انطالیہ، ترکی کے صدر رجب طیب اردوغان نے بدھ کو کہا کہ غزہ صرف جنگ کی تباہ کاریوں ہی نہیں بلکہ ایک سنگین ماحولیاتی بحران سے بھی دوچار ہے، جہاں صدیوں پرانے زیتون کے درخت تباہ کردیے گئے، آبی ذرائع آلودہ ہوگئے اور پورے کے پورے شہر ملبے کے ڈھیر میں تبدیل ہوچکے ہیں۔

انہوں نے انطالیہ میں اقوام متحدہ کے فریم ورک کنونشن برائے موسمیاتی تبدیلی کے تحت فریقین کی 31 ویں کانفرنس (کوپ 31) کے سربراہی اجلاس کی افتتاحی نشست سے خطاب کرتے ہوئے کہا کہ غزہ میں ماحولیاتی تباہی نے انسانی بحران کو مزید سنگین بنا دیا ہے۔

اردوغان نے کہا، ”جیسا کہ میں نے اقوام متحدہ کی جنرل اسمبلی سے اپنے خطاب میں بھی واضح کیا تھا، غزہ میں جو کچھ ہورہا ہے وہ صرف نسل کشی نہیں بلکہ ایک ماحولیاتی تباہی بھی ہے۔ صدیوں پرانے زیتون کے درخت کاٹ دیے گئے، زمین آلودہ کردی گئی، پانی زہریلا ہوگیا اور شہر ملبے کے بڑے ڈھیروں میں تبدیل ہوچکے ہیں۔”

غزہ میں بگڑتی انسانی صورت حال پر تشویش ظاہر کرتے ہوئے انہوں نے کہا کہ حالیہ شدید بارشوں اور سیلاب کے باعث ہزاروں خیمے اور عارضی پناہ گاہیں زیر آب آگئیں، جس سے بے گھر فلسطینیوں کی بڑی تعداد سخت سردی کے موسم میں بے یار و مددگار ہوگئی ہے۔

انہوں نے کہا کہ لاکھوں فلسطینی، خصوصاً بچے، مناسب رہائش، تحفظ اور بنیادی سہولتوں کے بغیر زندگی بچانے کی جدوجہد کررہے ہیں۔

اردوغان نے فوری طور پر غزہ میں انسانی امداد پہنچانے کی اجازت دینے کا مطالبہ کرتے ہوئے کہا، ”انسانی امداد کو فوری طور پر اس خطے میں داخل ہونے دیا جانا چاہیے۔ تنہائی کی یہ پالیسی ختم ہونی چاہیے۔ اس ظلم اور جبر کا خاتمہ ہونا چاہیے۔” انہوں نے عالمی برادری سے فوری اقدامات کی اپیل بھی کی۔

ترکی کے صدر نے کہا کہ عالمی برادری غزہ میں شہریوں کی تکالیف کے حوالے سے اپنی ذمہ داری سے بچ نہیں سکتی۔

موسمیاتی بحران کا ذکر کرتے ہوئے اردوغان نے خبردار کیا کہ انسانیت کو ماحولیاتی چیلنج کا سامنا ہے، جس کی ایک بڑی وجہ ضرورت سے زیادہ کھپت اور قدرتی وسائل کا غیر پائیدار استعمال ہے۔

انہوں نے کہا، ”انسانیت کے پاس سر پر چھت کے طور پر صرف ایک آسمان ہے اور ہمارے پاس صرف ایک باغ ہے، یعنی زمین۔ ہمارے پاس کوئی دوسرا آسمان، دوسری زمین، دوسرا سمندر، دوسرا بحر یا دوسرا جنگل نہیں ہے۔”

انہوں نے عالمی حدت، حیاتیاتی تنوع میں کمی، ماحولیاتی انحطاط، غذائی عدم تحفظ اور شدید موسمی واقعات سے پیدا ہونے والے خطرات کو اجاگر کرتے ہوئے کہا کہ کوئی بھی ملک موسمیاتی تبدیلی کے اثرات سے محفوظ نہیں ہے۔

اردوغان نے کہا کہ 31 سال قبل پہلی کوپ کانفرنس کے انعقاد کے بعد سے اگرچہ نمایاں پیش رفت ہوئی ہے، لیکن موسمیاتی وعدوں پر عمل درآمد اب بھی ایک بڑا چیلنج ہے۔

