واشنگٹن، امریکی صدر ڈونلڈ ٹرمپ نے فی الحال ایران کے خلاف نئے حملے کرنے یا تہران کے سخت مؤقف کے باوجود کسی معاہدے تک پہنچنے کے بجائے ایرانی معیشت پر دباؤ بڑھانے کی حکمت عملی اختیار کرنے کا فیصلہ کیا ہے۔ویب سائٹ ‘ایکسیس’ کی رپورٹ کے مطابق پیرس میں پیر کو جی 7 ممالک کے وزرائے خارجہ کے اجلاس کے دوران امریکی وزیر خارجہ مارکو روبیو نے بند کمرہ اجلاس میں بتایا کہ ٹرمپ نے ایران کے حوالے سے جنگ دوبارہ شروع کرنے اور معاہدے تک پہنچنے کے دو امکانات پر غور کیا، تاہم انہوں نے تیسرا راستہ اختیار کیا ہے، جس کا مقصد ایرانی حکومت کا معاشی طور پر گلا گھونٹنا ہے۔

رپورٹ کے مطابق روبیو نے کہا کہ امریکہ کسی نامناسب معاہدے پر دستخط نہیں کرے گا اور موجودہ معاشی دباؤ کی پالیسی جاری رکھے گا۔ ان کا کہنا تھا کہ اس حکمت عملی سے تہران کے لیے دہشت گرد تنظیموں کی مالی معاونت اور اپنی عسکری صلاحیتوں کی دوبارہ تعمیر مشکل ہو جائے گی۔ انہوں نے واضح کیا کہ اس پالیسی کے لیے کوئی حتمی مدت مقرر نہیں کی گئی ہے اور ٹرمپ کسی مصنوعی وقت کے دباؤ میں نہیں ہیں۔

اس حکمت عملی کی حمایت کرنے والی قومی سلامتی ٹیم میں وزیر خزانہ سکوٹ بیسنٹ، سی آئی اے کے ڈائریکٹر جان ریٹکلف اور ٹرمپ کے مشیر و داماد جیرڈ کشنر بھی شامل ہیں۔ رپورٹ کے مطابق اس ٹیم نے جنگ دوبارہ شروع کرنے کی مخالفت کرتے ہوئے موجودہ دباؤ جاری رکھنے پر زور دیا ہے، تاکہ ایران کو امریکی مفادات کے مطابق معاہدے پر آمادہ کیا جا سکے۔

ٹرمپ نے پیر کو قطری وزیراعظم شیخ محمد بن عبدالرحمٰن آل ثانی سے ملاقات کے بعد کہا تھا کہ ایران کے خلاف حملوں کا نیا دور ‘نہ ہونے کے برابر’ اور ‘غیر ضروری’ دکھائی دیتا ہے۔ انہوں نے ایران پر معاشی دباؤ اور بحری ناکہ بندی جاری رکھنے کی حمایت کی۔ اس حکمت عملی کے ساتھ ‘آئرن گیٹ’ نامی آپریشن بھی شامل ہے، جس کا مقصد ان زمینی راستوں کو بند کرنا ہے جن کے ذریعے تہران جدید ہتھیار اور دیگر ٹیکنالوجی منتقل کرتا ہے۔

دوسری جانب ایران کی سپریم نیشنل سکیورٹی کونسل کے سکریٹری محسن رضائی نے مذاکرات کے حوالے سے سخت مؤقف اختیار کرتے ہوئے اپنے ملک کے سات مطالبات پر قائم رہنے کا اعلان کیا ہے۔ ایرانی خبر رساں ایجنسی تسنیم کے مطابق انہوں نے کہا کہ تہران نے واشنگٹن سے ان شرائط پر واضح جواب طلب کیا تھا، لیکن اب تک کوئی جواب نہیں ملا۔ رضائی نے امریکہ اور ایران کے درمیان مذاکرات جاری ہونے یا قطر میں کسی اجلاس کی تیاری کی خبروں کی بھی تردید کی۔

ادھر قطری وزارت خارجہ نے پیر کو کہا تھا کہ امریکہ اور ایران کے درمیان اختلافات کم کرنے کی کوششیں جاری ہیں اور صورت حال مثبت سمت میں آگے بڑھ رہی ہے۔

یو این آئی۔ م س

تہران، ایران کی سپریم نیشنل سکیورٹی کونسل کے سیکرٹری محسن رضائی نے کہا ہے کہ فی الحال ایران اور امریکہ کے درمیان کوئی مذاکرات نہیں ہو رہے ہیں۔ انہوں نے یہ بات ایران کے حامی نشریاتی ادارے ‘المیادین’ کو دیے گئے ایک انٹرویو میں کہی۔

رضائی نے کہا کہ ایران پہلے ہی امریکہ کے سامنے سات شرائط پیش کرچکا ہے اور واشنگٹن سے ان پر واضح اور مثبت جواب دینے کا مطالبہ کررہا ہے۔ یہ شرائط جون میں پاکستان کی ثالثی سے ممکنہ ابتدائی معاہدے کے لیے پیش کی گئی تھیں، جن میں آبنائے ہرمز کو دوبارہ کھولنے اور مذاکراتی عمل کو حتمی معاہدے کی جانب آگے بڑھانے کی تجاویز شامل تھیں۔

انہوں نے کہا کہ تہران فی الحال امریکی جواب کا انتظار کررہا ہے اور امید ہے کہ واشنگٹن مستقبل میں ان شرائط پر اپنا ردعمل ظاہر کرے گا۔

دوسری جانب قطر کے ایک اعلیٰ عہدیدار سے پیر کو ملاقات کے بعد امریکی صدر ڈونلڈ ٹرمپ نے ایران کے خلاف فوری فوجی کارروائی کے امکان کو کم ظاہر کیا ہے۔ قطر دونوں ممالک کے درمیان ثالثی کا کردار ادا کررہا ہے، تاہم ٹرمپ نے ایران کی جانب سے پیش کردہ جنگ بندی منصوبے کو قبول کرنے کا کوئی اشارہ نہیں دیا ہے۔

یو این آئی۔ م س

ماسکو، یونیسیف کے ترجمان جیمز ایلڈر نے کہا ہے کہ سوڈان میں اس سال 8 لاکھ 25 ہزار بچے غذائی قلت کی جان لیوا صورتحال سے دوچار ہوں گے، جبکہ ڈرون حملوں میں اضافے سے ان بچوں کو مزید خطرات لاحق ہو رہے ہیں۔

جیمز ایلڈر نے منگل کے روز جنیوا میں ایک پریس کانفرنس کے دوران کہا، ”یہ سب ایسے وقت میں ہو رہا ہے جب اندازہ ہے کہ سوڈان میں 5 سال سے کم عمر کے 8 لاکھ 25 ہزار بچے اس سال شدید اور خطرناک غذائی قلت کا شکار ہوں گے، جو جان لیوا ثابت ہوتی ہے۔”

انہوں نے مزید کہا کہ ایل نینو کے بڑھتے ہوئے اثرات سے صورتحال مزید خراب ہو رہی ہے، کیونکہ اس کے نتیجے میں سوڈان میں خشک سالی پیدا ہوگی۔

یو این آئی۔ ایم جے