تہران، ایران نے اقوام متحدہ اور بین الاقوامی جوہری توانائی ایجنسی (آئی اے ای اے) سے کہا ہے کہ اس کے جوہری پروگرام کے بارے میں معلومات کے لیے 20 لاکھ ڈالر تک انعام کی امریکی حکومت کی پیشکش کی سخت مذمت کی جانی چاہیے۔

ایران نے خبردار کیا ہے کہ اس قدم سے جاسوسی کو فروغ مل سکتا ہے، جوہری سائنسدانوں کی جان خطرے میں پڑ سکتی ہے اور حساس جوہری تنصیبات کو تخریب کاری کا نشانہ بنایا جا سکتا ہے۔ایران کے وزیر خارجہ عباس عراقچی نے اقوام متحدہ کے سکریٹری جنرل انتونیو گوتریس، سلامتی کونسل کی صدر سانیتا پاولوٹا-ڈیسلینڈز اور آئی اے ای اے کے ڈائریکٹر جنرل رافیل گروسی کو لکھے گئے خط میں امریکی اعلان کو ایران کے پرامن جوہری پروگرام کی سلامتی اور سالمیت کے لیے سنگین خطرہ قرار دیا۔امریکی محکمہ خارجہ نے 6 اور 7 نومبر کو اپنے ‘ریوارڈز فار جسٹس’ پروگرام کے تحت اس انعام کا اعلان کیا تھا۔

بعد ازاں امریکی سینٹرل کمانڈ نے بھی اس کی تشہیر کی۔ اس کے تحت ایران کی جوہری تنصیبات، آلات اور ان سے وابستہ افراد، جن میں سائنسی برادری کے ارکان بھی شامل ہیں، کے بارے میں معلومات دینے پر 20 لاکھ ڈالر تک کا انعام اور ضرورت پڑنے پر منتقلی کی سہولت فراہم کرنے کی پیشکش کی گئی ہے۔

مسٹر عراقچی نے اس اعلان کو غیر ذمہ دارانہ اور خطرناک قدم قرار دیتے ہوئے کہا کہ یہ جوہری تنصیبات، مواد، تکنیکی آلات اور سائنسدانوں کے بارے میں خفیہ طور پر انٹیلی جنس معلومات اکٹھا کرنے کو کھلی ترغیب دینے کے مترادف ہے۔انہوں نے متنبہ کیا کہ مالی لالچ دے کر جوہری سائنسدانوں اور تکنیکی عملے کو نشانہ بنانے سے وہ جاسوسی، دھمکیوں اور حملوں کے خطرے میں آ سکتے ہیں۔ اس سے پرامن جوہری سرگرمیوں میں شامل تنصیبات کی سیکیورٹی کے حوالے سے بھی سنگین تشویش پیدا ہوتی ہے۔ایرانی وزیر خارجہ نے آئی اے ای اے کے سیکیورٹی نگرانی کے نظام کی معتبریت اور غیر جانبداری پر بھی سوالات اٹھائے۔ انہوں نے کہا کہ کسی خودمختار ملک کی جوہری تنصیبات اور وہاں کام کرنے والے افراد کی خفیہ معلومات عوامی سطح پر مانگے جانے سے ایجنسی کی تصدیق سے متعلق ذمہ داریاں کمزور ہو سکتی ہیں۔ یہ تشویش اس وقت مزید سنگین ہو جاتی ہے، جب متعلقہ تنصیبات بین الاقوامی نگرانی کے نظام کے تحت آتی ہوں۔مسٹر عراقچی نے خط میں لکھا، “امریکہ کے اس تشویشناک اعلان کا ایک فوری اثر یہ ہوگا کہ باقاعدہ سیکیورٹی نگرانی کا مطالبہ کرنا ممکن نہیں رہے گا، جبکہ جن تنصیبات، عملے اور حساس معلومات پر یہ نظام انحصار کرتا ہے، وہ قتل، تخریب کاری اور جارحانہ کارروائی کے خطرے کی زد میں ہوں گے۔”انہوں نے کہا، “یہ ضروری ہے کہ اس مخصوص معاملے میں ایجنسی کے سیکیورٹی نگرانی کے نظام کا استعمال امریکی انٹیلی جنس معلومات جمع کرنے کی سرگرمیوں کے لیے نہ ہو اور نہ ہی اس کی غیر جانبداری پر سمجھوتہ کیا جائے۔” انہوں نے متنبہ کیا کہ نگرانی کی سرگرمیوں کے دوران اکٹھی کی گئی معلومات کا استعمال ایجنسی کی تصدیق کی ذمہ داریوں سے مکمل طور پر غیر متعلقہ مقاصد کے لیے کیا جا سکتا ہے۔

