تہران، ایرانی پاسدارانِ انقلاب نے دعویٰ کیا ہے کہ آبنائے ہرمز میں غیر مجاز بحری راستے سے گزرنے والے دو آئل ٹینکرز ایک حادثے کے نتیجے میں آگ کی لپیٹ میں آگئے۔ دونوں جہازوں پر مجموعی طور پر 40 لاکھ بیرل سے زائد تیل موجود تھا۔

پاسدارانِ انقلاب کے مطابق یہ واقعہ جمعرات کو پیش آیا۔ تاہم بیان میں ٹینکروں کے نام، ان کی ملکیت، آگ لگنے کی نوعیت اور ممکنہ جانی نقصان کے بارے میں کوئی تفصیلات فراہم نہیں کی گئیں۔

مشرق وسطیٰ میں فروری کے اواخر میں جنگ شروع ہونے کے بعد ایران نے آبنائے ہرمز سے بحری جہازوں کی آمدورفت پر سخت پابندیاں عائد کر رکھی ہیں۔ تہران کا مؤقف ہے کہ اس اہم آبی گزرگاہ سے گزرنے والے جہازوں کو ایران کے منظور کردہ بحری راستے استعمال کرنے چاہئیں۔

دوسری جانب امریکہ نے ایرانی بندرگاہوں کی بحری ناکہ بندی کر رکھی ہے اور آبنائے ہرمز سے گزرنے والے تیل بردار جہازوں کی مدد بھی کر رہا ہے۔

آبنائے ہرمز عالمی توانائی کی تجارت کے لیے انتہائی اہم سمندری راستہ ہے۔ معمول کے حالات میں دنیا کی مجموعی تیل کی کھپت کا تقریباً پانچواں حصہ اسی گزرگاہ سے منتقل ہوتا ہے۔

اس آبی راستے پر پابندیوں اور فوجی کشیدگی نے عالمی سطح پر تیل کی ترسیل کو متاثر کیا ہے۔ ایرانی پاسدارانِ انقلاب کے دونوں ٹینکروں میں آگ لگنے کے دعوے کی تاحال آزادانہ طور پر تصدیق نہیں ہو سکی ہے۔

یو این آئی۔ م س

تل ابیب، اسرائیل میں نئی حکومت کی تشکیل کے لیے اپوزیشن رہنما گادی آئزن کوٹ کی کوششوں کے درمیان وزیراعظم بن یامین نیتن یاہو اقتدار برقرار رکھنے کی کوشش کر رہے ہیں۔ اسی دوران قیاس آرائیاں تیز ہوگئی ہیں کہ اسرائیلی سکیورٹی کابینہ کے اتوار کو ہونے والے اجلاس میں ایران کے خلاف نئی فوجی کارروائی کا فیصلہ کیا جا سکتا ہے۔

رپورٹوں کے مطابق سکیورٹی کابینہ کا اجلاس 5 اکتوبر کے بعد پہلی بار ہوگا۔ اسرائیلی سرکاری نشریاتی ادارے ‘کان’ نے بتایا کہ نیتن یاہو حکومت نے فوج کو ایران پر ممکنہ حملے اور وسیع تر فوجی تصادم کے پیش نظر تیاریوں میں تیزی لانے کی ہدایت دی ہے۔

دوسری جانب گادی آئزن کوٹ نے نیتن یاہو سے اپیل کی ہے کہ نگران حکومت کے دور میں غیر ضروری فوجی کارروائیوں سے گریز کیا جائے۔ وزیراعظم کو لکھے گئے خط میں انہوں نے کہا کہ موجودہ حکومت کو پارلیمنٹ (کنیسٹ) کا اعتماد حاصل نہیں ہے اور صرف 46 ارکان پارلیمنٹ نیتن یاہو کی قیادت کی حمایت کر رہے ہیں۔

نیتن یاہو کے دفتر نے آئزن کوٹ کے خط کو ‘غیر ذمہ دارانہ اقدام’ قرار دیتے ہوئے الزام لگایا کہ وہ قومی سلامتی کے معاملات کو سیاسی رنگ دے رہے ہیں۔ تاہم آئزن کوٹ نے سوال اٹھایا کہ انہیں معمول کی آپریشنل سکیورٹی بریفنگ دینے سے انکار کیوں کیا گیا اور کنیسٹ کی خارجہ امور و دفاعی کمیٹی کا اجلاس مبینہ طور پر اگلے ہفتے تک کیوں ملتوی کیا گیا۔

آئزن کوٹ نے کہا کہ وہ ایسی حکومت کی نگرانی میں خلا پیدا نہیں ہونے دیں گے جس نے پارلیمنٹ کا اعتماد کھو دیا ہے۔ انہوں نے اٹارنی جنرل گالی بہاراو میارا سے مداخلت کی اپیل کرتے ہوئے نیتن یاہو سے باقاعدہ، منظم اور جامع سکیورٹی بریفنگز کے ساتھ انٹیلی جنس جائزوں تک رسائی دلانے کا مطالبہ کیا۔ ‘ٹائمز آف اسرائیل’ کے مطابق آئزن کوٹ کا کہنا ہے کہ قانون کے تحت اس وقت کوئی باضابطہ اپوزیشن رہنما موجود نہیں ہے اور صدر اسحاق ہرزوگ نے انہیں حکومت بنانے کی ذمہ داری سونپی ہے۔

