واشنگٹن، امریکی صدر ڈونلڈ ٹرمپ نے فی الحال ایران کے خلاف نئے حملے کرنے یا تہران کے سخت مؤقف کے باوجود کسی معاہدے تک پہنچنے کے بجائے ایرانی معیشت پر دباؤ بڑھانے کی حکمت عملی اختیار کرنے کا فیصلہ کیا ہے۔ویب سائٹ ‘ایکسیس’ کی رپورٹ کے مطابق پیرس میں پیر کو جی 7 ممالک کے وزرائے خارجہ کے اجلاس کے دوران امریکی وزیر خارجہ مارکو روبیو نے بند کمرہ اجلاس میں بتایا کہ ٹرمپ نے ایران کے حوالے سے جنگ دوبارہ شروع کرنے اور معاہدے تک پہنچنے کے دو امکانات پر غور کیا، تاہم انہوں نے تیسرا راستہ اختیار کیا ہے، جس کا مقصد ایرانی حکومت کا معاشی طور پر گلا گھونٹنا ہے۔

رپورٹ کے مطابق روبیو نے کہا کہ امریکہ کسی نامناسب معاہدے پر دستخط نہیں کرے گا اور موجودہ معاشی دباؤ کی پالیسی جاری رکھے گا۔ ان کا کہنا تھا کہ اس حکمت عملی سے تہران کے لیے دہشت گرد تنظیموں کی مالی معاونت اور اپنی عسکری صلاحیتوں کی دوبارہ تعمیر مشکل ہو جائے گی۔ انہوں نے واضح کیا کہ اس پالیسی کے لیے کوئی حتمی مدت مقرر نہیں کی گئی ہے اور ٹرمپ کسی مصنوعی وقت کے دباؤ میں نہیں ہیں۔

اس حکمت عملی کی حمایت کرنے والی قومی سلامتی ٹیم میں وزیر خزانہ سکوٹ بیسنٹ، سی آئی اے کے ڈائریکٹر جان ریٹکلف اور ٹرمپ کے مشیر و داماد جیرڈ کشنر بھی شامل ہیں۔ رپورٹ کے مطابق اس ٹیم نے جنگ دوبارہ شروع کرنے کی مخالفت کرتے ہوئے موجودہ دباؤ جاری رکھنے پر زور دیا ہے، تاکہ ایران کو امریکی مفادات کے مطابق معاہدے پر آمادہ کیا جا سکے۔

ٹرمپ نے پیر کو قطری وزیراعظم شیخ محمد بن عبدالرحمٰن آل ثانی سے ملاقات کے بعد کہا تھا کہ ایران کے خلاف حملوں کا نیا دور ‘نہ ہونے کے برابر’ اور ‘غیر ضروری’ دکھائی دیتا ہے۔ انہوں نے ایران پر معاشی دباؤ اور بحری ناکہ بندی جاری رکھنے کی حمایت کی۔ اس حکمت عملی کے ساتھ ‘آئرن گیٹ’ نامی آپریشن بھی شامل ہے، جس کا مقصد ان زمینی راستوں کو بند کرنا ہے جن کے ذریعے تہران جدید ہتھیار اور دیگر ٹیکنالوجی منتقل کرتا ہے۔

دوسری جانب ایران کی سپریم نیشنل سکیورٹی کونسل کے سکریٹری محسن رضائی نے مذاکرات کے حوالے سے سخت مؤقف اختیار کرتے ہوئے اپنے ملک کے سات مطالبات پر قائم رہنے کا اعلان کیا ہے۔ ایرانی خبر رساں ایجنسی تسنیم کے مطابق انہوں نے کہا کہ تہران نے واشنگٹن سے ان شرائط پر واضح جواب طلب کیا تھا، لیکن اب تک کوئی جواب نہیں ملا۔ رضائی نے امریکہ اور ایران کے درمیان مذاکرات جاری ہونے یا قطر میں کسی اجلاس کی تیاری کی خبروں کی بھی تردید کی۔

ادھر قطری وزارت خارجہ نے پیر کو کہا تھا کہ امریکہ اور ایران کے درمیان اختلافات کم کرنے کی کوششیں جاری ہیں اور صورت حال مثبت سمت میں آگے بڑھ رہی ہے۔

یو این آئی۔ م س

واشنگٹن، امریکی نائب صدر جے ڈی وینس نے وزیر دفاع پیٹ ہیگسیتھ کا دفاع کرتے ہوئے انہیں عہدے سے ہٹانے کی کوششوں اور ان کے خلاف عائد الزامات کو مسترد کردیا ہے۔ انہوں نے کہا کہ ہیگسیتھ کے خلاف مواخذے کی کوششیں کسی ایسے جرم پر مبنی نہیں ہیں جو انہیں عہدے سے ہٹانے کا جواز فراہم کرے، بلکہ یہ پینٹاگان میں ان کے فیصلوں پر سیاسی اختلافات کا نتیجہ ہیں۔