انہوں نے کہا، ”پیرس معاہدے میں طے شدہ اہداف کو پورا کرنے میں ناکامی کا ہر گزرتا منٹ ہمارے سامنے موجود خطرات اور اخراجات میں اضافہ کرتا ہے۔” انہوں نے امید ظاہر کی کہ ترکی کوپ 31 کو مستقبل کی موسمیاتی کانفرنسوں کے لیے ایک عملی نمونہ بنانے میں کامیاب ہوگا۔

اردوغان نے کانفرنس کے انعقاد میں تعاون اور حمایت کے لیے اقوام متحدہ کے سکریٹری جنرل انتونیو گوتریس، آسٹریلیا کے وزیراعظم انتھونی البانیز اور برازیل و آذربائیجان کا شکریہ ادا کیا۔

ترکی کے موسمیاتی عہد کا ذکر کرتے ہوئے انہوں نے کہا کہ ملک 2053 تک خالص صفر اخراج کا ہدف حاصل کرنے کے لیے اپنی ”سبز ترقی” کی حکمت عملی پر عمل پیرا ہے۔

انہوں نے بتایا کہ توانائی، صنعت، ٹرانسپورٹ اور زراعت کے شعبوں کو کاربن اخراج سے پاک کرنے اور ماحول دوست ٹیکنالوجی کے ذریعے تبدیل کرنے کی کوششیں جاری ہیں۔ ان کے مطابق، 2017 میں ”زیرو ویسٹ” مہم کے آغاز کے وقت ترکی میں قومی ری سائیکلنگ کی شرح تقریباً 13 فیصد تھی، جس کے 2025 کے آخر تک بڑھ کر تقریباً 40 فیصد ہونے کی توقع ہے۔

اردوغان نے ترقی پذیر ممالک، بالخصوص کم ترقی یافتہ ملکوں اور چھوٹے جزیرہ نما ملکوں کے لیے موسمیاتی مالی معاونت اور ٹیکنالوجی کی فراہمی میں اضافے پر بھی زور دیا۔ انہوں نے کہا کہ ترقی یافتہ ممالک، جنہوں نے تاریخی طور پر عالمی کاربن بجٹ کا بڑا حصہ استعمال کیا ہے، انہیں اخراج میں کمی اور موسمیاتی مالی معاونت کے سلسلے میں زیادہ ذمہ داری اٹھانی چاہیے۔

ترکی نے کوپ 31 کے لیے 10 ترجیحی شعبوں کی نشاندہی کی ہے، جن میں صاف توانائی کی جانب منتقلی، زیرو ویسٹ، غذائی تحفظ، صنعتی ترقی، موسمیاتی تبدیلیوں کے مقابلے کی صلاحیت رکھنے والے شہر اور سمندروں کا تحفظ شامل ہیں۔

اردوغان نے کہا، ”ہمیں اس سے پہلے کہ ہمارا سیارہ ناقابلِ رہائش بن جائے، آنے والی نسلوں کے لیے ایک صاف ستھری، سرسبز اور زیادہ منصفانہ دنیا چھوڑنی ہوگی۔”

یواین آئی ، م ع

واشنگٹن، امریکہ کے صدر ڈونلڈ ٹرمپ کی جانب سے ارلنگٹن قومی قبرستان کے قریب تجویز کردہ 250 فٹ اونچی فتح کی یادگار کے خلاف کینیڈی خاندان کے نو افراد قانونی جنگ میں شامل ہو گئے ہیں۔

خاندان کا کہنا ہے کہ اس یادگار کی تعمیر سے ان کے اہل خانہ کی قبروں اور قومی یادگاروں کے تاریخی مناظر متاثر ہوں گے۔خاندان کے ارکان نے منگل کو واشنگٹن ڈی سی کی ایک عدالت میں عرضی دائر کر کے اس منصوبے کو چیلنج کرنے والے موجودہ مقدمے میں شامل ہونے کا مطالبہ کیا۔ ان کا کہنا ہے کہ مجوزہ یادگار سے صدر جان ایف کینیڈی، سینیٹر رابرٹ ایف کینیڈی اور سینیٹر ایڈورڈ ایم کینیڈی کی قبروں کے ساتھ ساتھ ‘ایٹرنل فلیم’ یادگار کا منظر بھی متاثر ہوگا۔خاندان نے دلیل دی کہ یہ وسیع ڈھانچہ امریکی فوجیوں کی قبروں، جن میں کینیڈی خاندان کے افراد کی قبریں بھی شامل ہیں، پر مستقل طور پر سایہ ڈالے گا اور قبرستان کی تاریخی نوعیت کو متاثر کرے گا۔

