وارانسی، بھارتیہ جنتا پارٹی (بی جے پی) کے قومی ترجمان اور رکن پارلیمنٹ سمبت پاترا نے پیر کے روز کاشی میں اپوزیشن اور کانگریس رہنما راہل گاندھی کو نشانہ بناتے ہوئے کہا کہ ووٹر لسٹ کی خصوصی گہری نظرثانی (ایس آئی آر) کے حوالے سے ملک میں غلط فہمی پھیلائی جا رہی ہے۔ انہوں نے راہل گاندھی کے 13 کروڑ ووٹوں کی چوری کے دعوے کو بے بنیاد قرار دیتے ہوئے کہا کہ اگر اتنی بڑی تعداد میں ووٹوں کی چوری ہوئی ہوتی تو ملک کی سڑکوں پر احتجاج ہو رہے ہوتے۔

سرکٹ ہاؤس میں صحافیوں سے بات چیت کرتے ہوئے مسٹر پاترا نے کہا کہ ایس آئی آر کا عمل ابھی جاری ہے اور مکمل نہیں ہوا ہے۔ انہوں نے کہا، ”آپ کے دور میں ایس آئی آر ہوا تو ٹھیک تھا، اب ہو رہا ہے تو غلط کیسے ہوگیا؟ یہ ووٹر لسٹ کو درست کرنے کا عمل ہے۔”

انہوں نے کہا کہ ووٹر لسٹ سے 4 زمروں کے لوگوں کے نام ہٹائے جا رہے ہیں۔ ان میں غیر حاضر، منتقل شدہ، فوت شدہ اور دوہری ووٹنگ کرنے والے ووٹر شامل ہیں۔ تقریباً 3 کروڑ ووٹر غیر حاضر زمرے میں ہیں۔ بوتھ سطح کا افسر (بی ایل او) ان کے گھر 3 بار جاتا ہے۔ تینوں مرتبہ غیر حاضر پائے جانے پر ان کا نام اس زمرے میں درج کیا جاتا ہے۔ ایسے ووٹر فارم-6 بھر کر اپنا نام دوبارہ شامل کروا سکتے ہیں۔

مسٹر پاترا نے کہا کہ تقریباً 6 کروڑ ووٹر منتقل شدہ زمرے میں ہیں۔ انہیں نوٹس بھیجے گئے ہیں۔ مقررہ فارم بھرنے پر ان کا نام بھی ووٹر لسٹ میں شامل کیا جا سکتا ہے۔ انہوں نے بتایا کہ تقریباً 2 کروڑ 80 لاکھ لوگوں کو فوت شدہ قرار دیا گیا ہے۔ کئی مرتبہ اہل خانہ کسی شخص کی موت کے بعد ووٹر لسٹ سے اس کا نام ہٹوانے کی اطلاع نہیں دیتے، اس لیے ووٹر لسٹ کو درست کرنا ضروری ہے۔

انہوں نے کہا کہ دوہری ووٹنگ کرنے والے ووٹروں کی تعداد بھی تقریباً 1 کروڑ ہے۔ ایسے ووٹروں کا نام صرف ایک ہی جگہ رکھا جائے گا۔ ان تمام زمروں کے اعداد و شمار کو جوڑ کر 13 کروڑ ووٹوں کی چوری کا دعویٰ کیا جا رہا ہے، جب کہ یہ پوری طرح گمراہ کن ہے۔

بی جے پی ترجمان نے کہا کہ کیا فوت شدہ لوگوں کے نام ووٹر لسٹ میں برقرار رہنے دینا مناسب ہے؟ انہوں نے مغربی بنگال میں ووٹر لسٹ سے نام ہٹائے جانے کے بعد بی جے پی کی جیت کے الزامات پر بھی سوال اٹھایا۔ انہوں نے کہا کہ جن 20 اسمبلی حلقوں میں سب سے زیادہ نام کاٹے گئے، ان میں سے زیادہ تر پر ترنمول کانگریس نے کامیابی حاصل کی۔

مسٹر پاترا نے کہا کہ یہ پورا عمل الیکشن کمیشن کے افسران کے دائرہ اختیار میں ہو رہا ہے۔ انہوں نے دعویٰ کیا کہ سپریم کورٹ نے بھی اس عمل کو مناسب قرار دیا ہے۔

انہوں نے فارم-6 کے حوالے سے راہل گاندھی کے الزامات کو بھی مسترد کیا۔ انہوں نے کہا کہ فارم-6 میں کوئی ترمیم نہیں کی گئی ہے۔ اس کے ساتھ ایک اعلانیہ شامل کیا گیا ہے، جس میں ووٹروں سے یہ معلومات مانگی جاتی ہیں کہ سال 2002، 2003 یا 2004 میں ان کا نام ووٹر لسٹ میں کہاں درج تھا۔