جوہری عدم پھیلاؤ کے معاہدے (این پی ٹی) کے آرٹیکل چار کا حوالہ دیتے ہوئے مسٹر عراقچی نے کہا کہ ہر ملک کو اپنی بین الاقوامی ذمہ داریوں کی پاسداری کرنے کی شرط پر، بغیر کسی امتیاز کے، پرامن مقاصد کے لیے جوہری توانائی کی تحقیق، پیداوار اور استعمال کا حق حاصل ہے۔انہوں نے کہا کہ کسی بھی ملک کو دوسرے ملک کی جائز جوہری سرگرمیوں میں دباؤ ڈالنے والے اقدامات، خفیہ مداخلت یا اس کی جوہری تنصیبات اور سائنسی برادری کی سلامتی کو خطرے میں ڈالنے والی کارروائیوں کے ذریعے رکاوٹ نہیں ڈالنی چاہیے۔وزیر نے کہا کہ جوہری سائنسدانوں اور تکنیکی ماہرین کو بغیر کسی خوف، دھمکی یا دباؤ کے اپنا پیشہ ورانہ کام کرنے کے قابل ہونا چاہیے۔ انہوں نے کہا کہ جوہری تنصیبات اور وہاں کام کرنے والے افراد کو غیر قانونی مداخلت سے بچانے کی مشترکہ ذمہ داری بین الاقوامی برادری کی ہے۔

مسٹر عراقچی نے گوتریس اور سلامتی کونسل سے امریکی اعلان کے اثرات کو فوری طور پر بین الاقوامی برادری کے نوٹس میں لانے اور بین الاقوامی امن و سلامتی کو درپیش خطرے پر توجہ دینے کی اپیل کی۔آئی اے ای اے کے سربراہ گروسی کو مخاطب کرتے ہوئے مسٹر عراقچی نے ایجنسی کی نگرانی کی سرگرمیوں میں رازداری، غیر جانبداری اور ادارہ جاتی آزادی کو برقرار رکھنے کے لیے اقدامات کرنے پر زور دیا۔ انہوں نے گروسی سے یہ یقینی بنانے کے لیے کہا کہ نگرانی سے متعلق معلومات کا انکشاف یا غلط استعمال ایجنسی کے دائرہ اختیار کے برعکس مقاصد کے لیے نہ ہو۔

یو این آئی ۔ م ع

تہران، ایران کے صدر مسعود پزشکیان نے بدھ کوے روز کہا کہ امریکہ اور اسرائیل ان کے ملک کے خلاف جنگ کرنے کے فیصلے کی سیاسی قیمت چکا رہے ہیں۔

مسٹر پزشکیان نے ترکی میں منعقد ہونے والی سی او پی 31 کانفرنس میں شرکت کے لیے تہران سے روانہ ہونے سے قبل کہا کہ امریکہ اور اسرائیل نے 28 فروری کو شروع ہونے والے تنازع کے دوران جنگی جرائم کا ارتکاب کیا۔ انہوں نے کہا کہ امریکہ، اسرائیل اور یورپ میں حالیہ انتخابی نتائج ‘جنگ پسندوں اور تشدد پسند عناصر’ کے خلاف عوام کی بڑھتی ہوئی ناراضگی کو ظاہر کرتے ہیں۔

مسٹر پزشکیان نے کہا کہ سی او پی 31 امریکہ اور اسرائیل کی فوجی کارروائیوں سے ماحولیات کو پہنچنے والے نقصان کو اجاگر کرنے کا ایک اچھا موقع ہے۔ وہ بین الاقوامی رہنماؤں اور عہدیداروں کے ساتھ اپنی ملاقاتوں کے دوران یہ معاملہ اٹھانے کا ارادہ رکھتے ہیں۔ ان کا کہنا تھا کہ امریکہ اور اسرائیل کی کارروائیاں جمہوریت اور انسانی حقوق کے تئیں ان کی وابستگی کے دعوؤں کے برعکس ہیں۔ انہوں نے بتایا کہ کانفرنس کے علاوہ ان کی 10 سے زائد ممالک کے رہنماؤں اور عہدیداروں کے ساتھ ملاقاتیں طے ہیں۔ ان میں ترکی کے صدر رجب طیب اردغان بھی شامل ہیں۔