خاندان کے ارکان نے پیر کو ڈسٹرکٹ آف کولمبیا کی امریکی ضلعی عدالت میں دائر عرضی میں درخواست کی کہ عدالت ٹرمپ انتظامیہ کو کانگریس کی منظوری، کانگریس کی جانب سے کسی اسپانسر کی نامزدگی اور تمام قانونی تقاضوں کی تعمیل کیے بغیر یادگار کو منظوری دینے، مجاز کرنے یا اس کی تعمیر سے روکے۔عرضی میں کہا گیا ہے، “صدر ڈونلڈ ٹرمپ غیر قانونی طور پر ایک وسیع یادگاری دروازہ بنانے کی کوشش کر رہے ہیں، جو ارلنگٹن قومی قبرستان میں کینیڈی خاندان کے اعزاز میں تعمیر کی گئی یادگاروں اور ان کی قبروں کے تاریخی مناظر پر مستقل طور پر سایہ ڈالے گا اور انہیں نقصان پہنچائے گا۔ اس سے ملک کے لیے جان قربان کرنے والے لاکھوں امریکی ہیروز کی یادگاروں کے مناظر بھی متاثر ہوں گے۔”مجوزہ یادگار کو لنکن میموریل سے دوگنے سے بھی زیادہ اونچا اور 25 منزلہ دفتری عمارت کے برابر قرار دیتے ہوئے خاندان نے کہا کہ میموریل سرکل میں اس کی تعمیر لنکن میموریل اور ارلنگٹن قومی قبرستان کو جوڑنے والی تاریخی بصری لکیر میں رکاوٹ بنے گی۔

امریکی میڈیا کی رپورٹس کے مطابق، روری کینیڈی اور میکسویل کینیڈی نے ایک بیان میں کہا کہ مجوزہ ڈھانچہ ان کے والدین اور چچاؤں کی قبروں کے ساتھ ساتھ ملک کے لیے قربانی دینے والے ہزاروں امریکی فوجیوں کی قبروں پر سایہ ڈالے گا۔ انہوں نے یہ بھی کہا کہ اس منصوبے سے جمہوری اصولوں اور تاریخی اہمیت کے حامل مقامات کے تحفظ سے متعلق قانونی دفعات پر سوالات کھڑے ہوتے ہیں۔

مقدمے میں شامل کینیڈی خاندان کے نو ارکان میں رابرٹ ایف کینیڈی اور ایڈورڈ ایم کینیڈی کے بچے اور پوتے پوتیاں شامل ہیں۔ انہوں نے واشنگٹن ڈی سی اور ریاست ورجینیا کی جانب سے ٹرمپ انتظامیہ کے خلاف دائر مقدمے میں فریق بننے کی درخواست کی ہے۔ ویتنام جنگ کے کئی سابق فوجیوں، تاریخی ورثے کے تحفظ سے وابستہ افراد اور ارلنگٹن کاؤنٹی نے بھی اس منصوبے کو چیلنج کیا ہے۔کینیڈی خاندان کا کہنا ہے کہ اپنے اہل خانہ کی قبروں کے تحفظ میں ان کا قانونی مفاد وابستہ ہے۔

خاندان نے دلیل دی کہ عدالتیں پہلے بھی اہل خانہ کو اپنے پیاروں کی قبروں کے تحفظ کا حق دے چکی ہیں۔