مسٹر پاترا نے کہا کہ نوجوانوں کے نام ووٹر لسٹ میں شامل نہ کیے جانے کا الزام بھی گمراہ کن ہے۔ انہوں نے دعویٰ کیا کہ 18 سے 28 سال کی عمر کے 2.37 کروڑ نوجوانوں کے نام اب تک ووٹر لسٹ میں شامل کیے جا چکے ہیں۔ انہوں نے اپوزیشن پر طنز کرتے ہوئے کہا کہ انہیں کام چوری کی عادت ہے، اسی لیے وہ ووٹ چوری کا نعرہ لگا رہے ہیں۔

یو این آئی ایم جے

نئی دہلی، وزارت دفاع نے ہندوستانی بحریہ کے لیے اگلی نسل کے آٹھ کارویٹ جنگی جہاز تیار کرنے کے سلسلے میں گارڈن ریچ شپ بلڈرز اینڈ انجینئرز لمیٹڈ (جی آر ایس ای) اور گوا شپ یارڈ لمیٹڈ (جی ایس ایل) کے ساتھ 53,866.50 کروڑ روپے کے معاہدے کیے ہیں۔

وزارت دفاع نے پیر کے روز یہاں بتایا کہ ان معاہدوں پر کرتویہ بھون-2 میں دفاعی سکریٹری راجیش کمار سنگھ کی موجودگی میں دستخط کیے گئے۔

وزیر دفاع راجناتھ سنگھ نے اسے ملک کے مقامی جہاز سازی کے شعبے کے لیے بڑی خوشخبری قرار دیتے ہوئے کہا کہ یہ دفاعی شعبے میں خود انحصاری کی سمت ایک اہم قدم ہے۔

معاہدے کے تحت جی آر ایس ای پانچ جنگی جہاز تیار کرے گا، جبکہ جی ایس ایل کو تین جنگی جہاز بنانے کی ذمہ داری سونپی گئی ہے۔ اس منصوبے کی خاص بات یہ ہے کہ پہلی مرتبہ ہندوستانی بحریہ خود ان جنگی جہازوں کا ڈیزائن تیار کرے گی، جبکہ مسابقتی عمل کے ذریعے منتخب کیے گئے دفاعی سرکاری شعبے کے ادارے ان کی تعمیر کریں گے۔

ان نئے جنگی جہازوں میں جدید میزائلوں، ہتھیاروں اور سینسر نظام سمیت جدید ترین صلاحیتیں موجود ہوں گی۔ ان کی مدد سے بحریہ فضا، سمندر کی سطح اور زیر سمندر علاقوں میں کارروائیاں انجام دے سکے گی۔ ان جنگی جہازوں کی شمولیت سے سمندری تجارتی راستوں کی حفاظت، دشمن کے جہازوں اور آبدوزوں کے خلاف کارروائی، ساحلی تحفظ، ساحلی سمندری آپریشنز اور سمندری نگرانی کی صلاحیت مزید مضبوط ہوگی۔

معاہدوں پر دستخط کے بعد مسٹر سنگھ نے سوشل میڈیا پر ایک پوسٹ میں کہا، ”ہندوستان کے مقامی جہاز سازی کے شعبے کے لیے یہ بہت اچھی خبر ہے۔ ہندوستانی بحریہ کے اگلی نسل کے کارویٹ منصوبے سے ملک کے جہاز سازی کے شعبے کو اہم فروغ ملے گا۔ اس سے دفاعی سرکاری اداروں، نجی شپ یارڈز اور ہندوستانی صنعتی شراکت داروں، جن میں چھوٹی، بہت چھوٹی اور درمیانے درجے کی صنعتیں بھی شامل ہیں، کے درمیان تعاون مضبوط ہوگا۔”

انہوں نے کہا کہ ان جہازوں کی تعمیر سے آئندہ دس برسوں کے دوران شپ یارڈز میں تقریباً 72 لاکھ افرادی دن کے روزگار کے مواقع پیدا ہوں گے، جبکہ معاون صنعتوں اور چھوٹی، بہت چھوٹی اور درمیانہ درجے کی صنعتوں میں 460 لاکھ افرادی یوم کا روزگار پیدا ہوگا۔

راجناتھ سنگھ نے کہا کہ ہندوستان میں تیار کردہ سامان اور آلات، مقامی ٹیکنالوجی اور ہندوستانی ہنرمندی و مہارت کے استعمال کو فروغ دے کر یہ منصوبہ دفاعی مینوفیکچرنگ میں خود انحصاری حاصل کرنے کی سمت ایک بڑا قدم ثابت ہوگا۔ ساتھ ہی اس سے وزیر اعظم نریندر مودی کے ‘میک اِن انڈیا’ کے عزم کو مزید تقویت ملے گی۔

وزارت دفاع کے مطابق اس منصوبے سے ملک کی مقامی جہاز سازی کی صنعت کو بھی فروغ حاصل ہوگا۔ اس کے تحت دفاعی سرکاری اداروں، نجی شپ یارڈز اور ہندوستانی صنعتی شراکت داروں، بشمول چھوٹی، بہت چھوٹی اور درمیانہ درجے کی صنعتوں کے درمیان تعاون میں اضافہ ہوگا۔

