سرینگر، میر واعظ عمر فاروق کی مسلسل تیسرے دن خانہ نظربندی کے باعث متحدہ مجلس علماء (ایم ایم یو) نے بدھ کو بانڈی پورہ میں ہونے والی علماء کی اپنی پہلی ضلعی سطح کی میٹنگ ملتوی کردی ہے۔ میر واعظ کی شرکت کے بارے میں غیر یقینی صورت حال کے پیش نظر یہ فیصلہ کیا گیا۔

ایم ایم یو نے ایک بیان میں کہا کہ بانڈی پورہ کے دارالعلوم رحیمیہ میں ہونے والی اس میٹنگ کا اہتمام 15 ستمبر کو سرینگر میں مذہبی تنظیم کی جانب سے منعقدہ ایک روزہ علماء کانفرنس کے سلسلے کو آگے بڑھانے کے لیے کیا جا رہا تھا۔ اس کانفرنس میں جموں و کشمیر اور لداخ کے مختلف مکاتب فکر اور علاقوں کی نمائندگی کرنے والے 70 سے زائد ممتاز مذہبی علماء نے شرکت کی تھی۔

ماحولیاتی بگاڑ اور اس کے دور رس نتائج پر بھی تبادلہ خیال کیا گیا۔ اس دوران شرکاء نے مذہبی رہنمائی، سماجی اصلاح اور اجتماعی کوششوں کے ذریعے ان چیلنجوں سے نمٹنے میں علماء کے کردار پر غور کیا۔

بیان میں کہا گیا، ”اس کانفرنس کے سلسلے کو آگے بڑھانے کے لیے جموں و کشمیر اور لداخ کے مختلف اضلاع میں میٹنگیں منعقد کرنے کا فیصلہ کیا گیا تھا، تاکہ ان کی رسائی وسیع کی جا سکے اور کانفرنس میں ہونے والے غور و خوض کو ٹھوس اقدامات میں تبدیل کیا جا سکے۔ بانڈی پورہ کی میٹنگ اس سلسلے کی پہلی کڑی ہونے والی تھی۔”

کشمیر کے سرکردہ مذہبی رہنما میر واعظ کی سربراہی والی ایم ایم یو نے کہا کہ بدھ کی میٹنگ کے تمام انتظامات مکمل کر لیے گئے تھے اور ممتاز علماء کی اس میں شرکت طے تھی۔

بیان میں کہا گیا، ”تاہم، تنظیم کے سرپرست میر واعظ عمر فاروق کی مسلسل خانہ نظربندی اور ان کی شرکت کے بارے میں غیر یقینی صورت حال کے باعث منتظمین کے پاس پروگرام ملتوی کرنے کے سوا کوئی راستہ نہیں بچا۔”

ایم ایم یو نے میر واعظ کی مسلسل خانہ نظربندی کو انتہائی افسوس ناک اور قابل مذمت قرار دیتے ہوئے کہا کہ پابندیوں سے ان کی مذہبی اور سماجی ذمہ داریوں کی ادائیگی متاثر ہو رہی ہے۔ اس کے ساتھ ہی سماجی اصلاح، اتحاد اور عوامی فلاح و بہبود کے لیے مذہبی علماء کی اجتماعی کوششوں میں بھی رکاوٹ پیدا ہو رہی ہے۔

اتوار کو میر واعظ نے کہا تھا کہ انہیں خانہ نظربند کر دیا گیا ہے۔ انہوں نے الزام لگایا تھا کہ جموں و کشمیر کی صورت حال سے متعلق انٹرنیشنل کرائسس گروپ کی حال ہی میں شائع ہونے والی رپورٹ کا حوالہ دینے پر انہیں سزا دی جا رہی ہے۔

یو این آئی۔ایم جے

سری نگر، جموں و کشمیر کے دارالحکومت سری نگر میں انفورسمنٹ ڈائریکٹوریٹ (ای ڈی) نے منگل کو دہشت گردوں کو مالی مدد فراہم کرنے اور غیر قانونی طریقے سے رقم کی منتقلی کے معاملے میں 4 الگ الگ مقامات پر تلاشی مہم چلائی۔

