سری نگر، جموں و کشمیر کے کولگام ضلع میں بدھ کی دوپہر نامعلوم دہشت گردوں نے مرکزی ریزرو پولیس فورس (سی آر پی ایف) کے جوانوں پر اندھا دھند فائرنگ کر دی، جس میں 2 جوان زخمی ہو گئے۔

سرکاری ذرائع کے مطابق یہ واقعہ دوپہر تقریباً 2:15 بجے پیش آیا، جب کولگام ضلع میں ایک چوکی پر تعینات سکیورٹی اہلکاروں پر موٹر سائیکل سے آئے نامعلوم حملہ آوروں نے اچانک گولیاں چلانا شروع کر دیں۔ واردات کو انجام دینے کے فوراً بعد حملہ آور موقع سے فرار ہو گئے۔ فائرنگ میں زخمی ہونے والے دونوں جوانوں کو فوری علاج کے لیے پڑوسی ضلع اننت ناگ کے ایک اسپتال منتقل کر دیا گیا ہے۔

واقعے کے فوراً بعد سکیورٹی فورسز نے علاقے کو گھیرے میں لے کر حملہ آوروں کی تلاش کے لیے کارروائی شروع کر دی ہے۔

یو این آئی۔ ایم جے

جموں، جموں و کشمیر کے لیفٹیننٹ گورنر منوج سنہا نے بدھ کے روز یہاں دیوالی کی رات نہرو مارکیٹ کے گودام میں پیش آنے والے آتشزدگی کے واقعے کی وجوہات اور حالات کا پتہ لگانے کے لیے ایک تحقیقاتی کمیٹی تشکیل دی ہے۔

ایک سرکاری ترجمان نے بتایا کہ لیفٹیننٹ گورنر منوج سنہا نے آتشزدگی کے واقعے کی وجوہات اور حالات کی تحقیقات کے لیے کمیٹی تشکیل دی ہے۔ اس کمیٹی میں انسپکٹر جنرل، جموں تیجندر سنگھ اور ڈویژنل کمشنر جموں وکاس کنڈل شامل ہیں۔

کمیٹی کو ہدایت دی گئی ہے کہ وہ کسی بھی قسم کی کوتاہی یا لاپروائی کی جانچ کرے، ذمہ داری طے کرے اور 15 دن کے اندر اپنی رپورٹ پیش کرے۔

قابل ذکر ہے کہ جموں کی سب سے بڑی تھوک منڈیوں میں شمار ہونے والی نہرو مارکیٹ میں زبردست آگ لگنے سے کم از کم 8 دکانیں جل کر خاکستر ہو گئی تھیں۔ اس بازار میں روزمرہ استعمال کی ضروری اشیا اور اناج کی تجارت ہوتی ہے۔

نہرو مارکیٹ ٹریڈرس ایسوسی ایشن کے صدر دیپک گپتا نے مبینہ طور پر آگ اور ہنگامی خدمات کے محکمے پر تاخیر سے پہنچنے کا الزام لگایا ہے۔ ان کا کہنا ہے کہ اس تاخیر کے باعث آگ سے زیادہ نقصان ہوا۔

یو این آئی۔ ایم جے

سرینگر، کشمیر اور لداخ کے بالائی علاقوں میں ہلکی برف باری ہوئی، جبکہ بدھ کے روز میدانی علاقوں کے بعض حصوں میں ہلکی بارش ہوئی۔ اس دوران محکمہ موسمیات کے مرکز سرینگر نے آئندہ 2 دنوں میں جموں و کشمیر کے بیشتر علاقوں میں مزید بارش اور برف باری کی پیش گوئی کی ہے۔

محکمہ موسمیات نے بتایا کہ بانڈی پورہ، سونہ مرگ، گلمرگ کے کانگ ڈوری، گمری، مینا مرگ اور دراس میں ہلکی برف باری ریکارڈ کی گئی ہے۔

محکمہ موسمیات کے مرکز نے 12 اور 13 نومبر کو کئی مقامات پر میدانی علاقوں میں ہلکی سے درمیانی بارش اور بالائی علاقوں میں ہلکی سے درمیانی برف باری کی پیش گوئی کی ہے۔ اس دوران کپواڑہ اور بانڈی پورہ کے بالائی علاقوں میں درمیانی سے شدید برف باری ہونے کا امکان ہے۔

محکمہ موسمیات نے 12 اور 13 نومبر کے دوران دن کے درجہ حرارت میں 6 سے 8 ڈگری سیلسیس تک نمایاں کمی آنے کی بھی پیش گوئی کی ہے۔ اس دوران بعض مقامات پر گرج چمک کے ساتھ تیز ہوائیں چلنے کا امکان ہے۔

موسم کی پیش گوئی اور دور دراز علاقوں میں سڑکیں بند ہونے اور آمد و رفت کے رابطے متاثر ہونے کے خدشے کے پیش نظر بانڈی پورہ ضلع انتظامیہ نے سیاحوں، مسافروں، امتحانات میں شرکت کرنے والے امیدواروں اور عام لوگوں کے لیے موسمی ہدایات جاری کی ہیں۔

ضلع انتظامیہ نے گریز کو عارضی طور پر سیاحوں کے لیے ممنوعہ علاقہ قرار دے دیا ہے اور وہاں پہلے سے موجود لوگوں کو مشورہ دیا ہے کہ وہ ضلع کنٹرول روم سے رابطہ کرکے فوری طور پر وہاں سے واپسی کا منصوبہ بنائیں۔

یو این آئی۔ ایم جے