منصوبے میں ہندوستان میں تیار کردہ اشیا اور آلات، مقامی ٹیکنالوجی اور ہندوستانی ہنرمندی و مہارت کے استعمال کو فروغ دیا جائے گا۔ وزارت دفاع کے مطابق یہ منصوبہ دفاعی پیداوار میں خود انحصاری کی سمت ایک اہم قدم ہے اور وزیر اعظم نریندر مودی کی قیادت والی حکومت کے ‘میک اِن انڈیا’ کے عزم کو مزید مضبوط بنائے گا۔

یواین آئی۔ ایف اے

نئی دہلی، کانگریس صدر اور راجیہ سبھا میں قائد حزب اختلاف ملکارجن کھرگے نے پیر کے روز اتراکھنڈ کی بی جے پی حکومت پر سخت حملہ کرتے ہوئے الزام لگایا کہ اقتدار میں دس سال گزارنے کے باوجود اس نے ریاست کے عوام کی امیدوں اور امنگوں کو دھوکہ دیا ہے۔ انہوں نے ریاست میں امن و قانون کی صورت حال خراب ہونے، خواتین کے تحفظ سے متعلق بڑھتی تشویش اور جواب دہی یقینی بنانے میں مسلسل ناکامی کا بھی الزام عائد کیا۔

سوشل میڈیا پلیٹ فارم ‘ایکس’ پر جاری ایک بیان میں کھرگے نے کہا کہ پہاڑی ریاست کے عوام بی جے پی کی ‘ڈبل انجن’ حکومت سے تیزی سے مایوس ہو رہے ہیں اور اب وہ حکومت سے جواب اور حکمرانی میں تبدیلی کا مطالبہ کر رہے ہیں۔

انہوں نے کہا، ”اتراکھنڈ میں بی جے پی کی ڈبل انجن حکومت کے دس سال ریاست کے عوام کی امیدوں اور امنگوں سے دھوکہ کرنے کے سوا کچھ ثابت نہیں ہوئے ہیں۔” انہوں نے الزام لگایا کہ امن و قانون کی صورت حال کی خرابی، خواتین کے تحفظ پر سنگین سوالات، اقتدار میں بیٹھے لوگوں کا تکبر اور جواب دہی سے مسلسل گریز نے حکومت پر عوام کے اعتماد کو کمزور کردیا ہے۔

کھرگے نے کہا کہ کانگریس اتراکھنڈ کے عوام کے حقوق اور مفادات کی آواز بلند کرنے کے لیے پوری طرح پرعزم ہے اور ریاستی حکومت کے خلاف سڑکوں سے لے کر اسمبلی تک اپنی جدوجہد جاری رکھے گی۔ انہوں نے کہا کہ پارٹی عام شہریوں کو درپیش مسائل اٹھاتی رہے گی اور اقتدار میں بیٹھے لوگوں کو جواب دہ بنائے گی۔

انہوں نے کہا، ”اتراکھنڈ کے عوام اب جواب چاہتے ہیں اور تبدیلی کے خواہاں ہیں۔” اس کے ساتھ ہی انہوں نے عوام کا اعتماد دوبارہ حاصل کرنے اور اچھی حکمرانی و عوامی فلاح و بہبود پر مبنی متبادل فراہم کرنے کے کانگریس کے عزم کا اظہار کیا۔

کھرگے نے کہا، ”ہمارا عزم عوام کا اعتماد جیتنا اور دیو بھومی اتراکھنڈ کو ایک محفوظ، حساس اور جواب دہ حکومت دینا ہے، جو ہر چیز سے بڑھ کر عوامی مفاد کو ترجیح دے۔”

کانگریس صدر کا یہ حملہ ایسے وقت میں سامنے آیا ہے جب پارٹی 2027 کے اتراکھنڈ اسمبلی انتخابات کی تیاریوں میں تیزی لا رہی ہے اور 2022 میں دوبارہ اقتدار میں آنے والی بی جے پی کو حکومت سے بے دخل کرنے کی کوشش کر رہی ہے۔ ریاست میں اپنی تنظیمی موجودگی مضبوط بنانے میں مصروف کانگریس، حکمراں جماعت کے خلاف عوامی شکایات کو ایک وسیع سیاسی چیلنج میں تبدیل کرنے کی کوشش کر رہی ہے۔

کھرگے کے بیان سے ان مسائل کا بھی اشارہ ملتا ہے جو کانگریس کی انتخابی مہم میں اہمیت اختیار کرسکتے ہیں۔ ان میں امن و قانون، خواتین کا تحفظ، جواب دہی اور حکمرانی میں مبینہ تکبر جیسے معاملات شامل ہیں، جنہیں پارٹی ریاست میں بی جے پی کی مسلسل حکمرانی کو چیلنج کرنے کے لیے نمایاں طور پر اٹھا سکتی ہے۔

یواین آئی۔ ایف اے