سرینگر، کشمیر اور لداخ کے بالائی علاقوں میں ہلکی برف باری ہوئی، جبکہ بدھ کے روز میدانی علاقوں کے بعض حصوں میں ہلکی بارش ہوئی۔ اس دوران محکمہ موسمیات کے مرکز سرینگر نے آئندہ 2 دنوں میں جموں و کشمیر کے بیشتر علاقوں میں مزید بارش اور برف باری کی پیش گوئی کی ہے۔

محکمہ موسمیات نے بتایا کہ بانڈی پورہ، سونہ مرگ، گلمرگ کے کانگ ڈوری، گمری، مینا مرگ اور دراس میں ہلکی برف باری ریکارڈ کی گئی ہے۔

محکمہ موسمیات کے مرکز نے 12 اور 13 نومبر کو کئی مقامات پر میدانی علاقوں میں ہلکی سے درمیانی بارش اور بالائی علاقوں میں ہلکی سے درمیانی برف باری کی پیش گوئی کی ہے۔ اس دوران کپواڑہ اور بانڈی پورہ کے بالائی علاقوں میں درمیانی سے شدید برف باری ہونے کا امکان ہے۔

محکمہ موسمیات نے 12 اور 13 نومبر کے دوران دن کے درجہ حرارت میں 6 سے 8 ڈگری سیلسیس تک نمایاں کمی آنے کی بھی پیش گوئی کی ہے۔ اس دوران بعض مقامات پر گرج چمک کے ساتھ تیز ہوائیں چلنے کا امکان ہے۔

موسم کی پیش گوئی اور دور دراز علاقوں میں سڑکیں بند ہونے اور آمد و رفت کے رابطے متاثر ہونے کے خدشے کے پیش نظر بانڈی پورہ ضلع انتظامیہ نے سیاحوں، مسافروں، امتحانات میں شرکت کرنے والے امیدواروں اور عام لوگوں کے لیے موسمی ہدایات جاری کی ہیں۔

ضلع انتظامیہ نے گریز کو عارضی طور پر سیاحوں کے لیے ممنوعہ علاقہ قرار دے دیا ہے اور وہاں پہلے سے موجود لوگوں کو مشورہ دیا ہے کہ وہ ضلع کنٹرول روم سے رابطہ کرکے فوری طور پر وہاں سے واپسی کا منصوبہ بنائیں۔

یو این آئی۔ ایم جے

جموں، جموں و کشمیر کے وزیر اعلیٰ عمر عبداللہ بدھ کے روز ادھم پور اور ریاسی اضلاع میں ترقیاتی سرگرمیوں کا جامع جائزہ لیں گے۔ اس دوران وہ عوامی بنیادی ڈھانچے سے متعلق منصوبوں کا افتتاح کریں گے اور 25 کروڑ روپے کی لاگت کے کئی نئے منصوبوں کا سنگ بنیاد بھی رکھیں گے۔

ایک ترجمان نے بتایا کہ وزیر اعلیٰ کے ساتھ کابینہ کے وزراء، وزیر اعلیٰ کے مشیر اور مقامی ارکان اسمبلی بھی موجود رہیں گے۔ اس جائزہ اجلاس میں اعلیٰ انتظامی افسران بھی شرکت کریں گے۔

انہوں نے بتایا کہ وزیر اعلیٰ دن بھر کے دورے کے دوران صبح کے وقت ادھم پور ضلع جائیں گے، جبکہ دوپہر کے بعد ریاسی ضلع کا دورہ کریں گے۔

ترجمان کے مطابق دونوں اضلاع میں وزیر اعلیٰ مقامی انتظامیہ کے ساتھ اعلیٰ سطحی جائزہ اجلاسوں کی صدارت کریں گے۔ ان اجلاسوں میں جاری ترقیاتی کاموں کی زمینی اور مالی پیش رفت، موسم سرما کی تیاریوں اور عوامی فلاح و بہبود سے متعلق اہم منصوبوں کا جائزہ لیا جائے گا۔

اس کے علاوہ وہ مکمل ہوچکے عوامی بنیادی ڈھانچے کے منصوبوں کا افتتاح کریں گے اور ان اضلاع کی ترقی کو مزید تیز کرنے اور عوام کو بہتر سرکاری خدمات فراہم کرنے کے مقصد سے کئی بڑے نئے منصوبوں کا سنگ بنیاد رکھیں گے۔

یو این آئی۔ ایم جے

سرینگر، جموں و کشمیر کے گاندربل ضلع میں سونمرگ سے سرینگر کی طرف جا رہی ایک سیاحتی ٹمپو ٹریولر کے حادثے کا شکار ہو جانے سے گجرات اور مغربی بنگال کے آٹھ سیاح زخمی ہو گئے۔

یہ حادثہ سمبل بالا میں پیش آیا۔ زخمی سیاحوں کو پہلے طبی امداد کے لیے لے جایا گیا اور بعد میں بہتر علاج کے لیے سورا میں واقع شیرِ کشمیر انسٹی ٹیوٹ آف میڈیکل سائنسز (ایس کے آئی ایم ایس) منتقل کر دیا گیا۔

زخمیوں کی شناخت احمد آباد کے رہنے والے شاردا بائی اور راماس، گجرات کے سورت کی رہنے والی جائشا، احمد آباد کے رہنے والے شوبھا اور راکیش کمار، مغربی بنگال کے رہنے والے سواس نواد یوسف گھوسی اور سوجیت گھوش کے طور پر ہوئی ہے، جبکہ مالا گھوسی کے پتے کی تصدیق نہیں ہو سکی ہے۔

لیفٹیننٹ گورنر منوج سنہا نے کہا کہ انہوں نے اس حادثے کے سلسلے میں سینئر حکام، ایس کے آئی ایم ایس کے ڈائریکٹر اور گاندربل کے ڈپٹی کمشنر سے بات کی ہے۔ مسٹر سنہا نے سوشل میڈیا پر لکھا، “گجرات اور مغربی بنگال کے آٹھ زخمی سیاحوں کو ایس کے آئی ایم ایس منتقل کر دیا گیا ہے۔ میں نے حکام اور ایس کے آئی ایم ایس کے ڈائریکٹر کو ہدایت دی ہے کہ زخمیوں کو ہر ممکن بہترین علاج فراہم کیا جائے۔ ان کی جلد صحتیابی کے لیے دعا گو ہوں۔”

یواین آئی۔الف الف