یہ جانچ ان الزامات سے متعلق ہے کہ عمر عادل ڈار اور اس کے ساتھی ممنوعہ تنظیم لشکر طیبہ (ایل ای ٹی) کے خفیہ مددگاروں کے طور پر کام کر رہے تھے اور اس دہشت گرد تنظیم سے وابستہ سرگرمیوں میں سرگرمی سے شامل تھے۔ ڈار کو فروری 2023 میں سری نگر کے نوگام علاقے سے اس کے 2 ساتھیوں کے ساتھ گرفتار کیا گیا تھا۔ پولیس نے ان تینوں کے قبضے سے بڑی مقدار میں نقد رقم بھی برآمد کی تھی۔ اس کے بعد جموں و کشمیر پولیس نے نوگام پولیس تھانے میں مقدمہ درج کیا تھا۔

ڈار 2023 میں گرفتاری کے بعد سے ہی جیل میں بند ہے۔ یہ خبر لکھے جانے تک ای ڈی نے ان تلاشی مہموں کے بارے میں کوئی سرکاری بیان جاری نہیں کیا تھا۔

یو این آئی۔ ایم جے

جموں، مرکزی وزیر ڈاکٹر جتیندر سنگھ نے پیر کو کہا کہ 2014 کے بعد سے ضلع کشتواڑ میں رابطہ سڑکوں اور بنیادی ڈھانچے کے شعبوں میں نمایاں تبدیلی آئی ہے۔

وزیر نے کشتواڑ میں منعقدہ عوامی دربار سے خطاب کرتے ہوئے یہ بات کہی۔ اس موقع پر انہوں نے مقامی باشندوں اور عوامی نمائندوں سے براہِ راست ملاقات کی اور ان کی شکایات، ترقیاتی ضروریات اور عوامی خدمات کی فراہمی سے متعلق مسائل کا جائزہ لیا۔

ڈاکٹر سنگھ نے یاد دلایا کہ مئی 2014 میں عہدہ سنبھالنے کے بعد وزیر اعظم نریندر مودی نے اسی سال دسمبر میں کشتواڑ کے چوگن میدان کا دورہ کیا تھا اور عوام کو یقین دلایا تھا کہ اب تک نظرانداز رہنے والے علاقوں کی ترقی کو ترجیح دی جائے گی اور ان پر خصوصی توجہ مرکوز کی جائے گی۔

2014 سے پہلے کی صورت حال کا ذکر کرتے ہوئے انہوں نے کشتواڑ میں بنیادی سہولتوں کی شدید کمی کو اجاگر کیا۔ ان کا کہنا تھا کہ سڑکوں کی حالت اتنی خراب تھی کہ ضلع تک بحفاظت پہنچ جانا بھی ایک بڑی کامیابی سمجھا جاتا تھا۔ کئی علاقوں میں موبائل رابطے کی سہولت تقریباً موجود نہیں تھی، جس کے باعث متعدد آبادیاں بیرونی دنیا سے کٹی ہوئی تھیں۔

انہوں نے کہا کہ مچیل یاترا کے راستے پر بھی بنیادی ڈھانچے کی شدید کمی تھی۔ یاتریوں کو بیت الخلا، بہتر سڑکوں اور قابل اعتماد مواصلاتی سہولتوں سمیت بنیادی ضروریات کی عدم دستیابی کا سامنا کرنا پڑتا تھا۔

عوامی دربار کے دوران وزیر نے لوگوں کی باتیں توجہ سے سنیں اور سڑکوں کے رابطے، عوامی بنیادی ڈھانچے، ضروری خدمات، دیہی ترقی اور مختلف سرکاری محکموں کی کارکردگی سے متعلق ان کے مسائل اور خدشات کا نوٹس لیا۔ ضلع کے مختلف علاقوں سے آئے لوگوں نے اپنی شکایات اور مطالبات پیش کیے اور ان مسائل کی نشاندہی کی جن پر عوامی خدمات کو بہتر بنانے اور خطے میں ترقیاتی سرگرمیوں کو تیز کرنے کے لیے توجہ دینے کی ضرورت ہے۔

کئی شکایات کا موقع پر ہی ازالہ کیا گیا، جبکہ وزیر نے متعلقہ افسران کو باقی مسائل کا جائزہ لینے اور مقررہ مدت کے اندر مناسب کارروائی کرنے کی ہدایت دی۔

یواین آئی۔ ظ ا