خاندان کے وکیلوں نے کہا کہ مجوزہ یادگار ارلنگٹن قومی قبرستان کے کام کاج اور تاریخی نوعیت میں غیر قانونی مداخلت ہے۔ ان کا استدلال ہے کہ اس سطح کی مداخلت کی منظوری دینے کا آئینی حق صرف امریکی کانگریس کے پاس ہے۔یہ قانونی چیلنج ایک ایسے وقت میں سامنے آیا ہے، جب گزشتہ ہفتے ایک وفاقی جج نے مجوزہ یادگار کی تعمیر پر عارضی طور پر 14 دنوں کے لیے روک لگا دی تھی۔ یہ روک منصوبے کے حق میں حتمی منظوری کے لیے ہونے والی ووٹنگ کے بعد لگائی گئی۔ اس سے قبل طویل عوامی سماعت کے دوران شہریوں نے اس منصوبے کی مخالفت کی تھی۔مجوزہ یادگار پوٹومیک ندی کے اس پار ایک ٹریفک چوراہے پر تعمیر کی جانی ہے، جو لنکن میموریل کے سامنے واقع ہے۔ ٹرمپ انتظامیہ کا کہنا ہے کہ اس کا مقصد امریکہ کی آزادی کی 250ویں سالگرہ کی یاد منانا ہے۔ انتظامیہ نے نومبر سے ہی تعمیراتی کام شروع کرنے کا منصوبہ بنایا تھا۔

یو این آئی ۔ م ع

ابوظہبی، روس، یوکرین اور امریکہ کے حکام کے درمیان امن مذاکرات کا دوسرا دن بدھ کو ابوظہبی میں دوبارہ شروع ہوا۔ فروری 2022 میں شروع ہونے والی جنگ کے خاتمے کی راہ تلاش کرنے کی کوششوں کے درمیان کیف نے واشنگٹن کے بدلے ہوئے موقف کا خیرمقدم کیا ہے، تاہم علاقائی تنازعات، سلامتی ضمانتوں اور جنگ بندی کی شرائط پر دونوں فریقوں کے درمیان بڑے اختلافات برقرار ہیں۔

کیف اور واشنگٹن نے مذاکرات کے پہلے دن کی بات چیت کو ‘تعمیری’ قرار دیا، تاہم فوری طور پر کسی بڑی پیش رفت کے آثار نظر نہیں آئے۔ فروری کے بعد روس اور یوکرین کے درمیان یہ پہلی براہ راست بات چیت ہے۔

پہلے دن کے مذاکرات کے بعد نہ تو روسی اور نہ ہی یوکرینی مذاکرات کاروں نے تفصیلات فراہم کیں۔ ماسکو اور کیف ممکنہ امن معاہدے کی اہم شرائط پر اب بھی ایک دوسرے سے کافی دور ہیں، جس سے تنازع کے خاتمے کے لیے کسی اتفاق رائے تک پہنچنے میں درپیش مشکلات کا اندازہ ہوتا ہے۔

واشنگٹن کی ثالثی میں ہونے والے سہ فریقی مذاکرات ایک دن کے وقفے کے بعد دوبارہ شروع ہوئے۔ اس سے قبل یوکرین اور امریکہ نے ابتدائی بات چیت کو تعمیری اور نتیجہ خیز قرار دیا تھا، اگرچہ کسی فوری پیش رفت کے آثار سامنے نہیں آئے تھے۔

یوکرین کے مذاکراتی وفد کے سربراہ رستم عمروف نے ٹیلی گرام پر ایک پیغام میں کہا، ”ہم مذاکرات کے دوسرے دن کا آغاز کر رہے ہیں۔” انہوں نے بتایا کہ پہلے امریکہ اور روس کی شرکت کے ساتھ سہ فریقی بات چیت ہوگی، جس کے بعد یورپی شراکت داروں کے ساتھ الگ ملاقات کی جائے گی۔

روسی سرکاری خبر رساں ایجنسی تاس اور دیگر روسی میڈیا اداروں نے بھی ذرائع کے حوالے سے مذاکرات دوبارہ شروع ہونے کی اطلاع دی۔ اطلاعات کے مطابق پہلے دن کی بات چیت تقریباً ساڑھے چار گھنٹے جاری رہی۔ توقع ہے کہ روسی وفد بدھ کو بعد میں میڈیا کے سامنے اپنا موقف پیش کرے گا۔