ایران اور ترکی کے درمیان تعلقات کو سازگار قرار دیتے ہوئے مسٹر پزشکیان نے کہا کہ دونوں ممالک کے علاقائی، اقتصادی، سماجی اور ثقافتی مفادات مشترک ہیں، جو دو طرفہ تعلقات اور علاقائی سلامتی کو مضبوط بنانے میں مددگار ثابت ہو سکتے ہیں۔ انہوں نے امید ظاہر کی کہ ان کا یہ دورہ بین الاقوامی برادری تک ایرانی عوام کا پیغام پہنچائے گا اور اس کے مثبت نتائج سامنے آئیں گے۔

مسٹر پزشکیان کا یہ دورہ ایسے وقت میں ہو رہا ہے، جب امریکہ نے اشارہ دیا ہے کہ فی الحال اسے ایران کے خلاف فوجی کارروائی کو بڑے پیمانے پر بڑھانے کی ضرورت محسوس نہیں ہوتی۔ امریکہ کے وزیر خارجہ مارکو روبیو نے منگل کے روز پیرس میں جی-7 کی میٹنگ کے دوران کہا کہ ایران میں ‘بڑی فوجی کارروائی کی ضرورت نہیں ہے۔’ اس کے ساتھ ہی انہوں نے دعویٰ کیا کہ ایران پر امریکہ کی اقتصادی دباؤ کی مہم مؤثر طریقے سے کام کر رہی ہے۔

مسٹر ٹرمپ نے اتوار کے روز نشر ہونے والے سی بی ایس کے پروگرام ’60 منٹس’ کو دیے گئے انٹرویو میں کہا تھا کہ فی الحال انہیں تنازع کو بڑھانے کی کوئی وجہ نظر نہیں آتی۔ تاہم، انہوں نے جنگ شروع کرنے کے فیصلے کا دفاع کرتے ہوئے کہا کہ اقتصادی اثرات کے باوجود یہ تاریخی اعتبار سے درست فیصلہ تھا۔

یو این آئی۔ م ع

پیرس، امریکی وزیر خارجہ مارکو روبیو نے کہا ہے کہ ایران کے خلاف معاشی دباؤ کے اثرات ظاہر ہونا شروع ہوگئے ہیں اور واشنگٹن تہران کو اس کی مبینہ سرگرمیوں کے لیے مالی وسائل فراہم ہونے سے روکنے کی کوشش کر رہا ہے۔

پیرس میں صحافیوں سے گفتگو کرتے ہوئے روبیو نے کہا کہ ایران کو اپنے جوہری پروگرام اور دہشت گردی کی مبینہ مالی معاونت کے لیے وسائل درکار ہیں۔ ان کے مطابق ایران کے مالی وسائل جتنے محدود ہوں گے، وہ ان سرگرمیوں پر اتنی ہی کم رقم خرچ کر سکے گا۔

امریکی وزیر خارجہ نے کہا کہ ایران کے خلاف مزید بڑے فوجی آپریشنز کی ضرورت نہیں ہے۔ اگر معاشی اقدامات کے ذریعے مطلوبہ مقاصد حاصل ہو رہے ہیں تو امریکہ کو مزید فوجی حملے کرنے کی ضرورت نہیں پڑے گی۔

روبیو نے کہا کہ واشنگٹن ایران کے ساتھ جاری تنازع ختم کرنے کے لیے سفارت کاری کا راستہ اختیار کرنے پر تیار ہے، تاہم تہران کے موجودہ مطالبات مکمل طور پر غیر حقیقت پسندانہ ہیں۔ امریکہ توقع کرتا ہے کہ ایران اپنے مطالبات پر نظرثانی کرے گا۔

انہوں نے کہا کہ اگر تہران نے اپنے مؤقف میں تبدیلی کی تو واشنگٹن سفارتی کوششوں کو آگے بڑھانے کے لیے تیار ہے۔ ان کے بقول امریکہ ایران پر معاشی دباؤ کی پالیسی جاری رکھے گا، تاہم سفارتی حل کے امکانات بھی برقرار رکھنا چاہتا ہے۔

یو این آئی۔ م س