تہران، ایران کے صدر مسعود پزشکیان نے بدھ کوے روز کہا کہ امریکہ اور اسرائیل ان کے ملک کے خلاف جنگ کرنے کے فیصلے کی سیاسی قیمت چکا رہے ہیں۔

مسٹر پزشکیان نے ترکی میں منعقد ہونے والی سی او پی 31 کانفرنس میں شرکت کے لیے تہران سے روانہ ہونے سے قبل کہا کہ امریکہ اور اسرائیل نے 28 فروری کو شروع ہونے والے تنازع کے دوران جنگی جرائم کا ارتکاب کیا۔ انہوں نے کہا کہ امریکہ، اسرائیل اور یورپ میں حالیہ انتخابی نتائج ‘جنگ پسندوں اور تشدد پسند عناصر’ کے خلاف عوام کی بڑھتی ہوئی ناراضگی کو ظاہر کرتے ہیں۔

مسٹر پزشکیان نے کہا کہ سی او پی 31 امریکہ اور اسرائیل کی فوجی کارروائیوں سے ماحولیات کو پہنچنے والے نقصان کو اجاگر کرنے کا ایک اچھا موقع ہے۔ وہ بین الاقوامی رہنماؤں اور عہدیداروں کے ساتھ اپنی ملاقاتوں کے دوران یہ معاملہ اٹھانے کا ارادہ رکھتے ہیں۔ ان کا کہنا تھا کہ امریکہ اور اسرائیل کی کارروائیاں جمہوریت اور انسانی حقوق کے تئیں ان کی وابستگی کے دعوؤں کے برعکس ہیں۔ انہوں نے بتایا کہ کانفرنس کے علاوہ ان کی 10 سے زائد ممالک کے رہنماؤں اور عہدیداروں کے ساتھ ملاقاتیں طے ہیں۔ ان میں ترکی کے صدر رجب طیب اردغان بھی شامل ہیں۔

ایران اور ترکی کے درمیان تعلقات کو سازگار قرار دیتے ہوئے مسٹر پزشکیان نے کہا کہ دونوں ممالک کے علاقائی، اقتصادی، سماجی اور ثقافتی مفادات مشترک ہیں، جو دو طرفہ تعلقات اور علاقائی سلامتی کو مضبوط بنانے میں مددگار ثابت ہو سکتے ہیں۔ انہوں نے امید ظاہر کی کہ ان کا یہ دورہ بین الاقوامی برادری تک ایرانی عوام کا پیغام پہنچائے گا اور اس کے مثبت نتائج سامنے آئیں گے۔

مسٹر پزشکیان کا یہ دورہ ایسے وقت میں ہو رہا ہے، جب امریکہ نے اشارہ دیا ہے کہ فی الحال اسے ایران کے خلاف فوجی کارروائی کو بڑے پیمانے پر بڑھانے کی ضرورت محسوس نہیں ہوتی۔ امریکہ کے وزیر خارجہ مارکو روبیو نے منگل کے روز پیرس میں جی-7 کی میٹنگ کے دوران کہا کہ ایران میں ‘بڑی فوجی کارروائی کی ضرورت نہیں ہے۔’ اس کے ساتھ ہی انہوں نے دعویٰ کیا کہ ایران پر امریکہ کی اقتصادی دباؤ کی مہم مؤثر طریقے سے کام کر رہی ہے۔

مسٹر ٹرمپ نے اتوار کے روز نشر ہونے والے سی بی ایس کے پروگرام ’60 منٹس’ کو دیے گئے انٹرویو میں کہا تھا کہ فی الحال انہیں تنازع کو بڑھانے کی کوئی وجہ نظر نہیں آتی۔ تاہم، انہوں نے جنگ شروع کرنے کے فیصلے کا دفاع کرتے ہوئے کہا کہ اقتصادی اثرات کے باوجود یہ تاریخی اعتبار سے درست فیصلہ تھا۔

یو این آئی۔ م ع

انطالیہ، ایرانی صدر مسعود پزشکیان بدھ کو اقوام متحدہ کی 31ویں موسمیاتی تبدیلی کانفرنس (کوپ 31) میں شرکت کے لیے ترکیہ پہنچ گئے۔ انہوں نے کہا ہے کہ کانفرنس کے دوران امریکہ اور اسرائیل کی کارروائیوں کے نتیجے میں ماحول کو پہنچنے والے نقصان کا معاملہ اٹھایا جائے گا۔

ایران کی سرکاری خبر رساں ایجنسی ارنا کے مطابق پزشکیان ترکیہ کے شہر انطالیہ پہنچے، جہاں وہ موسمیاتی کانفرنس میں شرکت کریں گے۔ اس موقع پر ان کی مختلف ممالک کے رہنماؤں اور اعلیٰ حکام سے ملاقاتیں بھی متوقع ہیں، جن میں علاقائی صورت حال اور باہمی تعلقات سمیت مختلف امور پر تبادلہ خیال کیا جائے گا۔