اپوزیشن کو خدشہ ہے کہ نیتن یاہو ایران کے ساتھ فوجی تصادم کو ہنگامی حالت کے اعلان کے لیے استعمال کر سکتے ہیں، جس سے قومی اتحاد کی حکومت تشکیل دینے کی راہ ہموار ہو سکتی ہے۔ اس صورت میں نیتن یاہو اور آئزن کوٹ ایک ہی حکومتی اتحاد میں شامل ہو سکتے ہیں، جس کی آئزن کوٹ مخالفت کرتے ہیں۔ یہ خدشات اس وقت مزید بڑھے جب نیتن یاہو نے کنیسٹ میں صحافیوں سے گفتگو کرتے ہوئے قومی اتحاد کی حکومت کے امکان کو مسترد نہیں کیا۔

دفاعی وزیر اسرائیل کاٹز نے بھی نگران حکومت کے فوجی کارروائیوں کے اختیارات کا دفاع کیا ہے۔ سوشل میڈیا پر جاری بیان میں انہوں نے کہا کہ اسرائیلی فوج کو فوجی کارروائیوں کی ہدایت دینے کے لیے حکومت کو اپوزیشن یا دیگر سیاسی شخصیات کی اجازت لینے کی ضرورت نہیں ہے۔ ان کے مطابق اس میں غزہ میں ٹارگٹڈ کارروائیاں، لبنان پر حملے اور شام و مغربی کنارے میں سکیورٹی آپریشن بھی شامل ہیں۔

ایران کے خلاف ممکنہ کارروائی کے بارے میں کاٹز نے کہا کہ اسرائیل نے فوج کے ساتھ رابطے میں عزم اور دانش مندی کا مظاہرہ کیا ہے اور حالات کے مطابق کارروائی جاری رکھے گا۔ انہوں نے کہا کہ اسرائیل کی سلامتی سیاسی عمل کے انتظار میں نہیں رہ سکتی۔ کاٹز کے مطابق نیتن یاہو بدستور وزیراعظم ہیں اور بطور وزیر دفاع انہیں فوج کی قیادت کی ذمہ داری حاصل ہے، تاہم یہ اختیارات طے شدہ نگرانی کے نظام کے تابع ہیں۔

واضح رہے کہ اسرائیلی قانون نگران حکومت کو فوجی کارروائیاں شروع کرنے سے مخصوص طور پر نہیں روکتا، تاہم بڑے فوجی فیصلوں کے لیے نیتن یاہو کی سربراہی میں سکیورٹی کابینہ کی منظوری ضروری ہوتی ہے۔

یو این آئی۔ م ع

تہران، ایرانی پارلیمنٹ کے اسپیکر باقر قالیباف نے کہا ہے کہ امریکہ اور اسرائیل کے ساتھ جنگ کے بعد آبنائے ہرمز کی صورتحال پہلے جیسی نہیں رہے گی۔ ان کے مطابق ایران اور عمان اس اہم بحری گزرگاہ کی نگرانی کے حوالے سے ایک نئی مفاہمت پر پہنچ چکے ہیں۔

قطری ٹیلی ویژن کو انٹرویو دیتے ہوئے قالیباف نے دعویٰ کیا کہ امریکی حکام نے ماسکو کے دورے کے دوران روسی صدر ولادیمیر پوتن سے ایران اور امریکہ کے درمیان مذاکرات میں ثالثی کی درخواست کی تھی۔

انہوں نے کہا کہ ایران نے آٹھ ماہ سے جاری تنازع ختم کرنے کے لیے قطر کے ذریعے امریکہ کو سات نکاتی امن منصوبہ پیش کیا ہے اور اب تہران واشنگٹن کے جواب کا منتظر ہے۔ ان کے مطابق اب فیصلہ امریکہ کے ہاتھ میں ہے۔

قالیباف نے بتایا کہ مجوزہ منصوبے میں امریکی بحری ناکہ بندی اور اقتصادی پابندیوں کا خاتمہ، ایران کے منجمد اثاثوں کی واپسی، تمام محاذوں پر جنگ بندی اور جنگ کے خاتمے کا باضابطہ اعلان شامل ہے۔ ان کا کہنا تھا کہ اگر امریکہ طے شدہ نکات کی پابندی کرے اور ایسے مطالبات سے گریز کرے جن سے بداعتمادی بڑھے تو معاہدہ ممکن ہے، تاہم ایران کو اب بھی امریکی حکومت پر اعتماد نہیں ہے۔

آبنائے ہرمز کے بارے میں انہوں نے کہا کہ یہ اہم آبی گزرگاہ جنگ سے پہلے والی صورتحال میں واپس نہیں آئے گی اور ایران و عمان اس کی نگرانی کے لیے نئے انتظام پر متفق ہو چکے ہیں۔

ایرانی اسپیکر نے خبردار کیا کہ اگر امریکہ نے ایران کے خلاف دوبارہ فوجی کارروائی کی تو صدر ڈونالڈ ٹرمپ کو ایک اور شکست کا سامنا کرنا پڑ سکتا ہے۔

یمن کی صورت حال پر بات کرتے ہوئے قالیباف نے کہا کہ کسی بیرونی فریق کو وہاں کے تنازع میں مداخلت نہیں کرنی چاہیے۔ ان کے مطابق اگر سعودی عرب اور یمن کی حکومت دونوں ایران سے مدد طلب کریں تو تہران تنازع کے حل کے لیے تعاون کرنے کو تیار ہے۔

قالیباف کے یہ بیانات ایسے وقت میں سامنے آئے ہیں جب ایران اور امریکہ کے درمیان جنگ کے خاتمے اور آبنائے ہرمز کی صورت حال پر سفارتی کوششیں جاری ہیں۔ تاہم ایرانی امن منصوبے اور ایران و عمان کے درمیان نئی مفاہمت کی تفصیلات کی آزادانہ تصدیق نہیں ہو سکی ہے۔

یو این آئی۔ م ع