مذاکرات میں شرکت نہ کرنے والے یوکرین کے صدر وولودیمیر زیلنسکی نے ابتدائی بات چیت کو ‘تعمیری اور خاصی بامعنی’ قرار دیا۔ انہوں نے کہا کہ مذاکرات میں یوکرین کے لیے سلامتی ضمانتوں اور انہیں طویل مدت تک مؤثر بنانے کے انتظامات پر خاص طور پر تبادلہ خیال کیا گیا۔

زیلنسکی نے سوشل میڈیا پلیٹ فارم ایکس پر لکھا، ”جنگ کی دوبارہ شروعات کو روکنے کے لیے حقیقی اقدامات کی ضرورت ہے۔ کشیدگی میں کمی لانے کے اقدامات کی ضرورت پر بھی بات ہوئی۔” انہوں نے مزید کہا کہ انسانی ہمدردی کے امور، بالخصوص قیدیوں کی رہائی، بھی مذاکرات کا حصہ رہے۔

امریکی وزیر خارجہ مارکو روبیو نے مذاکرات کے پہلے دن کو ‘انتہائی نتیجہ خیز’ قرار دیا۔ امریکی صدر ڈونالڈ ٹرمپ کے خصوصی ایلچی اسٹیو وٹکوف اور ان کے داماد جیرڈ کشنر مذاکرات میں واشنگٹن کی نمائندگی کر رہے ہیں۔

کشنر نے ایکس پر اپنی پوسٹ میں کہا، ”آج ہونے والی تعمیری بات چیت سے ہماری حوصلہ افزائی ہوئی ہے۔” انہوں نے مزید کہا کہ امریکی مذاکراتی ٹیم انتظامیہ کی براہ راست رہنمائی میں کام کر رہی ہے۔

فروری میں ابوظہبی اور جنیوا میں ہونے والے مذاکرات کے بعد تینوں ممالک کے درمیان یہ پہلی سہ فریقی بات چیت ہے۔

یہ مذاکرات ماسکو اور کیف کے درمیان ممکنہ امن معاہدے کی شرائط پر گہرے اختلافات کے درمیان ہو رہے ہیں۔ روس اس وقت یوکرین کے تقریباً پانچویں حصے پر کنٹرول رکھتا ہے اور اس نے کیف سے غیر جانبدار حیثیت اختیار کرنے اور نیٹو میں شمولیت کی کوشش ترک کرنے کا مطالبہ کیا ہے۔ یوکرین کے لیے سلامتی ضمانتیں اور روسی افواج کے قبضے میں موجود علاقوں کا مستقبل معاہدے کی راہ میں بڑی رکاوٹوں میں شامل ہیں۔

علاقائی تنازعات اب بھی اختلافات کا بنیادی سبب ہیں۔ ماسکو کا مطالبہ ہے کہ یوکرین مشرقی علاقوں سے اپنی فوجیں واپس بلائے، جن میں وہ علاقے بھی شامل ہیں جو اب بھی کیف کے کنٹرول میں ہیں۔

زیلنسکی نے کہا کہ روسی مذاکرات کاروں نے یہ دعویٰ کرکے غلط بیانی کی ہے کہ ماسکو کی افواج نے ڈونباس کے اس نصف علاقے پر بھی قبضہ کر لیا ہے جو اب تک یوکرین کے کنٹرول میں ہے۔

سفارتی کوششوں اور ٹرمپ کی جانب سے جنگ ختم ہونے کے بارے میں ظاہر کی جانے والی امید کے باوجود کسی بھی فریق نے بڑی رعایت دینے کا اشارہ نہیں دیا ہے۔

دریں اثنا، مذاکرات دوبارہ شروع ہونے کے باوجود محاذ پر لڑائی جاری رہی۔ یوکرین کے وزیر اعظم سرگی کوریتسکی نے کہا کہ روسی افواج نے وسطی یوکرین کے چار علاقوں میں بجلی کے چھ بڑے سب اسٹیشنوں کو نشانہ بنایا ہے۔

ابوظہبی مذاکرات سے قبل امریکی اور یوکرینی حکام کے درمیان مشاورت بھی ہوئی، جس میں برطانیہ، فرانس، جرمنی، اٹلی، نیٹو اور یورپی کمیشن کے نمائندوں نے بھی شرکت کی۔

یو این آئی۔ م ع