تہران سے روانگی سے قبل ایرانی صدر نے کہا تھا کہ کانفرنس میں امریکہ اور اسرائیل کی ایسی کارروائیوں پر گفتگو کی جائے گی جن سے ماحول کو نقصان پہنچا ہے۔ ان کے مطابق ایران اس عالمی فورم کو ماحولیاتی نقصانات اور خطے کو درپیش مسائل کی جانب عالمی برادری کی توجہ مبذول کرانے کے لیے استعمال کرے گا۔

یو این آئی۔ م س

واشنگٹن، امریکی صدر ڈونلڈ ٹرمپ نے فی الحال ایران کے خلاف نئے حملے کرنے یا تہران کے سخت مؤقف کے باوجود کسی معاہدے تک پہنچنے کے بجائے ایرانی معیشت پر دباؤ بڑھانے کی حکمت عملی اختیار کرنے کا فیصلہ کیا ہے۔ویب سائٹ ‘ایکسیس’ کی رپورٹ کے مطابق پیرس میں پیر کو جی 7 ممالک کے وزرائے خارجہ کے اجلاس کے دوران امریکی وزیر خارجہ مارکو روبیو نے بند کمرہ اجلاس میں بتایا کہ ٹرمپ نے ایران کے حوالے سے جنگ دوبارہ شروع کرنے اور معاہدے تک پہنچنے کے دو امکانات پر غور کیا، تاہم انہوں نے تیسرا راستہ اختیار کیا ہے، جس کا مقصد ایرانی حکومت کا معاشی طور پر گلا گھونٹنا ہے۔

رپورٹ کے مطابق روبیو نے کہا کہ امریکہ کسی نامناسب معاہدے پر دستخط نہیں کرے گا اور موجودہ معاشی دباؤ کی پالیسی جاری رکھے گا۔ ان کا کہنا تھا کہ اس حکمت عملی سے تہران کے لیے دہشت گرد تنظیموں کی مالی معاونت اور اپنی عسکری صلاحیتوں کی دوبارہ تعمیر مشکل ہو جائے گی۔ انہوں نے واضح کیا کہ اس پالیسی کے لیے کوئی حتمی مدت مقرر نہیں کی گئی ہے اور ٹرمپ کسی مصنوعی وقت کے دباؤ میں نہیں ہیں۔

اس حکمت عملی کی حمایت کرنے والی قومی سلامتی ٹیم میں وزیر خزانہ سکوٹ بیسنٹ، سی آئی اے کے ڈائریکٹر جان ریٹکلف اور ٹرمپ کے مشیر و داماد جیرڈ کشنر بھی شامل ہیں۔ رپورٹ کے مطابق اس ٹیم نے جنگ دوبارہ شروع کرنے کی مخالفت کرتے ہوئے موجودہ دباؤ جاری رکھنے پر زور دیا ہے، تاکہ ایران کو امریکی مفادات کے مطابق معاہدے پر آمادہ کیا جا سکے۔

ٹرمپ نے پیر کو قطری وزیراعظم شیخ محمد بن عبدالرحمٰن آل ثانی سے ملاقات کے بعد کہا تھا کہ ایران کے خلاف حملوں کا نیا دور ‘نہ ہونے کے برابر’ اور ‘غیر ضروری’ دکھائی دیتا ہے۔ انہوں نے ایران پر معاشی دباؤ اور بحری ناکہ بندی جاری رکھنے کی حمایت کی۔ اس حکمت عملی کے ساتھ ‘آئرن گیٹ’ نامی آپریشن بھی شامل ہے، جس کا مقصد ان زمینی راستوں کو بند کرنا ہے جن کے ذریعے تہران جدید ہتھیار اور دیگر ٹیکنالوجی منتقل کرتا ہے۔

دوسری جانب ایران کی سپریم نیشنل سکیورٹی کونسل کے سکریٹری محسن رضائی نے مذاکرات کے حوالے سے سخت مؤقف اختیار کرتے ہوئے اپنے ملک کے سات مطالبات پر قائم رہنے کا اعلان کیا ہے۔ ایرانی خبر رساں ایجنسی تسنیم کے مطابق انہوں نے کہا کہ تہران نے واشنگٹن سے ان شرائط پر واضح جواب طلب کیا تھا، لیکن اب تک کوئی جواب نہیں ملا۔ رضائی نے امریکہ اور ایران کے درمیان مذاکرات جاری ہونے یا قطر میں کسی اجلاس کی تیاری کی خبروں کی بھی تردید کی۔

ادھر قطری وزارت خارجہ نے پیر کو کہا تھا کہ امریکہ اور ایران کے درمیان اختلافات کم کرنے کی کوششیں جاری ہیں اور صورت حال مثبت سمت میں آگے بڑھ رہی ہے۔

یو این آئی۔ م س