان اور ماحولیاتی مسائل سمیت مختلف سماجی و مذہبی چیلنجوں سے نمٹنا تھا۔

میرواعظ نے کہا کہ سماجی اصلاح کے لیے اس طرح کی اجتماعی کوششوں کی حوصلہ افزائی کی جانی چاہیے، نہ کہ ان کی راہ میں رکاوٹیں کھڑی کی جائیں۔

انہوں نے کشمیر میں شادی بیاہ کی تقریبات میں کھانا تیار کرنے والے باورچیوں، جنہیں مقامی طور پر ”وَزہ” کہا جاتا ہے، کے اس حالیہ فیصلے کا بھی خیرمقدم کیا جس کے تحت دعوتوں کے اوقات کو منظم کرنے اور رات گئے ہونے والی وازوان کی ضیافتوں کو رات 10 بجے تک ختم کرنے کا فیصلہ کیا گیا ہے۔

میرواعظ نے اس اقدام کو شادی بیاہ کی تقریبات میں نظم و ضبط اور سادگی کو فروغ دینے کی جانب ایک مثبت قدم قرار دیا۔ انہوں نے کہا کہ اس فیصلے کے ساتھ وَزہ برادری کے وقار اور محنت کا احترام بھی ملحوظ رکھا گیا ہے۔ انہوں نے کشمیر وَزہ ایسوسی ایشن کو یقین دلایا کہ متحدہ مجلس علما سماجی اصلاح کی ان تعمیری کوششوں میں اس کا بھرپور ساتھ دے گی۔

میرواعظ نے کہا کہ وَزہ ایسوسی ایشن کا فیصلہ درست سمت میں ایک قدم ضرور ہے، تاہم شادی بیاہ کی تقریبات میں بڑھتی ہوئی فضول خرچی، رسم و رواج میں غیر ضروری اضافے، بے تحاشہ اخراجات اور دولت کی نمائش کے مسابقتی رجحان جیسے مسائل پر مزید کام کرنے کی ضرورت ہے۔ ان رویوں نے خاندانوں پر غیر معمولی مالی اور سماجی بوجھ ڈال دیا ہے۔

انہوں نے معاشرے پر زور دیا کہ وہ اپنی روایات کی خوب صورتی اور وقار کو برقرار رکھتے ہوئے فضول خرچی اور غیر ضروری رسومات سے گریز کرے، تاکہ اسلامی تعلیمات کے مطابق شادی بیاہ کی تقریبات کو سادہ، باوقار اور ہر خاندان کے لیے قابلِ برداشت بنایا جاسکے۔

یواین آئی۔ ظ ا