نئی دہلی، دہلی-این سی آر علاقے میں دودھ کی اہم سپلائی کرنے والی کمپنی مدر ڈیری نے جمعرات سے دودھ کی مختلف اقسام کی قیمتوں میں فی لیٹر 2 سے 4 روپے تک اضافہ کرنے کا فیصلہ کیا ہے۔ مدر ڈیری کے سرکاری ذرائع نے بدھ کے روز یہ اطلاع دی۔

ذرائع کے مطابق آپریشنل اخراجات میں ہونے والے اضافے کی جزوی تلافی کے مقصد سے دودھ کی قیمتوں میں یہ اضافہ کیا جا رہا ہے۔ نئی قیمتیں کل سے ان تمام علاقوں میں نافذ ہوجائیں گی جہاں مدر ڈیری کا دودھ سپلائی کیا جاتا ہے۔

اس اضافے کے تحت فل کریم دودھ کی قیمت میں سب سے زیادہ 4 روپے فی لیٹر کا اضافہ کیا گیا ہے، جس کے بعد اس کا پیکٹ 72 روپے کے بجائے اب 76 روپے فی لیٹر میں دستیاب ہوگا۔

وہیں، مدر ڈیری کا مقبول گائے کا دودھ 3 روپے فی لیٹر مہنگا ہوکر 62 روپے کی بجائے 65 روپے فی لیٹر میں ملے گا۔

دودھ کی دیگر اقسام کی قیمتوں میں فی لیٹر 2 روپے کا اضافہ کیا گیا ہے۔ اس کے تحت ٹوکن دودھ کی قیمت 58 روپے سے بڑھ کر 60 روپے، ٹونڈ دودھ کی قیمت 60 روپے سے بڑھ کر 62 روپے اور ڈبل ٹونڈ دودھ کی قیمت 54 روپے کی بجائے 56 روپے فی لیٹر ہوگئی ہے۔

تاہم، قیمتوں میں اضافے کے حوالے سے رابطہ کیے جانے پر مدر ڈیری کے سرکاری ترجمان نے فوری طور پر کوئی تبصرہ کرنے سے انکار کردیا۔

قابل ذکر ہے کہ سردیوں کے موسم میں قدرتی طور پر دودھ کی سپلائی میں کمی آجاتی ہے۔

یو این آئی۔ م ع

نئی دہلی، کانگریس نے ایودھیا کے شری رام مندر میں چندہ کی مبینہ چوری کا معاملہ ایک بار پھر اٹھاتے ہوئے جانچ کا دائرہ وسیع کرنے اور مکمل مالیاتی ریکارڈ عوام کے سامنے لانے کا مطالبہ کیا ہے۔

کانگریس کے شعبۂ مواصلات کے انچارج جے رام رمیش نے بدھ کے روز سوشل میڈیا پلیٹ فارم ‘ایکس’ پر کہا کہ مندر ٹرسٹ سے لے کر تعمیراتی کام، چندہ اور چڑھاوے کی گنتی اور انہیں بینک میں جمع کرانے تک کے انتظام میں بھارتیہ جنتا پارٹی (بی جے پی)، راشٹریہ سویم سیوک سنگھ (آر ایس ایس) اور وشو ہندو پریشد (وی ایچ پی) سے وابستہ لوگ شامل رہے ہیں، اس لیے وہ چندہ چوری کی ذمہ داری سے پیچھے نہیں ہٹ سکتے۔

انہوں نے کہا کہ آر ایس ایس سے وابستہ سابق اکاؤنٹس انچارج مہیپال سنگھ نے 2021 میں ہی چندے میں مبینہ بے ضابطگیوں کی اطلاع چمپت رائے اور گوپال راؤ کو دی تھی، لیکن کارروائی کرنے کے بجائے انہیں عہدے سے ہٹا دیا گیا۔ انہوں نے سوال کیا کہ ایسی صورت میں چمپت رائے، انل مشرا اور گوپال راؤ کو چارج شیٹ میں ملزم کے بجائے گواہ کیسے بنا دیا گیا۔

مسٹر رمیش نے میڈیا رپورٹس کا حوالہ دیتے ہوئے کہا کہ تعمیراتی کام سے وابستہ انجینئر دیناناتھ ورما نے ٹرسٹ کے دفتر سے متعلق کام میں 40 فیصد کمیشن مانگے جانے کا الزام لگایا تھا اور اس کی ایک آڈیو چمپت رائے کو سنائی تھی، جس کے بعد انہیں منصوبے سے ہٹا دیا گیا۔ انہوں نے ملزم انوکلپ مشرا کے بجرنگ دل اور آر ایس ایس سے مبینہ تعلق، ان کی بھاگوت کتھا میں چمپت رائے کی موجودگی، نیز گنتی کے عملے کے انچارج سبھاش شریواستو اور ملزم ٹنّو یادو کے تعلقات کا بھی ذکر کیا۔