وینس نے سوشل میڈیا پلیٹ فارم ایکس پر ایک سوال کے جواب میں کہا کہ ہیگسیتھ کے خلاف قابلِ مواخذہ جرم کا معاملہ بے بنیاد ہے اور اس کا جواب واضح طور پر نفی میں ہے۔ انہوں نے وزیر دفاع کو ہٹانے کی کوششوں کو ”سیاسی ڈرامہ” قرار دیتے ہوئے کہا کہ اس کا مقصد کانگریس کی اصل قانون سازی کی ذمہ داری سے توجہ ہٹانا ہے۔

انہوں نے کہا کہ کانگریس کے ارکان کے پاس حکومتی پالیسیوں سے اختلاف ظاہر کرنے کے کئی طریقے موجود ہیں، لیکن ان طریقوں کو اختیار کرنے کے بجائے ہیگسیتھ کو عہدے سے ہٹانے کی کوشش کی جارہی ہے۔ ان کے مطابق قانون سازی مشکل کام ہے، جبکہ کسی عہدیدار کو ہٹانے کی کارروائی آسان ضرور ہے، لیکن اس کا کوئی نتیجہ نہیں نکلتا۔ انہوں نے کہا کہ قانون سازوں نے صدر ڈونلڈ ٹرمپ کے ساتھ بھی ایسا ہی رویہ اختیار کیا تھا۔

وینس نے یورپ اور یوکرین سے امریکی فوجیوں کی واپسی کے منصوبوں میں تبدیلی اور اعلیٰ فوجی افسران کی ازسرنو تنظیم سے متعلق ہیگسیتھ کے فیصلوں کا بھی دفاع کیا۔ انہوں نے کہا کہ ان فیصلوں پر قانون سازوں کی ناراضی دراصل پینٹاگان کے اندر تبدیلیوں اور فوجی بیوروکریسی کو چیلنج کرنے کی کوششوں سے متعلق ہے۔

نائب صدر نے اشارہ دیا کہ ہیگسیتھ کو ہٹانے کی کوششوں کی بنیادی وجہ ایران کے ساتھ جنگ سے زیادہ پینٹاگان کے موجودہ انتظامی ڈھانچے میں تبدیلیاں لانے کا ان کا ارادہ ہے۔

وینس کے یہ بیانات ریپبلکن رکن کانگریس تھامس میسی کی جانب سے ہیگسیتھ کے خلاف مواخذے کی کارروائی کے لیے دستاویزات پیش کیے جانے کے بعد سامنے آئے ہیں۔ میسی نے ایران کے ساتھ جنگ کے انتظام اور امریکی فوجی کارروائیوں سے متعلق معاملات کو اپنی تحریک کی بنیاد بنایا ہے۔

دوسری جانب ہیگسیتھ نے بھی اپنے خلاف کارروائی کی کوششوں کو ”سیاسی شعبدہ بازی” قرار دیتے ہوئے مسترد کردیا ہے۔ ان کا کہنا ہے کہ اس کا مقصد ان فوجی کارروائیوں کی قیادت کرنے والے امریکی عسکری حکام کو نشانہ بنانا ہے، جنہیں وہ قانونی قرار دیتے ہیں۔ صدر ٹرمپ نے بھی وزیر دفاع کی حمایت کرتے ہوئے ان کی کارکردگی کا دفاع کیا ہے۔

یو این آئی۔ م س

ماسکو، یونیسیف کے ترجمان جیمز ایلڈر نے کہا ہے کہ سوڈان میں اس سال 8 لاکھ 25 ہزار بچے غذائی قلت کی جان لیوا صورتحال سے دوچار ہوں گے، جبکہ ڈرون حملوں میں اضافے سے ان بچوں کو مزید خطرات لاحق ہو رہے ہیں۔

جیمز ایلڈر نے منگل کے روز جنیوا میں ایک پریس کانفرنس کے دوران کہا، ”یہ سب ایسے وقت میں ہو رہا ہے جب اندازہ ہے کہ سوڈان میں 5 سال سے کم عمر کے 8 لاکھ 25 ہزار بچے اس سال شدید اور خطرناک غذائی قلت کا شکار ہوں گے، جو جان لیوا ثابت ہوتی ہے۔”

انہوں نے مزید کہا کہ ایل نینو کے بڑھتے ہوئے اثرات سے صورتحال مزید خراب ہو رہی ہے، کیونکہ اس کے نتیجے میں سوڈان میں خشک سالی پیدا ہوگی۔

یو این آئی۔ ایم جے