انہوں نے سوال کیا کہ کروڑوں روپے کی گنتی کرنے والے کمرے میں تقرریوں کے لیے نہ کوئی اشتہار جاری کیا گیا اور نہ ہی انٹرویو ہوا، تو وہاں اپنے قریبی افراد کو تعینات کرنے والوں کی جانچ کیوں نہیں کی گئی۔

کانگریس رہنما نے کہا کہ وزیر اعظم نریندر مودی نے 5 فروری 2020 کو لوک سبھا میں شری رام جنم بھومی تیرتھ شیتر ٹرسٹ کے قیام کا اعلان کیا تھا، لیکن اس کے انتخاب کے معیار اور طریقۂ کار کو عام نہیں کیا گیا۔ انہوں نے چندے کی مبینہ چوری کے معاملے میں وزیر اعظم اور وزیر اعلیٰ کی خاموشی پر سوال اٹھاتے ہوئے کہا کہ پہلی خصوصی تحقیقاتی ٹیم (ایس آئی ٹی) کی رپورٹ اسی ٹرسٹ کے حوالے کر دی گئی، جس کے عہدیداروں پر بدعنوانی کے الزامات عائد تھے۔ ان کے مطابق یہ رپورٹ عوام سے پوشیدہ رکھی جا رہی ہے۔

مسٹر رمیش نے کہا کہ جواب دہی صرف گرفتار کیے گئے آٹھ ملازمین تک محدود نہیں رہ سکتی۔ مندر کی تعمیر، انتظام و انصرام اور چندے کے مکمل نظام سے وابستہ ہر ذمہ دار شخص کے کردار کی جانچ سپریم کورٹ کی نگرانی میں ہونی چاہیے۔

کانگریس نے مکمل مالیاتی ریکارڈ عام کرنے، جانچ کا دائرہ وسیع کرنے اور قصوروار پائے جانے والے تمام افراد کے خلاف قانون کے مطابق کارروائی کا مطالبہ کیا ہے۔

یواین آئی۔ ایف اے

نئی دہلی، وزیر اعظم نریندر مودی نے بدھ کے روز بھائی دوج کے موقع پر ملک بھر کے لوگوں کو دلی مبارک باد پیش کی۔ انہوں نے اس تہوار کو بھائیوں اور بہنوں کے درمیان گہری محبت، اپنائیت اور مضبوط رشتے کا جشن قرار دیا۔

سوشل میڈیا پلیٹ فارم ایکس پر جاری اپنے پیغام میں مسٹر مودی نے اپنی نیک خواہشات کا اظہار کرتے ہوئے کہا، ”بھائی دوج کے مبارک موقع پر ملک بھر میں رہنے والے اپنے تمام اہل وطن کو دلی مبارک باد پیش کرتا ہوں۔”

وزیر اعظم نے اس تہوار کی جذباتی اور ثقافتی اہمیت پر زور دیتے ہوئے کہا کہ بھائی دوج بہن بھائیوں کے گہرے رشتے کی مٹھاس اور اپنائیت کی علامت ہے۔ انہوں نے مزید کہا، ”اس مبارک موقع پر میں سب کی خوشی اور خوش حالی کی پراتھنا کرتا ہوں۔”

بھائی دوج کا یہ تہوار بھائیوں اور بہنوں کے درمیان خاص رشتے کے نام ہوتا ہے۔ اس موقع پر بہنیں روایتی طور پر اپنے بھائیوں کے ماتھے پر تلک لگاتی ہیں اور ان کی خوشی، خوش حالی اور لمبی عمر کے لیے پراتھنا کرتی ہیں۔

اس کے جواب میں بھائی بھی اپنی بہنوں سے محبت اور ان کا ساتھ نبھانے کے عزم کا اظہار کرتے ہیں۔ اس موقع پر خاندان کے افراد ایک جگہ جمع ہوتے ہیں، روایتی رسومات ادا کی جاتی ہیں اور تحائف کا تبادلہ ہوتا ہے۔

ملک بھر میں مختلف انداز سے منایا جانے والا بھائی دوج خاندانی رشتوں، باہمی محبت اور بہن بھائیوں کے درمیان نسل در نسل قائم رہنے والے مضبوط تعلقات کی اہمیت کو اجاگر کرتا ہے۔

یو این آئی۔ ایم جے